Legian Beach

U de isch Ziit cho für üses letschte Land vo üsem Aabetüür. Aber wie zur Höu chunnte me äch am günschtigschte vo der vertröimte Mekong-Insle Don Det uf ds doch immerhin 2700km (Luftlinie) entfernte Bali?
Bali!! Jaaa ändlech Indonesie. I bi no nie gsi u ha nume guets ghört u umwärfendi Heugeli gseh! Aber äbe..wie vo Hie nach Da ohne z grossi Löcher ids Büdschee s schriisse. Vo Don Det für fasch nüt zrügg id Provinthouptstat Pakse, mit Air Laos nach Bangkok für 100.- u wiiter uf Denpasar mit Thai Lion Air (ja i weiss, isch grad ersch eini abgstürzt) für 170.- het is verchraftbar tünkt. Zwe Stung für z Umstiige in Bangkok si iiplanet u 8h Gsamtreisezit aagnähm. Frischfröhlech u guuten Muutes simer de los u hei üs ufne gmüetleche Reiisetag gfröit. Es isch de nüt drus worde. Soublöderwiis het Bangkok zwe Flughäfe u ja mir si am einte aacho u wäre vom angere abgfloge..was bebütet Gepäck hole, Thailand Immigration iireise, Transfer zum angere Flughafe, Thailand Immigration usreise, Gepäck ufgäh u iichecke..es isch unmüglech gsi das i zwe Stung ds schaffe..auso No-Show bim einte u sofort e angere Flug bueche…uff üsi Reis nach Bali het üs de auso viu Gäut, Närve u Ziit koschtet. Zum guete Glück isch mi Goudschatz naachsichtig mit mr gsii u mir si schlussändlech totmüed aber glücklech in Legian Bali aacho.

Naja me weises ja aber Bali isch eifach e Troum. Wo fani ah? Legian isch e touristischi Hochburg wo me sichs durchuus paar Täg cha la guet ga.
Aber mir si nid unglücklech gsi ids vertröimte Fischerörtli Amed z wächsle. Amed sie paar härzigi Dörfli wo sich a gröscht Vulkan vo Bali schmiege. Es het paar härzigi Beizli u Ungerkünft, herrlechi Ussichte über d Küschte u vorauem es Riff vo me vom Strand us cha schnorchelnd erkunde. Z erschte mau schnorchle mit Meereschiudkrote, unzählige Fischli u es paar schöne Koraue isch eifach wunderbar! Am Abe mitem Töffli über d Höger mit troumhafte Usblicke düse es härzigs Beizli finge wome cha d Füess i Sand stecke u über d Wäut, ds Meer u die nächschte Reiseziiu diskutiere..was fürnes Läbe!

D Balinese si extrem härzlech, offeni u luschtigi Lüt. Ihre Hinduismus isch gmischt mitemne töif verwurzlete Geischtergloube. U um die z friede z steue het jede Hushaut für si Husgeischt im Garte es Hüsli wo dr Husgeischt darf wohne ( ir Hoffnig, är wohni de nid im Huus). Dene Geischter wird täglech es chliises Bambuschörbli baschtlet mit Riis, Röicherstäbli, emne Getränk, erne Zigi u öppis Süessem drinne, so das dr Husgeischt e gmüetleche Tag i sim Hüsli het u ja nid usechunnt. Ähnlechi Chörbli legesi ou vore Iigang, ufs Trottwar, ufs Outo..ja eigentlech überau häre. Me mues schampar ufpasse nid uf die Opfergabe ds trample. Vorauem d Vögu aber ou d Strassebüsi u süschtigs Getier fröiie sich enorm über die zuesätzleche Leckereie.
Ohnis plant z ha, hei mir am 7. März in Amed mit de Balinese dörfe Balinesisches Nöijahr fiire. Nyepi. Ou Nyepi steit ganz im Zeiche vom Geischtergloube. So wärde am Voraabe vom ganze Dorf riisigi Geisterpuppe zeremoniell usem Dorf tribe u dr sogenant OgoOgo (dä Geischt wo die schlächte Geischter mitnimmt) verjagt. Am Tag druf isches absolut verbote irgendöppis ds mache. Me darf nüt schaffe, nüt ässe, vorauem ke Liecht oder Füür aazünte. Es isch ou strikt verbote ds Huus ds verlah. Das giut ou für Tourischte. Einersitz söu dä Tag am Gebät u dr Meditation diene, angerersiits geits drum, das d Geischter vo sich i dere Ziit (nachdäm si si vertribe worde) umetriebe, sich es nöis Daheim sueche. D Hoffnig isch, das we d Geischter uf Bali ke Mönsch u kes Liecht gseh gloube das d Insle unbewohnt isch und drum wiiterzieh. Bali isch ds einzige Land uf dr Wäut wo zum Zwäck vor Meditation der internationau Fluughafe 24h schliesst u ds Internet uf dr ganze Insle absteut. Wow was für iidrücklechi 24h mir hei dörfe erläbe. Kes einzigs Outo uf de Strasse, kes Grüsch vor Zivilisation kes Internet ..nume Natur Ruhe u ja ok chli Chäs u Wyy für ds Liibleche wohl..herrlech.

Witer simer nach däm besinnleche Tag uf Permuteran. Äbefaus es Küschtestettli mit guete Stränd zum schnorchle dank emne künschtleche Riff und vorauem dr vorglagerete Insle Menjangan..es Schnorchuparadies..u paar witeri, herrlechi Strandtäg inklusiv emne tolle Livekonzärt am Beach hei üs ds Läbe fantastisch gmacht. Übrigens het üse Guide a däm Livekonzärt sich vo üs so la mitriisse, das er am Morge dermasse verkateret isch gsi, das är nid mit üs ufe Schnorchutripp het chönne..mir si de mit sim Fründ gange u es isch super gsi.

Nächär hei mir Küschte verlah u si uf Ubud. Es soumässig härzigs Stedli, touristisch winemore aber eifach soo süess das me nid angers cha aus es gärnha..Es ligt zmitst i de Riisfäuder u lad eim drum zu wundervoue Spatziergäng ii. Ansonsten chame viu Zit vertörle mit stundelangem schnöigge iau dene härzige Lädeli u Marktständli (z.B. um heimlech dr passend Verlobigsring ds choufe) u när dr Abe bi Live-Reggae Musig la usklinge.
Aber scho baud hets üs wieder ads Meer zoge, Nusa Lembongan mir chöme!Read more