Parea

Womer hüt morge früeh hend welle uschecke, het scho dChatzedame vu geschter uf eus warted und sich mit es paar letzte Schmeicheleinheite vu eus verabschiedet. Nu bevor mer Huahine hüt Namittag verlah hend, hemmer nu die vu eusem Reisefüehrer heiss empfohlni Inselumrundig welle mache... gesagt, getan: so hemmer eus wieder mal en Roller gmieted und eus ufe Weg gmacht.
Huahine bestaht eigentlich us zwei Insle: Huahine Nui (gross) und Iti (chli). Die zwei Inseli sind durch die längst Brugg vu PF verbunde, die isch allerdings nur gschätzli 50m lang :) Während sTikehau Atoll eigentlich nur en Chreis us mit Palme bewachsnem Sand und Koralle isch, wo nid meh als 1-2m usem Wasser ragt, isch Huahine en "richtigi Insle" mit fascht 500m höche, dicht bewachsne Berge. Zudem gits da au nid nur Palme, sondern obe an de Häng gseht mer sogar Nadelbäum und lustigerwis au die Bäum mit de flache Chrone, womer suscht klassischerwis nur us de Savanne vu Afrika kennt :)
Es git nur ei Strass uf Huahine, die füehrt meh oder weniger de Küste entlang, teilwis fahrt mer nur en Meter vum Ozean entfernt. Hinder jeder Kurve wartet en wiiteri kristallklari, türkisi Bucht oft miteme saftig grüene Inseli i dr Mitti und derzwüschet (fascht scho kitschigi) wissi Segelböötli.
In einere vu dene Buchte lit die einzig Perlefarm vu Huahine, sie schwümmt als en Art Huusboot zmitzt i dr Lagune. Mer sind ja scho vor chli meh als 2 Jahr in Broome en Perlefarm ga aluege, da lauft das Ganze ca. glich ab - sogar dMuschelart isch die glich, nur produziert die in warme Gwässer ebe schwarzi statt wissi Perle. Da numal de grobi Ablauf zur Erinnerig:
DPerle wachst imene Art Sack in de Muschle - damit die aber entstah cha mues dMuschle gschlechtsriif si, also scho mind. 3-jährig si. Denn öffnet mer die Muschle en Spalt wiit und planzt ihre en chline Chern in der Sack. Der Chern chan entweder us Plastik si (git aber nur in 5% en Perle drus) oder isch selber scho us günstigem Perlmuett, d.h. wird maschinell usere andere Muschelwand usegschnitte (denn gits in 50% vu de Fäll en Perle drus). De Chern alei langet aber nu nid fürd Perleproduktion us, er wird nu durch en anderi Muschle "besamt". Also suecht sich de Perleexpert en Muschle mit bsunders schönem Perlmuett und "opfered" die "Schlabberhut" wo die innere Organ vu de Muschle umgit. Die Hut wird denn zerchlineret und zämä mit de künstliche Cherne in Sack vu de Muschle pflanzt. Denn hängt mer dMuschle anere Leine in ca. 10m Tiefi (si siged sehr empfindlich uf Temperatur-Unterschied) und holt sie erscht nach 1.5 Mönet wieder use. Bis denn erchennt mer öb dMuschle de Chern abgstosse het oder öb sich tatsächlich en Perle am bilde isch. Wenn de Chern abgstosse worde isch, chamer entweder neui Cherne and Muschelwand chlebe, das git denn in nur 6 Mönet so halbi Perle, oder mer hofft as dMuschle nu en natürlich deformierti Perle hervorbringt - die sind denn günstiger, bestehnd aber denn zu 100% us Perlemuschle wel kei künstliche Chern igsetzt worde isch. Wenn hingege dMuschle de Chern nid abstosse het, denn chamer 1.5 Jahr später en Perle ernte. Falls die wohlgformt und schön glänzig isch, chamer in die glich Muschle numal en neue Chern ipflanze - ca. glich gross wie dPerle womer vorher gerntet het. So gits überd Jahr immer grösseri Muschle - wo aber allerdings immer die glich Dicki an Perlmuetter dra hend, schliesslich wird ja eifach de Chern immer grösser! Nach vier Mal Ipflanze (also 9 Jahr) isch denn Fiirabig, aber es isch zimli selte as en Muschle so lang schöni Perle produziert, meischtens werdeds scho vorher abgstosse.
Nach de Perlefarm simmer nu dÜberrest vumene Marae ga aluege - das isch früener es wichtigs Besammligs-Hus zu religiöse und soziale Zwecke gsi. In Neuseeland hend das dMaoris bis hüt nu :)
Am früene Namittag hemmer eusi Insel-Rundfahrt abgschlosse und sind zum Flughafe - knapp 15 Minute später simmer scho ufem legendäre Bora Bora glandet! Nur scho de Landeaflug isch sehr schön, die bergig Insle i dr Mitti, umgä vu mehrere Gürtel-Insle und natürlich em berüehmte türkise Wasser! Hie isches denn umgekehrt als uf Tikehau oder Huahine gange: zerscht simmer mimne Boot-Shuttle zur Hauptinsle (mer landet ufem Insel-Gürtel im Norde) und denn mim Auto bis zu eusem Hotel Maitai (heisst btw au "ja" uf Tahitianisch, nid nur glich wie de Cocktail :)). Gemäss Google isch das es "simples Hotel am Strand" resp. scho spräferierte "Budget Hotel"... und das bi fascht 500 CHF pro Nacht! Eus gfallts uf jedefall guet, wohl au wel mer es Upgrade inen Overwater Villa becho hend, das hemmer eus bis etz nu nie gleischtet :)*Read more