Reset search
Latinamerica: EcuadorLatinamerica: Ecuador
SatelliteEdit route

Latinamerica: Ecuador

February - June 2023
A 124-day adventure by Maria Read more
  • 67footprints
  • 2countries
  • 124days
  • 794photos
  • 11videos
  • 11.3kkilometers
  • 3.4kkilometers
Follow Calendar Share Bucket list
Date descending
  • TravelerLatinamerica: Ecuador
    1
    Day 72

    Recap 🇪🇨

    May 7, 2023 in Ecuador ⋅ ⛅ 27 °C

    Das isches also gsi mit Ecuador für die Reis und ich luege zrugg uf 10 beidruckendi Wuche. De Start in Quito isch na liecht überfordnernd gsi. Z'gross, lärmig, hektisch, gföhrlich und generell anderst als gwohnt isches gsi. Di viert Wuche Sprochschuel im ruhige und viel naturnöchere Otavalo isch grad s'Gegteil gsi. A die tolle Lüt us de Schuel und di offne Ärm vode Gastfamiliene denki au gern zrugg. Und denn ischs richtig losgange mit s'Land erkunde. Zerst füf Täg im Amazonas mit extrem vielne Tier, wo natürli vorallem d'Affe und Fuultier zude Highlights zelled bi mir 🥰 Denn isch wandere ide Ande agseit gsi, was e wunderschöni Landschaft und d'Lagune Quilotoa als grosse Schlusspunkt mit sich brocht hät. Au de negst Stop im Cotopaxi Nationalpark isch prägt gsi vo verlassner Natur, Hügel und natürli em Vulkan selber, wo fliessig Rauch ufstiegt. Es hend es paar intensivi actionriichi Täg in Baños gfolgt, denn di total Erholig in Macas mitem Vulkan Sangay, wo sogar Lava spukt. Eine vo mine Lieblingsplätz isch denn mit Cuenca cho. E wunderschöni Stadt, iibetted ine gigantischi Landschaft mitem Cajas Nationalpark als Highlight. Und schliessli hät de Ufenthalt ade Küste gfolgt mit surfe und relaxe was das Zeug hält. S'Schlussbouquet hend d'Galapagosinsle bildet, wo dur die viele Tier uf wenig Platz und e jungi Gschicht beidrucked.
    Unterwegs hani vieli Lüt atroffe, di einte hüfiger und intensiver und di andere nume churz. Lustig isches aber fast immer gsi. Di wichtigste für mich:
    - Jaclyn, Cameron, Lenz & Nele us de Sprachschuel
    - Tamara us Sprachschuel & Isabela
    - Anna us Sprachschuel & Amazonas
    - Mandar usem Amazonas
    - Salome, Fabienne, Corinne & Sophie vo Quilotoa & Baños
    - Paul vo Cotopaxi, Cuenca & San Cristobal
    - Bruno & Léon, mini Lieblingssurflehrer
    - Caro & Anouk au us Olón
    - Natürli all die Ufriessertype, wo gern Touristinne aspreched. Au mit ihne isches meistens lustig und lehrriich gsi ^^

    Muchas gracias y hasta pronto! 🥰    Read more

    See translation
  • TravelerLatinamerica: Ecuador
    Day 72

    Adiós Ecuador

    May 7, 2023 in Ecuador ⋅ ⛅ 28 °C

    Hüt verwachi es paar Mal ide Nacht wege starchem Rege. Am schlimmste isches am Morge öppe am füfi. Us de Stross vor de Wohnig isch en Fluss worde... Egal, ich bi ja im Trochne und schlofe hüt sogar mal bis am sibni. Nach es bitz länger umegammle schaffis usem Bett und zude Bäckerei. Zum Glück häts ufghört regne für de Moment :) Zur Feier des letzten Morgens gönni mer es Croissant, was da stolzi zwei Dollar chosted. Zum Verglich: es normals Brötli isch 25 Cent... Zrugg dehei stoht währedem Zmorge widermal es Telefon mit de Schwiiz a, was dasmal mitem sehr schlechte Wlan und au enere instabile mobile Dateverbindig es bitz schwirig isch. I dem Bezug freui mi also scho wider uf s'Festland ^^ Ja und denn muesi schliessli packe, chille relativ lang eifach wils wider regnet und gange denn namel is Dorf für es letsts Glace währedem Seeleue beobachte :) Nachher heissts Wohnig übergeh und mitem Taxi an Flughafe pendle. Theoretisch wärs in Gehdistanz aber isch vilicht ned so intelligent mitem schwere Rucksack und emene immerna agschlagne Chnü... Ich bi extra bitz früeh unterwegs, dasi nachem Checkin na Ziit ha zum die 5 Minute zrugg is Dorf laufe und Zmittag esse. Dummerwiis hät aber de Checkin na gar ned offe und ich mues dete warte... Am Typ us de Surfschuel gohts genau glich, also wartemer zeme bitz ^^ Schliessli öffnet de Checkin, mir gebed s'Gepäck ab und essed denn öpis am Flughafe wils z'knapp wär für zrugg is Dorf. De Sicherheitscheck isch au keis Problem und so wartemer namel es bitz, bismer pünktlich zum boarde bitted werded. Ich schaffes endli mal, zum di letst si, wo das macht 🥳😂 In Reihe 5 nimi Abschied vo dem chline Paradies names Galapagos - schön isches gsi 🥰 Es isch scho beidruckend, wie viel Tier dasmer do uf sehr wenig Platz findet. Und wil sie nie würklich gjagt worde sind, hends au kei Angst vor eus. Hüfig bini gfroged worde, wenn dasi zrugg chume. Ich weisses würkli ned wil jetz am Schluss muesi sege hani gnueg übercho vo schnorchle und so und freue mi zerst uf e komplett anderi Welt in Bolivie 🤭Read more

