Tilbakestill søk
4/7- Wältreis
  • Jasmin Steiner
  • Daniel Felder
okt. 2024 – jun. 2025

4/7- Wältreis

De Dani ond d'Jasi gönd mol go luege, wies a anderne Orte so esch. Les mer
+5
FølgOversiktKalenderDelDelBøtteliste
Nyeste først
  • 4/7- Wältreis
    1
    1HCMCBi de Cu-Chi-TunnelBelöftigsöffnig vom Tunnel11Bschisse!

    Tag 60: HCM & Cu Chi

    12. desember 2024, Vietnam ⋅ ☁️ 31 °C

    Of üsere Reis dör Vietnam hemmer einiges öbere Vietnamchrieg glehrt, sichtbari Spure defo hemmer aber bishär ned wörklech gseh. Metere Tour zo de Cu Chi Tunnel hemmer hött Öberbliibsel vo dem Chrieg huutnöch welle erläbe. Do d'Tour erscht am Nomittag gsi esch, hemmer de Vormittag gnützt, zom a Dollar cho för Kambodscha. Es vermeindlech eifachs Onderfange hed sech als Odyssee usegstellt: Noch vier erfolglose Versüech be Banke hemmer denn en Wächselstobe gfonde, wo Dong i Dollar gwächslet hed. Die grosse Note i chliineri z'tuusche esch ähnlech onmöglech gsi, de hemmer ufgäh ond ghofft, dass es a de Gränze kei Problem wörd gäh (üs esch gseid worde, dass före administrativi Ufwand jewiils 5$ pro Person zahle mösst).
    Zrogg zo de Tour: Mer hend s'Glöck gha, die einzige Gäscht z'sii of dere Tour, hend also die ongeteilt Ufmerksamkeit vo üsere Füehrerin Rose gha. Dass mer vellecht ned ganz so vel us dere Tour wärded chönne metnäh, hed sech scho glii abzeichnet, wo mer enand noch jedem drette Satz vo ehre verständnislos agluegt hend... Bevor mer is Museum send, hemmer no en Halt gmacht benere Wärchstatt för Lüüt, wo vom Entlaubigsmittel Agent Orange betroffe send. Das Geft, wo d'Amerikaner im Vietnamchrieg iigsetzt hend, zeigt no bes hött sini Wörkig, indems be Embryone zo Missbeldige füehrt ond die Chend scho vo ehrem erschte Läbenstag a vomene Chrieg zeichnet send, wo eigentlech scho lang verbii esch.
    Ofem "Museumsgländ" sälber hemmer zerscht paar zerstörti amerikanischi Chriegsfahrzüüg agluegt, bevors de i Dschungel gange esch. Üs esch s'Belöftigssystem vo de Tunnel zeigt worde, nochhär hemmer sälber dör d'Tunnel chönne chrüüche. Di erscht Äbeni vo de Tunnel esch de Bsuecher z'lieb erwiiteret worde, sodass mer "bequem" in geböckter Haltig hed chönne dörelaufe. Die urspröngleche Gäng send so schmal gsi, dass die breiter baute Amerikaner denne stecke blobe send, vor allem di beide tüüfere Äbene vom Tunnelsystem, wo d'Vietnamese müesse hend chrüche ond wo för d'Bsuecher ned offe send. Grösseri onderirdischi Rüüm send s'Spital, de Besprächigsruum, d'Chochi (meteme spezielle Chämi, demets ned zonere verröterische Rauchsüüle cho esch) ond d'Mine- und Fallefabrik. Det hend d'Guerillas Blindgänger demontiert ond zo Landmine "recyclet". Obwohl d'Rose üsi Frog met "nei" beantwortet hed, chömmer üs ned vorstelle, dass es do ned ab ond zue mol zo Onfäll cho esch. D'Präsentation vo de diverse Fallene hed de Rose offebar am meischte Spass gmacht. "Easy to die" schiint ehre Lieblingssatz z'sii 😂
    D'Heifahrt hed sech de als rächti Useforderig usegstellt: Rushhour in HCM heisst, dass mer för en Wäg, wo normalerwiis 20 Minute goht, öber 2 Stond hed. Ändlech im Hotel acho, hemmer de Rose ehre Wonsch nocheme Review erföllt - ond bereut. Mer hend de Tag ächt cool gfonde, aber de Rose ehres Änglisch esch halt eifach wörklech schwär z'verstoh gsi. D'Jasi heds gwogt, drom "nor" 4 vo 5 Stärne z'gäh, was d'Rose ine regelrächti Krise gstörzt hed. Öber WhatsApp hemmer das düütlech z'gschpöre becho...    Les mer

