Vom Naturparadies in die Grossstadt

Glück gha, mer hend sGfängnis nach zwei Nächt ohni Kaution döffe verlah. Will eus es guet Getränk zum zMorge ned döff fähle simmer i euses Stammkafi in Ottawa en Kafi und en Matcha go hole und hend s Gratiszmorge im Hostel usgnutzt bevors wiiter gange isch.

Nachere chliine Irrfahrt dur Ottawa simmer de i de Provinz Quebec glandet, womer euses erste Tagesziel Mont-Tremblant agstüred hend. Mer sind uf de Autofahrt namal in Gnuss cho vo de wunderschöne Farbpracht vo de Wälder in Kanada.

Mont-Tremblant bestoht eigentli us zwei Teil, det wo au wüki die Iiheimische wohned und ihrem Alltag nachegönd und emne chliine, worschindli extra für all die Touriste gmachte chliine Village direkt bim Skigebiet. Vo obe hets usgseh wie Spielzüüghüüsli.

Nachere Gratisgondelfahrt s Village duruf, simmer au na paar Höhemeter gloffe, hend die früsch und klar Herbstluft gnosse, es Touriföteli gmacht und eus mitere fine Crepes verpflegt. Echli wie i de Schwiizer Berge hemmer eus gfühlt wo usem Radio de Gigi vo Arosa uf Französisch gloffe isch. Das isch au na öpis, womer eus etzt müend umstelle, alles isch uf Französisch agschriibe, aber d Mensche switched für eus de schnell uf Englisch, au wemmers zwüschedure versueched mit eusem Schuelfranzösisch.

Für es guets Kafi hemmer de na im Dorf vo Mont-Tremblant ghalte. Und denn simmer wiiter uf Montreal. Am Flughafe hemmer euses Auto abgeh und mer sind mitem Bus dur d Rushhour id Innestadt zu eusem Hotel gfahre.

Für die nöchste und letschte drü Nächt simmer imne herzige chliine Hotel mit europäischem Flair dihei. E churzi Duschi spöter simmer schowieder unterwegs zum zNacht. S Resti womer usgsuecht hend, het scho freud gha, dass zwoi Fraue chömmed, s isch nämli en Speed-Dating-Abe. Mer hend de aber danke d abglehnt und sind nur für feini Tacos und Enchilladas ine. Nachme nette Gspröch mitem Chellner hets für d Tina na e Pre Birthday Shot geh.

Vorem Schlofe hemmer eus na e Kollagenmaske ufgleit, demit mer morn de früsch und chnusprig i de Tina ihres neue Lebensjahr chönd starte.Read more