Tetapkan semula carian
Süd- und Zentralamerika
  • Michelle Kiener

Süd- und Zentralamerika

Ab ines neus Abentür ufem ne neue Kontinent. I reise es paar Monet dür Südamerika. D Route isch no sehr offe u bi drum gspannt, wo das mi here zieht... Baca lagi
+2
IkutiRingkasanKalendarKongsiKongsiSenarai baldi
Terbaru dahulu
  • Michelle KienerSüd- und ZentralamerikaPengembara
    Da het si üs zeigt, weles Gmisch das weli Farb git
    Hie het si d Wulle gfärbtE Frou bim WäbeBlick ids Sacred ValleyDas si die Steine wo när Hüser drus bout werdeHie ischsi am Figürli us Lehm amale

    Webe und töpfere im Sacred Valley

    5 Julai 2024, Peru ⋅ ☀️ 19 °C

    Sooo mi Mage het sech hüt zum Glück still gha u so langsam chani wider afa esse. Hüt isch nomau e gmüetlechere Tag gsi. Mir si am Morge mit dr Gruppereis gstartet u si zersch uf Ccaccaccollo gfahre u dert heimer de Chuechua-Froue dörfe bim webe zueluege. Si steue dert alles mögliche här us Schaf-, Alpaka- und Lamawolle. Ei Dame het üs verzeut wisi die Wulle de tüe färbe u zwar si ds aus natürlechi Sache wie Pflanze, Blueme, Salz, Quartz u no vieles meh. Ds isch sehr beidruckend gsi.

    Witer simer när zure Töpferei gfahre. Zersch het üs e Herr zeigt wisi tüe Hüser boue. Für das wird Lehm miteme Gras zeme gmischt u vertramplet u ner chunnt ds ine Form. Bis ds ganze Gmisch troche isch geits öpe e Monet. Us dene Chlötz wos de git tüe si ner ihri Hüser boue. Si tüe dert mitem Lehm oh no huufe anderi Sache hersteue: Tassli, Schüsseli, Chöttli u no anderi hübschi Souvenirs. Weni gnue Platz i mim Gepäck hät, hätti definitv öpis kouft.

    Nachdem heimer es feins Mittagesse übercho u si no uf Ollantaytambo gfahre. Hie het üs üse Guide no meh über d Inkas verzeut. Die Stadt isch nämlech sehr wichtig i ihrer Kultur. Morn geits für üs ab ufe Inka Trail für vier Tag. Mir si gspannt was üs erwartete u ob mers schaffe die vier Tag dürezwandere.    Baca lagi

    Lihat terjemahan
  • Michelle KienerSüd- und ZentralamerikaPengembara
    Los geits bi Km 83
    Da heimer no glachetEine vo üsne 18 Porters. Die mache e ungloubleche, herte Job wo schlecht zahlt isch...Ufem Dead Womans PassUnterwegsÜsi Chöch hei üs e Turte gmacht am letschte TagLebensziel erreichtMachu Picchu vo obeIr Ruine Stadt

    Camino Inka to Machu Picchu

    6–9 Jul 2024, Peru ⋅ ⛅ 22 °C

    I ha lang überleit wini die vier Tag Inka Trail gschid ine Bitrag verpacke ohni daser z läng wird. Was mer uf däm guet 45km länge Trail erlebt hei, chame gar nid imne Bitrag verfasse, me muess es selber erlebt ha.

    Trotz mim schwache Mage bini sehr motiviert gstartet. Dr erst Tag isch im Verglich zum Reste no eher gmüetlech u z loufe isch sehr gäbig gange.
    Dr zwöit Tag isch dr strängst, da me am längste louft, aus berguf und me passiert dr höchst Punkt vom Trail, d Dead Womans Pass uf 4'215 M ü. M. Mi Mage het scho am Morge ume nid so wöue u i bi drum sehr langsam losgloffe. Zwüschine isch mau besser worde, aber die huere Stägetritte ufe si scho sehr sträng si. Churz vorem Pass isch mer ume chli übel worde u i ha es Pöiseli brucht. Wonis de ändlech ufe Pass gschafft ha, bini so erliechteret gsi u so glade mit Emotione dasi eifach gredi use ha afa gränne. D Guides u dGruppe heimi de tröstet u mer Muet gmacht. Offebar passiert ds nid nume mir dert obe. Umso glücklecher bini gsi womer de z Basecamp am Nami erreicht hei.
    Dr Dritt Tag isch besser gsi u i ha viel meh Energie gha. Landschaftlich isch das dr schönst Tag gsi vo aune.
    Am vierte Tag simer am 3 am Morge uf zum packe und losloufe. Dür das simer scho früeh a üsem eigentliche Ziel acho. Mir hei e Tour gmacht dür Machu Picchu u si mega beidruckt gsi.

    I ha i dene vier Tag viel über d Inkas erfahre. Dr Wäg dert here het mi meh beidruckt aus Machu Picchu säuber. Me gseht no so viel meh Ruine unterwegs, wo derzue ghöre weme sech für die Kultur intressiert. Zudem bini überrascht gsi vo mir säuber u wasi aus cha erreiche weni gnue Wille ha. Üsi Pumas Crew (üse Gruppenme) isch wine Family gsi, me het sech gegesitig motiviert und unterstützt. Üsi zwei Guides, Raùl und Katy, si immer für üs da gsi. Üsi zwei Chöch hei immer hammer Esse zuebereitet u gluegt dases a nüt fehlt. U üsi 18 Porters (Träger) hei z ganze Material ire wahnsinns Gschwindigkeit vo A nach B treit u derfür gsorget, das aus isch parat gsi we mir achöme. Ohne die Crew im Hintergrund isch sone Wanderig nid möglich. Dankbar, Glücklech, Müed und mit viele Idrück simer in Cusco acho u froh gsi, mau ume chönne ga zdusche.    Baca lagi

    Lihat terjemahan
  • Michelle KienerSüd- und ZentralamerikaPengembara
    Moray
    MarasSalzterrasse vo MarasInnehof in ArequipaCrepes mache glücklech

    Moray, Salzterrasse u e Nachtbus

    11–12 Jul 2024, Peru ⋅ ☀️ 18 °C

    Da mir letscht Wuche vorem Inkatrail no e Tour hei müesse absäge, heimer denkt, die hüt no nachezhole. Mir si zwar nid mega zfriede mit dr Organisation, hei ihne aber nomau e Chance gäh. Aus ersts simer zure Weberei gfahre. Ds isch für üs nüt neus gsi u eigentlich oh nid ufem Programm gstande. Leider si die Froue wo dert webe viel meh unter Stress u si het üs ire mega Gschwindigkeit aus abegliiret. Witer simer zure Inkaruine wo Moray heisst. Dert hei d Inkas probiert verschiedeni Gmües azpflanze, wo i dere Höchi eigentlich gar nid wachse. Dr Guide het leider nid meh gwüsst zverzeue u dr Bsuech isch mega churz gsi. Nachdem heisi üs uf Maras bracht, womer ime Lade hei öpis über d Salzherstellig erfahre u hei chönne shoppe. Natürlech simer de die bekannte Salzterrasse no ga aluege. Ds Salz chunnt vom Berg u sammlet sech i dene 3'000 Pools. Pro Familie ghöre 5 setigi Pools u die entscheide de obsi wei ärnte oder nid. Ds isch mega idrücklech gsi.
    Zrugg im Hotel heimer no üsi Rucksäck umpackt u ner simer zum Terminal uf üse letscht Nachtbus hie.

