Vamos a Olón

Fast usgschlofe verwachi hüt, wil en Zimmerkolleg i einere Luutstärchi telefoniert und sich denn au na luut defür entschuldigt - danke für nüt 😂 Egal, isch ja immerhin achti, da chamer eigentli au ufsto... Öppe am zwei sölli en Bus neh für ad Küste, hät de Receptionist gseit und d'Ziit bis denn wetti i dere Stadt namel nutze. Ich gange tatsächlich wider id Chile (ja, hetti au ned erwarted aber ha d'Kathedrale eh na vo inne wele besichtige und ha guet Ziit defür also los). D'Mess isch wider usverchauft und au wider super schön. Ich finde d'Orglemusig und de Gsang genial wil halt würkli viel Lüt au mitsinged :) Tüüfeentspannt chumi zrugg is Hostel, gange e churzi Rundi go jogge und packe denn mini 7 (oder vilicht au ehner 77) Sache wider in Rucksack für d'Wiiterreis und checke us. Dusse warted scho de Paul für es letsts Kafi und Zmittag, bevor sich eusi Weg werded trenne. Danke für die Ziit, isch super gsi :) Es negsts Taxi bringt mi schliessli an Busterminal, woni problemlos es Ticket uf Guayaquil ergattere. Nachere churze Panikattake wili denke dasis verlore han, tauchts wider uf und ich chan beruhigt in Bus stiege. D'Fahrt füehrt namel dur de Nationalpark vo gester und denn schnell 4'000 Höhemeter durab uf Guayaquil. S'Wetter isch zerst sunnig, ufem Abeweg sehr neblig (was exrem schad isch wil d'Ussicht wär glaub gigantisch) und im Flachland schiffeds und gwittereds denn was das Zeug hält. E chlini Googleabfrog seit, dass das sitere Wuche so isch und drum verschidensti Strasse wege Erdrütsch und Überfluetige gsperrt sind - crazy... Hoffe, ade Küste isches denn besser 🙈 Z'Guayaquil acho, würi genau de negst Bus verwütsche, weni ned uf s'WC müest und nachher s'falsche Perron zuegwise übercho wür. Tja, warti halt 55 min uf de negst Bus. Informiere mal s'Hostel, dases spöter als erwarted wird. Upsi ^^ Im Gegesatz zum erste Bus höckled dasmal nume wenig Lüt dine und ich chan mi usbreite für e komfortabli drüstündigi Fahrt. Inicke traui mi ned, wett mini Station ned verpasse... Wie sich denn aber z'Olón schliessli usestellt, isch mini Station au d'Endstation und ich eini vode zwei letste Passagier - hetti das vorher gwüsst... Irgendwie passierts, dasi bim Gepäck sattle mitem Chauffeur is plaudere chume, er sin Bus na fertig parkiert, ich iichecke und mir denn gmeinsam s'Meer gönd go sueche. Das ganze ended imere lustige Unterhaltig und er isch tatsächlich eine vo dene Lüt, wo ned wüssed, wie dasmer eifachs Spanisch redt, also mueser andauernd sini verwendete Wörter erkläre - ups, ha no bitz öpis z'lerne ^^ Zrugg im Hostel stelli fest, dass d'Klimaalag ned so starch isch wieni ghofft han und so ischs i mim Zimmer immerna gfühlti 28 Grad und dur das au bitz en Kampf zum trotz grosser Müedigkeit einigermasse guet schlofe... Janu, über es bitz meh Wärmi als bis jetz in Ecuador beklagi mi trotzdem ned :)Read more