Kulturschock in Tokyo

Ich bi gester Obig in Tokyo glanded und bi jetzt scho völlig verwirrt vo all dene Ihdrück! Ich weiss gar ned wo ahfo es esch eifach alles eh so anderst 😳.

Vom Flughafe zum Hostel hani Ewigkeite brucht. Die Ubane sind ächt zimlich kompliziert zum verstoh. Ich ha zwar scho es App abeglade wo mer gholfe hed wenigstens z wösse wohi ich muss aber das Problem mit ehm Ticket heds ned glöst. Ergendwie muss mer dass bi jedem Mol umstiege weder neu löse...bi mim zwoite Umstiege han ich aber mösse feststelle, dass ned jedi Station ehn Schalter hed. Da ich mit ehm Ticketschalter ned klar cho bin bi ich so ehn umestehende Polizist go froge (wo übrigens kei englisch gredt hed) . De heds denn zu sinnere Ufgab gmacht mer so lang z hälfe bis ich es Ticked ha. Es hed sich usegstellt, dass s Problem esch, dass ich no kei Bargäld ha. De Polzist hed mich zo 2 Bankomät gfüehrt (de erst hed nor japanischi Charte ahgnoh) wobi de zwoiti ca. 3 Minute Usserhalb vom Bahnhof gsii esch. Denn esch er mit mer weder zrug gloffe hed mer zeigt wie löse und au grad die nöchst Verbindig noche gluegt - ich bi mer rächt komisch vorchoh 😂. Das hed mer zeigt, dass mer do vellecht ned ganz eso schnell ahgsproche werd wenn mer chli verlore usgsehd aber wenn eim mol öbber hilft - denn richtig!

Ändlich im Hostel ahcho hed denn grad ehn Kimono ahprob stattgfonde. Das hani ned welle verpasse also han ich nor schnell mis Züg is Zimmer brocht und bi go teilnäh 😅. Mer sind vo ehnere ältere Japanerin ihkleided worde wo das ganze sehr ärnst gnoh hed. Ständig esch sii weder öbbis go z rächt züpfle, dass au joh alles richtig sitzt 😂.

So han ich ganz schnell Lüüt känne gelehrt und bi denn au grad mit dene go Ässe. Mer sind ih so es mega mini Restaurant ih de nöchi vom Hostel go Ramen Suppe ässe...mmmmh aber das mit de Stäbli muss ich no chli üebe.

Höt Morge bini denn zu ehmene Tempel do ih de Nöchi. Es Rägned leider grad abe aber esch glich schön zum luege! Sie händ grad ehn Zeremonie gha und ich ha drum ned trout ih Tempel inne z laufe ha aber vo usse chli chönne luege und ha ihri Meditations-gsäng ghört 😊.

Alles ih Allem esch das alles no mega überwältigend! Ich verstoh keis Wort und cha keis Wägschild läse. Ich weiss au ned wenn ich gäg es kulturells Tabu verstosse und gang devo us, dass d Lüüt do eifach z fründlich wäred zum mich druf hiiwise. Ich muss mich no ahs Ässe gwöhne und ah die unglaublich fancy WC's wo alli ehn Sitzheizig dinne händ 😂.

🥔Read more