Taichung

Taichung esch ca. 2 Stund südwestlich vo Taipei und esch bizli grösser als d Hauptstadt. Ich ha eigentlich vorgha nor ei Nacht do z verbringe und denn wiiter z goh well ich chli gnueg ha vo Städt im Momänt. Aber es ged so viel cooli Tagesusflüg rund umd Stadt, dass ich schlussändlich doch 3 Nächt blobe bi.

Ah mim erste Tag bin ich eifach chli dord Stadt gloffe. Ich ha ehn lokale Märt gfonde wo es totals Chaos us allne Lüüt herrscht wo ihri Ihchäuf uf ehm Roller erlediged, überall Salat am Bode liid (werum au immer) und d Unterhose diräkt näb de hangende Hüehndli verchauft wärded. Ich bi au no dur de Taichung Park spatziert & ha mer det ehn Bubble-Milktea gönnt wo do alli trinked. Am Obig bini mit zwoi Engländer woni in Taipei känneglehrt ha ah Nightmarket go ässe und denn no uf es Glace im edelste Süessigkeite Lade vo Taiwan. Ich muss zuegäh das esch s beste Schoggiglace gsii wo ich jeh gässe ha!

Am nöchste Tag esch Fiirtig gsii und drum send alli Hostels zimlich voll mit Taiwanese wo Churztrips möched. Ich bi am Morge ih ehn Park gloffe well mer im Hostel gseid worde esch det sig am Fiirtig secher ehn schöni Stimmig. Det heds denn viel Picknicker gha und Lüüt wo Ballön verchaufed und au ehn chline Märt mit handgmachte Sache. Ich ha det öbbis gässe und bi denn mit ehm Bus id Wetlands gfahre. Das esch so es Sumpfgebiet chli usserhalb. Det hani voll viel härzigi Chräbsli chönne beobachte und denn Barfuess chli durd Landschaft laufe. Das esch werklich ehn tolle Nomittag gsii. Förs Znacht bini de weder ah ehn Nightmarket go verschiednigi taiwanesischi Spezialitäte probiere 😋Read more