    Am Morge früeh simer in Arequipa acho u hei nid mega viu gschlafe. Zersch simer ga zmörgele u ner chli dür z Städtli gloffe. Zwüsch in simer ume iz Hostel zum häre liege u dusche. Am Nami hets de ume es hüngerli gäh u mir hei üs feini Crepes gönnt. Morn weimer no meh vor Stadt gseh, aber hüt heissts afa mau früeh ga schlafe.    Baca lagi

    Lihat terjemahan
  • Michelle KienerSüd- und ZentralamerikaPengembara
    Innehof mit Orangeböim
    Mega farbefrohEs Strässli im KlosterD Wöscherei vo annodazumalDa gseht me no Ruine vom ErdbebeMis Queso Helado

    E Stadt ire Stadt

    13 Julai 2024, Peru ⋅ ☀️ 22 °C

    Mir si ume mau beidi nid so zwäg u hei drum chli länger pfuset u z Programm chli zrugg gschrubt für hüt.
    Womer üs einigermasse fit hei gfüehlt simer zum Kloster gange vo Arequipa. Ds isch mega sehenswärt wius "e Stadt ire Stadt" isch.
    Mir hei üs chönne are dütsche Füehrig aschliesse u drum viel drüber erfahre. Dä Teil wo mir si ga aluege ghört zum alte Kloster u isch iz es Museum. Mitti 20. Jahrhundert hets es grosses Erdbebe gäh u ds het e Teil vom Kloster zerstört. Z neue Kloster isch gad nebedran u dert lebe aktuell 13 Nonne.
    Im alte Kloster hei annodazumal nume jungi Meitli vo riche Familie inedörfe. Zudem heisi müesse spanischer Abstammig si. Zu Spitzezite hei dert öpe 500 Nonne gläbt. Die Nonne hei dert aui ihres eigete Hüsli mit Bedienstete gha u es isch ne sehr guet gange. Wesi einisch iz Kloster si, hei si für immer müesse dert bliebe. Sie hei die Muure nie verlah. Inne gsehts aber us wines chlises Städtli u si hei recht viel Platz gha. Hützutags isch ds natürlich chli anders u d Nonne lebe freier. Si dörfte oh z Kloster für immer verlah wesi möchte. I has mega idrücklech gfunde Gschicht z erfahre und dür die Gässli spaziere. Mir si nach dr Füehrig no iz Kafi vor Ort ga zMittag esse u ner nomau dür z Museum spaziert u no viel meh entdeckt. Ds het aus me Zit brucht aus erwartet.

    Nachem Kloster simer ines Kafi ga Dessert esse. Arequipa isch bekannt für ihres Queso Helado (= Chäsglace übersetzt). Es besteit aber nid us Chäs, sondern eifach us Milch u wird mit Zimt serviert. Isch auso sehr fein gsi.

    Iz simer scho ume im Bett u hoffe, mir chöi üs no chli erhole. Morn morge gömer wider uf nes 3-Tägigs Trekking.    Baca lagi

    Lihat terjemahan
  • Michelle KienerSüd- und ZentralamerikaPengembara
    Blick i Colca Canyon
    Tag 1 ufem TrekkingÜses Hüsli ir erste NachtZ Brüggli hets im Februar weggschwemmt. Guet isch TrockezitÜses GrüppeliUnde isch Sangalle u obe gseht me dr Weg vo Tag 3.Pool in SangalleHeissi Quelle im Colca TalBlick uf Vulkän. Dr Sabancaya isch no aktiv.

    Neui Wuche, neus Trekking

    14–16 Jul 2024, Peru ⋅ ☀️ 17 °C

    Offebar heimer no nid gnue gha vom wandere u hei darum es drütägigs Trekking buecht dürs Colca Tal. Ds isch bekannt für Kondore u es isch eine vode töifste Canyon wos git. Am erste Tag heimer am Morge am 3 müesse parat stah füre Bus, cho ischer de am 4i. Wer mi kennt weiss, dasi ke Früehufsteherin bi u hami drum scho denn liecht gnervt, das mer e Stund schlaf isch klaut worde.
    D Fahrt iz Tal duuret ca. 3 h u isch oh nid sehr agnähm gsi. Aber churz vorem Mittag heimer üse Guide, dr Ismael, troffe u si endlech losgloffe. Es isch drü Stund abwärts gange, was super isch gsi, wiu mer beidi erkältet si. Was weniger cool isch gsi, isch d Hitz. Mir hei nid würklich mit so warme Temperature grächnet u leider isch dr Wäg nur ar Sunne gsi. Dr Blick i Canyon isch aber mega idrücklech gsi. Mir si de müed im erste Hostel acho u hei dr Nami dert gnosse. Mir si si es chlises Grüppeli; nebst em Guide isch no es belgisches Päärli derbi.

    Dr zwöit Tag hani am schönste gfunde u am agnähmste zum loufe. Mir si vom einte chline Dörfli zum nächste gloffe. Zersch ischs es Momentli ufe gange, ner Flach witer u de no abe. Auso e perfekti Mischig. Mir si in Sangalle übernachtet. Dä Ort treit oh dr Name Oasis, wius i au dene karge Berge e mega grüene Fläck isch u würklech chli usgseht wine Oase. Zudem hets dert nur Unterkünft für Touriste, d Lüt wohne nid dert. Üses Hostel isch mega schön gsi miteme riesige Pool u viel Pflanze. Mir hei dr Nami dert gnosse mit bädele, Spieli spile u liege.

    Dr dritt Tag het am 4.30 gstartet. Hüt geits nume ufwärts u da mir wider am Sunnehang si, isch super, das mer so früeh scho losloufe. Es isch öpe 3h ufwärts gange u recht streng gsi. D Stimmig am Morge isch aber mega schön gsi u drum het sechs glohnt so früeh ufzstah. Obe heimer zMorge übercho u ner simer witergfahre zude heisse Quelle. I dem Tal hets viel Vulkän, einigi si sogar no aktiv. Dür das hets natürlechi heissi Quelle u dert simer ga bädele. Nachem Mittag heimer no ame Ussichtspunkt ghaute uf 4'900 m u vo dert gseht me die viele Vulkän no besser. Nachdem isches wider zrugg gange uf Arequipa.    Baca lagi

    Lihat terjemahan
  • Michelle KienerSüd- und ZentralamerikaPengembara
    Z Flugiii
    Blick über d LandschaftDr AstronautIz wirds schwieriger: wär gsehr dr Aff?Da wäri d SpinneleDa si mehreri druf u eis geit mitz über d StrassBlick uf NazcaDie alte AquäduktZwei Teletubbies

    Höheflug in Nazca

    19 Julai 2024, Peru ⋅ ☀️ 24 °C

    I de letschte Täg simer viel greist u heis eher gmüetlech gnoh. Jede Tag Action weme nid ganz fit isch, isch nid z empfähle. Mir hei mittlerwile d Höchi verlah u si zerste mau sit öpe 1.5 Monet wider unter 1'000 m ü. M. Zudem heimer churz z Meer gseh.

