Pallātturuttu

Uf em Boot hämer alli sehr guet gschlafe, es het au so ganz liecht gschwanket😊

Nach em indische Zmorge simer den bis am Namittag uf de Backwaters umetuckeret. D Ussicht und die ganz Atmosphäre isch es eimaligs Erlebniss und isch es wiiter Highlight vo eusere Indiereis. D Ziit hämer mit Läse, Skipbo, spanisch üebe, fötele, gsprächle und eifach gnüüsse verbracht.

De Koch het eus au wahnsinnig mit indischem Ässe verwöhnt. Mer muss aber säge, dass nach fast 6 Wuche indischem Ässe, es eus langsam usem Hals hanget 🙈😂 dezue anne chunnt, dass de Koch mit de Azahl vo Gricht und mit de Mängi vo de einzelne Gricht masslos übertribt het. Wo mer den gseh hend, dass sie en Teil vom Ässe is Wasser zu de Fischli rüeret, isch euses schlechte Gwüsse is unermässliche gstiige. Umso me au, will mer in Indie doch au viel Armuet gse händ und Mänsche, wo zwenig händ, und mir im gägesatz i somene Übermass bedient worde sind. Aber die Mängi a Ässe, wo er uftischt het, hätti für 5 Mänsche meh glanget und mir händs unmöglich chöne fertig Ässe. Mir sind den einisch sooo überäsde gsi, dass s Ässe gar kei Freud meh gmacht. Mir händ ihm aber scho nach de erste Mahlziit gseit, dass es viel zviel isch und er doch bitte weniger Choche söll und dass mer au ufs Poulet chönd Verzicht (het au immer no Fisch dezue ge). All eusi Versüech de Food-Wast chli zhalte, het nur dezue gfüert, dass mer no meh uftischt becho händ🙈 irgendwen hämer den aber resigniert und nur no das gässe, wo mer händ möge...

Als mer den gäg de spöter Namittag agleit händ und dringend chli bewegig brucht händ (au um z Verdaue, dass mer de Znacht wieder möget), hämer en längere Spaziergang gmacht.

Nachdem mir dänn eus dur de Znacht dure kämpft hend, simmer den einisch i eusi Koje.Les mer