Río Mapota

Das isch Spass gsi!
De Tag started mitem Hostelzmorge und nachher, wo d'Mitbewohner au wach sind, muesi schliessli packe. Fast pünktlich am nüni wirdi mit es paar anderne zum River Rafting abgholt. Im Lokal schnappemer eus Helm, Schueh, Schwimmveste und en Wetsuit. Denn gohts 30 Busminute, bismer am Startpunkt achömed. Dete gits zerst Mal haufenweise Sicherheitsinfos für de Fall, dass öper usem Boot gheit, womer hoffentli alli ned werded bruche. Und denn folged au na Trocheüebige zu Stüürmanöver und Rettisaktione. Schliessli fühlemer eus ready und träged als Team Kaiman euses Boot is Wasser - los gohts mit wiitere Üebige, eifach dasmal im Wasser. Und denn starteds richtig. Öppe e Stund lang söll s'Abentür duure und es macht vo Afang a super viel Spass :) Irgendwo nach de Hälfti isches denn so wiit, dasmer e Stromschnelle siitlich treffed und d'Hälfti vo eusere Besatzig verlüred - upsi. Zwei möged sich am Boot hebe und chönd relativ schnell gretted werde. Eusen einzige Maa wird aber devotribe und chan wenig spöter vom Rettigskajak ufgfange und eus zruggbrocht werde. Isch grad bitz hektisch gsi aber he, isch Teil vom Abentür und so im Nachhinein hemers doch zimli souverän glöst :) Viel z'schnell simer scho am Endi und schlüpfed i trochni, warmi Chleider. Uf de Zruggfahrt gits en Zmittagstop im Resti - die Stärchig chömer all bruche. Zrugg im Hostel isch chille agseit, bis am halbi sechsi min Bus uf Macas fahrt. "Wohere?" Das bini di letste Täg immer wider gfroged worde und ja, da isch es ned sonderlich bekannts Dorf bi Touriste. I hoffe, dases nach dene drü doch sehr intensive Täg im volle Baños genau s'richtige isch für mich. Vier Stunde und es paar ungsundi Snacks spöter stiigi us, schnappe mer es Taxi und lande ide Unterkunft. Die isch ned wprkli es Hostel, sondern meh Einzelzimmer wo sus a Studente vermieted werded. Wils wider wenig Lüt ume hät, chumi es Gratisupgrade ines geössers Zimmer über 🤭 Direkt usem Fenster sölli uf en wiitere aktive Vulkan gseh. Do bini ja gspannt uf de Blick morn Morge :)Read more