On the Road to Ottawa

S erscht Mal i eusne Ferie simmer vomne graue Himmel und Räge begrüesst worde. Mer sind gad froh gsi, hemmer i eusere Suite in the Bush s zMorge debi gha, wo eus d Aileen uf die 8i brocht het, und mer nani grad hend müesse use.

Nachere churze Lagebesprechig, wasmer ufem Weg uf Ottawa alles wönd mache, hemmer eusi Koffere packt und sind a euse ersti Halt, em „Eagles Nest Park“. De Rege het sich zum Glück scho fasch verzoge und mer hend im Trochne zwei churz Loops im Park gmacht. Mal e anderi Ussicht bi verhangem Himmel und ned so viel Fernsicht.

Euse nöchst Stopp het sich is überschaubare Maynooth gmacht, churz ufs WC und d Bei vertrette, hemmer de erst Kafihalt in Barry‘s Bay in Agriff gnah. En feine Cappuccino für d Tina und en Chai für mich und min Hals hets im Madawaska Coffee geh. ZMittag hemmer amne herzige Rastplatz am Golden Lake iignah und sind denn uf Renfrew. Dött hemmer eus namal d Bei vertrette, namal en Kafi gholt und sind de gstärkt uf Ottawa gfahre.

Scho bim Inefahre uf Ottawa het sich de Himmel immer meh zuezoge, aber es het nani grägnet. Mer sind de bi eusem Hostel acho. Es isch ned eifach nur es normals Hostel, sondern es ehemaligs Gfängnis. D Zelle sind umbout worde zu Dorms. I eusem Dorm isch de Dougal C. McNab weg Betrug iigsperrt gsi.

Demit mer au na für die letschte Täg gnue Chleider hend, simmer zunere Laundry. Eigentli hemmer denn welle d Stadt echli go aluege, aber de Petrus hets ned guet gmeint mit eus. Es het denn nur e churzi Rundi geh, aber so dass d Wösch fertig gsi isch für de Tumbler. Währenddesse simmer na fein und viel go asiatisch zNachtesse. Mer sind gspannt, wie sich Ottawa eus morn zeigt.Okumaya devam et