    See translation
  • TravelerLatinamerica: Ecuador
    Day 71

    San Cristobal - Más playas

    May 6, 2023 in Ecuador ⋅ 🌧 28 °C

    Au hüt klappeds ned mit usschlafe. Wie immer verwachi pünktlich am sechsi wos hell wird und de Verchehr zuenimmt. Nach bitz gammle und sehr gmüetlich zmörgele muesi mal wider Wasser poste (müehsam...) und mache mi uf de Weg zum Playa Baquerizo, wo bitz wiiter weg isch als di andere. Eigentli hetti wele mit de Lütlis vo gester go bike, aber glaube mis Chnü wür das ned so toll finde... Bim laufe chani immerhin selber bestimme, wie fest dasis wett büge :) Unterwegs zum Strand isch es chlises Museum zude Gschicht vo Galapagos und ich lose es bitzeli bide Füehrig zue, wo per Zuefall grad isch. Wasi lerne:
    - San Cristobal und Española sind öppe 3 - 4 Millione Johr alt. Isabela z.B. Nume 700'000 Johr
    - Alli Insle beweged sich öppe 1.5 Meter pro 50 Jahr in Richtig Festland . Findi einigermasse viel
    - Grossi prächtigi Koralleriff gits ned, wil d'Wassertemperature viel z'unkonstant sind
    - 4 verschiedeni Meeresström treffed uf Galapagos ufenand und füehred zu dementsprechend unterschiedliche Bedingige ade Stränd
    - Di erste Seelüt wo Galapagos als Zwüschestop brucht hend, hend Landschildkrotte als Nahrig für unterwegs mitgno. Das isch sehr praktisch, wil die ohni Wasser und Nahrig 6 - 12 Mönet chönd überlebe.
    Nach dere Informationsfluet goht de Spaziergang erst richtig los und es isch wider richtig drückend heiss hüt morge... Am Afang isch de Weg na usbaue, denn eifach en Trampelpfad und ohni Mensche. Das verleited mich dezue, zum Chopfhörer montiere und i einere Luutstärchi mitsinge 😁 Schliessli chumi bim Strand a und gange go schnorchle. D'Strömig isch recht starch merki, drum blibi ned so lang im Wasser. Woni usechume entdecki bedrohlich graui Wolche. Das git höchstens en churze Rege - hani denkt. Churz spöter höckli untereme Baum und bin am lese, wos immer stärcher afangt regne... Meh Schutz gits da ned und zruggo isch wohl au e Pflicht, drum laufi eifach mal los und hoffe. Scho nach churzer Ziit bini klitschnass. Zum Glück hani d'Schutzhülle für de Rucksack debi, so dass immerhin d'Kamera troche blibt :) Als Abchüelig isch de Rege durchus perfekt. Ufem Weg triffi wider zwei vo gester und laufe bitz mit ihne. Chum verabschided, entdecki de Omri im Museum, wo denn grad zrugg is Dorf chunnt und wo denn au er ine anderi Richtig mues, taucht wider de Typ us de Surfschuel uf (woni de Name immerna ned weiss ^^). Tja, so gross isch das Dorf also 🙈 Eigentli wetti denn dusche aber ha grad kei Wasser ide Wohnig - wie ironisch währends dusse durchus starch gregnet hät... Also chöcherli ganz eifach (es wird s'einzig mal blibe woni "choche") und wechsle denn in Siestamodus :) Schliessli schiint d'Sunne wider und ich gange uf Dessertsuechi inere Bäckerei - mhh fein :) Und wils grad so schön isch, entscheidi zum namel am Rochestrand mis Glück mit Roche und Sunneuntergang probiere. Zum ned es allzuschlechts Gwüsse vor luuter Abwiisig übercho, ladi denn au de Teddy dezue ii und da seiter natürli ned nei. Also stürzemer eus wider zeme id Fluete, was hüt gar ned so schlecht passt wil d'Welle sind durchus grösser als sus amel. D'Sicht isch hüt öppe glich schlecht wie gester und dementsprechend schnell simer au wider dusse. Und schliessli fangts namel a regne... Das wars dann wohl mit mim letste Sunneuntergang uf Galapagos. Janu, han ja es paar schöni gha :) Wider klitschnass zrugg ide Wohnig klappeds dasmal mit flüssend Wasser. Erfrischt gnüssi denn de letst Abig miteme feine ecuadorianische Znacht in bester Gsellschaft vo ganz vielne Reisende, wo sich all irgnedwie so halbe kenned :)    Read more

