Vom Arrowhead zum Lion‘s Lookout

Guete Morge du wunderschöns Kanada!
Nach de lange Autofahrt gest, hani de Schlaf dringend brucht und drum simmer hüt au ersch am 8i uf. Wills ned gad im Städtli es zMorgeresti gha het, simmer chli usserhalb imne typische nordamerikanische Restaurant/Diner go zmörgele. Ned s beste zMorge, aber es het de Zweck erfüllt.

Zum Glück hemmer bereits im Vorfeld e „Permit“ für de Arrowhead Provincial Park kauft, susch wers schwierig worde mit eusem Tagesprogramm. Sogar de Parkmitarbeiter het eus globt. En Parkplatz hemmer schnell gfunde, de Rucksack packt und d Schueh gschnürt und scho simmer los uf eusi erst Wanderig dur die kanadische Wälder. E 9km langi Route het eus ufem Arrowhead und em Beaver Meadow Pfad rund um de Lake Arrowhead gfüehrt. Die goldige und rote Herbstfahre vo de Ahornbäum hend sich vo de schönste Siite zeigt, mer sind chum usem Stuune cho und hend eus na lang ned satt gseh. Au paar Tier sind eus begegnet, zum Biispiel Frösch, Eichörnli und Vögel. Am Bär oder amne Elch simmer zum Glück ned über de Weg gloffe.

Nachme feine Picknick mit de wunderschöne Sicht uf de See und de Wald simmer na e churzi Runde zumne Wasserfall gloffe. De Tina ihre Gluscht uf Kafi isch den immer grösser worde und so simmer de zrugg zum Motel, hend eus dusched und ufe Weg is Zentrum vo Huntsville gmacht. Im Threshold hets en grosse Cappuccino für d Tina und en Iced Matcha Latte für mich geh. Beidi hemmer nachli gläse und eifach d Ziit gnosse.

Willmer natürli ned hend chönne stillsitze, hets eus na uf de Lion‘s Lookout in Huntsville verschlage. Leider simmer ned die einzige gsi, keis Wunder, wennmer bis ufe cha fahre mitem Auto. Mer hend de churzi Astiig trotzdem z Fuess i Chauf gnah und dobe viel Geduld ufbrocht, zum na die eint und ander schön Ussicht chönne zgnüsse.

Direkt im Aschluss simmer de au scho go ässe. Hüt hani mini erste Mac and Cheese gha. Sehr fein, aber au sehr viel. Nachme Abstecher ine Chocolatier, wos für d Tina na zwei Truffes geh het, simmer au schowieder is Motel und planed etzt na euse nöchst Tag.Weiterlesen