Beine müde, Bauch voll, Geist erschreckt

Phu, üse letscht ganz Tag in Montreal und vo eusere Reis isch abroche. Die ganz Reis fühlt sich a wie en Film mit sovielne Konfiglasmoment, dasmer sie worschindli gar ned all chönd ufzelle. Nichtsdestotrotz hemmer eus au für hüt wieder es schöns Brunchlokal usgsuecht, womer eus mit feine Egg Benedict, emne guete Cappuccino und emne riese Matcha Latte verwöhne lah hend, demit mer Energie für de Tag hend.

Die hemmer au brucht, will de „Spaziergang“ zu de Pont Jacques-Cartier und übere uf d île Sainte-Hélène isch de doch chli länger gange wiemer denkt hend und au d Temperature sind wärmer gsi wie die letschte zwei Täg, 20 Grad Marke isch wieder knackt worde. Vo de Brugg und au de Insle hemmer namal en schöne Blick uf d Skyline vo Montreal chönne werfe. Bevormer mit de Metro de retour id Stadt sind, hemmer na en Abstächer zumne chline Rosegarte gmacht und d Biosphère de Montreal aglueget.

I de Metro vo Montreal isch alles chli ruhiger und entspannter wie in New York, aber ned zwingend schöner. Nachdem mer eus im neue Quartier orientiert hend, simmer gad anes hipps Kafi anegloffe und hend eus beid es Iced Getränk gholt. Mitem Getränk i de Hand unterwegs, wo e wohltuendi abchüelig gsi isch, simmer zum „Franklin‘s“ gloffe zum e Spezialität us Montreal zässe. Es het e Platte mitem typische „Montreal smoked meat“, chli Brot, Kohlsalat, Essiggurke und Pommes geh. Zum Glück hämmer sie teilt, will als Dessert hemmer namal en Biberschwanz gholt, so in Montreal wirder ned Beavertail gnännt sondern „Queues de Castor“. Damol hets eine mit Pistazie geh. Wieder absolut fein gsi.

Am Namittag hemmers de chli ruhiger agah lah, sind chli am Vieux-Port ue und abegloffe und hend sogar na paarne chönne zueluege wies 64 Meter abme Chrahne en Bungeesprung mached. Die eint oder ander Person het sogar s Wasser berüehrt.

Euses letschte zNacht hets immne herzige italienische Restaurant geh. Mer hend eus en Zucchettisalat und e grossi Antipastiplatte teilt. D Schärfi vom Ässe het eus nachli Begleitet, ich han mer de na es Glace gholt und d Tina hets mit Wasser versuecht.

Demit euse letscht Abig eus guet i Erinnerig bliibt, het d Tina vor es paar Täg e Gruselfüehrig dur „Old Montreal“ buecht. Innere Gruppe vo öpe 20 Lüüt simmer mit de Alice dur Montreal gloffe und sie het ganz aschaulich, aber au mitme gwüsse Witz (Spuck-)Gschichte verzellt. Die 90 Minute sind wie im Flug verbi.Read more