Kelowna, vili Brauereie und es Reh

Am nöchste Tag simer ab uf de nögst Bus nach Kelowna am Okanagan Lake. In Kelowna hämmer es cools Airbnb e bitz usserhalb vom Zentrum gha, wo genau im Brewery District gläge isch, Perfekt! Mir händ dänn au grad inere Brauerei z nacht gässe, ide Vice&Virtue hämmer so zimmli alli Bier probiert und dezue fantastisch gässe (Huusgmachti Gnocchi mit Pilz 😍) d Bier sind au alli mega guet gsi. I dem Brewery district sind öppe 10 Brauereie näbenand, also hämmer denkt mer probieret gad no 2 anderi. d Jackknife und Bad Tattoo Brewery sind beid au zimmli guet ok gsi, aber nöd annähernd so wie die Erst.

Am nögste Tag simer im Sprout Cafe go ässe, en grauehafte Hipsterschuppe mit entsprechend arrgoantem service, ich ha gad chli Heiweh nach Züri übercho 😂 Da min Koffer bitzli glitte hät uf dere Reis (50CHF Koffer usem Coop, genau das ischer au Wert gsi) hämer nacher id Orchard Park Mall müesse en neue go chauffe. Nacheme usgiebige Shopping-trip simmer den dihei go uusruebe und am am Abig im Salt&Brick go ässe. Dete sind allr gricht zum Teile, wasi zimmli es guets System gfunde han. S Risotto mit Kalbsäggli isch min Favorit gsi.

A eusem letste Tag in Kelowna hämer was gmacht? E Food Tour natürlich. De Guide Andrew hät zimli eus cooli Ort zeigt, er sälber isch en ehemalige Sportkommentator und so hätter au gredet (bitz nervig, aber hey guets ässe). Euse Favorit isches Koreanisch/Italienisches Fusion Resti gsi und mir händ au gad für de Znacht reserviert dete. Tour isch würkli abwechsligsriich gsi, und mer hend sogar en Absinth us der Region chönne probiere. Nöd die bescht Food Tour bis jetzt, aber zimmli guet. Nacher hämer eus no e Bootstour buecht und sind ufem Okanagan mitem Tikiboot umegschipperet, das isch zwär nöd schlächt gsi, aber au nöd würkli unterhaltsam. Am Abig simer im Gather go ässe ( das Resti vo de Tour). S Esse isch wieder mega gsi (Pork Belly in Gochujang Jus), aber d Chellnerin hett eus bstellig vergässe und mir hend ewigs gwartet. Womer sie druff ahgsproche hend, hets sie gmeint d Chuchi sege sehr im Stress hüt. Ja cool, aber all um eus ume wo nach eus cho sind händ ihres Esse scho. Ihri Antwort: Jaaaa, ihr händ ja zerrsch Vorspiis gha, und ich han eues esse ersch bstellt nachdem ihr fertig gsi sind. Brot, eusi Vorspiis isch BROT gsi. Säg eifach du häsches vergässe du Totsch. Anyway, nacheme ässe simmer no es Abschiedsbier ide BNA Brewery go näh und den Hei. Womer usem Taxi uusgstige sind, isch den es Reh ide Gägend spaziert und hett in Seelerueh Pflanze ide Gärte gfrässe 😂 Gsichteti Bäre: 0, Gsichteti Reh: 1

Morn gahts ab nach Vancouver!Read more