    Hüt simer aber glich nomau bitz id Höchi. Nazca isch vorauem bekannt für d Nazca Linie. Ds si Geoglyphe, wo hunderti vo Jahr aut si u vor Nazca-Kultur stamme. Me gseht die grosse Scharrbiuder nume vome höche Berg oder vom Flugzüg. Mir hei üs lang überleit, ob mer dä Flug würklech söue mache. Aber aui womer gfragt hei, heis nid bereut. Dr Flug isch mit some chline Flugi gmacht worde u mir si nebst de zwei Pilote nume füf Persone gsi. Scho allei das isch es cools Erlebnis gsi. D Biuder het me de recht guet gseh vo obe u si si scho recht beidruckend. Gäge Schluss simer oh no über d Stadt Nazca gfloge und über die dert bekannte Aquädukt us dr Nazca-Kultur. Mir hei dr Flug definitiv nid bereut u heis mega toll gfunde, z Land so oh no vo obe zgseh.

    Iz höckle mer ime Kafi u warte uf üse Bus nach Huacachina.    Baca lagi

    Lihat terjemahan
  • Michelle KienerSüd- und ZentralamerikaPengembara
    Uf de Düne
    Üse BuggySand...1BodyboardeSunneuntergang ir WüestiAr Lagune vo HuacachinaÜses Top MatrialJulian am Skifahre

    Sandbuggy, Bodyboarde u Skifahre

    20–21 Jul 2024, Peru ⋅ ☀️ 24 °C

    Mir si ir Wüesti acho, genauer ir chline Oase Huacachina. Hie hets e chlini Lagune u drum um huufe Hotels u Restaurants.
    Am erste Tag simer aber zersch uf Ica id Stadt, da mir hei Bargeld brucht. Mir si de oh no chli dür d Stadt gloffe bevor mer mitem Tuktuk ume zrugg uf Huacachina si. Dert heimer für am Abe e Sandbuggy-Tour buechet. Ds isch hie so zimlech z Must-do. I bi zerste mau ire Sandwüesti u bi scho recht beidruckt vo dene grosse Sanddüne. Z Buggyfahre isch recht lustig u abentürlich gsi. Fasch chli wie ufere Achterbahn. Nachdem er mit üs ä Cher het gmacht, heimer no dörfe Bodyboarde. Da rütscht me miteme Brett e Sanddüne abe. Ds het oh mega gfägt. Gändet het ds Usflügli miteme schöne Sunneuntergang u huuuuufe Sand ide Schueh.

    Am nächste Tag heimer üs de agmäudet zum Skifahre. Mir isch fasch dr lade abe woni gseh ha, das si hie Ski vermiete. Natürlech heimer üs ds nid la entgah im Sand chönne Ski zfahre. Vor Ort het er üs no chli verzeut uf was me im Sand am beste luegt, wiu es isch scho bitz anders aus im Schnee. Dä Spass isch für mi leider nach dr erste Fahrt scho verbi gsi, wiu i bi umgheit u ha z Chnöi verdräiht. Es isch nid mega schlimm, tuet aber glich weh u i ha mi nid no meh wöue verletze. Julian isch die räschtleche Düne no abegfahre u bi eifach mitem Buggy mit.    Baca lagi

    Lihat terjemahan
  • Michelle KienerSüd- und ZentralamerikaPengembara
    Strand vo Paracas
    1DelfinWider es guets zMorgeD Stadt PiscoNeusti Strasse, aber d Hüser drum um i schlechtem ZuestandDie grössti Muschle am Strand :-PIde Rebe vor BodegaI dene Tanks wird Pisco hergsteutDegustation het nid dörfe fehle

    Vo Pisco zu Pisco

    25 Julai 2024, Peru ⋅ ☀️ 21 °C

    Die letschte Täg si sehr ruhig gsi. I ha mis Chnöi stiu gha u ds het sech glohnt. Es tuet nämlech scho viu weniger weh bim loufe. Zudem simer no vo Huacachina uf Paracas gfahre. Hie verbringe mer ume es paar Tag. Dr erst Tag heimer mit usschlafe u Dörfli erkunde verbracht. Paracas isch am Meer u recht touristisch. D Peruaner hei aktuell Ferie u drum hets zurzit oh viu Iheimischi hie. Womer de am Meer si entlang gloffe, het üs e Frou gseit es heig Delfine am Strand (auso im Wasser) u womer de chli nöcher si, si tatsächlich zwöi Delfine ir nechi vom Strand umegschwumme. Ds isch rächt e coole Moment gsi.

    Hüt simer fein ga zMorge esse imne herzige Kafi. När heimer es Usflügli gmacht uf Pisco. Zersch heimer denkt, mir chönnte e Roller miete, aber si hei üs dert derfo abgrate dermit uf Pisco zfahre u ds isch oh guet gsi eso. Si het nis aber gholfe es Taxi z becho u gluegt, das mer nid z viel zahle defür. Mir si houptsächlich uf Pisco zum Geld hole, d Stadt selber isch nid mega schön. Vor paar Jahr hets hie es Erdbebe gäh u ds gseht me teilwis no ade Hüser ah. Viel isch kabutt u glich gseht me neb kabutte Hüser scho ume neui Strasse, wo eigentlich viu z Gross si für sone chline Ort.

    Vo Pisco simer no witer id Bodega 1615. Sie stelle z bekannte Getränk Pisco her u me cha dert d Fabrik aluege und ga degustiere. In Peru isch ds fasch ein Muss, dr Cocktail Pisco Sour isch schins in Lima erfunde worde u mittlerwile Nationalgetränk. Dr Härewäg isch chli speziell gsi, da dr Taxifahrer ke ahnig het gha, wo er here muess. D Füehrig isch aber umso besser gsi. Si het sich mega müeh gäh mitem spanisch, wiu si het gwüsst, das mer nid viu verstöh. Pisco isch e Wybrand u mir hei zersch e Willkommensdrink übercho u ner d Rebe dörfe ga aluege. Nachden simer witer id Fabrik, wosi üs dr Prozess het erklärt u schlussendlich heimer dörfe degustiere. Es isch sehr spannend gsi, meh dörfe drüber zerfahre u probiere.    Baca lagi

    Lihat terjemahan
  • Michelle KienerSüd- und ZentralamerikaPengembara
    E Humboldt PinguinEs KräbsliPelikaneE SeelöiMach dr Pizzaiolo😍😋

    Galapagos vo Peru

    26 Julai 2024, Peru ⋅ 🌬 17 °C

    Dä Morge simer ume eis früeh uf. Üse Airbnb Vermieter het oh no e Travel Agency u mir hei bi ihm e Tour buechet ufd Islas Ballestas. Me seit oh, ds sige Galapagos vo Peru, vorauem wäg ihrer Fauna.
    Z Wetter isch am Morge aube no nid so super, aber mir mache doch z Beste drus. Mir si mitem Schiff richtig Insle usegfahre u dr Guide het üs immer wider öpis drüber verzeut. Mega viu het me nid verstande, aber mir hei de eifach Tier beobachtet. Me het Pinguine gseh, Seelöie, Krebsli, Pelikane u süsch no huufe anderi Vögu. Ufem Rückweg simer sogar no zwöine Delfine begägnet. Oh we ds Wetter am Morge no nid het mitgspiut, isches doch recht cool gsi so viu Tier ir freie Wildbahn zgseh.

