Don Pancho

Au die negste zwei Täg gönd schnell verbi obwohl ned meega viel planed isch. Am Mittwuch isch wider Zmörgele und surfe agseit, bevors Zmittag git. D'Surflektion lauft wider super. Mir wechsled uf "grüeni Welle", also die bevor si breched, womer schlussendlich au apeilt zum richtig surfe. Das bedüted weniger Chraft vode Welle im Moment womer ufstoht, also muesmer meh paddle aber defür gits wemer si verwütscht es richtig guets Gfühl. Dank es bitz Astosshilf vom Surflehrer klapped denn das au es paar Mal - genial :) Nachem wohlverdiente Zmittagsnack tretti mal wider mit de Schwiiz in Kontakt und denn heissts vode Surfschuel us organisiert go Strand suuber mache. Miteme Abfallsack sammlemer alles mögliche i, was ned in Sand ghört. Für das dases eigentli en sehr suubere Strand isch, häts doch na viel Züg umeligge... Als Dank gönnemer eus inere Strandbar en Margarita und gnüssed en wiitere wunderschöne Sunneuntergang 😍
Denn gits wider es lokals Znacht und schliessli wagemer eus uf Montañita in Usgang, was sich als zimli lustig und dütlich langwiiriger und intensiver als ich denkt hett usestellt. Obs echt am "all you can drink" für 6 Dollar liit...? Wasi usefinde: min Surflehrer chan gar ned mal so schlecht Englisch. Amel sicher wener betrunke isch klappeds recht guet. Vermuetli ischs bi mim Spanisch öppe glich ^^ Schliessli schaffeds mir 3 Zimmerkolleginne zum eus so verteile, dasmer all unterschiedlich heichömed. Ups 😂

Nach 4 Stunde Schlof verwachi wider und schaffes ned zum namel iischlofe. Janu, stohni halt uf. Ich pläuderle bitz mit allne, isse öpis und gange schliessli is Dorf go luege, wenn am Mäntig d'Büs Richtig Guayaquil fahred. Han mi entschide, dasi di ganz restlich Ziit ufem Festland wett do z'Olón verbringe wils eifach so super gmüetlich isch :)
Ja und denn waagi mi selbständig is Wasser und probiere mi mit de grüene Welle. Hüt sind d'Welle aber grösteteils inexistent oder denn grad sehr gross. Und so lerni vorallem kenne, wiemer ufem Brett liit, warted, Welle suecht und sich debi hine ade Bei verbrennt. Und ab und zue lahni mi vo z'grosse Welle verwütsche, wirde ordentli duregwirblet und luege viel de anderne Surfer zue. Ei Welle verwütschi denn aber perfekt und sto ohni Hilf uf minere erste eigne grüene Welle - was für es Gfühl 💪 Schliessli wirdi müed, gange go Zmittag sueche und hänge mi nacher id Hängematte, woni denn au öppe es Stündli pfuuse, bevori mi für di eigentlich Surflektion parat mache. D'Welle sind immerna ähnlich wie am Mittag, also viel warte und denn vorallem Erfolg dank Hilf bim Aschiebe. Aber he, es fühlt sich immerna grandios a. Nach hüt und dene grüene Welle hani richtig Bock zum drablibe und richtig lerne z'surfe 🤗 Und denn chunnt na es wiiters Highlight wil ich blibe im Wasser und surfe währedem Sunneuntergang 😍
Nach dem wetti nume na öpis: richtig guets Esse. Das isch en astrengende Tag gsi... D'Anouk und ich werded schliessli bim Inder fündig und es isch richtig richtig guets Esse! Zrugg im Zimmer bini eigentli müed gnueg zum go schlofe aber wie so ab und zue Mal, schribi denn glich na Blog, was wie immer meh Ziit brucht alsmer denkt aber die ischs mer wert :)Читать далее