Bentota River Sea Plane Base

Hüt hemmer eus zämä mit Fredi und Wiggi überleit, wie asmer die negschte paar Wuche wend verbringe. Aktuell planemer de südliche Küste nachezga, denn chli Inland zu Plantage und Temple, und denn in Nordoste ga kite. Dernach hemmer d Uno-Saison gstartet - das wird sicher nu paar gueti Battles gä. Mer (d.h. v.a. de Sämy) sind uf jede Fall scho etz mit Abstand die lütiste Gäst im Hotel, mit vil Gjaul v.a. bi 7er im Uno und Ping Pong Zweikämpf.
Später simmer sogar nu is Meer, wo hüt scho um einiges ruhiger und blauer isch gsi - doch nach wie vor hend eus die Iheimische gseit, mer seled weg de Strömige nid meh als Hüfttüf is Wasser ga. Zum chli Wellespringe und Tolle hets uf jede Fall glanget. Btw euse erschte Ganzkörper-Kontakt mit Salzwasser uf euser Weltreis!
Vorem Znacht het denn am Sämy sin Wuschelchopf messe dra glaube - d Martina het ne mit de Tondöse regelrächt gschore :) zwar mit eis zwei Patzer, aber sEndergebnis laht sich glaubs scho la gseh, zumindescht da in Sri Lanka :)
On a more serious note: die heftige Gwitter und Regefäll vu de letschte paar Täg sind wohl scho eher ussergwöhnlich und teilwis kritisch fürd Bevölkerig. So hemmer hüt erfahre ases in Colombo und andere Siedlige Überschwemmigä gä het und durch Blitzischlag und Erdrutsch sogar 7 Lüt ums Lebe cho sind! Mer hoffed as sich d Wetterlag in de negschte Täg stabilisiert.Leer más