Reset search
Meland s Afrikareis
  • Meland s Wältreis
  • Andrea Bischof
Dec 2020 – May 2021

Meland s Afrikareis

A 145-day adventure by Meland s Wältreis & Andrea Read more
FollowInsightsCalendarShareShareBucket list
Newest first
  • Trip start
    December 9, 2020
    Meland s Afrikareis

    Verschoben isch nit uffghobe:-)

    May 28, 2020 in Switzerland ⋅ ☀️ 20 °C

    Scho im März 2020 isch scho fascht ziemlich klar gsi, dass mir unseri planti Reis am 01. Juni nit könne starte.
    S Coronavirus het die ganze Plän uffe Huffe gworfe.
    Dr Job und d Wohnig hän mir beidi uff Endi Mai kündet. Jetzt heisst e Plan B kreiere.
    Alles umplane, neu koordiniere und luege wo mir unterkömme.
    Dr ganz Juni wärde mir in de Berge verbringe. 2 Wuche in Dr Alphütte in dr Lenk und 2 Wuche in Obersaxe. Soo öbbis vo verdient und zum Erhole.
    Im Juli kömme mir wieder ind Nöchi und wohne bim Tanti Brigitte in St. Pantaleon im Dachstock.
    Damit mir d Uslaage nit vom ersparte Batze mien usgeh, sueche mir uns e temporär Job bis Endi Novmeber.
    In Dr Hoffnig dass den s Reise über s grosse Meer wieder unbeschränkt möglich isch.
    Hüt, dr 28.Mai hän mir uns definitiv entscheiden dass mir unseri Reis in Neuseeland am 08. Dezember 2020 wärde starte.
    Und genau sooo hän mr das au buecht:-) Mir freue uns nach wie vor riesig uff das verschobene und bitz anderscht plante Abentüür.    Read more

    See translation
  • Meland s Afrikareis

    Ändligg gohts loos

    December 1, 2020 in Switzerland ⋅ ☁️ 1 °C

    Nachdäm mir unsere plante Start vom Juni 2020 hän miesse verschiebe und unseri Plän umkrämplet hän gohts jetzt am 9. Dezämber 2020 ändligg los. Aber nit uff Neuseeland wie mir im Mai no dänggt hän (die hän dGränze immer no zue) sondern uff Südafrika. Mir könne sogar diräkt vo Züri uff Kapstadt fliege, Edelweiss sei Dank :-). Abgseh vom Ticket muess me jetzt au e negative COVID-19 Tescht vorwiese zum könne fliege, bzw. Ireise. Das isch no die letschti Hürde wo mir mien näh, jedoch erscht kurz vor dr Abreis, well dä Tescht nit älter als 72 Stund alt dörf sy, wenn mir in Kapstadt akömme. Jetzt heissts no die räschtliche Sache erledige und packe.
    Mir sin sehr gespannt und freue uns total!    Read more

  • Meland s Afrikareis
    Capetown Style
    d Nationalbluemed HafebewohnerUssicht vom botanische Garte1

    Acho in Capetown

    December 13, 2020 in South Africa ⋅ 🌙 17 °C

    Nach 11 Stund Maske im Gsicht und zämeglegt uff em Sitz in dr Economy vo dr Edelweiss sin mr in Capetown acho. D Corona Massnahme sin nit so schlimm gsi wie erwartet. Usser Zettelusfülle und Fiebermässe am Handglänk🤔 hän mr schlussendligg dr Südafrikanisch Stämpel in Pass beko.
    Völlig dure hän mr s Hotelzimmer für die nöggschte 11 Dääg an dr Waterfront am Meer bezoge.
    D Waterfront in Südafrika isch nach de Pyramide in Ägypte dr hüfigsti bsuechti Ort in ganz Afrika.

    Durch Walking Toure und Busfahrte hän mr scho e Wenigkeit vo dr Stadt gseh.
    D Gschicht vo dr Apartheit in däm Land het uns sehr beidruckt. Es isch unglaublich, wie 4 Millione wissi Mensche 41 Millione farbigi Mensche durch Macht und Gäld hän könne unterdrucke, usbeute und us em eigene Land/ Quartier vertriebe.
    D Downtown isch voll mit Läbe, Gsang, e huffe kleini Märtständ und vielne kleine Kaffis.
    E Bsuech im Botanische Garte het uns d Vielfalt vo dr Flora ufzeigt. So hän mr au Nationalblueme vo Südafrika , Königsprotea, gfunde.    Read more

    See translation
  • Meland s Afrikareis
    d Flora
    Bo- Kaapunsere FlizzerUssicht uff Capetown von dr Elephant s Eye Cave uss

    Capetown und so...

    December 19, 2020 in South Africa ⋅ 🌙 19 °C

    Capetown isch wirkligg sehr vielsitig.
    E witere Walking Tour mit em Thema Bo- Kaap. Bo-Kaap isch e Stadtvierte vo de Kapmalaie, wo nachdäm sie vo dr Sklaverei befreit worde sin, sich dört agsiedlet hän. Sin mehrheitlich Muslimischi Bewohner. E typischs Merkmol vo däm Viertel sin die viele bunte Hüser.

    Sit es paar Täg hän mir unsere neue Flizzer, dr Toyota Yaris. So hän mr au könne kli unabhängig d Umgäbig vo Capetown unsicher mache. So sin mr ans Cap der guten Hoffnung und hän
    wunderschöni Wanderige gmacht. Uff em Signal Hill und im Silbermine Nature Reservat ( im Table Mountain National Park), hän mir e wunderschöni Ussicht uff die ganzi Stadt, e sensationelli Flora und e prachtvolle Sunneuntergang könne gniesse. Sogar in d Höhli „Elephant s Eye Cave“ sin mr uffe klätteret.    Read more

  • Meland s Afrikareis
    Gfängniszälle vom Nelson Mandela
    dr Nelson Mandela bi sinere Red vom Balkon nach sinere Freilassig

    Nomol Capetown

    December 20, 2020 in South Africa ⋅ ☀️ 24 °C

    Im ganze sins 10 Dääg Capetown. Und me könnt no länger blibe, mr hän no lang nit alles gseh.;-)

