Hawaii

Üse letscht Tag uf Kauai isch glichzytig der schönscht, längscht und intensivscht Tag gsi. Drum chunnt der Foodprint mit Verspätig. D Shaka-App het üs i Waimea Canyon State Park gfüehrt.
Am Morge isches no gmüetlich losgange. Am 9i am Morge simer bir Kauai Kaffee Farm ga Kaffee probiere und hei di grosse Plantagen bestunt. När simer am Waimea Canyon entlang gfahre und hei bi ganz mängem Ussichtspunkt ghalte und vieli Föteli gschosse. Dr Waimea Canyon wird völlig zu Recht als “Grand Canyon vom Pazifik” bezeichnet. Di intensive Farbe mache ihn aber i üsne Ouge no fasch idrücklicher als ds Original. Am Namittag heimer e ersti chlineri Wanderig unternoh, wo üs d App vorgschlage het. Entlang vom Wanderweg hei üs mehreri Usichtspünkt uf d Na Pali Küste erwartet. Der Weg isch troche gsi und mir si gäbig vorwärts cho. Mir hei aber gli erfahre, wieso di Gegend - ömu gemäss amerikanische Quelle - ds rägerichste Gebiet vor ganze Welt söll si. Es si immer wieder Wolke cho und hei d Sicht is Tal versperrt, när hets afa tröpfle. D Ussicht isch drum meistens grau in grau gsi. Mir heinis de nach guet ere Meile entschiede, umdschere und nid bis zum finale Ussichtspunkt ds loufe. Der Entscheid isch definitiv weise gsi. Es het nämlich de ersch richtig afa rägne u der Wäg isch i chürzischter Zyt schlammig u sehr rütschig worde und der Pesche het us unerfindliche Gründ genau a däm Tag statt de Trekkingschueh di profillose Turnschueh agleit. Immerhin hets de d Wulche fürne churze Moment chli vürblase, dass mer d Na Pali Küste tatsächlich nomal zu Gesicht hei übercho. D Ussicht isch scho so sehr idrücklich und lohnenswert gsi. Mir heis alles in allem guet zrügg zum Outo gschafft.
Mitem Outo simer gmüetlich retour gfahre und hei bimene Parkplatz ghalte, wo üs d App en witeri Wanderig empfohle het. Dert isches (no) troche gsi und de heimer gfunge mir chönne ja eifach es paar Meter loufe und si immer no chli witer glüfe - da der trochnig Weg ja problemlos "bewanderbar" isch gsi. Obwou mir gmäss de Schildli vo de Amerikaner scho lang nüme sotte läbe u dr Pesche ds Anja sehr fescht het müesse motiviere entlang vor Klippe ds loufe, simer schliesslich bis ads Endi vo däm Canyon Trail glangt u si bimene schöne chline Wasserfall acho, wo genau oberhalb vom Waipoo Wasserfall isch, wo ds Wasser när 240 Meter ds Loch abe stürzt. Chum heimer der Rückweg antrete hets wieder afa schiffe..Natürlich isch es wieder schlammig und rütschig worde, sodass mer nur sehr langsam si vorwärts cho. Zrügg bim Parkplatz hets nur no en einsame Güggel und keni Outos meh ka. Müed, aber zfride simer talwärts gfahre und hei gseh, wie d Sunne wieder isch füre cho. Churz vorem Sunneuntergang het das ufs Mal zumene ungloublich intensive Regenbogen 🌈 gfüehrt, wo mir praktisch für üs allei hei ka. Zum Glück isch üsi Wanderig so lang gange..Baca selengkapnya