    See translation
  • TravelerLatinamerica: Ecuador
    Day 70

    San Cristobal - Entre hospital y playas

    May 5, 2023 in Ecuador

    Wie abgmacht gohts hüt nachem Zmorge wider is Spital. Dete machi wider genau s'gliche wie gester: warte, Bluetdruck messe, Froge beantworte und miteme Dokter rede. Er meint dasmer sötted röntge, aber das macheds erst am Nami wider, mir sölled am zwei namel cho - danke für wider ned viel. "Willkomme z'Ecuador" meint min Host dezue ^^ Immerhin isches gnueg Ziit, zum en wiitere Strand erkunde. Chum bini zum Huus us, gheit mer de Teddy über de Weg, wo am liebste grad wür mitcho. Ich vertrösten aber - wett lieber mini Rueh ha als ihn ^^ Unterwegs zum Playa La Loberia hät en Rollerfahrer Mitleid mit mir, und nimmt mi churzerhand mit. Segi natürli ned nei, wil zum uf de asphaltierte Stross laufe isches eigentli definitv z'heiss :) Nach dem sinds nume na es paar Meter bis zum Strand. Dä isch au wider schön aber bitz überbsuecht und mit wenig Schatte, drum gangi ned go schnorchle. Defür verzellt mer de Nationalparkheini, wo wie a so vielne Orte Personaldate erfasst, dasmer na wiiter chan laufe zumene Ussichtspunkt. Das tönt na guet und machi denn au, unterwegs di zum Teil duchus imposante uf s'Vulkangstei ufschlagende Welle beobachtend. 30 Minute spöter bini bim Ussichtpunkt, womer ine Bucht gseht und im Wasser tribendi Schildkrotte chan beobachte. Au en Redfeetboobie hät sichs da uf de Klippe zum brüete bequem gmacht :) Ufem Zruggweg machi vorallem eis: schwitze - mal wieder. Aber ich beklage mi ned, lieber so als schlechts Wetter. Und bide Tshirts chunnts au nüme drufa, die sind eh scho vollgschwitzt 😂 Für de Zruggweg gönni mer denn es Taxi, wo definitiv z'tüür isch für die 5 Minute aber ha grad nüm möge laufe und mis Chnü seit vermuetli au danke... Zmittag gits en Snack am Hafe und denn heissts scho wider ab is Spital und siehe da, dasmal muesi ned warte. Aber d'Nachricht isch ned besser wege dem. Anschinend macheds grad kei Röntge, ich söll i zwei Stunde wider cho. Langsam nagts also würkli a minere Geduld... Janu, also ab an Rochestrand. Leider isch d'Sicht sehr schlecht hüt, ich gseh also wider nüt. Gibe mal de Fluet ufem Höchststand und bi Vollmond d'Schuld. Defür triffi na zwei Lütlis vo gester a und mir mached wider ab zum Znacht - weni denn nüm im Spital am warte bin ^^ Nachem Salzwasser abdusche nehmemer de Weg is Spital zum vierte Mal in Agriff. Danke übrigens an Alexander, wo sich dementsprechend zum vierte mal devoschlicht bim schaffe... Ja und dasmal gohts au wider schnell: amelde, aneligge, röntge und zack, fertig. So eifach wärs. Müemer nume na zrugg in Notfall zum d'Resultat beurteile. Dete acho segeds eus, dasmer defür en Termin müend ha und dass si denn am Mäntig wider schaffed. Dank em Alex sinere Erklärig, dass ich am Sunntig min Rückflug han, findets plötzli es bitz freii Ziit für mich ^^ De Dokter vom Morge luegt d'Röntgeufnahme a und meint "isch alles guet, d'Chnoche sind ned kaputt". Erst bi siebe mal nochefroge findi use, dases öpis mit de Bänder oder so isch, und dasi eifach söll schone, bises nüm wehtuet. Okey, alles klar, danke. Jetz weissi au, wieso dases gratis isch bi dem Service aber he, besser als nüt :) Viel schneller als erwarted simer also fertig und mached eus na uf d'Suechi nachere Pharmacie für en Stützstrupf, wo us Erzählige durchus hilft zum schone. Bide dritte Pharmacie werdemer schliessli fündig. Erst dehei findi use, dass überhaupt ned das verpackt isch, wo ufem Bild isch. Also zrugg und umtusche und denn isch das ganze endli so wies sött si - hallelujah. Jetz blibt nume na z'hoffe dasi ned z'lang Schmerze han, wil es gohts ja bald uf Bolivie und dete wetti eigentli parat si zum wandere... Für de Sunneuntergang gangi an Hafe und gnüsse eifache es bitz d'Rueh inmitte vo Seeleue. Ufem Zruggweg triffi denn per Zuefall uf de Omri, au vode Tour gester. Mit ihm pläuderli, bis au di andere zwei Tourkollege mit namel zwei Kollege uftauched und mer all zeme gönd go esse :) Womer zum Resti uselaufed, entdecki de Paul. Jawohl, de Paul us Cotopaxi und Cuenca. Mit dem hetti überhaupt ned grechnet und dementsprechend gross isch d'Freud! Hetti sini letst Sprachnachricht mal glosed, hettis gwüsst. Ups ^^ Die Widerveinigung fiiremer grad na miteme usgiebige Spaziergang am Meer. Das isch defintiv en versöhliche Abschluss vo dem sus halbe erfolgriiche Tag 🤗Read more