    Mit em Boot sin mr Robben Island go bsueche. Isch rächt touristisch und genau nach Zitplan, aber extrem spannend gsi.
    Robben Island isch e Insle wo ca. 12 km vo Kapstadt entfernt isch. Sie isch bereits im 17. Joorhundert e Gfängnisinsle gsi. Spöter het me denn die Leprakranke dörthi verfrachtet. Im 2. Wältkrieg het d’Insle als Navy-Stützpunkt vo de Alliierte dient, uss däre Zyt stön no einigi Gebäude. In dr Zit vo dr Apartheid sin denn überwiegend politische Gfangeni igsperrt worde. Au dr Nelson Mandela het ca. 20 Johr in däm Gfängnis als politische Gfangene verbrocht. Bevor er denn frei gloh worde isch und Präsident vo Südafrika worde isch.
    D Füehrig durch das Gfängnis het e ehemolige Häftling gmacht. Und was dä dört alles het miese erläbe, isch unfassbar und au unvorstellbar.

    Uff unsere Usflüg in und um Kapstadt hän mr au mit andere Bewohner vo Südafrika könne Bekannschaft mache :-)    Read more

    See translation
  • Meland s Afrikareis
    dr Klippschliefer
    uunnnd hopp :-)Wyy tasting

    s Wyygebiet Stellenbosch

    December 21, 2020 in South Africa ⋅ ☀️ 30 °C

    Adeee Kapstadt, mir fahre witer.
    Über die berüehmti Küstestroos „Chapman‘s Peak Drive“ sin mr nach Betty’s Bay zunere Pinguin Kolonie. Endligg, d Andrea het scho lang druff plangt die Pinguine in ihrem natürliche Läbensruum azträffe. Es het au sehr viel Kormorane und Klippschliefer gha wo dört läbe.

    In Stellebosch sin mir natürligg go Wyy taste. Denn Stellebosch isch es sehr berühmts Wyyabaugebiet. Meh als 200 Wyy- und Trubeproduzänte findet me in däm Gebiet.
    Leider het d Meli miese bim Tee tasting blibe, will sie so e miese Darmvirus verwütscht het. D Andrea het also elei miese Wyy trinke. Nach 12 verschiedene Wyys uff 2 Wyyguet het sie den uffgäh, ;-). Vom beschte Wy, also dä wo uns am beschte gschmeggt het hän mir zwei Fläsche kauft, damit mir öbbis feins z’Dringge hän an dr Wiehnacht.    Read more

    See translation
  • Meland s Afrikareis
    d Rosa Flamingos
    d Floraan dr Küste, mit de Rockrabbitsunsere Wiehnachtsbaums Luxuszimmer in dr Forty Trees Lodge

    Hermanus

    December 25, 2020 in South Africa ⋅ 🌙 16 °C

    Hermanus isch dä Ort wo me ka Wal beobachte, das sogar vo dr Küste us. Dr südlichi Glattwal kunnt do hi zum die Junge gebäre. Eigentligg, aber Afangs Dezämber sin sie witer zoge in d Antarktis go Ässe. Also hän mir keine Wal gseh🙃.
    Hermanus isch aber au suscht e schöns Städtli. Mir sin an dr Küste gsi und hän dene „Rockrabbits“ ( so nennt me do die Klippeschliefer) stundelang zuegluegt. E ältere Herr isch denn an d‘Muure füre gstande und het ihne gruefe. Mir häns zerscht nit ganz Ärnscht gnoh, bis denn ein um dr ander vo däne härzige Pelzhüfe azeggle koh isch. Sie hän ihm uss dr Hand gfrässe und sin ihm sogar bim Bänkli uff e Schoss gsässe. Mir hän stunend zuegluegt. Är het is denn erklärt, är käm jede Daag vrby zum si z‘Fuetere, es seige sini Fründe, me miess eifach uff d‘Finger ufpasse, do si scharfi Zehn hän.

    Au d’Flora isch do wieder unglaublich vielsitig. Mir hän im Fernkloof Nature Reserve einigi könne bewundere.

    In dr Vermont Saltpan hän mr zahlrichi Vögel könne beobachte. Näbe Ente, Reiher, Gäns, Komorane au Flamingos. Isch sehr schön gsih, d‘Flamingos fliege z‘gseh, sin total eleganti Tier und erscht mit de usbreitete Flügel offebare si s‘komplette farbspektrum vo ihrem Gfieder.

    Mir hän do unseri Wiehnacht mol total anderscht verbrocht, in kurze Hose, bi strahlend blauem Himmel, Sunneschin und 26 Grad :-) , inere Luxus Lodge. Hüt am Morge hän mir sogar sälbergmachte Wiehnachtsgutzi bikoh, mir wärde total verwöhnt.
    S Bett isch soo gross, dass mr zum Guet Nacht sage hän miese telefoniere zäme, sowit sin mr vonenan wäg gsi😂    Read more

    See translation
  • Meland s Afrikareis
    Birdwatching ( Stuuundelang:-)
    Cango Wildlife RanchCango CaveStrausse RanchRoute 62 und dr Swartpass, Baboons zmittst uff dr StroosD Lodge DeBergkant, bi dr Renate, es Dörfli in dr Mitti vo nüt:-)

    e Wuche in Prince Albert

    December 30, 2020 in South Africa ⋅ ☀️ 27 °C

    Über die bekannti Route 62 sin mr vo Hermanus nach Prince Albert übere Swartpass gfahre. In Prince Albert sin mr ind Lodge De Bergkant.
    Die ghört dr Renate und d Renate het Johrelang mit dr Meli im Kantonspital Liestel gschafft. Sie isch in dr Personalabteilig gsi, wo sie nach 15 Johr kündet het und uff Prince Albert usgwanderet isch. Tja d’Wält isch klei und me trifft sich immer 2x im Läbe. ;-) Prince Albert isch e kleins Dörfli, bitzli im Landesinnere und in in dr Mitti vo gar nüt. Es het zwüsche 33 und 40 Grad dure Daag. Und es isch nonig Hochsummer.
    Do blibe mr zum Johreswächsel.
    Näbe fuule und gmietligge Dääg am Pool und Birdwatching hän mr au einigi Usflüg nach Oudtshoorn gmacht.