    Se oversettelse
  • 4/7- Wältreis
    Naga (Schlange) & Löwe: BeschützerDe Opfer vo dem Ort werd im Memorial House gedänkt, wo ehri stärbleche Öberräschte ufbewahrt sendChoeung EkGfängnis S-21. Vor de Rote Khmer esch das e Schuel gsi.S-21 Haftbedingige ond DuschiGolden Temple: Naga & Asuras (Dämone)Dani & Dine vorem OnabhängigkeitsdänkmalKönig SihanoukMmmh. Gummifröschli send besser...

    Tag 61, 62 & 63: Phnom Penh

    13. desember 2024, Kambodsja ⋅ ☁️ 30 °C

    Medemene Reisebus hemmer üs ofe Wäg nach Phnom Penh, Kambodscha gmacht. Öber d'Iireis hemmer vel abentürlechi Gschechte ghört, was üs ned grad zueversechtlech gstemmt hed. Osserdem heds i fascht jedem Brecht gheisse, dass mer 5 USD Schmiergäld zahle müess, egal ob mer bereits es E-Visa hed oder ned. Sie heigeds jewiils met "Bearbeitigsgebühr" begröndet. Mer send drom zemli öberrascht gsi, wo mer relativ zögig ond ohni zuesätzliche Uslage dörfe hend iireise.
    In Phnom Penh semmer am Obig pönktlech acho, is Hotel ond no rasch öbis go ässe.
    Üse Plan för de nöchscht Tag hed för de Morge en Stadtbesichtigong of eigeti Fuuscht vorgseh. Mer send bi üsem Spaziergang onder anderem bim Königspalascht, bim buddhistische Tämpel Wat Phnom Daun Penh ond bem Stadtchärn verbi cho. Vor allem bim Königspalascht hend üs vel Tuk-Tuk-Fahrer en Tour abote, was üs regelmässig ufghalte hed. Eine vo dene Fahrer, de Dine, hemmer sehr sympathisch gfonde ond ehm drom versproche, mer wörded üs no mälde, ob mer am nöchschte Tag med ehm en Usflog mache wörded.
    S'Nomittagsprogramm hed üs denn rächt gforderet, wil mer üs met de Gräueltate vo de Rote Khmer a de eigete Bevölkerig, wo zwösche 1975 bis 1979 s'Läbe vo 2 bis 3 Millione Läbe koschtet hed, usenandgsetzt hend. Zerscht hemmer Choeung Ek, eis vo öber 300 Killing Fields in Kambodscha, bsuecht. Killing Fields send Massegräber, in dene d'Opfer vom Regime vo de Rote Khmer hiigrichtet ond verscharrt worde send. D'Brutalität, wo di meischt jugendliche Täter a Tag gleid hend, esch onvorstellbar ond komplett onbegröndet. In Choeung Ek send ongföhr 20'00 Mönsche hiigrechtet worde, 129 Massegräber hed mer gfonde.
    Veli Opfer vo dene Killing Fields send zerscht Insasse vomene Gfängnis gsi, wo mer si so lang gfoltered hed, bis si ergendwelchi Sache gstande hend, om si nochär z'exekutiere. Die Gständnis send meischtens druf usegloffe, dass sie met de CIA zämeschaffed. Osserdem hends no wiiteri Näme müesse nenne vo Persone, wo au involviert seiged. Onter de onglaubliche Quale hend d'Insasse früener oder spöter alles gstande, au wenn si ned emol gwösst hend, wer oder was d'CIA esch. Om sech vor Racheakt z'schötze esch denn jewiils grad die ganz Familie hiigrechtet worde, au Babys.
    Im Gfängnis S-21, au bekannt als Tuol-Sleng-Genozid-Museum, send vier vo de wenige Öberläbende vor Ort gsi ond hend Uskonft gäh ond ehri Büecher verchauft.

