Canmore, kei Bäre und s Crazyweed

Am Morge früeh hämmer euses Airbnb verlah und hend aus uf de Weg zu eusem Bus gmacht. Di negste Täge reise mer vo Calgary abe bis nach Vancouver mit jenste chlinere und grössere Stops ide Rockie Mountains und em Okanagan Valley.

Erste Stop: Canmore.

Canmore isch es chlises Städtli ide nöchi zum eher bekannte Banff ide Rocky Mountains. Umgeh vo massive und wunderschöne Berge simmer am Morge am 9 dete acho und händ euses Gepäck äfeng im Hotel abglade. Nachdem mer eus im Städtli chli umegluegt händ, hämmer eigentlich e Rafting tour welle mache, aber leider sind die bis nögst Wuche nöd buechbar, schade. Den gömmer hald go wandere. Und ersch jetzt hanich usegfunde das d Simona mega vil Angst hett uf Bäre zträffe. Das isch da definitiv möglich, aber doch eher unwahrschinlich. Trotdem warned eim die Iiheimische wemmer id Natur gaht söllmer en Bearspray mitneh (das isch en Pfefferspray für Bäre). Mir händ eus denn so eine gmietet und sind uf en Spaziergang am Bow River entlang. Die Gegend isch eifach wunderschön, mer chönt echt Stunde det go lauffe (also ich, d Simona nöd. Grund: Bäre 😂). Mir händ leider kei Bäre gseh. Nachem lauffe hemmer eus es Bier verdient und sind id Canmore Brewing Company. Nacher simmer entli is Hotel icheckt und hend es chli usgruebt. Am Abig simmer im Restaurant Crazyweeds go ässe. Das isch es Restaurant mit mega moderner Chuchi (eher untypisch für sones Bergdorf) und isch mega fein gsi, mis Bavette Steak mit Chimichurri isch meeeeega gsi. Nachem znacht simmer den zrugg is Hotel, da mer am nögste Morge wieder sehr früeh use müend. Next Stop: Salmon Arm.Read more