    Mir sin uffd Cango Wildlife Ranch, hän iheimischi aber au exotischi nit südafrikanischi Tier kenneglernt. Mir hän sogar e Lemur dörfe strichle, dä isch eim uff e Schoss gsässe. Si hän samtweichi Pfote und liebe Bananesmoothies.

    D’Cango Cave het uns bsunders beidruggt. Die Höhli isch eini vo de schönschte uff dr Wält mit unglaublich hoche Stalagmite und Stalaktite. Die sin mehreri Millione Johr alt. Me ka 600m wit in d Höhli laufe.

    Uffere Strausse Ranch sin mr au go e Bsuech abstatte. D Strausse sin die gröschte nitfliegende Vögel uff dr Wält. Sie wärde 2-3m gross und über 200 kg schwer. In 3 Sekunde isch ihri Gschwindigkeit vo 0km/h uff 70km/h. Kunnt so eine entgege grennt, kunnt me mit wägrenne also nit wit. Denn legt me sich flach uff e Bode, bättet und hofft dass sie über eim drüber renne. So e Kralle in ihrne Zeche ka ohni Problem e Mensch komplett uffschlitze. Mir hän erfahre, ass nur grad dr Leu und dr Gepard si könne risse, alli andere Tier könnes nit mit ihne uffnäh.
    Sie sin keini gschiedi Tier. Es Aug ( 60g) vomene Strauss isch grösser wie ihres Hirni (40g).
    Frässe duet e Strauss Körner, Gras, Frücht und Stei. D’Stei ässe sie dass sie d’Nahrig im Mage könne zermahle, do e Struss keini Zähn het.
    Vo eim Strausseei könne 18 Mensche drvo ässe und isch so viel wie 24 Hühenereier. Zum koche bruchts 1 -2 Stund. Mir hän sogar die früsch gschlüpfte Strausse-Babies dörfe go aluege, so siess. Züchtet wärde si vorallem wägem Fleisch und em Läder. Mir häns is nit näh loh und dört no e Strausse-Steak gässe, so früsch kömme mir dänggs nie wieder drzue.    Read more

    See translation
  • Meland s Afrikareis
    Ussicht uff ganz Afrika:-)
    Am Meererfinderischs Omelette Dinner1fake CheminéWanderige im griene tropische Garden Route Nationalpark

    Wieder am Meer, in Wilderness

    January 5, 2021 in South Africa ⋅ ☁️ 23 °C

    Wilderness isch e Dörfli an dr Küste am indische Ozean an dr beriehmte Garden Route. Es isch alles total grien do. Es isch zwar öbbe 10 Grad kälter wie in Prince Albert, aber d’Luftfiechtigkeit isch rächt viel höcher do.

    Mir hän s’Meer gnosse und verschiedeni Wanderige gmacht. Am Strand entlang, durch e Wald, amene Fluss entlang und zumene Big Tree (e 800 Joor alte Yellow Wood) und das in Begleitig vo tuusige vo Mucke. Zum Glügg hän mir s‘Antibrumm drby.
    Uff de Wanderige sin mr de „Small 5“ begegnet:
    Schlange, Frosch, Flusskrebs, Heugumper und Schmetterling. :-)

    Bim Ussichtspunggt „Map of Africa“ gseht me dr ganzi Kontinänt gformt durch e Fluss. Mir hän also 2x miesse luege bis mirs gseh hän.

    Es het au Rägedääg gäh und damit mr nit kalt bekömme, hän mr e Zimmer mit Cheminée gnoh.:-)
    Damit mr bi däm Räge nit hän use miese hän mr uns e Gasherd zuedo und e Omelettedinner zuebereitet.    Read more

  • Meland s Afrikareis
    Unterwägs und s'Lodgehüüsli mit dr Ussicht
    dr Lodge eigeni Tierpark...1SafariBüffel, Schakal, Zebra, Elefante1Bim bade und plantsche

    Addo-Elefanten-Nationalpark

    January 10, 2021 in South Africa ⋅ ⛅ 22 °C

    Vom Westerncape sin mr über d’Garden Route ins Easterncape. Bi Port Elizabeth verby gfahre zum Addo Elephant National Park.
    Unseri Lodge isch kli usserhalb vom Park. Mit eme eigene kleine Tierpark, wo sie Tier grettet, verletzti pflägt und kleini ohni Eltere ufzoge hän. Dr ganz Daag hört me e gezwitschere und geschnattere vo de Vögel. Uss unserem Boxspring Bett sehn mr diräkt uff e Wiese mit Springböck. Es isch sehr amüsant dene bim springe, also gumpe könne zueluege.

    D’Dääg hän mir im Nationalpark verbrocht bi de grosse Dickhüter. Mir hän se vom Morge frieh bim Zmörgele bis ind Mittagsstunde bim Bade im Schlamm könne beobachte. Es isch schön zum zueluege, wievyyl Spass si hän bim Bade. Einigi sin richtigi Wasserratte und könne stundelang im Wasser sy, plantsche und spiele. Es het e huffe Baby-Elefante wo no bim Mami dringge, Kleikinder und Teenies. Abgseh vo de junge Bulle wo ständig dien ziggle und Seich mache hän die Tier e sehr e liebevolle Umgang mitenand.

    Es läbe öbbe 600 Elefante do. Die Junge läbe mit ihrer Muetter, Tante, Cousin, Brüedere und Schwestere in ganze Sippschafte, während däm die erwachsene Bulle Einzelgänger sind.
    E Elefant isst öbbe 150kg Pflanze in 17-19h pro Tag. Schloofe wird überbewärtet und nur einzelni Stunde. Trinke mien sie 140l Wasser pro Tag. E usgwachsene afrikanische Elefant wiegt zwüsche 3 und 6 Tonne und könne zwüsche 2 und 3 Meter gross wärde. E usgwachsene Bull isch is mol ganz noch vor em Auto duregloffe, eifach riesig das Tier. Zum Glügg het är nur kurz gluegt und isch denn witergloffe.

    Mir hän au e huffe anderi Tier endeckt und beobachtet: Zebras, Pumbas ( Warzeschwein), Kudus, Schakal, e Büffel, Schildkrote und e huffe Vögel.    Read more

    See translation
  • Meland s Afrikareis
    1

    und wills sooo schön isch....

