Calgary zoo

A eusem 2 Tag in Calgary isch s Wetter entli echli Kanadischer worde, d.h. chalt und regnerisch. Drum hämer denkt mer bruched es bitzli entspannig und hend eus e Massage gönnt. Komplett entspannt simer nacher e bitz im Shopping Center go iichaufe, da mer no paar sache bruucht hend für de rest vom trip. Am Abig hemmer es Uber gna und sind is Grey Eagle Resort & Casino. Nei, mer sind nöd go gamble sondern go esse (war ja klar). Und zwar gits det es Restaurant wo Indigen inspirierts Esse serviert, namens "Little Chief". S Esse isch unglaublich guet gsi, Elk Meatball Pasta und Indian Tacos😍 Nacher simer zrugg is Zentrum in Taproom vode 33 Acres, e Brauerei woni us Vancouver kenne, für en chline Absacker.

De dritti und letsti Tag hemmer dänn miteme gsunde brunch gstartet im Wise&Wright, und es isch echt mega fein gsi. Und den simmer in Calgary Zoo gfajre mitem C-Train, wo eigentlich kein Train sondern es Tram isch (Kanadier🤷🏻‍♂️). De Zoo isch zwar vergliche zum Züri Zoo mega chli aber mega schön gmacht gsi. D Simona und ich sind beidi unabhängig vonenand vomene Pinguin attackiert worde, schint wohl sini Masche zsi. Und mir händ au d Brun- und Grizzlybäre gseh, e gueti Vorbereitig für di negste Täg ide Rocky Mountains 😂 Am abig hämer em grosse Spaziergang gmacht und hend debi d "Brüch Bar" entdeckt. Das isch e Brauerei wo Kombucha/Bier hybride braut. Die sind mega interessant gsi. Nachem znacht im "Kingfisher" wo Seafood und Tonkatsu serviert hemmer de Rest vom abig im Airbnb verbracht, da mer am negste Morge am 6i use hämd müesse. Ab id Berge, ab zu de Bäre! Czytaj więcej