Sajama - Copacabana: chömer Busfahre?

De einzig Bus, wo direkt in Sajama fahrt, isch sonen Minibus am morge am halbi sechsi. Eifachheitshalber nehmemer de nacheme schnelle Zmorge. Es isch eimal meh sehr chalt und wird eigentli ide ganze zweiehalbstündige Busfahrt au ned besser. De einzig Liechtblick isch de Sunneufgang unterwegs :) In Patacamaya suechi es WC, denn findemer es negsts Büsli für uf La Paz und während de Fahrer na meh Passagier organisiert, bstelled mir im Beizli nebeddra en Tee und es Sandwich. Dummerwiis isch de Chauffeur schneller als mir und es müend all uf eus warte. Ups ^^ De Tee wärmt richtig schön uf und s'Sandwich isch au sehr fein. So als chlini Idee zum Budget womer z'Bolivie brucht: alles zeme hät öppe 1.30 Fr kosted und d'Busfahrt pro Person 4 Fr... Ja und dä Bus bringt eus denn uf La Paz. Wo genau daser wird acho hani ned verstande. Mir fahred in Stadtteil "El Alto", wo jetz ned grad en schöne Idruck macht. Nime mal a dases im Zentrum denn besser wird. Irgendwo inere Stross halteder und meint, dasmer am Ziel sind. En Bus für eus nach Copacabana, eusem negste Halt, isch wiit und breit ned in Sicht. Ich froge na schnell de Fahrer und de zeigt i irgend e Richtig und murmled öpis. Kei Ahnig, mir laufed mal los und chönd ja denn wider froge. Dur ned grad gueti Gschmäcker und sehr chaotischi Strosse bahnemer eusen Weg und landed irgendwo womer immerna ned meh wüssed. E Verkäuferin meint, jede Minibus wo do durefahrt, bringt eus an Terminal und dete fahred denn Büs uf Copacabana. Zum Glück häts in La Paz nume öppe siebe Terminals womer ned wüssed, ob vo allne Büs fahred. Mir höckled uf guet Glück inen Minibus (wider sehr umständlich mitem grosse Rucksack) und erkläred am Chauffeur wasmer wend. Er sött eus anebringe... Es bitz spöter werdeme informiert, dasmer sölled usstiige und de Terminal denn es paar Querstrosse witer finded. Okey - fast das womer erwarted hend aber immerhin hämer en Plan ^^ In La Paz schiint jedi Stross en chline Märt z'si und so simer bestens mit Brotigem und Snacks ideckt, womer tatsächlich amene Terminal achömed. Dete findemer denn au en wiitere Minibus uf Copacabana. Biser losfahrt hämer grad na Ziit zum esse :) Relativ bald nach Abfahrt zeigt sich eus de Titicacasee - gseht schön us. Es folgt e churzi Fähreüberfahrt, wobi mer euses Auto und s'Gepäck verlönd und separat mit de Personefähre fahred. Isch vilicht au gschiider. Uf de andere Siite müemer uf s'Auto warte, wasmer souverän mit Glace esse überbrücked, was a dem grosse See mit Strandfeeling zimli passt :) Denn folgt namel es knapps Stündli uf kurvige Strosse bis uf Copacabana. Dete hettemer gern scho es Boot uf d'Isla de Sol gno, die fahred aber um die Ziit nüm, drum hämer es Hostel reserviert. Und das zeigt sich als eis vode schönste womer bis jetz gha hend mitere super hilfsbereite Bsitzerin. Zimli schnell heissts Wösch usesueche. Zum wäsche isch höchsti Ziit und mir hetted si gern morn morge vor de Fähreüberfahrt wider... Ufem Weg zude Wäscherei (meh schlecht als recht kleidet wil alles warme Züg gwäsche wird ^^), chömed eus Lenz und Nele entgege, woni au us de Sprochschuel kenne. D'Reisewelt isch scho chli :) Nacheme churze Schwatz gebemer d'Wösch ab und diskutiered mit ihre us, dass sis morn morge 07.30 parat hät, so dasmer e Stund spöter d'Fähre sötted verwütsche - perfekt! Denn gömer an Strand, trinked es Bierli vorem Sunneuntergang und wos mitem Sunneuntergang denn chalt wird suechemer es Resti für s'Znacht. Finde tüemer Lamm und es rechts Stuck Fleisch :) Für de Dessert wemer s'Lokal wechsle. Wege de Zwüschesaison isch aber au do ned viel los und recht viel gschlosse. Mit Müeh und Not lömer eus zumene Pancake überrede, öppe s'einzig Süesse wos git. Ide Türe chömed eus wider Lenz & Nele entgege und meined, dass de Fisch also au sehr fein segi für es negsts mal. Mal luege :) Zimli volle nachem Dessert probieremer na Brot für s'Zmorge morn finde und werded schliessli binere halbmotivierte Strosseverchäuferin fündig. Es git sogar scho bekonfti Brötli :) Ja und denn gohts zrugg, wo e leider ned ganz so heiss wie erwarteti Duschi warted aber immerhin warm isch si und au unter dene Bettdeckene chamer na fertig ufwärme 🙈もっと詳しく