    See translation
  • TravelerLatinamerica: Ecuador
    Day 69

    San Cristobal- 360°

    May 4, 2023 in Ecuador ⋅ ⛅ 30 °C

    Ajj hüt verwachi mit meh Chnüschmerze 😫 Janu, mini Tour finded trotzdem statt. Miteme Boot gohts eimal um di ganz Insle - natürli mit Zwüschestops. Ich bi pünktlich i minere Agency, dete trödlemer aber so lang ume, dases nachher na stressig wird für uf s'Boot ^^ D'Teilnehmer sind all öppe i mim Alter, glaube das chönnt en lustige Tag geh. S'Problem: ufem Boot hämer zwar viel Ziit zum rede aber mitem konstante Motorelärm isches halt bitz schwirig... Bis zum erste Stop sinds glaub öppe 1.5 Stund Fahrt i einigermasse welligem Wasser. Min Mage vertreit das aber immerna sehr guet :) Mitem Notfallschluchböötli werdemer an Land brocht, womer na es paar Minute zu eusem Schnorchelspot laufed. Dete werded eus viel Schildkrotte versproche und das bestätigt sich. Zwüsched eus insgesamt öppe 50 Lüt vo 4 Boot häts ganz bestimmt na meh Tier als Mensche in allne Grössene, mer mag chum noche mit luege 🥰 Ab und zue schwimmt au wider en Seeleu verbi :) De Strand selber isch kein Sandstrand sondern bestehend us Korallereste. Inmitte vo ultra müehsame Rossbräme wartemer, bis eus s'Schluchboot zrugg uf s'Boot bringt. Dete ergatteri en Platz bim Kapitän obe und gnüsse besti Ussicht für e witerhin welligi Fahrt. De negst Stop isch bimene Felse, wo d'Redfeetboobies brüeted und dementsprechend zahlriich vom Boot us z'bestune sind :) Ab jetz wird s'Meer ruhiger. Für de Zmittag setzemer de Anker inere ruhige wunderschöne Bucht. Es git frisch brötlete Fisch und Riis 🤗 Nachem Esse hämer au do na Ziit woni bruche zum schnorchle und au es bitz im Wasser ufem Rugge ligge und d'Sunne im Gsicht gnüsse :) S'grosse Highlight chunnt jetz zum Schluss: de Kicker Rock, wos massewiis Hai söll ha. Glaube ufem Weg do here nicki mal churz i - uf mim Plätzli uf de Brüstig. Ups, do brucht mer Stabilität ^^ De Kicker Rock ragt einsam vor de Insle usem Wasser, was Deepwatersnorkeling mit sich bringt. Mir gsehnd also unter eus kein Meeresgrund sondern nume Fisch und nebed eus de Felse. E intressanti, bitzeli beängstigendi Erfahrig... Nebst de Fisch zeiged sich eus tatsächlich es paar Galapagoshai, Schildkrotte und Seeleue :) Nume de Hammerhai wett sich mir immerna ned zeige. Eusen Guide hät gseit, mir sölled immer bi ihm blibe. Chasch denn mal, wenn 50 Lüt um dich ume hesch und nume d'Schnorchel gsehsch... So passierts, dasi ihn und mini ganz Gruppe verlüre und mi eifach emere andere ahenke, was besser isch als elei irgendwo strande... Dummerwiis goht die Gruppe au in Felsspalt ine, wo eusen Guide devor gwart hät wil zu dere Jahresziit Stei chönd abbreche, was denn im dümmste Fall tödlich endet. Aber ebe, wett ned elei unterwegs si also gangi mit. Schliessli taucht mis Boot wider uf und di ganz Besatzig winkt mer zue. Zrugg bi ihne kassieri en Zemeschiss aber finde immerna dases di best Lösig gsi isch. Sölled si sich öpis überlegge dasmer wenigestens am Guide sin Schnorchel erkennt oder so wenn mer söll chöne folge... Das druckt grad es bitz fest uf mini Stimmig aber naja, sus ischs durchus sehr beidruckend gsi :) Nume e churzi Fahrt spöter erkenni wider d'Schnorchelstränd rund um s'Dorf und mir chömed heil und immerna ohni seechranki Lüt im Hafe a. Schliessli vergissi mis Schnorchelzüg ufem Boot und mues mitem Wassertaxi namel zrugg 🤦🏻‍♀️😂 Bim Usrüstig zruggbringe probieri mal velofahre. Goht ned, chan s'Chnü ned gneug büüge :/ Also frogi de Typ, wies mit Gsundheitsabklärige so funktioniert do. Er meint, mer chan jederziit im Notfall vom Spital uftauche, die helfed denn - sogar gratis - wiiter. Während ich no überlegge, obi wett verbigo, rüefed mer es paar Lüt vode Tour zue, wo im Bier sind. Da chani ja ned eifach wiitergo. Währedem gspröchle beschlüssi, dasi tatsächlich is Spital wett und froge min AirBNB-Host, ober mi als Local chönnt begleite wiler weiss, wie dases lauft. Er mues na schaffe aber chan gern nachher mitcho meinter :) Also blibi na bitz im Bier und gange denn mitem Omri zude Tauchschuel woner morn e Tour hät wili vilicht au namel wett go. Si gönd aber mit de ned lizenzierte nume anen Spot wos kei Hai hät, also ischsmers ned wert zum mitgo. Und de zweit Lade woni na schnell froge, isch di negste Täg usbueched. Isch vilicht au besser für mis Chnü... Schliessli gohts z'fuess die paar Minute zum Spital. Dete isch mal warte agseit und denn Bluetdruck und so Züg neh (scheibe, bin dütlich schwerer als vor 2 Mönet. Glaube d'Waag isch falsch...). Nach es bitz meh warte chunnt mal öper für es Gspröch. Fazit: de Orthopäd mues drufluege, mir sölled morn morge namel verbicho. Okey, danke für ned viel und bis morn. Zrugg dehei gnüssi en Frustsnack und denn ischs scho zimli Ziit zum go ligge nach dem durchus ermüedende Tag :)Read more

