En Schock, E Entüschig und en Aal

Mir händ eus mega gfreut uf euse Trip nach Lunenburg (es wunderschöns chlises Fischerdorf) und Mahone Bay womer scho vor es paar Täg buecht hend. Grad womer eus am Morge am 9i uf de Weg gemacht hend, hemmer e Nachricht vom Tourabüter becho dass de Treffpunkt gänderet hät. Am neue Treffpunkt acho hemmer denn usegfunde wieso, es hät e Messerstecherei geh ide Nacht am ursprüngliche Ort und Polizei het alles abgsperrt 😨 Jänu, passiert hald leider überall uf de Welt. Nachdem mer am neue Ort zerrsch vergäbe gwartet hend, hemmer denn nacheme churze Telefonat de zueständig Typ dochna gfunde. De Höhepunkt vo dere Gschicht isch denn e Halbstund spöter gsi, wo de Holzchopf denn plötzlich gmeint hett es hegi es Missverständis geh und sie heged leider kein Bus hüt für eus. Messi für de. Sie hend eus denn en Refund geh und eus Gratis uf jede Tour womer hend well umbuecht. Mir gönd jetzt (hoffentlich) am Zistig uf Lunenburg, und zwar Gratis (being Swiss, I love free stuff 😂). Was machemer jetzt mitem ahgfangene Tag? Mir händ den es Schiff uf d St. George Island buecht, e Insle gad usserhalb vo Halifax miteme alte Militärstützpunkt/Fort druff. Dete hemmer e Tour dur die alte Katakombe gmacht wo mega spannend gsi isch, vorallem die Lady wod Tour gmacht het isch mega gsi. Zrugg ufem Festland hämmer denn euse Zmittag im Restaurant Black Sheep gässe (D' Simona Miesmuschle und ich Eggs Benedict, beides top👍). Nach dem viele laufe hemmer den denkt mir müend eus chlii usruebe. Bis zum Znacht hemmer den nüme vil gmacht usser en Spaziergang und gschnell go iichauffe. Ide Izakaya Kanpai hämmer den wieder mal Phänomenal gässe, mer händ vil chlini Sache zum teile gha, aber vorallem s Tonkatsu und der grillierti Aal sind mega gsi (de Aal isch absolut öppis vom beste gsi woni jemals gässe han, super zart und grad uf de Zunge gschmolze). Dezue hets es Galaxy IPA vo Propeller geh. Als Abschluss vom Weekend simmer denn na id Brauerei 2 Crows ide nöchi vom Hotel. Und das het sich sehr glohnt, ihri Foeder-glagerete Suurbier sind mega gsi (s eine mit Marquette Trester und Pflume het würklich alles übertroffe) und de Ort selber isch mega gmüetlich und d Dame ade Bar mega guet druff gsi. D Simona het zum Abschluss no en Beerslushie gha, de isch aber Verbesserigswürdig gsi. Another day, another night! Bis bald🙌Read more