    January 10, 2021 in South Africa ⋅ ⛅ 22 °C
  • Meland s Afrikareis
    Hängebrugg überem Storm River an dr Mündig ins Meer
    Bekanntschaft im Walddr Big Yellowtree5au übere Wäg gloffe

    Tsitsikamma

    January 13, 2021 in South Africa ⋅ ⛅ 26 °C

    Do mr nit gwüsst hän ob dr Cyril Ramaphosa, Präsidänt vo Südafrika dr totali Lockdown usspricht und denn au s Reise zwüsche de Provinze nümmi möglich gsi wär, sin mr wieder kli zrugg gfahre in nöchi Westerncape.
    Bim Tsitsikamma Nationalpark hän mr e 3 däägige Stop igleggt. Nach de Safaritoure im Auto bi de Elefante mien mr unsere Gliedmasse wieder in Bewegig bringe.
    Mir hän wunderschöni Wanderige gmacht im Wald, an dr Küste und bis zu dr Hängebrugg über em Storm River.
    Die ander Wanderig im Tsitsikamma isch e Yellow Tree Rundi gsi. Dä Big Tree isch 1000 Johr alt, 36,6m Hoch und het e Umfang vo 8,5m.    Read more

    See translation
  • Meland s Afrikareis
    Monkeyland
    Birds of EdenRobbergwanderigd'Mündig zum indische Ozean vom Salt River2Ussicht vom Lodgebalkon1

    Plettenberg Bay

    January 18, 2021 in South Africa ⋅ ☀️ 22 °C

    Mir hän Glück gha, dr Präsident het kei komplette Lockdown agordnet. Jetzt stoht unserer witere Entdeckigsreis durch Südafrika nüt meh im Wäg. Mir hän trotzdäm e kleini Reise-Pause in Plettenberg Bay gmacht, inere wunderschöne Lodge mit ere senationelle Ussicht.
    Vo dört us hän mr verschiedeni Tagesusflüg gmacht. Ins Monkeyland und Birds of Eden
    Die meiste Affe und Vögel sin us Privatbesitz, Labors oder Zoo und dörfe in dene Uffangstatione relativ frei und wieder wild Läbe. Klar, sie wärde gfietered, ansunschte könne sie sich innerhalb vo dr Aalag frei bewege. Mir hän e hufe über d’Lemure und d’Affe ghört. D’Kapuzineraffe benütze als einzigi Affeart Wärkzüg, z.B. Stein zum Nüss uffmache oder Stöck zum Wasserschlange fange und töte (sie ässe die denn au). Sunsch kennt me das nur vo de Primate. Lemure hän sie zwei verschiedeni Arte, die mit em gstreifte Schwanz (wie dr King Julien) und denn die Schwarz-Wisse. Die sin zwar grösser, seige aber Schisshase. Kömme nur rasch zum Frässe an Boden und denn sofort wieder uff e Baum :-) Die andere sin zimlig fräch und hän is immer wieder e Stück wit begleitet.
    Jetzt wüsse mir au, ass nur die südamerikanische Affe ihri Babies uff em Rugge umedraage. Die afrikanische und asiatische Affe hän sie immer unde am Buuch.
    Birds of Eden isch die gröschti Vogel-Freiflug- Aalag uff dr Wält. Es het vyyl Vögel kah, isch e rächte Lärm gsih.

    Im Robberg Nature Reserve hän mr e sehr e schöni Wanderig gmacht. Es isch nit nur e Naturschutzgebiet sondern au e Weltkulturerbe und e nationals Denkmal. Uff em Rundwäg vo 8,9km wird me vo verschiedene Landschafte, ( Sand, Wald, felsigi steili Wänd, Meer..) und verschiedene Tier begleitet, wie Vögel und Heugumper, au Seebäre-Kolonie sin do beheimatet. Mir hän ihne zuegluegt bim Schwümme, sie dien richtig Wällerite. Es isch is nit klar, ob sie das nur zum Spass mache oder derby au Fisch frässe, isch ämel toll gsih zum zueluege.

    Au d’Wanderig im Nature’s Valley zum Salt River isch Landschaftlich e Highlight gsih.    Read more

    See translation
  • Meland s Afrikareis
    so Stroose und das no bi Räge
    vo dr Lodge usEs kleins Dörfli mit bunte HüüserTier uff dr Stroos und im Garte vo dr Lodged Landschaft

    Wild Coast

    January 22, 2021 in South Africa ⋅ ☀️ 27 °C

    Über Port Alfred sin mr an d‘Wild Coast, Coffee Bay gfahre. In Port Alfred hän mr e Zwüschestopp iglegt, damit mr nit zlang am Stück mien Autofahre. Am nöggschte Daag den witer nach Coffee Bay.

    D’Stroose sin immer töller worde zum fahre mit unserem kleine Toyota. Es sin Kilometer langi Stroose mit X Schlaglöcher und Schotter. S’Tempo isch so ähnlich wie Stop and Go, Hop in and wieder Hop out off the Schlaglöcher. Hän mr den die Löcher im Griff gha, so sin uns Küeh, Esel, Geisse, Schwein und Hüehner in einere gmietliggkeit über Stroos gfloffe.
    Aber d’Landschaft isch wirkligg sehr schön, scho nume wäge däm het sichs glohnt die Stroose in kauf znäh.

    Mir hän is in Coffee Bay im Ocean View Hotel iquartiert und es het also gstumme, mir hän vo unserem Zimmer uss diräkt uffs Meer gseh und d‘Wälle au ghört rusche in dr Nacht. Dr Strand hän mir praktisch für uns kah, abgseh vo e paar Spaziergänger, e Härde Kieh, Geisse und zwei Rösser. Die hän sich gnüsslig gwältzt im warme Sand.

