Salmon Arm, an Pelikan und en Dütsche

Salmon Arm, euse nöchsti Stop uf de Reis hämmer bis anhin gar nöd kännt. Mit händ eigentli nur da welle e Nacht verbringe willmer nöd 8-9 Stund händ welle im Bus hocke. Nachere churzwilige Fahrt vo Canmore nach Salmon Arm (eusi Fahrerin hett es extrems Mitteiligsbedürfnis gha) hemmer eus uf de Weg zu eusem Hotel gmacht und debi en erste Blick uf Salmon Arm gworfe. Joa...es isch rein optisch schomal nüt speziells. Gläge am TransCanada Highway isches au nöd sehr Fuessgängerfründlich. Mir händs dänn irgendwie zum Hotel gschafft und au säb hät usgseh wie die Motels womer amel ide Nachrichte gseht 😂 ihr wüssed was ich meine. Nacheme churze Abstecher id Mall (d Simona hett neui Hose brucht) simmer denn richtig Sushwap Lake (ja es hett tatsächlich au Natur da) und det isches echt schön gsi, es het sogar Pelikan gha. Eifach d lüüt i dem Ort sind eus bitz komisch vorcho. Mir sind nacher is einzige Brewpub in Salmon Arm go ässe. Dete hett de Chälner en extrem uffälige Dialekt gha und wonen gad he welle fröge vo wo er chunnt herter scho: "Aus Bayern komm ich" gantwortet. De Matthias isch en echt coole typ gsi und hett eus bitz meh über de Ort verrate. Anschinend isches es mal e KKK Hochburg in Kanada gsi und es gäbi, sägemers mal so, eher wenig Usländer da 😂 Aber er hät au gmeint d Stadt wachi langsam chli uf und werdi moderner. S Esse ide Barley Station isch ganz ok gsi, aber bide Bier hets paar ganz gueti debi gha. De Matthias het eus den na par mega nützlichi Tipps geh für Argentinie, womer natürli dankend agno hend. Das nacher scho spaat gsi isch simmer den au is Hotel zrugg. Am nögste Morge simmer ide Shushwap Pie Company go brunche, was fein gsi isch, und den churz chli im Zentrum spaziert. Mir hend den doch nach en chline Teil vo Salmon Arm gfunde wo ganz hünsch isch. Aber ja d lüt da sind sehr speziell, sägemer so: ich han nonie so vil Pick-up Trucks i mim läbe gseh. Eine defo hett en abbrochene Hockeyschläger als Fahnestange für sini Kanadafahne benutzt, und denäbed en groooossse F*ck Trudeau chläber gha 😂 Mir sind also gar nöd eso truurig gsi womer den entli eusi Bus nach Kamloops gna hend.

De simer den 2h spöter acho. Da hets eus den scho besser gfalle. Nacheme super zNacht im "Brownstone" (Elch Hackbrate und Sockeye Lachs) simmer na schnell im Red Collar es paar Bierli go neh und denn au scho is Bett. Ime Hotel, es richtigs, nöd eis us de Nachrichte. Gesichteti Bäre: 0Read more