    See translation
  • TravelerLatinamerica: Ecuador
    1
    Day 68

    San Cristobal - Las playas

    May 3, 2023 in Ecuador ⋅ ☀️ 29 °C

    Es schloft sich also super so imene eigene Zimmer :) Eigentli wetti hüt als ersti Amtshandlig go jogge aber mis rechte Chnü schmerzt us unerklärliche Gründ, drum wird das gstriche. Nachem Zmorge machi mi gmüetlich spazierend uf de Weg zum Playa Tijeretas, wos super söll si zum schnorchle. De Weg füehrt mi dur de Busch, amene andere Strand verbi und über zwei Ussichtspünkt und e Darwin-Statue denn zu dere Bucht. Dete wirdi vo einigermasse vielne Seeleue und au scho es paarne Lüt empfange. Also Schnorchel montiere und los! Es isch tatsächlich sehr schön und ich entdecke en recht lustige neue Fisch mitere risesige lange Nase ^^ Jedes mal wenn en Seeleu uftaucht hani es bitz Angst respektive Respekt voreme Agriff, was aber natürli nie passiert. Di ganz Ziit chani eigentli nume eis Bei bruche, s'ander tuet bi schnelle Bewegige oder z'fest büüge weh... Irgendwenn wirdi bitz müed und gange mi ad Sunne go tröchne, bevor de Ufstiig zum negste Ussichtspunkt ob de Bucht astoht - sehr schön :) Wil d'Sunne wider vollgas git, gangi denn an Playa Mann go chille, wo sehr viel Schatte büted. S'einzig "störend" isch, dasmer nie weiss, ob oder besser gseit wenn dass en neugierige Seeleu verbichunnt und eim s'Plätzli am Strand striitig macht 😂 Schliessli chumi hunger über und gange zrugg go Zmittag snacke. Am Nami stoht es bitz Administration a. Zerst e Tour bueche. Für das hani drü Agencies empfohle übercho, wo aber all na zue hend. Nimi halt e anderi, chunnt öppe ned drufa am Endi... Wil die au Velos und Kajaks hend, frogi mal, obs Flickzüg für mis Nackechüssi hend und das klapped denn au. S'Loch chunnt es bitz Liim und es Pflaster über. Würkt bitz bastled aber hebed uf jede Fall bis jetz. Denn probieri erfolglos e Schnalle für min Rucksack ufztriibe - das muesi wohl z'Bolivie namel probiere. Und schliessli luegi mal schnell, wiemer eusi Ziit in Bolivie iiteiled und was so d'Ireisdbestimmige sind. Sött eigentli klappe mit mim Zertifikat. Schliessli isch da immerna das Problem mitem Geld abhebe, wo no ned klapped. Ha Müeh mitem Onlinezuegang zum usefinde warum, drum schribi mal de Bank und hoffe jetz, dass sie chönd helfe. Ja und denn hät de Teddy Firobig und mir mached eus uf de Weg an Playa Punta Carola, womer gemäss ihm hüfig viel Roche atrifft bim schnorchle. Ich finde vorallem viel lässigi Fischschwärm und e cooli Felselandschaft aber d'Roche zeiged sich erst, womer nachher am Strand höckled. Muesis halt widermal probiere ^^ Bim usem Wasser usecho schnapped mi na en Seeleu am Fuess. Das tuet ned weh aber han es halbs Herzchriesi wilen ned gseh han aschlieche 🦭 De Sunneuntergang gnüssemer au na am Strand und mached eus denn uf de Weg zrugg is Dorf. Dete gits en feine Burger zum Znacht - endli mal wider :) De Teddy meint na, dass frischi Aloe Vera eis von Grossmutters Gheimrezept gege Schmerze isch. Also pflückemer so eini, ich warte bis de Saft usgloffe isch und schniide si denn uf, zum mer so schleimigs Züg iischmiere - hoffemer dases hilft :) Und nachher hani na mitere Südkoreanerin abgmacht, womer uf de Vulkantour uf Isabela troffe hend, zum uf ihren letste Obig astosse. E Anekdote zu dem: bi ihne isches so ungwöhlich zum nackti Huut zeige, dass sie sich zimli mues überwinde zum s'Pullöverli abzieh und di frisch Luft ade Schultere gnüsse 🙈Read more