    Es het do au vermehrt Strossehünd, vorallem eine hets is ado. Är isch mit is am Strand koh spaziere und mir hän ihm versuecht bizbringe, dr Stägge wieder zrugg bringe, erfolglos. Egal, är und mir hän dr Plausch kah. Mir hän ihn Charly gnennt und nodürlig het är nach em Ässe no e Stügg Fleisch vom Buffet bikoh, wo mir nümi möge hän 😬

    S’berüehmti „Hole in the Wall“ in dr nöchi vo Coffee Bay hän mr leider nit gfunde🙈, aber e huffe kleini Dörfli wo mir mit abstand die einzige Wisse gsi sin. D‘Kinder am Strosserand hän is fröhlich zuegwungge und anderi hän au eifach miesse luege. D‘Lüt do läbe in sehr sehr eifache Verhältnis, gar nit vorstellbar für uns.    Read more

  • Meland s Afrikareis
    Bim 5 Gänger:-)Drakensberged'Wandervögele wunderschöni Flora1dr Maskewebervogel und Näschtbaute, und anderi Baumbewohner

    Drakensberge

    January 25, 2021 in South Africa ⋅ ☁️ 17 °C

    Nach ere 10-stündige Autofahrt vo dr Küste sin mr total erledigt bi de Drakensberge ako. Dr Zuestand vo de Strosse isch sehr abwächsligsriich, vo teerte, über Schotterstrosse zu zwar teerte Strosse aber mit extrem viele Schlaglöcher.
    Drakensberge sind s’höchste Gebierge in Südafrika. Die höchsti Erhebig isch jedoch in Lesotho uff 3482 m.ü.M. Im Winter hets Schnee uff däm Gerbierge und me ka Skifahre.
    D’Lodge wo mr gsi sin isch uff 1500m.ü.M

    Wit und breit isch nüt, usser d’Lodge, d’Bärge und viel viel grieni Natur.
    Es isch wunderschön, die Rueh.
    Mir sin go wandere und hän d’Landschaft eifach gnosse. Bärg uff und Bärg ab, über Bächli, dure Brombeerwald und amene Felse mit Pavian verbi.
    Ab und zue isch uns s’Wätter scho e weneli z’fiecht und vorallem z’heiss gsi, bi 32 Grad go wandere isch e schwitzigi Aglägeheit gsih.
    Am Obe hän mr unsers 5 Gang Menü gnosse und am Weiher de zahlriche, Vögel, Frösch, Libälle, endlos vielne Mucke und Fisch könne zueluege, vorallem zueloose.
    Es isch Rägezit in däm Gebiet und es het au einigimol grägnet.

    Dr Maskenwebervogel mit sinere uffallende gälbe Farb hän mr do speziell guet könne beobachte.
    Dr Name Webervögel hän sie dr Art vom Näschtbau z’verdanke. Sie spinne Gräser, Fasere und Fädere zu kunstvolle Hängenäschter an de Äscht vo de Bäum. Und Maskewäbervogel vo dr schwarze Maske im Gsicht. ( Kei Virus! )
    S’Männli baut mehreri Näschter und hofft das e Wibli während dr Balz eins vo sine Näschter ahnimmt. Isch das dr Fall, baut s Wibli dr Inneberich no fertig us, bevors denn d‘Eier dri legt.    Read more

    See translation
  • Meland s Afrikareis
    Rägezit... d Brugg über dr Fluss isch knapp no befahrbar gsiKaffernbüffel bim Schlammbaddr Parkdr Fluss iMfolozi durch dr Parks Breitmaulnashorn und Impalas

    Hluhluwe- iMfolozi

    January 28, 2021 in South Africa ⋅ 🌧 20 °C

    Mir hän d’Unterkunft so gwählt, dass mr vo do us es paar Tagesüsflüg könne mache. Mir sin in Mtubatuba. Do rund um wird Zuckerrohr abaut und die Lodge wo mir sin isch damals viel vo de Arbeiter uss dr Zuckermühli bsuecht gsih.
    Vo do hän mr dr Hluhluwe- iMfolozi Park bsuecht. Bi dr Ifahrt in Park sin mir gfoggt worde ob mir Waffe dery hän und bi dr Usfahrt hän si dr Kofferruum kontrolliert. Leider kömme au immer wieder Wilderer in die Parks ....
    Dr Park isch s’ältischti Wildschutzgebiet in Südafrika und umfasst 96‘000 ha. Es liegt in dr Provinz KwaZulu-Natal.
    Er het dr Name vo de beide Flüss „Hluhluwe“ und „iMfolozi“ wo dure Park fliesse. Dr Park isch hügelig und jetzt im Summer sehr grien.
    Me seit es isch dr Park vo de Nashörner. Mir hän nit viel vonene gseh aber doch so e prachts Tier vomene Breitmaulnashorn vo nochem könne beobachte. Direkt näbem Auto.
    S’Breitmaulnashorn ischs gröschte vo de Nashörner. So e Nashorn isch wenig agriffsluschtig, macht mes aber hässig kas zum gföhrliche Gegner wärde und setzt s’Horn als Waffe ih. Es ka bis zu 40km/h schnäll renne.
    Es sin Pflanzefrässer wie d‘Elefante.
    Au e Büffelhärde isch uns entgege ko.
    Do wirds eim kli anderscht, au im Auto, wenn so Tier uff eim zue kömme. Kaffernbüffel, so nennt me die, sin aber eher ruhigi, gemächlichi Tier und liebe Schlammbäder.
    Es het au e Huffe anderi Tier gha: Impalas, e Schopfadler, Monkey, Pumbas :-) und grossi Echse.    Read more

    See translation
  • Meland s Afrikareis
    Hippos
    dr Webervogel und e Adlerdr EisvogelD Krokodiluff em Boots Gnu, Kudu, Wasserbock, Buschbock und Vögel