    Dr Nami heimer uf dr Terrasse verbracht mit Tagebuch schribe, Recherchiere u chli si. Für zNacht heimer d Idee gha, Pizza z mache. Es het zwar kes Backblech gha, aber Bratpfanne tuets oh u mir hei e super feini Pizza gnosse.    Baca lagi

    Lihat terjemahan
  • Michelle KienerSüd- und ZentralamerikaPengembara
    Sandbuggy zum dritte
    D Oase Costa RicaSändeleSanddüneVelöle (da hani no glachet)La Catedral - da isch mau e Boge gsi vorem ErdbebeLa playa rojaSchono rot dä Sand

    E witeri Oase und es Velotüürli

    27–28 Jul 2024, Peru ⋅ 🌙 15 °C

    Gester heimer e witeri Oase bsuecht. D Oase Costa Rica isch oh no natürlich (Huacachina isch nüm natürlich, wius vom Tourismus isch zerstört worde). Mir hei gstuunet womer vorem Hostel si mitem Sandbuggy abghout worde. Mit däm heimer nid grechnet, aber guet. D Oase isch mega schön u me chönnt dert sogar mite SUPs, Kajaks oder Böötli druf u drin schwümme. Für mi isches aber z chaut gsi u drum simer ufd Sanddüne ufegloffe u hei dr Usblick gnosse. Nachere Stund simer witergfahre u mir hätte üs nomau chönne bim Sandboarde versueche. I has de dismau la si. Bi Sunneuntergang simer ume zrugg uf Paracas gfahre.

    Dä Morge hets ume mau es Velotüürli gäh ids Reserva Nacional de Paracas. Scho nach paar Meter hetmer ds Füdle weh tah vom Sattu u i ha gwüsst, ds wird e länge Tag. Julians Sattu isch weicher gsi u drum heimer ab und zue mau gwächslet. Zersch heimer e Halt gmacht bir "La Catedral". Ds isch e Steiformation wo mau e Boge het gha u so wines Türmli u drum chli usgseht wine Kathedrale. Nacheme Erdbebe isch dä Boge mau igstürzt. Schono imposant weme denkt, wie viel Stei denn isch abgheit.
    När simer no witer gfahre zum Playa Roja. Teilwis bini oh gloffe, wiu mir het irgendwenn nid nume z Füdle sondern oh mis Chnöi ume afa weh tue. Dermit hani no haubers grächnet, aber ha z Velofahre glich wöue usprobiere. Dr Playa Roja isch e rote Strand. I muess sege, uf de Fotos gsehts chli cooler us aus es isch. Grundsätzlich isch ds Reserva Nacional scho no hübsch, emu klippene si idrücklech, aber mit dem müehsame Velo u de schmerze hani nid sone mega gueti Zit gha u bi froh gsi, womer ume si ir Stadt gsi. Dert heimer nis afa mau es Frappe gönnt u si ner doch zimlech müed hei ga zNacht esse.    Baca lagi

    Lihat terjemahan
  • Michelle KienerSüd- und ZentralamerikaPengembara
    E auti Loki imne Park
    Kennedy ParkDi hätte mer am liebste heignohSones SchätziAr Küste mit Blick ufe Loves ParkIm Loves ParkDr Lüchtturm

    Vom Land id Grossstadt

    30 Julai 2024, Peru ⋅ ☁️ 20 °C

    Gester spät am abe simer in Lima acho u afa mau i McDonalds öpis ga esse. Mir hei nid dra denkt, öpis zNacht i Bus näh u hei drum recht hunger gha (oder emu i). Vorauem het mi Mage ume mau öpis brucht woner kennt. :)

    Hüt heimer de z Quartier Miraflores erkundet. Zersch simer iz Zentrum vo Miraflores gloffe u dert i Kennedy Park. I dem Park lebe Chatze u si werde dert oh gfüetteret. Zwöi si bsunders uf Kuschelkurs gsi u schlussendlich heimer überne Stund i dem Park verbracht mit Büssi strichele. Ds het es hüngerli gäh u drum simer öpis chlises ga esse. När simer no witer spaziert zum Love's Park. Vo dert gseht me uf Küste abe. Mir si no witer zum Lüchtturm u zum Chinese Park spaziert, hei de Surfer u de Gleitschirme zuegluegt u d Ussicht gnosse. Ds Wetter macht üs irgendwie im Moment chli müed u drum hets im Aschluss no es Kafi gäh. Bevor mer zrugg id Unterkunft si, simer no ine riesige Supermarkt u dert in stuunend umegloffe, aus wäre mer zerste mau ime Lade. Tatsächlich heimer oh scho lang nüm sone riese Ichoufslade gseh.

    Lima het üs beidi positiv überrascht. Viel Reisendi hei üs verzeut, es sig nüt speziells u si sige enttüscht gsi. Mir findes aber e cooli u suberi Stadt. Krass isch oh dr Unterschied zum Land. Lima macht sone moderne Idruck u mir füehle üs e bitz, aus wäre mer "zrugg ir Zivilisation". U neb us hets chlini Städtli u Dörfer wo haub am zerfalle si.    Baca lagi

    Lihat terjemahan
  • Michelle KienerSüd- und ZentralamerikaPengembara
    Plaza de Armas (isch gsperrt gsi, u drum so leer)
    Altstadt LimaInnehof ir KathedraleNomau e Innehof ir KathedraleUsblick vom TurmUsblick i TurmPark im Quartier BarrancoBarranco

    Die letschte Täg mit zwöi Abschiede

    31 Jul–1 Ogo 2024, Peru ⋅ ☁️ 16 °C

    Gester heimer dr Bus gnoh ids Stadtzentrum vo Lima. Dert heimer dr Plaza de Armas bsuecht und dr Präsidentepalast. D Hüser si hie bitz älter u hei chli meh Charme. Mir hei oh ume mau e Kathedrale bsuecht mitem Ziel ufe Turm ga d Ussicht aluege. Überraschenderwis hets de dert in no schöni Innehöf gha womi oh recht beidruckt hei. D Ussicht vom Turm isch oh spannend gsi u me het oh dert obe gmerkt, wie riesig das Lima eigentlich isch. Zrugg ir Unterkunft heimer de afa packe...

    Dä Morge heimer nomau zeme gnosse. Mir si no iz Quartier Barranco spaziert, wo oh mega hübsch isch gsi. När heimer natürlech huufe Zit brucht zum üs verabschiede u si no zeme ga zNacht esse. Julian flügt zrugg id Schwiz u nach 3 Monet zeme unterwegs si, isch mer dr Abschied natürlich bsunders schwer gfaue.

    I verabschiede mi de morn oh vo Peru u flüge witer uf Kolumbie. I freue mi, es neus Land dörfe z'entdecke. Peru isch für mi es Uf und Ab gsi. Landschaftlich u Kulturell hets so viel schöns u spannends z biete. Trotzdem ischs mer gesundheitlich nid immer guet gange, ha weni Energie gha u ds isch mer oh ufd Stimmig gschlage. I bi froh si die letschte Täg drum gmüetlech gsi u chani iz de öpis neus gseh. Ab iz leider ume allei...    Baca lagi

    Lihat terjemahan
  • Michelle KienerSüd- und ZentralamerikaPengembara
    Plaza Botero
    Plaza BoteroEl Poblado isch sehr grüen

    Ersti Idrück vo Medellin

    3 Ogos 2024, Colombia ⋅ ☁️ 27 °C

    Gester abe bini in Medellin acho u de oh zimlech glii ga pfuse, wiu mi zReise doch chli kabutt gmacht het.