    See translation
  • TravelerLatinamerica: Ecuador
    Day 67

    Transfertag Isabela - San Cristobal

    May 2, 2023 in Ecuador ⋅ ☀️ 29 °C

    Hüt muesi würkli früeh use. Checkin für d'Fähre isch 05.10... Ich verwache sogar no vorem Wecker - wieso genau weiss niemer ^^ Au um die Ziit isches scho zimli warm, so dasi bim an Hafe laufe is schwitze chume... Währedem warte dete goht d'Sunne uf. Für das hät sich s'ufsto scho glohnt 🤗 D'Fährefahrt zeigt sich so ruhig, dasi sogar na es bitz döse chan :) E direkti Fähre uf San Cristobal gits leider ned, drum strandi z'Santa Cruz und mues dete es paar Stündli totschla. Immerhin chani mis Gepäck bide Travel Agency meines Vertrauens und em Ideyo deponiere :) Ich mues bemerke, dass d'Schnalle vo mim grosse Rucksack uf de Fähre kaputt gange isch. Jetz trägi alles Gwicht uf de Schultere anatatt de Hüfte, was zimli astrengend isch. Hoffe dasi uf San Cristobal e neui Schnalle chan organisiere... Jetz gohts uf jede Fall mal uf Souvenirjagd, wovos definitiv gnueg git. Wirde schliessli mit Magnetli und Tshirt fündig :) Jetz würi gern amene Sandstrand in Schatte ligge und döse aber mini Erfahrig seit, dases das do ide Nöchi ned git und ich han nume mässig Lust zum 45 min laufe defür. Finde es chlises Pärkli mitere lustig verzierte Keramikwand und Schatte. Dete chilli es Ziitli, bis mi d'Mugge fast uffressed und ich hunger han. De Burgerplatz womer de Ideyo empfohle hät findi grad ned, drum gits namel es lokals Almuerzo. Chum hani bstellt, schribt de Ideyo, was mini Essensplän sind. Churz nachher höckleter gegenüber und verzellt vo sine erschreckend klare Zuekunftsplän. Do fühli mi grad bitz planlos 😂 Widermal meh als volle chumi vo ihm es ruhigs Plätzli miteme Steg anere Lagune um de Egge empfohle über zum bitz aneligge, wasi denn au mache. Es isch würkli ruhig und ich glaube, ich halte es churzes Nickerchen. Ufem Weg zrugg zum Gepäck gönni mer es Glace, halte denn namel en churze Schwatz mitem Ideyo, wo mi für de Fährecheckin begleited und mues schliessli au vo de zweite Insle hüt Abschied näh. D'Fähre isch dasmal viel luxuriöser bestuehlt und es chönd all wettergschützt vorwärts fahre 😎 Ufem ganze Weg bini wider am Blog tippe und stune ned schelcht, womer scho nach 1.5 statt 2 Stunde im Hafe vo San Cristobal achömed. Dete warted scho ganz viel Seeleue uf eus, nume vo mim AirBNB-Host isch nüt z'gseh... Ah doch, irgendwenn merkemer, dasmer beidi uf de jewiils ander warted ohni eus z'erkenne 😂 Er füehrt mi i mini Wohnig für di negste Täg, verzellt vode beste Aktivitäte und Schnorchelspots und bringt mer denn au na e eigni Schnorchelusrüstig - sehr nett! Ide Wohnig hani ganz viel Platz für min Kram und mal wider e eigni Chuchi, uf das freui mi :) Für de Sunneuntergang gangi an Hafe abe und wett go bade. Vor zweiterem hani denn aber wege z'viele Seehünd Angst ^^ Bim am Steg entlanglaufe wirdi mal wider vo zwei Iheimische agsproche und mitem einte, em Teddy, ischs denn na es Ziitli lang ganz lustig (usser dasi wider vo Mugge ufgfresse wirde... Die sind do agressiver als im Amazonas). Bin aber bald mal zimli müed und gange hei zum öpis chlises esse und früeh go ligge. Glaube uf San Cristobal wirdi mi au wohl fühle. Es isch so halbe gross und schiint weniger Touris z'ha als Santa Cruz mit Stränd im Dorf oder nur wenig entfernt zum chille und schnorchle 🤗Read more

