Reset search
Andi und PadelAndi und Padel
SatelliteEdit route
Velobegeistertes Paar aus Olten (CH) mit grossen Träumen. Unsere grösste Reise beginnt im Juni 2023 mit Coast to Coast USA in 3 Monaten. Read more Olten, Schweiz
  • TravelerUSA Coast to Coast
    Day 57

    Planänderig im Räge

    July 29, 2023 in the United States ⋅ ☁️ 13 °C

    Gester Obe hets ir Wätter-App gheisse, dases vom Morge bis spot Nomitag rägnet. Erstunlecherwies heimer hüt bi guetem Wätter i Tag chönne starte. Nacheme Säubstbedienigszmorge im Motel simer wieder dr glich Wäg zrügg gfahre, wiemer gester scho cho si, und de witer Richtig Booneville und ad Fulton Chain Lakes wo vo 1-8 nummeriert si. Ungerwägs heimer e Türeler troffe wo Bar Harbor - Portland fahrt. Churz vorem Mittag hets de glich afoh rägne, womer mou nass si gsi, ischs aber gar nid so schlimm gsi und dank em warme Wätter heimer währendem fahre au nid chaut becho.
    Leider gits au hüt wider es paar unagnähmi Begägnige mit Hünd zvermäude. Dr Patrick het dr Bärespray meh aus einisch scho füregno, faus e Verteidigung nötig wärde würd. Aber glücklecherwies simer immer gnue schnäu gsi.
    In Inlet isch dr Plan gsi dr Räst vom Räge loh verbi z zieh und de no 10 km ufe Camping z fahre. Wos aber plötzlech immer länger bis i Obe ine Räge azeigt het uf üsne Wätterapps, heimer üs widermou churzfristig fürnes Motel entschide.
    Hoffentlech heimer die letschte Täg vor Tour wider chli meh Glück und chöi nomou es paar Nächt im Zäut verbringe.    Read more

    See translation
  • TravelerUSA Coast to Coast
    Day 56

    Zmitzt ire Razzia glandet

    July 28, 2023 in the United States ⋅ ☁️ 22 °C

    Nachdem mir hüt nach 25 km am Patrick sis Velo hei chönne id Reperatur bringe, heimer in Oswego imene Kafi 4h druf gwartet dases fertig wird. Zum Glück ischs de am früeche Nomittag sowiet gsi und mir hei no die plante 70 km chönne i Agriff näh. D Campingmöglechkeit im State Forest mit ume See verteilte Plätz het guet tönt. Doch womer si acho isch aus chli weniger romantisch gsi. Bim einte Platz hei d Polizei und dr Sheriff grad e Drogerazzia gmacht und zumene angere simer mitem Velo nid cho wöu mr im Schlamm si bliebe stecke. Genau do si d Möglechkeite leider sehr begränzt gsi und es het ke offizielle Camping imene Radius vo 50 km. Drum hets gheisse 10 km zrügg is nöchste Motel. Das widerum isch drfür sehr idyllisch gläge😄Read more

    See translation
  • TravelerUSA Coast to Coast
    Day 55

    Langsam gspüre au mir d Hitz

    July 27, 2023 in the United States ⋅ ⛅ 26 °C

    Mir si ide letschte Wuche oft gfrogt worde womer si gsi wos so heiss isch gsi. D Antwort isch: Mir wüsses nid, wöu mir hei bis jetz Glück gha hei und nie e Hitzewälle verwütscht hei. Vilech au wöu mr denn ide Bärge si gsi.
    Die letschte Täg hei üs aber zuegsetzt, es isch schwül und mir chöme nüm so locker vorwärts wie gwöhnt. Ei Faktor isch aber sicher au, dass wider meh Höhemeter drzuechöme.
    So heimer hüt knapp 120 km gmacht und si beidi froh gsi womers gschafft hei. Bsungers wöu bim Hingerrad vom Patrick gester und hüt je e Speiche broche isch. Morn gits e Bsuech bimne Velomech. Mir zäutle am Lake Ontario. Dodermit hei mer 3 vo de 4 grosse Seeä bsuecht. Am Nomi hets no es verdients Glas Wii ir lokale Winery gä. Lustigerwis gits dört aber e grösseri Uswahl a Bier als Wii.    Read more