    Dä Morge bini derfür eis wach gsi. D Nacht isch lut gsi, wiu nebem Hostel e Party isch gsi u d Musig mega lut. Guet guts Ohrestöpsle. Zudem isches hie zimlech warm u a das subtropische Klima muesi mi oh no zersch gwahne.
    I bi de gmüetlech ga zMörgele u ha würk es mega feins Cappuccino gha (Danke oh a Schumgott a dere Stell). När bini mit dr Metro zum Plaza Botero gfahre. Botero isch e bekannte Künstler u paar vo sine Skulpture stöh uf dem Platz. När bini no chli witer gloffe u ire Shoppingmeile glandet. Dert hets mer de irgendwie zviu Lüt gha u bi drum wider zrugg i mis Quartier "El Poblado". Dr Nami isch recht heiss gsi u drum hamer de no es Frappucino gönnt. När bini no chli dür ds Quartier spaziert u de am spätere Nami ume im Hostel gsi. Dert bini ine Hängematte u ha no chli recherchiert wasi hie no wet gseh. I ha mi oh no mit mine Zimmergnossinne (zwöi Schwizerinne und e Engländerin) unterhaute u mir Inspiration ghout für mini Reis dür Kolumbie.

    ZNacht hani mer Pasta gmacht, natürlech viu z viu. Gar nid so eifach iz ume allei z choche. I ha mitem Julian immer e super Choch drbi gha 😋 Bim zNacht hani mi no miteme Päärli us Ecuador unterhalte u iz bini scho ume im Bett. Morn geits uf ne Tour dür nes spannends Viertel vo Medellin...    Baca lagi

    Lihat terjemahan
  • Michelle KienerSüd- und ZentralamerikaPengembara
    Streetart
    E Teil vode RolltreppeDs isch e Schuel wo neu ischFarbig u lebendig isches hieD Ussicht ufd StadtMini Wenigkeit

    La Comuna 13

    4 Ogos 2024, Colombia ⋅ ☁️ 25 °C

    La Comuna 13 isch e Teil vo Medellin mitere spannende Gschicht u öpis wome unbedingt söt gseh ha. I ha für ds e Tag vorher e Tour buechet gha. Leider isch de bim Treffpunkt niemer gsi u oh nach paar Lüt frage u sueche hani niemer gfunde, wo mini Tour hät söue mache. Chli dumm, wiu i ha so natürlich ner für nüt zaut. I ha mi de spontan are Free Walking Tour chönne aschliesse u so trotzdem viel über Comuna 13 erfahre.

    Dä Teil vo Medellin isch früecher dr gfährlichst Ort überhoupt gsi. Diversi Bande hei enand richtig bekriegt u Morde si ar Tagesordnig gsi. Ersch vor paar Jahr het de d Stadt öpis dergäge chönne mache. Si hei z Quartier mit Busverbindige und Rolltreppe mitem Reste vor Stadt verbunde u mittlerwile isches e sehr beliebte u belebte Ort u sehr touristisch. D Lizeth het üs vieles über Gschicht vo dem Ort chönne verzeue u het üs tolli Orte u viel Streetart zeigt. Si lebt selber mitz drin sit 10 Jahr, isch aber nid dert ufgwachse.
    Mir het dr Ort mega guet gfaue, oh wiu me sone tolli Ussicht ufd Stadt het u d Gschicht isch sehr beidruckend gsi. Definitiv e Ort wome muess bsueche in Kolumbie.    Baca lagi

    Lihat terjemahan
  • Michelle KienerSüd- und ZentralamerikaPengembara
    Über de Dächer
    Seilbahn richtig ArvíUfem WanderwägliSuper zMittag gsiE Teil vom BluemefestivalBlueme

    E Seilbahn ine anderi Welt

    5 Ogos 2024, Colombia ⋅ ☁️ 19 °C

    Die Nacht hets grägnet u gwitteret wi nüt u drum hani beschlosse usschlafe u de spontan luege wasi asteue. Guet isch z Wetter besser worde, so hani nämlech i Parque Arví chönne. Dr Park isch mit dr Seilbahn direkt vor Stadt erreichbar. Vom Gondeli us gseht me ufd Hüser u ufd Stadt abe, was mega idrücklech isch. U plötzlech schwebt me eifach so über em Wald u gseht nüt me vor Stadt. I bi de so gad chli ire andere Welt acho. Dr Park isch mega grüen u ruhig u chaut... I ha natürlich nid bedenkt, das es hie bis 2'000 m höch isch. Guet hani d regejagge drbi gha u so hami ufne Wanderweg gmacht. Ufem Weg hets oh Beschriebige vode Pflanze u i has sehr gnosse idr Rueh vor Natur z si. Si vom Infopoint het mer gseit dr Weg geit 1-1.5h u i bi mit sehr gmüetlech loufe nach 45 Minute fertig gsi. Nachem loufe hani mer dert no e Waffle gönnt u zudem hani zerste mau e Bluemeusstellig gseh dert obe. Z Medellin isch nämlech aktuell no z Bluemefestival.
    Nach dem gmüetleche Tag bini ume zrugg id Stadt u ha afa packe. Morn geits de es paar Kilometer witer.    Baca lagi

    Lihat terjemahan
  • Michelle KienerSüd- und ZentralamerikaPengembara
    Guatapé liegt am ne See, wo aktuelle eher weni Wasser het
    D Chiuche ufem HouptplatzEs GässliFarbigs HüsliMeh farbigi HüsliNo meh farbigi HüsliNo meh farbigi HüsliRegeboge vom Hostel us gfötelet

    Sooo farbig hie...

    6 Ogos 2024, Colombia ⋅ 🌩️ 22 °C

    Es isch Zit gsi Medellin z verlah. I ha dr Bus gnoh uf Guatapé. D Fahrt isch recht cool gsi. I ha e tolli Sitznachbarin gha, wo uf Kolumbie isch usgwanderet u i ha mi bitz mit ihre chönne unterhalte. Zudem ischs landschaftlich e mega schöni Strecki. Am früeche Nami bini acho u zersch iz Hostel. Dr Dude vor Rezeption isch mega lieb u het mer diversi Tipps gäh. I bi de zersch öpis ga esse, es vegetarischs Bandeja. Ds isch es kolumbianischs Gricht mit Bohne, Riis, Eier, Salat, frittieri Banane u süsch no öpisem gsi, woni nid ha chönne definiere. D Originalversion wär no mit verschiedene Würst u Fleisch. I has fein gfunde (ussert natürlech Banane u dr Salat hani oh lasi) u isch cool heisis ire Vegiversion gha.
    När bini dür Guatapé spaziert u bi hin und weg gsi. Ds Städtli isch bekannt für die farbige Hüsli u ds het soo toll usgseh. I ha eifach müesse dür JEDES Strässli spaziere u huufe Föteli mache. Ungerwegs hamer de no es Iiskaffi gönnt u ner bini ume zrugg iz Hostel. Eigentlech hani no zum ne Ussichtpunkt wöue, aber wius het nach Räge usgseh, hami de drgäge entschiede.
    I ha no chli gläse u öpis chlises gässe u iz gits e gmüetleche Abe.    Baca lagi

