Mælen

De Zoo in Kristiansand isch schön gsi, aber weg em zimlich durchgehende Rege sind zimlich alli Tier irgendwo versteckt gsi. Es paar Highlights (Gepard, Luchs, Erdmännli, Schlegerei im Affegheg) häts glich geh. De Alain isch enttüscht gsi, will de Reisefüerer de chlini aber wichtigi Unterschied vo Panda & rote Pande nöd gmacht het und er drum kein richtige Panda zu gsicht becho het . 😞 Nachem Zoo simmer s chline Dörfli Mandal go aluege, womer vome Ussichtspunkt hend chöne über de Hafe und die viele wisse hüser drüber luege und e feini Schoggimilch mit norwegischem Gebäck gnosse hend (söll eifach niemmer fröge, was es genau gsi isch, mir hend kei ahnig aber sisch super gsi). Denn simmer wieder losgfahre richtig Lindesnes, womer ufme Stellplatz Znacht kochet hend und de schöni Sunneuntergang vom Lüchtturm ahgluegt hend. Am morge hemmer bide Bäckerin nebem Stellplatz feini Zimtschnegge gholt (mit de treffende Wort vom Alain beschribe: sisch wie wenn en Zimtschnägg und en Zopf es Baby gmacht hetted) und sind losgfahre richtig Stavanger. Ufem Weg hemmer en Halt gmacht in Flekkefjord, wieder es herzigs Dörfli, und denn namal eine bim Obrestad Fyr (Wie mer inzwüsche gmerkt hend, heisst Fyr Lüchtturm), wos es sehr feins Stuck Chueche geh het. Nebedra isch (lut Alain) eine vode beschte Flüss zum Lachs fische duregflosse, drum hett er natürlich nochli müse d Ruete ine hebe, und ich ha nochli Ort und Sache für eusi nögsti Route use gsuecht. Denn Simmer wiiter gfahre und nach eme letschte churze Zwüschestopp bim Refnesstranda simmer ufem Campingplatz in Ølberg am Meer acho. Mer hend Znacht kochet und sind de Sunneuntergang go luege, wo leider echli hinder de wulche versteckt gsi isch. Ez wird nochli glese und Film gluegt und morn gahts wiiter richtig Stavanger.Okumaya devam et