Costeño Beach/Tayrona

Ide Nächi vo Palomino isch de Parque Tayrona gsi. En rächt en bekannte Nationalpark.
Zum det anegah hani es bekannts hostel ide Gägend gno: Costeño Beach Hostel. Gschlafe hani ineme 32er Zimmer. Tönt schlächt, isches aber nööd. Es isch en riisige und offene Saal gsi. Eigentli hets dete eifach 32 Bettene gha und es Dach. Wänd hets kei gha. Mir hend sozöge im freie pennt. Aber Mosquitonetz hets gha. Es isch also eigentli na recht de hammer gsi. Am erste Abig hani denn gad na e Gruppe vo Europäer (3 dütschi, 1 franzos, 1 schwed und 2 italos) kenneglernt wo in Mexico im Ustusch gsi sind und nach 1.5 mönet bereits fertig gsi sind mitem Ustuschsemester 🙂😂 Mit dene simmer denn in Tayronapark und am Folgetaag go Tubing mache. Das isch eigentli nüt anders wie mit eme Luftdonut in Fluss z ligge. De Tourguide vom Tubing het eus ufem Wäg no empfohle eis z Kiffe, s wär eigentli scho fascht ein Muss, er wür eus sust au grad scho zum Verkäufer bringe (de Priis isch ih dere Jahresziit 2.- für en joint, d Ernte seg ebe grad chli knapp ide Region 😂).
De Guide het denn 1 Schwümmweste z wenig gha, will ich aber schwümme chan, hetter gseit bi mir segs überflüssig 😂 alli andere wo aber au hend chönne schwümme hend eini müesse träge haha
Jetzt würkli, das Tubing isch eine vo de lustigste Aktivitäte woni uf de Reis bis jetzt gmacht han, vor allem mit dere Konstellation ah Persone. S highlight sind d Italiänner wenns mit ihrem italo akzänt englisch redet. Egal was sie uselönd, es isch eifach lustig.

S hostel isch super gsi, eini vode beste massage woni je gha han für 12.-/stund, direkte meerzuegang, super ässe und täglich e Party. Am letschte Taag isch zwar alles usbuecht gsi, wenn mers aber guet mit de receptiion hät, denn chunnt mer en Staffruum mit eigenem Bett über für 10.-/nacht (weniger als es bett im 32er Schlaag).Read more