    Lihat terjemahan
  • Michelle KienerSüd- und ZentralamerikaPengembara
    La piedra de peñol
    D Stäge für ufeWär gern föreli mit buechstabe macht, isch hie richtigMini begleiterinneUssicht vom SteiIg mit ussicht vom stei2Hie hani am schumgott speziell danktDr Stei vo witem

    720 Stägetritte

    7 Ogos 2024, Colombia ⋅ ☁️ 22 °C

    La Piedra de Peñol isch öpe z bekanntiste a Guatapé näbst de farbige Hüsli. Dert hani natürlich unbedingt häre müesse. Dr Dude vor Reception het mer empfohle früeh zgah u ds isch e super Tipp gsi.
    I bi auso am Morge mitem Bus dert häre gfahre u ha de dert zuefälligerwis d Emma ume troffe. Mir hei üs im Hostel z Medellín lehre kenne. I bi när mit ihre und ihrer Kollegin witers. Ufe Stei füehrt e Stäge mit 720 Stägetritte. Die heimer de Schritt für Schritt gnoh u i muess säge, dr Niese Treppelouf wär äuä nüt für mi. Obe acho het me e fantastischi Ussicht.
    D Stäge abe isch chli eifacher gange u dert simer de äbe froh gsi, das mer früeh ufe si, wiu es si üs mega viel Lüt entgäge cho. Schön heimer däm Touristestrom chönne uswiiche. Unde acho heimer de es Tuktuk gnoh uf Guatape, wiu süsch hätte mer müesse e Stund ufe Bus warte.
    Im Städtli hani de andere zwöine chli zeigt was wo isch u mir hei no es Kafi trunke.
    I bi de am Mittag ume iz Hostel zrugg, wiu mi Plan wär gsi, e Bootstour mache. Leider bini die einzigi gsi wo ds cool fingt u si het de nid stattgfunde (hoffe immerno uf morn).
    Stattdesse bini no ufne Ussichtspunkt ir nechi vom Hostel. Oh ds isch e Empfählig gsi vom Reception Dude u dert gseht me de dä Stei nomau vo witem u d Ussicht isch oh recht cool. Zudem bini dert allei gsi u ds hani gad mega gnosse.
    Zrugg im Hostel bini no chli häregläge u ha Zügs planet. I ha die letschte zwöi Nächt nid so super gschlafe u ds mani iz merke. Hoffe die Nacht klappets de besser. Morn geits ume zrugg uf Medellín...    Baca lagi

    Lihat terjemahan
  • Michelle KienerSüd- und ZentralamerikaPengembara
    Hoffentlich dr letscht Nachtbus gsi
    Am Morge am 7ni irgendwo in KolumbieDa simer scho ar Küste obe gsiViel Ghüder im und am WasserMis Hostel in Santa Marta

    Ab in den Norden

    9–10 Ogo 2024, Colombia ⋅ ☁️ 31 °C

    Nach Guatapé bini ume zrugg uf Medellín gfahre u ha dert nomau e Nacht verbracht. I ha nüm gross Motivation gha öpis zmache, wiu i eigentlich aus scho gseh ha. Im Hostel hani gester aber no zwöi lehre kenne u i bi mit dene zwo Dame ga z Mittag esse. Zeme heimer de no e gmüetleche Nami verbracht. När hani no chli Proviant müesse choufe bevors az Busterminal isch. Es steit e längi Busfahrt ah i Norde...

    Ufem Weg zum Terminal hami no mitem Uberfahrer über z Lebe im Kolumbie unterhalte u d Unterschiede zur Schwiz si natürlech mega krass. Hie chame sech nid mau e eigeti Wohnig leiste, weme dr Mindestlohn (ca. 300 Euro) verdient. Es Apartment chostet viel meh aus das u da het me de no nid gässe.
    I bi Fan vo Kolumbie, gad wöu d Mönsche hie so offe und ungloublech fründlech si. Me chunnt sehr eifach mitne iz Gspräch, auso meistens spreche si mii ah...

    När bini de i Bus richtig Santa Marta u mir si insgesamt 17h unterwegs gsi. Dr Sitz neb mir isch zum Glück läär gsi u i ha gnue Platz gha. Gschlafe hani glich nid gad viu. Ufem Weg simer ah schöne Landschafte verbigfahre u dür chlini Dörfli. Oh hie isch z Lebe gad ume anders im Verglich zur Grossstadt. Es isch eifacher u vielne Orte liegt huufe Ghüder ume.
    In Santa Marta acho hani es Taxi wöue näh für zum Hostel. E jungi Frou (d Eleonor), wo im gliche Bus isch gsi ebefalls u es het sech usegsteut, das mer ids gliche Hostel müesse. Drum heimer üs de zeme tah u so chönne Choste spare. Vorem Hostel het dr Taxifahrer de glich dr Vollpriis vo beidne wöue u d Eleonor cha zum Glück mega guet spanisch u het ihm de gseit, das mer sicher nid plötzlech meh zahle. Dr Priis macht me nämlech immer vorher ab u dä zeut.
    Mir hei no gad nid i Zimmer chönne u si drum oh no zeme ga zMittag esse. Mir si beidi mega müed vom Busfahre u hei drum nüm viu gmacht. I bi no ga dusche u ner mitem Buech ine Hängematte gläge u iz gani de öpe früeh ga liege. Mir si hie am karibische Meer u es isch sehr heiss. Da muesi mi oh no bitz dra gwahne u hoffe i cha de die Nacht mau guet Pfuse.    Baca lagi

    Lihat terjemahan
  • Michelle KienerSüd- und ZentralamerikaPengembara

    Karibisches Klima in Santa Marta

    11 Ogos 2024, Colombia ⋅ ☁️ 29 °C

    I ha würklech wunderbar gschlafe hie u bi sehr froh drum. I has hüt gmüetlech gnoh u ha nachem zMorge hei telefoniert. När bini chli dür Santa Marta gloffe. D Autstadt isch u herzig, farbig u mit vielne Blüemli. I ha dert oh no es neus Bikini kouft, wiu i unbedingt eis brucht ha u ha sehr freud dran.
    Zrugg im Hostel hani mi morgig Tag plant u süsch grelaxed. E dütschi Zimmerkollegin hetmi de gfragt, obi es Glace chiem cho näh u da hani gwüss nid nei gseit.
    Iz bini am choche u ner geits ume früeh iz Bett. Morn wird ume mau e längere Tag.    Baca lagi

    Lihat terjemahan
  • Michelle KienerSüd- und ZentralamerikaPengembara
    Wäg düre Dschungel
    Nid z Beste Biud, aber dr Selbstuslöser het aus gähGschwitzt bis a Bach abeUssicht ufe erst StrandUssicht ufe zwöit StrandI has nume gseh, wiu sechs gad bewegt het ghaChurzi Zit speter hani würklech e Kaiman gseCabo San Juan

