Isla del Sol

Mir stönd pünkltlich wie abgmacht am halbi achti vor de Wäscherei. Wie erwarted müemer es bitz meh als 10 min warte, bis si mit de zum Teil ned ganz trochne Wösch uftaucht. Im Stechschritt gohts denn is Hostel go Wösch sortiere, vernünftig alegge und alles für en zweitägige Usflug uf d'Isla del Sol in Tagesrucksack packe. S'restliche Gepäck chömer im Hostel lo :) Perfekt pünktlich treffemer am Fähresteg ii und beziehnd es Plätzli ufem Dach. Wird windig aber schön :) D'Fähre tuckerled sehr gmüetlich vor sich hi aber Stress hämer defintiv kei meh hüt. Irgendwenn wirds eus z'chalt und mir wechsled in gschlossne Bereich abe. Einehalb Stunde spöter werdemer im Süde vode Insle abgsetzt und started de Astiig is Dörfli ufe über d'Inkatreppe bi bester Ussicht :) Dobe gönnemer eus zerst mal e Znünipause miteme frische Kiwisaft 🤭 Und denn spazierem los, immer de Krete noche über mehreri Gipfeli in Norde vode Insle. Begleited werdemer vol Igor, emene Hund womer eigentlich beidi gar ned wend aber er zeigt sich unglaublich treu. Zmittag (richtigi Sandwich us de Znünibeiz!) gönnemer eus unterwegs. Überraschend zeiged sich di letste paar hundert Meter Weg zum Dorf. Mir nehmed e Abchürzig wilmer morn de ganz nördlichst Teil gönd go aluege und landed plötzlich halbe chletternd zmitzt imene Felse. Mit eusne Halbschüeli und emene halbbatzig guete Seil zum hebe isches es bitz abentürlich aber langsam und bedacht überstömers problemlos. Im Dorf landemer direkt am Strand, wo sich Chüeh vo Seegras ernähred und jungi Säuli am Strand tummled 🤣 Nach es bitz zueluege machemer eus uf Hostelsuechi und werded fündig. Mir sötted hüfiger ned im Vorus bueche, wil jetz zahlemer öppe d'Hälfti vo sus amel. Mal luege was d'Zuekunft na bringt. Jä und denn isch erst zmitzt im Namittag und mir verbringed di restlich Ziit bis zum Znacht mit Bierli trinke, de Strandtier zueluege und Zimmer vorheize. De erholsami Namittag und Abig hämer eus durchus verdient und gnüsseds richtig :)

Au de zweit Tag wird gmüetlich. Mir schlofed us, gönned eus es Zmorge imene Resti und spaziered denn gmüetlich na es bitzeli wiiter in Norde, wos Inkaruine git. De Weg isch schön und mir gnüssed d'Sunne unterwegs. Bide Ruine acho, leggemer eus in Rase und chilled es Ründeli. Anschiinend isch d'Insle scho vor de Inkas en heilige Ort für verschiedeni Völker gsi aber di meiste Überreste gits natürlich vode Inkas. Zum eus s'Zmittag verdiene, erklimmemer na en chline Gipfel und essed denn im Windschatte vode Ruine. Schliessli verlömer de Ort pünktlich bevor de gross Touristeasturm chunnt, wo hüt Morge s'Boot in nördliche Hafe gno hät 🤭 Bim negste Hoger gnüssemer namel chli d'Sunne und gönd denn zrugg is Dorf. Dete gits mit bester Ussicht en erfrischende Fruchtsaft und denn fahrt au scho gli d'Fähre zrugg uf Copacabana. Dasmal ziehmers bi Ruggewind ufem Dach dure :) Unterwegs haltemer bimene schwimmende Beizli zum Zmittag esse. Isch ja herzig aber hett mer eus au vorher chöne drüber informiere ^^ Bi eus gits mal wider es Bierli statt esse 😇 Churz vorem Hafe stoppemer plötzlich miteme komisch tönende Motor. Zum Glück gohts denn aber nach es paar Minute wiiter. Häter echt müese tanke? ^^ Zrugg ufem Festland gömer im Hostel wider go iichecke und werfed denn eusen Plan mitem Sunneuntergang ufem Hoger luege über de Huufe wilmer kei Lust uf Astrengige hend. Defür isch Souvenir poste agseit und nachher gits es lokals Getränk und en tüüre Snack inere Strandbeiz zum Sunneuntergang :) Zur Feier des Titicacasees wett ich denn na go Forelle probiere und ha vo Nele und Lenz ghört, wos guet söll si. Und ja, es isch gar ned mal so schlecht und wils s'Tagesmenu isch gits au Suppe und Schoggibanane und natürli es Gläsli Wii dezue 🤭 Ufem Zruggweg is Hostel pöstelemer Züg für es selbergmachts guets Zmorge und Snacks für in Bus morn. Dasmal hämer es anders Zimmer mitere bessere Duschi, was selbstverständlich usgnutzt wird. Weisch nie wenns negst mal e gueti Duschi git ^^
Im Verlauf vode letste zwei Täg hämer eus au es bitz viel Gedanke über eusi Plän in La Paz gmacht, also hauptsächlich über s'Projekt 6'000er. S'Resultat: De Chachacomani wär definitiv einsamer und vermuetlich mit de Berge rundume zimli imposant. Mer brucht aber 3 - 4 Täg für d'Bestiegig und übernachted im Zelt. I han brutal Respekt vor dere ganze physische und psychische Useforderig und wett vorallem niemer anderst vorem Erfolg abhalte. De Huayna Potosí zellt zude eifachere 6'000er vode Welt, isch nöcher a La Paz und en Gipfel ohni sehr höchi Nachbere und chönnt dur das na viel beidruckender si. Er isch i zwei Täg machbar und dementsprechend au viel begangner als de Chachacomani. Au mir wends mitem eifachere und erfolgsversprechendere probriere. Am liebste mitem Bergfüehrer womer in Sajama troffe hend und mit Start am Fritig. Die Infos gebemer am Dütsche, womer ja au in Sajama troffe hend, dure. Nach dem Telefonat frogemer de Mario, de Bergfüehrer, ober immerna frei isch für eus zwei. Jetz nach dere Entscheidig schloft sichs grad doppled entspannt :) Nervös wirdi denn vermutli morn wemer Material fassed und so 🙈Read more