    St Lucia

    January 29, 2021 in South Africa ⋅ ⛅ 26 °C

    E witere Tagesusflug isch ins Dörfli St. Lucia an dr Küste gsi.
    Dörfli vo de Hippos ( Flusspferd). In dr Nacht stiege sie uss em Fluss und göhn im Dörfli go grase, me nennt die dorum au „Townies“.
    Mir hän e Bootstour uff em Fluss gmacht.
    Dure Daag liege d Hippos im Fluss.
    Sie hän ganz e dünni Huut, und mien die dorum im Summer mit em Wasser vor Sunnebrand schütze.
    Drfür hän sie e extrem diggi Fettschicht unter dr Huut.
    Sie halte sich nur in flache Gwässer uff wo sie könne stoh, denn sie sin extrem schlächti Schwümmer. Sie laufe imWasser.
    An Land könne sie e Gschwindigkeit vo 30km/h uffbaue, wobi meistens 3 Füess glichzittig uffem Bode sin, damit sie ihres Gwicht könne stabilisiere.
    So e Flusspferd wiegt zwische 1500 und 1800 kg.
    Sie läbe in Gruppe und hän meistens e männliche Afiehrer wo s Territorium verteitigt.
    Mien sie ihr Revier mol verteidige denn bruche sie ihri lange Eckzähn als Waffe.
    Es het au dört anderi Tier z’entdecke gäh.
    E anderi Art vom Webervogel wo sini Näschter im Schilf baut.
    Au e wunderschöns Exemplar vomene Kingfischervogel ( Eisvogel) hän mr entdeckt im Schilf.
    Und natürligg hän mir au Krokodil gseh.
    Es sin Nilkrokodil wo do läne, die könne sowohl als auch im Süesswasser wie im Salzwasser (Brackwasser) läbe.

    Em Isimangaliso Wetland Park, oberhalb vo St. Lucia hän mr au e Bsuech abgstattet.
    Das isch dr Park mit dr zweithöchste bewachsene Sanddüne uff dr Wält.
    Es het e huffe Kudus, Gnus, Wasserböck, Buschböck, vieli Vögel, sowie au Grienmeerkatze (Vervet Monkeys) kah.    Read more

    See translation
  • Meland s Afrikareis
    Abkiehlig im Pool / d Crocodile Bridge, wieder befahrbar
    Mme Löwe, ZebraLeopardeHipposElefant und dr Dung Beetle by the workd Nochbere uff Bsuech 😊

    Kruger Nationalpark

    February 3, 2021 in South Africa ⋅ 🌧 25 °C

    Im Marloth Park, isch e Park grad vor em Krugerpark, hän mir unsers Studio mit Pool🤭 bezoge. Au im Marloth Park läbe e Huffe wildi Tier und mir zmittst inne.
    Es isch richtig heiss und total fiecht. Es Gwitteret oft und het extrem viel Wasser.
    Mir hän dä Ort gwählt, damit mr nit wit hän für zum Crocodile Brige Gate wo in Kruger Park fiehrt. Leider hän mr die Brugg nit immer könne benutze will sie überfluetet gsi isch🙈.
    Dr Kruger Nationalpark ischs gröschti Naturschutzgebiet in Südafrika. Zählt mit sinere Flächi vo 20‘000 Quatratkilometer zu de gröschte Naturschuttgebiet in ganz Afrika.
    Dr Park isch 1898 unterem Präsident Paul Kurger als „Sabbie Game Reserve“ zum Schutz vo dr Wildnis gründet worde.
    1926 het denn das Gebiet dr Statuts Nationalpark beko und au dr hütigi Name, Kruger Nationalpark.
    Es läbe 147 Arte Säugetier, 507 Vogelarte, 114 Reptiliearte, 49 Fischarte und 34 Amphibiearte im Park.
    Und e Bruchteil vo dene Tier hän mir dörfe beobachte und gniesse. Me kas fascht nit in Wort fasse wenn me voreme Hippo, Elefant, Leopard, Büffel oder e Härde Impala stoht. Natürligg im Auto, das dörf me im Park nit verloh. Au die wunderschöni farbepracht vo de Vögel und die kleine Bewohner vom Park sin sensationell zum Beobachte.
    Am letschte Obe sin no d Nochbere verbi ko uff e Apero😊 🦓🦓🦓🦓
    Vier Zebras sin plötzlich bi dr Veranda gstande.
    Sie hän uns zwar us dr Hand d Pellets gmampflet, sin aber sehr sehr schüch gsih. Aber dä Apero wärde mr nieme vergässe😊    Read more

    See translation
  • Meland s Afrikareis
    Krugerpark
    1Lionesse bi dr Pause, Zebras am Kuschle und Büffelhärde überquere d StroosBsuech bi dr Jessica & em RichieNashorn-Waise, d'Leuejungsuff Safari, und e GeierBlyde River Canyon, three Rondvales, Patholes, Lisbon Waterfall

    Hoedspruit

    February 7, 2021 in South Africa ⋅ ☁️ 27 °C

    Dr Wäg nach Hoedspruit hän mr dur e Krugerpark gnoh und mir hän nomol einiges erläbt. E ganzi Büfflehärde wo über d’Stroos zottlet isch und e Löwin het am Strooserand e Pause gmacht.
    In Hoedspruit sin mr ine Lodge wo e eiges Game Reserve het und e sehr e schöni Ussicht uff d’Drakensberge.
    Mit eme Ranger sin mr am Obe uff e Game Drive. De Nashörner wo si do hän het me allne s’Horn abgnoh. So wärde die Nashörner nit vo Wilderer gjagt und tötet. Isch die einzigi Chance damit d’Nashörner überläbe. Das muess me alli zwei Johr wiederhole do die Hörner nochewachse. Do uff dr Lodge hän sie e Nashorn-Waise Projäkt, sie hän bereits 5 Waise uffzoge und sie könne in d‘Wildnis entloh (au ohni Horn). 3 jungedlichi männlichi Leue sin uns begegnet und me het se bim idunkle ghört brülle um ihres Revier z’vertedige.
    E jungi Leopardin het ihri Beute im Gebüsch gässe, sie het uns agfaucht und isch denn in d’Büsch sich go verstegge. (Het leider nit glängt für es Foti)

    In dr nöchi vo Hoedspruit läbt au d’Jessica und dr Richie. The world famous Hippos.
    D’Jessica isch im Johr 2000, während ere grosse Überschwemmig am Blyde River an Land gspüelt worde. Sie isch früsch uff d Wält ko, d’Nabelschnuer no dra und vom viele Wasser vo dr Muetter trennt worde. Am Ufer isch sie vom Ehepaar Jouberts entdeckt worde. Sie hän sie zu sich gnoh und d’Jessica mit Milch uss dr Fläsche uffzoge. Hüt isch sie 21 Johr alt und wohnt bi de Jouberts, au im Huus. Sie hän scho mehreri Türe und Sofas miese ersetze😂.
    Sie läbe am Fluss, so ka d’Jessica ihri Freiheit usläbe und trifft au anderi wildi Hippos. Sie kunnt aber immer wieder zrugg zum ässe.
    12 Johr spöter (2012) isch dr Richie au als kleine waise Hippo zu ihne gstoose. Er isch es Männli und dörf dorum in dr Nacht nit frei umelaufe. Den die wilde männliche Hippos würde ihn töte.
    Am Nomidaag hän mir die 2 troffe zur Teatime. Jessica het aber leider nit könne teilnäh, do sie sich vorere Wuche e Wunde im Muul zuezoge het und e Stück Zahn abbroche isch. Also hän mir dr Roibuschtee mit em Richie teilt.
    Er isch e tolls Erläbnis gsi!