    Nume einisch gschwitzt hüt

    12 Ogos 2024, Colombia ⋅ ☁️ 29 °C

    Dr Grund wiso dasi uf Santa Marta bi cho, isch dr Tayrona Nationalpark u dä hani hüt bsuecht. I ha eigentlich früeh los wöue, wiu uf Cabo San Juan louft me je nach dem 2-3h ei Wäg u i ha ja nume e Tag iplant gha. D Maria vor Reception het mi iglade mit ihne mit zgah u i ha gfunge, wiso nid?! Ds hani schlussendlich e bitz bereut. Treffpunkt wär am 8i gsi, aber wis haut so isch z Südamerika simer ersch am haubi 9i los. Ufem Weg het de no eini müesse Banane choufe. Immerhin heimer nid müesse ufe Bus warte, dä het üs innerhalb vore Stund zum igang bracht. Am 10ni simer de bim Igang gsi u de hei die Damene no müesse d Unterkunft bueche. I ha mi de vo ihne verabschiedet u abem Igang no e Shuttlebus gnoh. Vo dert us bini ner richtig Cabo San Juan gloffe. Dr Wäg füehrt düre Dschungel u zum Glück mehrheitlich am Schatte nah. Es isch so heiss gsi u i ha gloub no nie so krass gschwitzt wie hüt. Ufem Weg gseht me mit es bitzi Glück huufe Tier. I ha Affe gseh, Eidechsli, irgend es Bütutier (es isch leider wit weg u im Gebüsch gsi, drum weisi nid was genau i gseh ha), es Gecko, e Kaiman u huufe Schmetterlinge.
    Nach guet 2h bini de in Cabo San Juan acho. I ha gläse ds sig dr schönst Strand. Schön isches, aber es het oh extrem viu Lüt dert, wiu irgendwie aui dert here loufe. I bi de d Füess ga iz Wasser ha, hami no chli hereghöcklet u zMittag gesse u nachere Stund hami de ufe retourwäg gmacht.
    I bi froh gsi woni de seichnass ume zrugg im Hostel bi gsi u ha chönne ga Dusche u abchüele. Dr Tag isch aber u schön gsi u dr Bsuech im Nationalpark het sech definitiv glohnt.    Baca lagi

    Lihat terjemahan
  • Michelle KienerSüd- und ZentralamerikaPengembara
    D Houptstrass wo zum Strand füehrt
    Strand vo Palomino

    Es Hippiedörfli namens Palomino

    14 Ogos 2024, Colombia ⋅ ☁️ 26 °C

    Gester isch nid viel gloffe, i ha mitem Julian telefoniert, när mit dr Eva zMittag gesse u bi de ufe Bus richtig Palomino. Die Fahrt geit 2h u i ha gueti Unterhaltig gha vom Bueb näb mir. Er isch gwundrig gsi woni her chume u het mer sogar vo sine Bananechips abote. Z Palomino isch gad e anderi Welt, es sich viu chliner u d Strasse si nüm teeret.

    Hüt morge hani ds Dörfli bitz erkundet. Me seit, es sig sones Hippie Dörfli. Da chame sech iz drunger vorsteue was me wot. Fakt isch, es het i dere einte Strass, wo oh mis Hostel isch, mega viel Lädeli mit Handgmachte Sache, huufe Restaurants u Hotels. D Lüt si aui oh sehr gmüetlech druf u lebe zimlech vo Tag zu Tag. I bi am Morge zersch am Strand gsi, dert isch mer de schnell mau z heiss worde u i bi zrugg iz Hostel. När bini no chli Lädele u ga Empanadas esse u am Nami hani gläse ir Hängematte. Uf Instagram hani de gseh das d Emma (vom Hostel in Medellín) oh z Palomino isch u drum simer am abe zeme ga esse. Scho lustig, das me immer wider die gliche Lüt trifft.

    Zudem hani hüt mi erst Sunnebrand ufgläse u ha Muggestiche a gogo trotz Muggespray.
    Palomino isch definitiv no nid so entwickelt wie Santa Marta oder Medellin, me het hie oh regelmässig Stromusfau. Trotzdem ischs es mega herzigs Dörfli u schins oh viel sicherer aus vieli Grossstädt. (i wet hie no erwähne, dasi mi in ganz Kolumbie no nie unsicher gfüehlt ha, obwou ds sehr oft gseit wird vo dem Land)    Baca lagi

    Lihat terjemahan
  • Michelle KienerSüd- und ZentralamerikaPengembara
    Usblick uf Palomino und z Meer (me gsehts nid i weiss)
    D Berge vor Sierra NevadaBim indigene Volk (ds isch d Chuchi)Ds isch sone gmeinschaftsrum für Ritual etc.Mir dene Reife simer dr Fluss dürabZ Restaurant woni ha zmittag ghaDa gsehts nid schlimm us, aber es isch chnütschrot

    Schöne Tag mit rotem Endi

    15 Ogos 2024, Colombia ⋅ ☁️ 30 °C

    Für hüt hani e Tour buechet, wo zercsh zum ne indigene Volk füehrt u aschliessend het me no chönne Tubing mache ufem Rio Palomino. I bi di einzigi gsi, wo ds het wöue mache u ha dür ds e private Guide gha. Si Name isch Leider gsi (würklech).

    Dr Leider hetmi bim Hostel abghout u mir so no id Agentur gfahre. Dert het mer e Dame dTour erklärt u scho wosi gseit het, zTubing geit bis zu 3h u isch ar Sunne, hani gwüsst ds isch ke gueti Idee. Wis aber so isch machi viel schlechti Idee trotzdem.
    Mir si auso mitem Töff losgfahre. Er miteme Schwümmring u i mit eim uf de Schultere. Zudem hani no mi Rucksack u e Schwümmweste gha. Chönne hebe hani mi nume mit eire Hand u d Strasse si sehr uneben u es isch uf u ab gange. Scho ds isch es Abentür gsi. Mir si öpe 10-15 Minute gfahre u ner simer dr Räschte gloffe. Es isch öpe e Stund lang düre Wald gange u unterwegs het me die verschneite Gipfle gseh vor Sierra Nevada. Ds isch es Küstegebirge mit Berge über 5'000m u i has recht beidruckend gfunde, wiu ds Gebirge isch nume ca. 40 km vor Küste entfernt.
    När simer de endlech bim indigene Volk acho. Es isch sehr chli u es wohne 5 Familie dert. Es isch chli schad gsi, das niemer isch dert gsi womer meh hät chönne verzeue. Dr Leider het mer de paar Infos gäh. Aber es si haut nid sehr viu gsi u drum bini chli enttüscht gsi vo dem Bsuech.

