Ocongate

So, hüt klappeds mit abhole. Es bitz chaotisch isches aber das bini mu ja fengs gwöhnt. Im gwohnte Minibus fahremer denn es bitz meh als drü Stunde bis zum Startpunkt vode Wanderig. Dete gits zerst mal Zmorge :) Denn gohts los is Tal der Lagunen, liecht astiegend immer em beidruckende Berg Ausangate entgege. Ich laufe und plaudere de ganz Weg lang mitem Henry us Australie :) Nach 1.5 Stunde erschiint di erst Laguna mit super Bergpanorama. Super nöch sind au Lagunas Nummer zwei, drü und vier, wobi Nummer vier ehner en Tümpel isch. Also ned falsch versto... Schön sind sie definitiv alli aber halt eifach zum Teil sehr chli. Au Nummer füf und sechs sind ehner chli, defür di letst namel gross 🤗 Alli ligged recht nöch zeme. Mir lönd eus viel Ziit zum gnüsse und snacke bevormer zrugg is Dörfli spaziered. Dete warted scho fast s'Zmittag, was au nötig isch wil trotz ehner chliner Astrengig häts i dere Höchi wider Hunger geh... Leider isches recht troche und gschmacklich au kei Meisterleistig aber he, es isch gnueg ^^ Aschlüssend höcklemer i di vulkanische Therme grad nebeddra für di perfekt Erholig :) Ja und denn isches plötzlich stressig wilmer im Verzug sind und anschiinend es paar uf de Flüger müend hüt Obig 😅 Schliessli simer churz vor de achte zrugg im Zentrum, so dases mir grad na knapp in Campinglade langed zum Wanderstöck für di negste Täg miete. Ufem Rest vom Heiweg pösteli no es paar anderi nötigi Sache, snacke öpis und probiere denn im Hostel möglichst schnell alles richtig packe für de Trek ab morn und de Rest verstaui für de Checkout, gange go dusche und gheie denn is Bett. Ob sich de ganz Tag glohnt hät? Bin mer ned sicher. Schön isches scho gsi aber 7 Stunde fahre für 3.5 Stunde wandere... Glaube würs ned namel mache. De Wecker meint uf jede Fall, daser i 5 Stunde und 30 min scho wider schelled, also isch höchsti Ziit zum schlofe 😅Okumaya devam et