Latinamerica: Ecuador

Souerän im Hostel acho, stoht scho d'Anna parat. Sie warted eigentli ned uf mich aber janu, jetz wartemer halt s'zweite uf ihren Kolleg. Wenig spöter tauchter uf und mir hend es gmüetlichs Bierli uf de Dachterrasse vom Hostel während dene 3 Stund womer no müend warte bis de Nachtbus is Cuyabeno Schutzgebiet vom Amazonas losfahrt :)
Immer mal wider werded verschideni Lodges im Regewald usgruefe wo derfed iistiege, nume eusi (glaub) ned. Am Schluss stoht nume no en Bus dete wo "all the other lodges" na dri chömed. Und mir sind tatsächlich uf de Liste. De Bus isch bequem aber bitz eng bestuehlt. Ich bruche öppe so 3 Stund und e ersti Pinkelpause bisi denn gnueg müed bin zum würkli schlofe und ned nume d'Auge zue ha. Liit vilicht au ade Stross, wo jetz wider bitz grader isch als bide Andeüberquerig. Wos hell wird simer scho irgendwo im Nebel und hend nebst es paar grössere oder chliinere Dörfer au scho sehr viel Grüen vor de Busfenster. Uf de letste paar Kilometer isch d'Stross immer mal wider nur us Schotter und dementsprechend würkli schüttlig. Schliessli erreichemer nach 12 Stunde im Bus s "Basecamp". Dete gits es Zmorge und nachher nehmemer im motorisierte Kanu Platz, wo eus i ungefähr 3 Stund Fahrt ca. 35 km flussabwärts id Lodge bringt. Eusen Guide für di negste Täg wird de Rom si, wo sit 18 Jahr für die Lodge schaffed und im Amazonas ufgwachse isch. Unterwegs gsehmer nebst de beidruckende Pflanzewelt au scho einigi Tier:
- Weissbrusttukan. De grösst vo siinere Art i dem Gebiet. Er frisst unter anderem Babyvögel und Eier
- Morpho Schmetterling
- Anhinga (Schlangenhalsvogel)
- Totechopfäffli
- Wollaffe
- Kaputzineraffe
- Monk Saki (Mönchaffe)
- Stinky Turkey. De letst Überlebend Vogel us sinere Gattig und s'Wahrzeiche vom Nationalpark
- Diversi verbiflügendi Vögel & Papageie
Unterwegs chömemer anere Stell verbi, wo zwei verschideni Flusssystem zemechömed. Es zeigt sich eidütig und iidrücklich, wie White- und Blackwasser inenand verschwimmed. Ganz zum Schluss findemer denn au es ersts Mal use, wieso de Regewald so heisst und mir chömed liecht nass ide Lodge a - es wird bestimmt na dütlich nässer di negste Täg, isch mal e gueti Istimmig ^^
Ide Lodge gits als allerersts es WC, en Willkommenssaft und Zmittag. Denn chömer eusi Zimmer bezieh und mis teili tatsächlich mit de Anna, ohni dasmer das irgendwo ageh hend :) D'Zimmer sind riesig und es hett au na es dritts Bett. Speziell isch, dass ned gschlosse sind, sondern zwüsched Wänd und Dach na zwei Meter offe sind - au zum Nachber ^^ D'Dächer sind us Palmzwiege gmacht. Die hends aber müese ifüehre wil di lokale Palme ned derfed gfällt werde. Nachere churze Pause isch Besammlig für e Kanutour mit Kafee & Kuchen to go.
Ich bsorg mer na en Regeponcho vode Lodge, glaube für uf s'Kanu isch das dütlich agnehmer als Regejagge und -Hose.
Mir fahred wider flussufwärts in Richtig Lagune. Die isch zude jetzige Jahresziit öppe 3-4 Meter unterem maximale Wasserspiegel aber au so höch, dass sie en Teil vom Wald verschlingt und nume na Bäum uselueged 😍 De Sunneuntergang verpassemer knapp wiler mit de Wulche au sehr churz isch. Zum ide Mitti vode Lagune schnell is Wasser gumpe langeds aber na locker. Und das isch herrlich warm und trotzdem erfrischend 🤗 Am Rand vode Lagune wär das viel z'gföhrlich wege allerlei Tier wo sich dete ufhalted, unter anderem de Fisch wo eim chan Stromstöss versetze. Für d'Zruggfahrt mitem Kanu hämer eusi Stirnlampe mitgno. I dene reflektiered sich allerlei Auge starch und verrated dementsprechend womer Tier finded. Ide Theorie eifach - ide Praxis hani na müeh zum das bim doch zimli schnell fahrende Boot umsetze. Aber mir hend ja en Guide debi wo das chan. Und d'Anna isch au sehr guet i dem :) So findemer unter anderem en Great Pootoo (Riesentagschläfer), eusi erst Schlange, zwei Kaimane und vieli flügendi Fledermüs.
Schliessli gits e schnelli heissi Duschi bevors es Znacht git und mer bald alli zimli müed is Bett gönd. D'Stimmig ide Gruppe isch na verhalte aber hüt sind au all müed, beidruckt und neu gsi. Das wird na lockerer :) Es Moskitonetz überem Bett isch überlebenswichtig und schiint i dere erste Nacht sin Dienst ganz guet z'mache. Iischlofe fallt mer mit Vogelgezwitscher, Afferüef, Zikadesurre und so wiiter keis bitzli schwirig. Ide Nacht für d'WC-Pause realisieri, wie dunkel dases isch - würkli dunkel!
Ich bi vo dem erste Tag und de Vielfalt im Regewaöd sehr beidruckt. Natürli sind d'Totechopfäffli mis Hightlight gsi aber au ganz viel anders isch super beidruckend do usse 😊Baca lagi