    De folgendi Tag hemmer medem Dine verbrocht. Är hed üs am Morge abgholt ond zom Mongkol Serey Tämpel (au als Golden Temple bekannt) brocht, wo är üs öbere Buddhismus in Kambodscha informiert hed. Noch dem Bsuech vo dem iidröckleche Tämpel semmer wiiter of d'Silk Island ond hend eini vo de Siide-Manufakture bsuecht, wo mer bi de Siideverarbeitig chönne hend zueluege. Sehr beeidrockt gsi semmer vo de Handgreff wo all perfekt setzed.
    Wiiter esch es zo zwoi wiitere Tämpelalage gange. Bem zwoite Tämpel hed üs chli betroffe gmacht z'gseh, dass mer be üsere Akonft grad vo vier Chend empfange ond de ständig begleitet worde send, wo üsere Meinig noh i de Schuel mössted sii. Grad verwahrlost hends ned usgseh, aber mer hed scho gseh, dass sie ned vel hend. E zahnlosi jongi Frau hed üs zomene Baum gfüehrt, wo paar Affe dinne ghocket send, de Dine hed ehre deför es chliises Trinkgäld gäh. Das esch ehre "Job" ond das werd wohl au das sii, wo die Chend i Zuekonft wärded mache. Mer hend spöter erfahre, dass die öffentleche Schuele in Kambodscha zwor gratis send, es aber kei Schuelpflecht ged. Was i de Schwiiz en Fall för d'KESB wär, interessiert do leider niemer. De aschliessendi Ponkt vo de Tour esch denn s'komplette Gägeteil gsi: D'Diamond Island. So werd dä Stadtteil gnennt, wo d'Wolchechratzer zom Bode us schiessed ond Läde vo Luxusmarkene i einere Reihe stönd. Wiiter eschs de gange zo de "Prunkstross", wo s'Unabhängigkeitsdänkmal ond s'Dänkmal vom Königsvater Sihanouk stönd. De Sihanouk werd in Kambodscha sehr verehrt, objektiv gseh chönnt mer aber säge, är esch e Fahne im Wind gsi... De aktuelli König schiint üs en vernönftige Mönsch z'sii (schiint of Konventione z'pfiiffe: onverhürotet, wel gmäss Sok homosexuell, mehrsprochig, Balletttänzer...), aber z'säge hed er i sim Land halt nüüt. Noch dem Morge voller Iidröck semmer met em Dine no go z'Mettag ässe ond woner üs bem Hotel weder abglade hed, hed er üs no en Iiladig usgsproche. Wenn mer weder mol of Phnom Penh chämed, wörd är üs gärn zo sech hei iilade ond üs sinere Frau vorstelle 🥹
    Am Obig hemmer scho weder Programm gha: Food Tour! Zäme met de Esther us Singapur ond em Sok, üsem Guide, semmer die kulinarische Schätz vo Kambodscha go entdecke. Dass zo dene Schätz warmi Kokoschüechli ond Smoked Noodles ghöred, gsähmmer ii, die frittierte Insekte fendemer allerdings gwöhnigsbedörftig. Die lokale Glacékreatione wie Durian ond Taro send zwor ongwohnt, aber fein. Als Abschloss vo de Tour wär no eis Bier inere Bar ofem Plan gstande. De Sok hed üs aber offebar so sympathisch gfonde, dass er üs ine Bar gfüehrt hed, wo mer die einzige Touris gsi send ond üs grad no en Biertorm bstellt. Debii mömmer doch morn früeh uf... 🙈    Les mer

    Se oversettelse
  • 4/7- Wältreis
    Windig am Saracen BayLazy BeachHätt er sech doch nor rechtig iicremt...🙈Zerscht dör s'Wasser, ...... denn döre Dschungel, ...... denn of de steinige Stross, ......weder zrogg i Dschungel, bes...... zom Sunset Beach ond de Chräbs :)Khmer Kafi