    See translation
  • TravelerLatinamerica: Ecuador
    Day 66

    Isabela - Volcan Sierra Negra

    May 1, 2023 in Ecuador ⋅ 🌧 25 °C

    Hüt stoht e gfüehrti Wanderig ufem Vulkan Sierra Negra a. Für die müemer 07.20 parat si, nume zum denn warte bis eus e Halbstund spöter s'Sammelbüsli ufladed. Schiint unkonstant z'si do ^^ Es sind Lüt vo zwei Toure im Büsli und lustigerwiis isches denn es rechts Chaos, bis sich d'Guides einig sind, wer wenn mues usstiige. Als obs das ned jede Tag genau glich würed mache 😂 Aber au a das hani mi eigentli gwöhnt. Bis jetz hät na immer alles klapped ^^ D'Wanderig füehrt zerst uf d'Krete vom Vulkan und denn dere entlang. D'Sicht uf de vor ca 2'400 Johr kollabierti Krater (de Fachname isch Caldera) isch gigantisch. Wieso dasmer weiss dases 2'400 Johr sind? Ganz eifach: de Candelabrakaktus wachst ungefähr 3 mm pro Jahr und di höchste Exenplar im Vulkangstei sind fast acht Meter höch. D'Caldera hät en Durchmesser vo 10 km und isch komplett vo zwei verschidene Lavaarte usgfüllt. Di verschidene "Linie" ide Lava zeiged di verchidene Täg vom letste Usbruch. Grundsätzlich gilted bi Vulkän: je flacher, desto berechebarer. De Sierra Negra bricht zimli regelmässig öppe all 15 Johr us, wobi s'letst Mal 2018 gsi isch. Dankemene Monitoring weissmer immer öppe 6 Mönet im Vorus, dases wider passiert. Flüchte isch aber für d'Locals kei Option. Sie beobachteds lieber vo nöchem ^^ Unterwegs lönd am Wegrand verschideni Materialie d'Stei zum Teil in rot, silber und blau schimmere :) Zuesätzlich findemer chlini intakti und en grosse kollabierte Lavatunnel. Anschinend sött mer do nie dur d'Tunnel laufe wilmer nie weiss, wenn di aktive Vulkän zu Erschütterige füehred. Im Gegesatz zude Tunnel uf Santa Cruz, wo d'Vulkän nüm aktiv sind - Glück gha ^^ Bim zrugglaufe gits denn zwei chlini Unfäll vo Lüüt, wo stürchled. Di eint devo isch in Sandale unterwegs - ufere 15 km Wanderig 🤷🏻‍♀️ Halb so wild, mir schaffeds dankere medizinisch bestens usgrüstete Teilnehmerin all zrugg zum Büsli, au wenn sichs zimli zieht... D'Rückfahrt mitem Büsli gnüssi miteme Fensterplatz. Mir fahred entlang vo Gmües- und Früchteplantage, dur Wald und Wiese und immer wieder dur tröchneti Lavaström 😍 Nachere Empanada zum Zmittag isch endli mal es bitz Siesta agseit - die hani nötig. Schliessli klappeds denn mit Geld hole und ich chan mini Schulde bide Tamara begliche - danke ad Travelcash, woni sit 5 Johr unnütz bsitze ^^ Hoffe dases ufere andere Insle denn au mit de normale Charte wider goht... Nach de grösste Hitz wagi mi uf de Flamingosteg, wo schön dur d'Salzlagune hinterem Hostel füehrt. Anstatt Flamingos findi aber "nur" Babyentli :) Und denn gits namel e Abchüelig im Meer, woni grad au d'Tamara wider atriffe. Zur Feier vo eusem letste gmeinsame Obig gönnemer eus es tüürs Znacht am Strand wo au sehr fein isch aber leider dütlich z'wenig für das womer zahled. Zum Glück vergesseds, eus de Drink z'verrechne, denn gohts wider uf ... Bi dem Znacht gsellt sich na öper zu eus, woni ide Surfschuel und sit gester scho es paarmal atroffe han. D'Reisewelt wird immer chliner ^^ Und denn gits au hüt wider ide gmüetliche Bar "Pink Leguan" en letste Drink bevors bi mir packe heisst. Wil mini Zimemrkollege scho schlofed, passiert das im Taschelampeliecht - upsi 🙈Read more

    See translation
  • TravelerLatinamerica: Ecuador
    Day 65

    Islabela - vistas buenas

    April 30, 2023 in Ecuador ⋅ ⛅ 28 °C

    Hüt morge gömer so früeh wies d'Öffnigsziite vode Reception erlaubed wider mitem Schnorchel los zude Concha de Perla. Es hät gheisse, am Morge hegis na ned so viel Lüt und defür meh Tier. Falsch ^^ Glaube ganz viel Lüt hend das gseit übercho, so dasmer hüt weniger erfolgrich sind als bim erste Mal aber egal, isch trotzfem schön und ei Roche findi denn au :) Zum troche werde hängemer wider zwüsched Seeleue, Meerechse und emene Päärli wo am usnüechtere isch ufem Steg und gnüssed d'Ussicht. Plötzli merki, dass mis Handy woni ufes Bänkli gleit han meh oder weniger vomene Seeleu beschlagnahmt wird und probieres unter sinere Flosse wegzieh, ned dasers is Wasser schmeisst oder so... Er findet das ned nett vo mir und attakiert min Oberarm... So Seeleuezäh sind also na spitzig ^^ Aber alles guet, han nachher mis Handy wider und de Biss isch nume churz schmerzhaft gsi. Ufem Zruggweg merki, dasi s'Tshirt woni jetz amel abhalte han zum schnorchle ohni en Sunnebrand am Rugge übercho , irgendwo unterwegs verlore han. Also laufi alles retour aber blibe leider erfolglos uf de Suechi - scheibe, das hetti gern wider gha... Tja, egal, wiiter im Tagesprogramm: mir sueched es Velo zum miete und mached eus uf de Weg zum Ussichtspunkt Cerro Orchilla. Unterwegs haltemer bide Salzwasserlagune zum Vögeli beobachte, binere Landschildkrott am Wegrand, bimene erste Ussichtspunkt und bimene Asiat wo Veloproblem hät ^^ Es isch au hüt wider brutal heiss 🥵 Nach sechs Kilometer isch Endstation mitem Velo und es goht z'Guess wiiter. Zerst chunnt d'Muro de las Lágrimas wo als letste Überreste uf e düsteri Epoche vode Insle erinnered, wo do es Gfangenelanger gsi isch. Und denn started de Ufstieg zum Ussichtspunkt z'fuess. Dank de Hitz isch denn das au zimli astrengend aber es lohnt sich :) Dobe gnüssemer im Schutz vomene Dach und miteme konstante Windli es Picknick. Lustigerwiis taucht plötzli wider eine vode Locals uf womer scho kenned. D'Welt uf dere Insle schiint sehr chli z'si. Glaube sogar z'chli für mich uf längeri Ziit 🙈 De Zruggweg vorallem mitem Velo isch abetürlich wil d'Bremse meh Verzierig als Bestandteil vode Velos sind. Zum Glück ischs nie würkli steil. Bim dritte Strand womer apeiled ischs denn au endli möglich zum bädele und mir gönned eus die Abchüelig so schnell wie möglich - herrlich! S'Meer do hät e rechti Siitwärtsströmig und au es bitz vom Strand weg, so dasmer bitz Geduld bruched zum zruggcho... Womer zum Wasser use chömed tauched plötzlich Wulche uf, so dasmer gmüetlich chönd lang am Strand chille und Chraftüebige mache ohni Angst voreme Sunnebrand müese z'ha :) Ufem Heiweg is Dorf buechemer denn na e Vulkantour für morn und started di für Isabela normal Obigroutine, wobi au hüt de Sunneuntergang inexistent isch. Lustig isch, dasmer do würkl immer di gliche Lüt wider gseht. Wemer am Obig ade Restis am Strand verbilaufed, höckled ganz sicher Lüt vode Fähre oder vode Tour dete ^^Read more