    Au vo Hoedspruit us ka me zum Blyde River Canyon. Es isch e 26km lange und 800m tiefe Canyon wo hauptsächlich us Sandstei bestoht. Es isch dr 3. gröschti Canyon uff dr Wält. Wills so viel grägnet het, het me dr obersti Ussichtspunkt nit könne bsueche.
    Aber au vo de „three Rondavales“ isch d Ussicht atemberaubend gsi. Es isch alles sehr grien.
    Bi de“ Bourke‘s Luck Patholes“ kömme 2 Flüss zäme und es bilde sich durch die Wirbel wunderschöni Steiformatione.
    Dr „Lisabon Waterfall“ het sit Johre nüm soviel Wasser gha wie zur Zit. Es isch e wunderschöni Fahrt gsi durch dä Canyon.    Read more

    See translation
  • Meland s Afrikareis
    Zigünerläbe
    d Sandsteifelse,kli Flora und dr Fels wo mr uffe sin.Ussicht vom höchste Punkt im Golden Gate Highlands NPWeissschwanzgnu und Schabrakenschakalachtung Fuessgänger unterwägs2d Touris mit em Nelson Mandela und dr Ussicht vom Naval Hill. Unsere neue Flizzer dr Ford.

    Clarens und Bloemfontein

    February 12, 2021 in South Africa ⋅ ⛅ 27 °C

    Unseri Reis goht langsam wieder zrugg in Süde richtig Capetown.
    In Middelburg hän mr e overnight-stop iglegt, bevor mr denn witer zum kleine Künstlerdörfli Clarens gfahre sin. Klar het me dört kei normali Lodge. Mir sin für 2 Dääg in Zigünerwage Esmeralda izoge.
    Vo Clarnes us sin mr zum Golden Gate Highlands Nationalpark. Dr Park zeichnet sich bsunders über die orange und okerfarbene Sandsteifelse us, wo über die griene Graslandschaft rage.
    Mir sin uff e höchsti Berg uffe gwanderet (und au klätteret) und hän die wahnsinns Landschaft gnosse.
    In däm Nationalpark hän mir s‘erschti mol Wiss-Schwanz Gnus gseh. Sie gsehn speziell us, dr Körperbau vome Gnu, d‘Hörner gsehn mehr wie die vome Büffel us, d‘Mähne glicht die vome Zebra und im Gsicht hän si e abstehende Hohrbüschel. Leider hets in ströme grägnet, dorum ischs Foti nit so klar.
    Au dr Schabrakenschakal isch uns übere Wäg gloffe.

    Nach 2 Dääg hän mr alles wieder zämepackt, mir sin langsam Profis im Packe und zittlich unschlagbar😂.
    Witer isch d’Fahrt in d’Stadt Bloemfontein gange. Isch die sächst gröschti Stadt in Südafrika und d’Hauptstadt vo dr Provinz Free State. Es läbe ca. 256.000 Iwohner in dr Stadt. Obe uff em Naval Hill stoht die grossi Statue vom Nelson Mandela. Au d Ussicht uffd Stadt isch schön vo däm Hügel us und Fuessgänger hets au einigi unterwägs😉

    Schweren Herzens hän mr hüt unsere Toyota Yaris Flizzer nach 7’900 km miese abgäh. Sie hän behauptet me mies e Service mache, obwohl bim Display nüt ufglüchtet het. Mir hätte en also gärn bhalte bis wieder retour nach Capetown, aber är het dringend neus Öl brucht. So hän mr nach e kli Vrrhandle e neue Ford Flizzer beko und reise mit däm witer. Isch e SUV, jetzt gsehn mir d‘Schlaglöcher besser :-) Hoff är erwist sich als genauso zueverlässig wie dr aToyota.    Read more

  • Meland s Afrikareis
    Graaff-Reinet, unseri Unterkunft. s Wetter: Gwitterhaft
    Blessbok, Eland,Gemsbok,Weissschwanzgnu, ZebraObesa Kaktusgarte,(man siehe d Öffnugszite:-)Bsuech bi dbi dr Aunt Evelyne und ihrem kleine RestaurantValley of Desolation, und d Ussicht

    Graaff- Reinet

    February 16, 2021 in South Africa ⋅ ⛅ 15 °C

    Graaff - Reinet isch unsere nöggschte Stop richtig Süde.
    Graaff-Reinet isch umgäh vom Nationalpark Camdeboo und die 4. ältischti Stadt in Südafrika
    Mir wohne imene alte Cottage vo 1850 im viktorianische Stil.
    Camdeboo kunnt vo dr Khoi Sproch und heisst „grünes Tal“. Es läbe vorallem verschieden Arte vo Antilope, Gnu, Zebras und e huffe Vögel im Park.