    Tag 64-67: Koh Rong Sanloem

    16. desember 2024, Kambodsja ⋅ ☁️ 29 °C

    Hött fahremer is Paradies! Met de Insle Koh Rong Sanloem vor Auge, semmer nochere vel z'chorze Nacht ofe Bus, wo üs i die angäblech hässlechschti Stadt vo Kambodscha, noch Sihanoukville, brocht hed. Wel mer diräkt a Hafe send, hemmer ned allzu vel vo de Stadt gseh, uffallend send aber doch die vele onfertige "Gebäudeliichene" gsi. En Amerikanerin hed sech vo de onklare Agabe vo de Fährigsellschaft närvös mache loh ond esch drom emmer chli be üs blobe, demet sie d'Fähri jo ned verpasst. Noch es betzeli Warte esch de d'Fähri ändlech cho ond mer send use ofs ruuche Meer. S'esch denn en zemmli holprigi Fahrt worde 🤢 En Mitfahrer, wo vo sech behauptet hed, of de Insle imene Hotel z'schaffe, hed sogar gmeint, dass grad am Morge es Fischerboot ondergange seig. Wohrheit oder nor Gschwätz vomene Wichtigtuer? Mer send of jede Fall wohlbehalte ond met ongläärte Mäge of de Insle acho, wo mer meteme ungwöhnleche Shuttleservice is Hotel brocht worde send: Jedes vo üs esch metem grosse Rocksack (ca. 16kg) am Rögge hende ofene Roller ghocket ond de eschs öber staubigi Fäldwäge zom Hotel gange. Sone asträngendi Töffahrt hemmer also no nie erläbt. Im Hotel acho, hemmer de nömme vel möge mache ond send de eifach chli am Strand go laufe, bevor mer send go z'Nacht ässe. Ond es hed gäh - Pizza! 😄 So fein gsi!
    Am nöchschte Tag semmer of die ander Siite vo de Insle gloffe zom de Lazy Beach go aluege. Vor Johre mol als eine vo de Top 21 Stränd vo de Wält gwählt, esch er emmer no wonderschön ond öberraschend wenig bsuecht gsi. Leider esch üsi Huut ned oder nömme so sonnegwöhnt gsi wie mer gmeint hend ond am Obig semmer chli (Jasi) sehr (Dani) rot gsi. Am druffolgende Tag hemmer en andere Strand bsuecht, nämlech de Sunset Beach. Schöni Sache muess mer sech jo bekanntlech erarbeite ond so hend au mer en steinige Wäg of üs gnoh zom a dä Strand glange. Es hed sech definitiv glohnt! D'Jasi hed vel Ziit met Chräbs beobachte verbrocht, de Dani hed im Schatte gläse, am Ändi vom Tag hemmer no zäme de Sonneondergang gluegt, wo do wörklech sehr schön esch. Dank Stirnlampe ond Anti-Brumm esch au de Wäg zrogg is Hotel keis Problem gsi. Wels üs so guet gfalle hed, hemmer am nöchschte Tag genau s'Gliiche gmacht 😊 Es send drüü sehr entspannendi Täg gsi, wo mer of dere Insle verbrocht hend. Jetz semmer weder parat för neui Iidröck!    Les mer

    Se oversettelse
  • 4/7- Wältreis
    Shuttle
    Do hed de Dani di holprig Öberfahrt scho prognostiziert gha.Eini vo de vele "Gebäudeliichene" vo Sihanoukville.Dämol leider kei Privatkabine im Sleeperbus