    See translation
  • TravelerUSA Coast to Coast
    Day 54

    Am Eriekanal entlang

    July 26, 2023 in the United States ⋅ ☁️ 27 °C

    Hüt morge hei mir d Grand Island wieder verloh. D Brügg uf dr angere Site vor Insle isch nid agnähmer gsi zum befahre. Dr Velowäg so schmal das mir hei müese zirkle mit üsne vollbepackte Velo. Und uf dr Stross, wo nur vore Leitplanke isch abtrennt gsi, si d Autos und Trucks a üs verbibraust. Aber denn simer dr ganz Tag nume no uf Trails gfahre und hei Kilometer chönne spuele. Dr ursprünglech Plan ab de Niagara Falls heimer scho wider übere Huufe gworfe und si 50 km witer gfahre. D Hitz het aber vor auem ar Andi chli z schaffe gmacht. Oder vilech au d Tatsach dasmer nach 2 Mönet immer no nüt glernt hei bezüglech regumässige Pause und ungerwägs gnue Ässe🫠
    Eigentlech heimer amene Lock in Rochester (gratis) wöue Campe. So wie mr das gläse hei uf dr Website vom Erie-Kanal Trail. Wöu mr üs dört aber nid wohl und sicher gfühlt hei unds ke Alternative ir Nöchi het gä, heimer üs fürnes Hotel entschide. Einisch meh simer froh dasmer üs nid müese überlegge öb mr üs das jetz chöi leiste.
    Und mir si drfür mit Rund umd Uhr gratis Snacks und Getränk überrascht worde. Der Patrick het zum Ässe nur gmeint: "Die wüsse nid uf was si sech ilöh."    Read more

    See translation
  • TravelerUSA Coast to Coast
    2
    Day 53

    Niagara Falls Teil 2

    July 25, 2023 in the United States ⋅ ☀️ 27 °C

    Hüt heimer sit langem widermou richtig und ohni Wecker usgschlofe. Das het mega guet do, mitem früeche ufstoh und em doch nid ganz so tiefe Schlof im Zäut heimer üs es rächts Schlofmanko igfahre.
    Denn simer mitem Bus id Stadt, d Hautstöu isch direkt vorem Camping. Trotzdem si mir die einzige Touris gsi.
    Niagara Falls aus Stadt isch nüt sehenswärts. Überau aues uf Touriste usgleit und chum geit me ei Querstross zwit hingere ischs zimlech abgfucked.
    D Niagara Falls an sich si aber beidruckend und e Pausetag do het sech glohnt. Mir hei s klassische Programm mit Ussichtsplattform und Fahrt mit dr Maid of the Mist gmacht. Denn simer i State Park und hei d Fäll au no vo ganz nöch bestuhnt. E Cocktail/Bier im Top of the Falls Restaurant mit Blick ufd Horseshoe Falls heimer üs ebefalls nid loh näh.
    Am Nomi/Obe heimer de no d Anähmlechkeitem vom KOA gnosse, chli sünnele am Pool het hüt müese si.    Read more

    See translation
  • TravelerUSA Coast to Coast
    2
    Day 52

    Niagara Falls Teil 1

    July 24, 2023 in the United States ⋅ ⛅ 26 °C

    Hüt hei bi üs beidne d Bei am morge chli brönnt vor Etappe gester. Drum si mr froh gsi ischs hüt nid ganz so wiet. Fasch dr ganz Tag heimer uf Trails chönne fahre. Dr letsch het üs direkt uf dr kanadische Site zu de Niagara Fäll gfüehrt. Es cools Gfüehl a sone touristische Ort mitem Velo chönne z fahre. D Sicht ufd Fäll isch sehr beidruckend. No beidruckender isch d Schlange vor dr Gränzkontrolle zur USA. Leider hei mir ir Autokollonne müese warte. E Fuessgänger het üs aber zum Glück gseit mir söue fräch ir Mitti füre fahre und nid ir bränntige Sunne warte - är miech das au immer so. Chli schlächt heimer üs gfüehlt aber mir hei sicher e Stung igspart.
    Die nöchste 2 Nächt verbringe mr ufeme KOA ire Cabin. So chöi mir morn in Rueh d Fäll vor amerikanische Site bestuhne und sowohl üses Gepäck aus au d Velos si sicher verstaut.    Read more

    See translation
  • TravelerUSA Coast to Coast
    Day 51

    Und scho fasch wider ar Gränze

    July 23, 2023 in Canada ⋅ ☀️ 25 °C

    Hüt heimer bir Conny no es richtigs Schwizer Zmorge mit guetem Brot, Ufschnitt, Chäs und Joghurt und Müesli gnosse. Drum simer au relativ spot gstartet. Das heimer ar Hitz gmerkt, morn geits definitiv wieder früecher los. Die erste 30 km si schwierig gsi ir drückende Hitz und mir hei üs gfrogt öb die 160 km, wo ufem Programm si gstange, nid chli zu ambitioniert si. Aber mir wäre nid mir wemers nid dürezoge hätte. Mir si de au besser is Fahre cho und d Pause in Port Dover ire Bakery het üs neue Schub verliehe. Dr 2. Teil vom Tag ischs zum Teil direkt am Lake Erie nochegange, dr Usblick isch schön aber zum bade machts nid ah, z fest isch dr Gstank vom Algeteppich wo fasch s ganze Ufer süümt.
    Hüt simer wider mou ufeme staatleche Camping, schön gläge amene Fluss und für kanadischi Verhältnis günstig.
    Morn morge geits witer nach Fort Erie und de uf dr kanadische Site ufe nach Niagara Falls womer de d Gränze wieder passiere.    Read more