    Vo dert us heimer üs de mit de Schwümmreife ufe Weg zrügg gmacht. Mir si gueti 2h unterwegs gsi ufem Fluss Palomino u die Abchüelig het mega guet tah. D Landschaft isch oh mega toll gsi wiu me so düre Dschungel fahrt. Z Tubing isch mega lustig u oh gmüetlech gsi, aber ebe oh di ganzi Zit ar Sunne. Resultat isch iz e ultra miese Sunnebrand, wo echt weh tuet.
    Nachem Tubing hani am Meer no zMittag gässe. Ds Restaurant het mer dr Leider empfohle. Es isch es Fischrestaurant gsi u i bi chli erchlüpft, wo dr Kellner plötzlech mitem Fang des Tages isch vor mer gstande. I hanim de müesse sege, dasi ke Fisch isse u drum Pasta mit Gmües bsteut. Nachem zMittag hami ufe Heiwäg gmacht u sit denn probieri mini Verbrönnig z heile.    Baca lagi

    Lihat terjemahan
  • Michelle KienerSüd- und ZentralamerikaPengembara
    Im Hostel isches sehr gmüetlech
    ZMorge vor Bäckerei2Am dritte Tag hani de fasch e ganzi Pizza möge

    I'm fine... Totally fine...

    16–18 Ogo 2024, Colombia ⋅ ☁️ 29 °C

    Mi Sunnebrand isch du leider chli schlimmer gsi ausi ds zersch denkt ha. No nie i mim Lebe hani so schmerze gha wäg Sunnebrand. Es hei sech Blase biudet, i ha öpe zwei Tag nid richtig chönne esse, mini Füess si agschwulle u jede Schritt tuet weh. Am Friti bini de no vo Palomino uf Minca greist. Z guete isch, das Minca chli höher gläge u darum chüeler isch. Sit zwei Tag bini iz scho hie u ha no nüt gmacht ussert mi Sunnebrand uskuriert. Es wird besser, aber loufe tuet immer no sehr weh. I ha mi mega uf Minca gfreut, wiu me hie so viu tolls cha mache u ufne Teil muesi iz haut verzichte. I ha aber no e Nacht verlängert i mim Hostel, so hani no e Tag länger Zit. Z Hostel isch würklech geniau. Es isch e Empfählig gsi vo zwöine Schwizerinne woni in Medellin ha lehre kenne u d Ingrid, d Besitzerin, isch mega lieb u erkundigt sich regelmässig wis mir geit. I dere Zit hani viel gläse, telefoniert, Tagebuech gschribe, Bei igsaubet, Joghurtkure gmacht, Aloe Vera gsuecht u nid gfunde u bi eifach chli gsi. Morn wetti de doch mau bitz usem Dorf u hoffe, das mer mini Bei da ke Strich dür d Rechnig mache.Baca lagi

    Lihat terjemahan
  • Michelle KienerSüd- und ZentralamerikaPengembara
    D Ussicht vor Finca Candelaria
    E KakaofruchtSo gseht ds us weme se ufschnitDs wisse heimer dörfe süggele u es schmöckt null nach Schoggi100 % Kakao zum trinkeE Schoggimaske hets oh no gähE KafiboumHie wärde si gmahle (normalerwis gits für ds Maschine)Die gröstete BohneD Monica, mini Fahrerin

    Kaffee und Kakao

    19 Ogos 2024, Colombia ⋅ 🌩️ 25 °C

    Da hüt mi letscht vou Tag in Minca isch, hani mi ufgrafft öpis z unternäh. I ha nämlech unbedingt wöue e Kaffeefarm bsueche hie. Da mini Bei lädiert si, hani mer es Mototaxi gnoh bis zur Finca Candelaria. Normalerwis wäri ds äuä gloffe, me hät vom Dorf nume öpe e Stund. Mini Mototaxifahrerin het Monica gheisse u si isch di einzigi Frou wo Mototaxi fahrt (es sige 80 Manne u 1 Frou). Drum hanis u cool gfunde hani mit ihre dörfe fahre.
    Bir Finca acho heisi mer gseit dasi di einzigi bi für dKafitour u me brucht mindestens zwei, aber d Kakaotour würd stattfinde. Chli enttüscht hani de haut afa Kakaotour gmacht u di isch oh sehr spannend gsi. Si erkläre eim dert nämlech wie Böim wachse u wie d Frücht gläse werde. Ner wird eim zeigt wi sone Frucht vo in usgseht u mir hei oh dörfe probiere. Witer wärde Kakaobohne fermentiert, tröchnet u gröstet. Aschliessend wirds gmahle u us dem gits ner verschiedeni Produkt. Dr Eduardo het üs jede Schritt zeigt u am Schluss heimer chönne rohe 100%-ige Kakao probiere. Isch mega toll gsi, dä Prozess vor Pflanze bis zum Getränk chönne gseh u zwüsch in mau chönne probiere.

    Nach dere Tour hani mitübercho wie zwöi Froue süsch no intresse hätte are Kaffeetour u i ha drum gfragt, ob de iz no eini stattfindet u tatsächlich hani no dörfe e Kaffeetour ahänke. Mir hei verschiedeni Kafiböim agluegt. D Pflanze si aktuell grüen u no nid riif zum abläse. Gläse wärde si de zwüsche November u Februar wesi jedi anderi Farb ussert grüen hei. När wärde si fermentiert, tröchnet, verstampfet u gschälet. Nachdem chunnt z röste u z mahle. Oh hie heimer dr ganz Prozess mitübercho u chönne feine Kafi probiere.

    I ha auso e mega spannende Tag gha, d Monica het mi de wieder zum Hostel gsteut u sit denn bini mini Bei wider am chüele u still ha.    Baca lagi

    Lihat terjemahan
  • Michelle KienerSüd- und ZentralamerikaPengembara
    Dr Uhrturm vo Cartagena
    Dr Platz vor dranIrgend e Kathedrale1Hübschi Gässli

    Zit für öpis Neus

    22 Ogos 2024, Colombia ⋅ ☁️ 30 °C

    Sit drü Tag bini in Cartagena, e Ort in Kolumbie wo sehr viel Gschicht het. I ha mi mega uf Cartagena gfreut, aber nid ganz so viu gseh wini ha wöue.

    Gester Vormittag hani d Altstadt chli erkundet u bi zum Uhrturm und dür die farbige Gässli gloffe. D Altstadt isch chli u drum bini relativ schnell derdür gsi. Es isch hie wider sehr heiss u i merke, dasi die Hitz im Moment eifach nid mah verliede. Drum bini gester Nami de im Schatte bliebe. Dr Sunnebrand isch am bessere, aber mir geits oh süsch gsundheitlich nid 100% guet. I cha immer no chum öpis esse u schlafe extrem schlecht u langsam merki das mer ds ad Energie geit.

    Die Nacht hani so weni gschlafe, dasi iz recht kabutt bi u i verbinge darum dr Tag im Hostel. I wär gern no uf ne Insle vor Cartagena, aber Gsundheit geit vor.

    Hüt isch mi letscht Tag in Kolumbie u i bi scho chli truurig, dasi scho ume witer ga. Mir het Kolumbie sehr guet gfaue u i wirde bestimmt wider cho. I hät i dene drü Wuche sicher meh chönne gseh, aber i ha sehr vo Tag zu Tag gläbt, was oh toll isch gsi. Leider het mer Gsundheit bi vielem e Strich dür dRechnig gmacht, emu gad gäge Schluss. Drum freui mi iz oh, es neus Land dörfe entdecke u bi gspannt wies mer dert geit.    Baca lagi

    Lihat terjemahan
  • 2025© FindPenguins
  • Utama
  • Mengenai kami
  • Penjejakan kumpulan
  • Akhbar
  • Terma
  • Privasi & Cookies
  • Pusat Bantuan
  • Cetakan