    Tag 68 & 69: Reisetag & Siem Reap

    20. desember 2024, Kambodsja ⋅ ☁️ 28 °C

    Als Reisetag esch de Tag 68 eigentlech schnell verzellt, wäred do ned weder de Shuttle vom Hotel zom Pier ond denn no d'Öberfahrt met em Boot gsi. Andersch als be de Ankonft semmer be de Abreis met em "Massetransportmittel", emene Ahänger, zom Pier brocht worde. Die diräkte ond onverfälschte Iidröck vo de Omgäbig (Mittagssonne, Staub, Schlaglöcher, Sitzflächi = Ladeflächi) hend üs bsonders gfalle. Ofem Wasser eschs met dene diräkte Iidröck wiitergange, wo d'Öberfahrt anere Achterbahnfahrt gleche hed, so sehr hend d'Wälle met üsem Boot gspellt. Mer send zom Glöck hende gsi, de esch es eigentlech guet gange. Eini hemmer allerdings beobachtet, die hed ned so glöcklech driigluegt... Wel üse Bus erscht am Obig gfahre esch, hemmer üs (vomene dreiste Taxifahrer) a d'Busstation fahre loh, wo mer s'Gepäck för paar Stond deponiert hend. Vellecht liids jo eifach am Quartier, aber dä Teil, wo mer vo Sihanoukville gseh hend, esch wörklech ned so schön gsi. Ond Sandwich för s'Znacht onderwägs hemmer au niene gfonde. De heds halt Chips ond Nössli gäh zom z'Nacht (d'Jasi hed no Glöck gha ond en Bao Bun ergatteret). D'Fahrt met em Nachtbus esch weder mol rächt agnähm gsi ond am früehche Morge semmer in Siem Reap acho. Met Stock ond Stei gäge streunendi Hönd bewaffnet (wo aber sehr schüch ond gar ned gföhrlech gsi send), semmer zom Hotel gloffe ond hend zom Glöck grad scho ofs Zemmer chönne. Nocheme chorze Powernap semmer scho weder los ond send die zuegäh, wenige Highlights vo Siem Reap go aluege. Härzig esch die Stadt aber trotzdem ond noch ca. 12'000 Schrett hemmer denn es früehchs z'Nacht gnoh, wel mer früeh is Bett hend mösse.Les mer

    Se oversettelse
  • 4/7- Wältreis
    Warte ofe Sonneufgang. Vel besser werds leider ned.
    Vishnu in Angkor WatApsaraHandsome ond di andere zwoiEingang zu Angkor ThomBayonApsarasTa ProhmTa Prohm2Üs heds det so guet gfalle, dass mer üs en Wohnig agluegt hendNeui Gschmacksrechtig: Taro-Kokosnoss

    Tag 70: Angkor

    22. desember 2024, Kambodsja ⋅ ☁️ 20 °C

    De Wecker hed üs scho am vieri us üsne Träum gresse. De Grond för die früehchi Tagwach esch ned öppe de Angkor Wat Indochine Marathon gsi, sondern e Sonneufgangs-Velotour zo Angkor Wat ond anderne Tämpelaalage. Üse Guide, de Handsome, hed üs am halbi füfi met em Tuktuk vorem Hotel abgholt ond de semmer of Angkor Wat usegfahre, wo scho honderti Läufer zo fätziger Musig sech am iilaufe gsi send. Sovel zomene entspannte Start i Tag... Obwohl de Handsome üs en super Spot ergatteret hed (of 10cm genau hed är üs platziert!), hemmer leider of Grond vo Wolche en zemmlech onspektakuläre Sonneufgang erläbt. Nochhär semmer i die riesig Tämpelaalag ine, wo mer die spannend Dörmeschig vo Hinduismus ond Buddhismus a de verschedne Relief gseh hend: Tanzendi Apsaras, e Statue vom Vishnu, de Shiva in Form vomene phallusförmige Stei, Darstellige vo de Höll (alles usem Hinduismus) ond dezue no onzähligi Buddhas. Zo dem Mix esch es cho, wel Angkor Wat im 12. Jh. ursprönglech als hinduistische Tämpel baut worde, vo nochfolgende Herrscher met anderem Glaube denn aber omgstaltet worde esch. Noch de Tour dör Angkor Wat esch es erscht 08:30 gsi - Ziit förs z'Morge ond denn los of d'Velo. Of ruhige Strosse ond sandige Waldwäge esch es wiiter gange zo Angkor Thom, bzw. em Haupttämpel Bayon. Obwohl dä Tämpel nor paar Dekade jönger esch als Angkor Wat, esch sin Zuestand bedüütend schlächter gsi. Üs esch gseid worde, dass sinerziit wohl am falsche Ändi gspart worde seig. Baupfusch schiint keis moderns Phänomen z'sii... Die grosse Törm met de iigmeisslete Gsechter send aber emmer no sehr iidröcklech ond au d'Relief, wo verschedni Situatione usem Chrieg ond Alltag darstelled, wörked no sehr lebändig. De letschti Tämpel könnt mer us Reisekatalög ond usem Kino: D'Lara Croft als Tombraider hed in Ta Prohm mol ergend en verschollnige Gägestand gsuecht. Mer hingäge hend probiert, de iidröcklechschti Baum i dem Tämpel z'gfende. Gar ned mol so eifach gsi, wel die "Spongetrees" ond Wörgefiigene so bizarri Forme chönd anäh, dass es fascht scho könschtlech (wie ofeme Filmset) wörkt. Noch dem eigentlech chorze, aber doch lange Tag hemmer no met em Handsome z'Mettag gässe ond send weder zrogg is Hotel. De Räscht vom Tag hemmers chli ruhiger loh agoh.Les mer