    See translation
  • TravelerUSA Coast to Coast
    3
    Day 50

    Chli Heimat in Kanada

    July 22, 2023 in Canada ⋅ 🌙 19 °C

    Hüt morge simer früeh gstartet und hei zersch mou bim Walmart üsi Vorrät müese ufstocke. Denn ischs Richtig Lake Erie gange. Dr Wind isch nüm ganz so guet gsi wie gester, aber mir si trotzdem zügig vorwärts cho. Zmorge hets wiedermou am Strosserand gä, wöu mr ke gmüetlechere Ort gfunge hei. In Port Stanley heimer wieder glernt dases do nur alles oder nichts git. Dä chli Ort isch extrem touristisch wäg sine zwöi Sandstränd. D Andi het de au es churzes Bad gno, bevor mr imene Kafi hei s Gwitter loh verbizieh, wo aber gar nid cho isch.
    Denn ischs zur hütige Ungerkunft gange: Uf die hei mir üs sehr gfreut sit mr se vor zwöi Täg uf dr verzwieflete Suechi nachere Schlofglägeheit ir nöchi vo Port Stanley amene Wucheend entdeckt hei. D Conny füehrt es B&B on the Farm vo ihrem Ma Jürg. Die beide si ursprünglech usem Thurgau. Es isch so entspannt gsi widermou uf schwizerdütsch chönne mit öperem z rede. Mir hei e gmüetleche Obe mit ihne verbrocht und über sehr vüu diskutiert was eim so uffallt was do angersch isch.    Read more

    See translation
  • TravelerUSA Coast to Coast
    2
    Day 49

    O Canada

    July 21, 2023 in Canada ⋅ ☀️ 24 °C

    Eigentlech isch für hüt üse Plan gsi zumene Camping nöch ar Fähri z fahre und de morn Morge d Gränze z überzquere. Dä Plan hei mr scho nach 40 km verworfe. Dr Wind und die flachi Landschaft hei üs imene Tempo loh fahre womer süsch nur drvo chöi tröime. Bis am Mittag simer bi 100 km gsi und hei e Pause bim Tim Hortons e Pause gmacht, ein Muss füre Patrick.
    D Fähri het üs de übere St. Claire River uf Kanada brocht. D Ireis het sech eifacher gstautet aus dänkt. Die einzige Froge si gsi wie lang mr bliebe und öb mr Waffe drbi hei.
    Ufem Camping acho hets üs zersch der Nuggi usegjagt, wo üs der Bsitzer seit ei Nacht chostet 70 Dollar. Zwar Kanadadollar aber immerno 50 CHF. Mir hei ne de uf 40 US $ abegmärtet. Immerhin heimer de no es Bad im Fluss chönne näh und d Sunne no chli gniesse. Lustigerwies hei mer uf däm Camping au der Rob wieder atroffe. Är heig eigentlech au plant gha ufem State Park uf der angere Site vor Gränze z nächtige, aber dört sig der Strom usgfalle und drum ischer au scho hüt über d Gränze cho.    Read more

    See translation
  • TravelerUSA Coast to Coast
    Day 48

    Wiehnachte im Juli

    July 20, 2023 in the United States ⋅ 🌩️ 26 °C

    Nachdem üs dr John hüt morge no 30 km begleitet het und mr mit ihm Nomou e Donut gnosse hei ischs witergange nach Frankenmuth. Dä Ort womer eigentlech nur hei wöue verbifahre isch üs vo aune empfohle worde chli nöcher azluege. Do isch d Heimat vom grösste Wiehnachtslade wältwiet. Und jo gross isch nur dr Vorname, er isch riesig. Jeglechi erdänkleche Christbaumchugele chame do chaufe. Simer bis jetz sehr zrüghautend gsi mit Souvenirs, heimer do nid ganz chönne widerstoh.
    Zum Glück simer zur rächte Zit do gsi, so heimer am Gwitter usem Schärme chönne zueluege.
    Ufem Camping in Otter Lake heimer zwar gratis dörfe Zäutle, aber näbe üs isch es päärli gsi wo im Auto läbt und e Hung derbi hei, wo ar Andrea definitiv chli z neugierig isch. Mir hei de der Obe am Beach verbrocht und hei so unger der Pergola au am 2. Schauer chönne uswiche.    Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English