Big city life

Hüt hemmer Santiago erkundet - zum Ufwache isches direkt zu de Fischständ vum Mercado Central gange... leider nüm all allzu früsch gsi, beurk! Denn simmer durch dStrasse rund um dPlaza de Armas mit de Catedral Metropolitana gstrieled, halb am Sightseeä, halb uf dr Suechi nachere neue Sunnebrille für de Sämy und emene Reisefüehrer für Chile... nach sicher 10 erfolglose Optiker-Bsüech hemmer endlich en Sunglass Hut gfunde, wo de Sämy die perfekt matt polarisiert Ray Ban gfunde het - Part I accomplished. Für Part II hemmer tatsächlich mit dr Metro bis inen Vorort vu Santiago messe fahre - doch da hemmer denn en top usgrüschtete Travel Book Lade gfunde. Um eus nid in jedem Land wieder dFüess für en Guide messe plattzlaufe, hemmer denn au grad all Bücher für die bisher geplante verblibende Länder poschtet: Chile, Bolivie und Peru. Dem chline Lade hemmer wohl grad en guete Umsatz-Boost verpasst, de Bsitzer het eus als chlises Dankeschön nu grad es Spanisches Phrase Book gschänkt - de neu treu Begleiter vum Sämy :D
Am Namittag hemmer ufe Cerro San Cristobal welle, doch da mer scho langsam chli fuul worde sind, hemmer eus für de Ufeweg dStandseilbahn gönnt :) Die gseht us wied Polybahn - nur in grüen, offe, chli länger und steiler :) Vum Gipfel (mit wisser Maria - evtl. als Pendant zu Rio?) gseht mer über die ganz Stadt (wo abgseh vu Wohnblöck eher flach isch) und dAndä im Oste. Nur 20km vu dr Stadt hets scho über 3'000m höchi Gipfel und chli wiiter, a dr Grenze zu Argentinie, lieged die höchste Berge vu de Andä mit über 6'900m!
Nach so vil Idrück simmer in eis vu de vilne Cafe-Bars ikehrt und hend traditionelli Pisco Sours probiert - super fein, aber bemerkbar effektiv!
Ufem liecht beduselte Heiweg het en schöni Überraschig uf eus gwartet: nachdem mer weder in Singapur, no in Indonesie, Fidschi, Neuseeland oder Polynesie hend chenne NuvaRing uftriibe, hemmer etz erfahre asmer die in Chile sogar ohni (!) Rezept chaufe cha! :o Zrugg im Hotel hemmer eus grad wiiter chenne freue, denn eusi ganz dreckig-füecht-salzig Wösch vu de letschte paar Wuche het suuber und nu Tumbler-warm uf eus gwartet :)
Zum Znacht hemmer kei grossi Sprüng meh möge mache: mer sind en super Burger ga esse und hend uf de Plaza de Armas nu anen paar öffentliche Schach-Partie zuegluegt... unglaubliche Speed und Chälte-Resistenz hend die Amateur Spieler!
Zrugg im Hostel hend eus nu die zwei huuseigne Chatze beehrt - wobi beid en unerchlärlichi Freud a eusem Lavabo gha hend :)*Read more