    See translation
  • TravelerLatinamerica: Ecuador
    Day 64

    Isabela - Los Túneles 🦭🐢🐧

    April 29, 2023, South Pacific Ocean ⋅ 🌙 26 °C

    Eusi Schnorcheltour hüt started erst am 11i, das heisst ich han vorher ganz viel Ziit wil das mit dem Usschlofe isch immerna sone Sach wenns früeh hell wird. Woni verwach gsehni, dases bewölkt isch und dementsprechend au mal wider ned z'heiss zum go jogge 🤭 Ob das wohl e gueti Idee isch miteme schüche Kater...? Jawohl isches! Es tuet guet und lauft sich au agnehm entlang vom schöne Strandweg. Heiss isches denn aber trotzdem ^^ Ja und nach es bitz Erholigsziit fangi mi a parat mache für d'Tour, so planed dasi genau pünktlich parat bi und sicher ned z'früeh wil mir sind ja immerna in Ecuador. Dummerwiis isch s'Taxi hüt dütlich z'früeh dra und mues drum uf mich warte - upsi 😂 D'Fahrt an Hafe verbringemer hinde ufem Pickup gmüetlich im Fahrtwind. Eusen Schnorchelspot isch öppe 45 Bootsminute entfert und je nöcher dasmer chömed, desto meh gsehts nach Starchrege us. Churz vorem Ziel fangts denn au a, was aber egal isch wilmer ja gschützt sind und nachher eh is Wasser gönd. Eigentli ischs ganz schön, mal so erfrischti Luft z'ha. Di erst Schnorcheleinheit duured denn öppe e Stund und füehrt eus dur felsigi Landschafte. Im einte Teil häts massewiis Schildkrotte zum beobachte und imene andere isch de Haichindergarte mit ganz vielne chline Wiisspitzhaie, so dass d'Tamara ned mal mues Angst ha ^^ Untereme Felse sind denn au na es paar usgwachsni Exemplar z'entdecke wo grad s'Mittagsschlöfli mached :) Au zwei Seepferdli findemer 🥰 Nume es paar Bootminute und ei erfrischendi Melone wiiter isch de zweiti chürzeri Schnorchelgang agseit. S'Highlight do: d'Galapagos-Pinguin 😍 All Lüt hend gseit dasmer kei werded finde i dem Teil wilsne aktuell grad z'heiss isch aber siehe da, öppe 15 Stuck höckled ufem Felse und gnüssed ihres Lebe. Spöter schwimmeds per Zuefall grad au na a mir verbi. Nebst dem isch d'Felslandschaft spektakulär und mir finded en Lobster und e Tigerschlange. Denn simer all hungrig wil das umepaddle und komisch schnufe isch astrengender alsmer denkt... Es git es guets Zmittag ufem Boot, zmitzt ide Felsformatione vo Los Túneles. Wieso dases do so heisst, isch uf de Fotis dütlich z'erkenne. E wunderschöni Landschaft, womer nachher ufeme churze Spaziergang no erkunded. Bim Fotoshooting macht sich d'Tamara de Zeche bitz kaputt - ha doch gwüsst dases kei gueti Idee isch zum uf dene Lavagsteiformatione umegumpe ^^ Au en Bluefeetboobie wo grad am Eier usbrüete isch chömer na vo ganz nöch beobachte :) Ufem Zruggweg mitem Boot ergattered mir zwei d'Logeplätz bim Kapitän ufem Dach und gnüssed besti Sicht uf alles. Alles bedüted d'Mantaroche wo churz sichbar sind (oder amel en chline Teil devo ^^), d'Felsformation Union Rock mit brüetende Vögel, d'Isla Isabela wo immer links vo eus isch und en zweite Starchrege wo vor eus isch und mer na werded verwütsche. Uf eusne Plätz hämer kei Witterigsschutz aber mir wend trotzdem blibe. Isch für s'Badzüg gar ned so schlecht, denn gsehts mal wider Süesswasser vo nöchem ^^ S'einzig negative: irgendöpis mit de GoPro vom Guide hät ned klapped, so dasmer jetz kei Fotis hend vo eus mit Tortugas, Pinguine und Haie, was extrem schad isch aber ja... Zrugg im Hostel machemer eus frisch und probiereds wider mitem Sumneuntergang. Hüt ischs aber z'bewölkt defür. En Drink gits trotzdem wider ^^ Und denn haltemer eus hüt an Plan und gönd zrugg is Hostel go choche. Es git saufeini und sauviel Gmüespasta :) Zum verdaue spazieremer es bitz dur s'Dörfli und gnüssed d'Rueh. Mir sind beidi recht müed und gönd früeh go ligge nacheme wiitere wunderschöne Tag uf Galapagos :)Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English