Valladolid

Ganzi 5 Nächt hämmer zum Abschluss vo üsem Roadtrip in Valladolid verbrocht! Es esch wunderschön gsii, mer händ es gmüetlichs Casa gha und es ged viel Usflüg wo mer vo Valladolid us cha unternäh. Da ich schoweder chli im Hinderträff bi mit ehm festhalte vo mine Erläbnis möcht ich ned alles ufschriebe sondern eifach vo es paar Highligts verzelle 😊.

Üse ersti Usflug esch zu de Ruine vo Chichèn Itza gange. Da d Ruine sehr touristisch sind (sie sind eis vo de 7 neue Wältwonder) simmer sehr früeh am Morge gange. S früehe ahcho und d Rägeziit händ d Mängi vo de Lüüt erträglich gmacht. Mer händ üs ehn Guide gnoh und send ned enttüscht worde. Die guet restaurierte Ruine und d Gschiidheit vo de Mayas händ üs beidruckt! Vorallem wie sie mit Stei ahordnige scho perfekt funktionierendi verstärker oder echo Soundsystem härebrocht händ und wie sie ih ihrem Tempel ihri Kaländerberächnige mit de Sunne abgstumme händ isch mer blobe.

Da mer scho lang devo gredt händ de Film Coco (ehn Chindertrickfilm über de Dia de los muertos) z luege, hämmer üs entschlosse ihs Kino z goh. Popcorn sind grandios gsii 😍. Au wenn ich überhaupt ned verstoh warum die do ketchup, mayonais und scharfi sauce drüber schmeissed 😣. De Film esch zwar uf spanisch gsii und mer händ ned viel verstande aber mer händ trotzdem viel über de Dia de lis muertos glehrt und sind mit de grobe Handlig mitcho. Grad nachdem mer us ehm Kino cho sind simmer ah ehn Platz zuegloffe wo sich Lüüt zu ehnere Prob vom Dia de los muertos versammled händ. Es hed alles so ihd Stimmig inne passd nach ehm Film drum heds mich mega beidruckt. Sie händ ehn Umzug durd Stadt gmacht....es esch werklich toll gsii.

Natürlich hämmer au weder es paar Cenote abklappered. Die sind eifach so schön und immerweder chli anderst. Oft simmer fast oder ganz alleige gsii und jedi esch weder es erläbnis för sich gsii.

Au ganz cool esch üses sälber gchochte Ässe gsii 😍. Mer händ einisch Rahmschnitzel gmacht, einisch Crépes und einisch hämmer üsi eignige Tacos mit Pastor vom nöchste Restaurant, Avocados vom Märt & früsche Tacos vo de Taceria gnosse.

Und zum Schluss muss ich natürlich au no de tolli Märt erwähne wo mer sind go ahluege. Mer händ vom Hostel Velos becho und sind so los gradled. De einti Teil vom Märt esch speziell für Fleisch gsii. Zerst bin ich werklich chli gschockt gsii ab all dene tote Tier wo det umeganged sind. Schlussändlich esch es aber halt au ganz normal und ich ha mer müsse ihgestoh dass ich wenn ich scho Fleisch isse au mit dem muss chönne umgoh. Im zwoite Teil heds denn meh Frücht, Süesses und so gha. Mer händ es paar Sache zum choche gchauft, Fruchtsäft drunke und üs "Piñatas" gchauft wo mer denn am Obig händ welle ufschloh. Leider hämmer müsse usefinde, dass die nur zum ufhänke dänkt gsii wäred und mer völlig för nüt blind uf die arme Dinger ine ghaue händ. 😅🙈Read more