Valencia Peak

Was für en tag!
Am morge simmer gmüetlich ufgstande, ufem camping go dusche ond denn los gfahre. Mer händ nor e knappi stund wäg gha ond send unterwägs no go poste ond üs es starbucks kaffi go gönne 😋
Denn hemmer i dem state park wo üse camping isch parkiert ond send de küste entlang spaziert. Mer händ gar ned gwösst was üs erwarted ond send so vollkomme überrascht gsi vo dere atemberaubende Schönheit!
Aschlüssend simmer ufe camping, sind no chli a de sunne ghocked ond wos langsam chüehler worde esch hämmer es füür gmacht. Plötzlich esch e chliine bueb vo üsne camping-nachbere zu üs cho ond hed gfragt, ob mer de räst vo sinere "magic soup" wellid. Mer händ beid dänkt, dass er us wasser ond gräsli irgend es süppli gmacht hed, aber nei, sis mami esch denn tatsächlich mit me topf voll suppe z laufe cho wo sie nöm händ möge. Sie hed gseid es sig zwar ned so vill aber als vorspiis sigs doch super. Mer händ freud gha a dere nätte überraschig - wie dankbar mer über de snack werkli gsi send, hed sich aber erst spöter zeigt...
Mer send no chli dusse ghöckled ond händ am füür zueluegt beses ganz dunkel ond langsam werkli au chalt worde esch: ond denn hed d action erst rechtig agfange!
Mer send i wohnwage ond händ üs zum znacht nomol welle spargle choche. Mer händ wasser und pilzli ond e sauce ufgsetzt ond grad afa choche, wo mer bemerkt händ, dass d flamme ergendwie gälber sind als üblich ond plötzlich gsehn ich, dass es au hinderem chochhärd gälbi flamme hed: de chochhärd esch in flamme ufgange! 😱 Zum glück hed de erich ganz schnell reagiert, de härd abgstellt ond sofort alles mitem füürlöscher glöscht. Leider esch s wohnmobil nachär voll dere mählige substanz usem füürlöscher gsi ond somit nöm bewohnbar 🙈 mer händ denn lang mit de wohnmobilfirma telefoniert ond sind schlussändlich zumne motel ide nöchi gfahre. Morn chunnd de us was jetzt passiert: wahrschiinlich es neus wohnmobil 😅
Mer händ s beste us de situation gmacht ond die warm duschi im motel gnosse ond denn am halbi 12i, dank de zaubersuppe vo de nachbere ned ganz verhungered, pizza bstellt. Jetzt liggemer im bett ond freued üs uf en erholsami nacht 😊Read more