    Im Obesa Kaktus Garte und Kindergarte het dr pensionierti Strofverteitiger Johan Bouwer 1960 agfange Some z’pflanze und die Kaktee ufzieh. Es sin über 7200 Kaktee, dr Johan het im 2012 uffghört mit zähle, will dass nur fürs Ego sig und es isch dr gröschti privati Kakteegarte wältwit.
    Sie sin zum Teil über 50 Johr alt und riese gross.
    Uff eme umkehrte Bluemetopf im Garte sitzend het uns dr Johan sini Weisheite und e bitz vo sim Läbe verzellt. Es isch sehr spannend gsi.
    Er het uns gseit dass mr unbedingt s’Dörfli Nieu Bethesda mien go bsueche. Dört läbt d’Aunt Evelye, sie kocht sit über 20 Johr für die arme Kinder und het dört e kleins Restaurant und freut sich über jede Bsuech.
    Sie läbt dört imTownship und mir hän uns miese dure froge bis mr sie gfunde hän. Sie isch 70 Johr alt und het e sehr härzliggi Usstrahlig.
    Sie het uns ihrs home made Ginger Beer brocht und uns über Gott und die Welt verzellt.
    Sie wird komplett über privati Spänder finanziert.
    Es sin wunderschöni Begegnige gsi mit em Johan und dr Aunt Evelyne.

    Klar hän mr au s’beriehmte Valley of Desolation,(Tal der Trostlosigkeit) bsuecht. D’Ussicht dört Obe isch wiedermol atemberaubend gsi, die Witti und eifach nur Natur.
    S’Valley of Desolation isch s’Ergäbnis vo vulkanische Aktivitäte und Erosione vo Millione vo Johr. Es bestoht us steile Klippe und Doleritsäule wo 120m überem Talbode liege.    Read more

    See translation
  • Meland s Afrikareis
    Wilderness am Meer
    Prince Albert, De Bergkant LodgeMatjiesfonteinSutherlanddr Mond, isch in dr südliche Hemisphäre grad Spiegelverkehrt wie im Norde. Er isch do am zuenäh.2durchs Telelskop

    Unterwägs und Sutherland

    February 22, 2021 in South Africa ⋅ ☀️ 26 °C

    Vo Graaff-Reinet sin mr nomol uff Wilderness ans Meer. Dört sin mr die zwei Schwizer, dr Hans und d’Christine go bsueche. Mir hän sie kenneglernt wo mr s’erscht mol in Wilderness gsi sin. Es isch e Hotspot für Gleitschirmflieger, was die zwei mit Lideschaft mache. Mit hän viel pläuderlet, verzellt und glache.
    Unseri Bsuechsrundi isch witer gange nomol zu dr Renate und em Michi uff Prince Albert, in DeBergkant Lodge.
    Bimene „lekker Braai“ ( guete Grill) mit guetem Fleisch und e huffe Wyy hän mr au viel z’verzelle gha. Es isch e sehr schöne Obe gsi. Au zum Relaxe und eifach sii, dr perfäggti Ort.

    Im kleine Dörfli Matjiesfontein hän mr e Mittagässe-Zwüschestop gmacht uff em Wäg nach Sutherland. Matjiesfontein isch e Kur- und Ferieort gsi und die ganz Siedlig isch jetzt e Naturdenkmol.

    Witer isch unseri Reis nach Sutherland. Sutherland liegt uff ca. 1’700m.ü.M und isch bekannt für Stargazing (Stärnebeobachte). Sie hän ca. 360 mol im Johr stärneklari Nächt.
    Do Obe stoht s’gröschte Teleskop vo dr südliche Hemisphäre. So hän mr uns intensiv mit unserem Universum usenandgsetzt. Hän d’Milchstroos gseh und bsunderi Stärnbilder wo mir uff dr Nordhalbkugele nit gsehn. Es isch faszinierend was me für Instrument het zum s Universum z’entdecke und dr Blick durchs Teleskop isch atemberaubend.    Read more

    See translation
  • Meland s Afrikareis
    Cederberge
    1uff de Spure vo de San1dr erscht Platte, no rächtzittig gflickt beko vorem verroste:-)Kaptölpel1guet Looose:-)1

    Cederberge

    February 26, 2021 in South Africa ⋅ ☀️ 32 °C

    Dr letschti Stop bevors wieder zrugg nach Capetown goht. In de Cederberge im Städli Clanwilliam. Begrüesst worde sin mr in dr Unterkunft Yellow Aloe uff schwizerdütsch. Dr Michel füehrt die Lodge scho sit 8 Johr und kämpft wie so vieli uff dr Wält ums wirtschaftliggi Überläbe.
    Cederberg isch e 71‘000 Hektar grosses Naturgebiet, wo vorallem e tolli Flora het und bekannt isch für sini spektakuläre Felsformatione.
    Sie baue dr eigene Wyy ah, braue s’eigene Bier und pflanze d’Rooibis- Pflanze ah, wo hauptsächlich in Südafrika gerntet wird für dr weltbekannti Roibuschtee.
    D’Berglandschaft isch nach dr bedrohte Clanwilliam- Zeder benennt, wos nur in dere Region do git. Im 20. Johrhundert het me die wägem Baumboom fascht usgrottet. Elei 2700 Bäum sin zu Telefonmaste verarbeitet worde. Jetzt isch dr Lebensruum vo dr Clanwilliam- Zeder unter Schutz gstellt.

    S’Urvolk vo de San hän sich mit ihrne Felszeichnige in Höhle und Felsüberhäng verewigt. D’Felsbilder sin zum Teil bis zu 6000 Johr alt. D’San hän do in einklang mit dr Natur gläbt. Bevor die europäischi Siedler d’Zedere abgholzt hän für ihri Hüser und Fälder und so d’San vertriebe hän.
    Uff dr Entdeckigstour hän mr s’erscht Mol e Platte gha am Auto. Zmittst uffere Gravel Road bi 36 Grad an dr pralle Sunne. Dank sehr schnälle Hilf vo 3 ganze Familie 🙈😂isch dr Reife im
    nuu gwächslet gsi.:-)

    Im Nochbersdorf Lamberts Bay an dr Küste sin mr zunere riese Kolonie Kaptölpel.
    Öbbe 3000 Vögel läbe dört und kömme jede Summer wieder zrugg zum brüehte.
    Es isch e riese Lärm, denn immer öbber vom Elterepaar goht go Fuetter hole und erkennt den si Partner und die Junge am Lärm ah wieder. Sie sin sich s’Läbelang treu.
    Die Junge kömme erscht nach 4 Johr wieder zrugg do sie erscht denn s’erschtmol Jungi könne beko.
    Sie brühete nur vor dr Küste vo Namibia und Südafrika. Also sehr e sältene Vogel.    Read more

    See translation
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice