Mossel Bay, Skydiving und Hermanus

Plant gsi wär hit Morgä ä Toichgang z Mossel Bay. Drumm bini gester wieder ad Küste gfahre. Gschlafe hani det imne alte Zugabteil und am Abig bini midem Johann und de Silja us Dänemark nu chli durs Städtli zogä.
Äbä, plant gsi wär hit Scuba Diving, aber das gester gstirmt hed, isch d Sicht nid giod gsi und drumm de Toichgang abgseid wordä. Also hani de churzerhand halt ä Skydive biocht🤷🏽‍♀️ Ich mein s hed beides Toichä im Name und isch drumm ja fascht s gliche. So bini de 2 Stund nachem Biochä zämä midem Arno vo 3000m usmene Flugzig gumped. Nach 30 Sekunde friiem Fall, isch de nu ä 6 Minuite Falschirmflug agstandä. Das isch wahrschinlich diä verrücktischti und besti Erfahrig vo mim Läbä gsi.
Dena bini witer uf Hermanus gfahre. Zmittag gässä hani imne klassische Farmstall, quasi äs Buirahof Restaurant wo oi Produkt vom Hof verchoifd. Im scho fascht kitschig perfekte Städtli Hermanus gani diä nechschtä Täg ga surfe.Read more