    Se oversettelse
  • 4/7- Wältreis
    Toureplan
    De Vegi hed Freud a de PilzMarktAm Staub ässeSiestaJetz es Riisfäld, vo April bes Oktober en See"Floating" Village1Denn dueder so interessiert...Buddha, von Naga beschütztBrahmaVishnuWeihnachtsessen

    Tag 71+72: Floating Village & Heiligobe

    23. desember 2024, Kambodsja ⋅ ☀️ 18 °C

    Wels üs met em Handsome so fescht gfalle hed, hemmer före nöchschti Tag grad nomol e Tour be dem Abieter buechet. Leider hed üs ned de Handsome is Henderland vo Siem Reap bes zom Tonle Sap See gfüehrt (dä esch scho förne anderi Tour buechet gsi), sondern de Vandy. Är esch be wiitem ned so gschpröchig gsi wie de Hansome ond hed üs stillschwiigend e Pilzfarm ond de obligatorischi Märt zeigt ond öber staubigi kambodschanischi Landstrosse gfüehrt. Nocheme usgiebige z'Mettag hemmer no chli Siesta i de Hängematte gmacht, bevors wiiter gange esch zo üsem Tagesziel, em Floating Village am Tonle Sap See. D'Bezeichnig tüüscht echli, wel eigentlech triibed die Hüüser ned, sondern stönd of bes zo 9 m höhche Stelze. Was üs sehr fasziniert hed, esch d'Tatsach, dass die 6 km langi Stross wo mer gfahre send vom Ticketschalter bes zom Bootstäg i de Rägeziit komplett vo Wasser omgäh esch. Mer hend de spöter usgrächnet, dass dä See im "volle" Zuestand öber halb so gross esch wie d'Schwiiz!
    Met em Boot semmer dör s'Dorf gfahre ond hend so en chliine Iibleck is Läbe vo de Iiheimische becho. Ofem See hemmer gwartet, bes d'Sonne ändlech ondergoht (de Sonneondergang hemmer gar ned ombedengt welle luege, aber esch halt Teil vo de Tour gsi) ond mer weder hend chönne omchehre. Im Tuktuk eschs de im Donkle weder zrogg of Siem Reap gange.

    De nöchschti Tag esch de 24. gsi. Zur Feier des Tages semmer ines Museum gange: S'Nationalmuseum in Siem Reap beschäftigt sech met de Entstehig vo Angkor ond em Khmer- Riich, was üs noch üsere Füehrig dör die drüü Tämpel bsonders interessiert hed. Die 17 $ Iitrett pro Person plus je 5 $ före Audioguide hend üs zwor chli öberrascht, aber wel mer jo bekanntlech alles usemene Museumsbsuech use holed, esch das guet investierts Gäld gsi. Mer hend vel öbere Buddhismus ond Hinduismus im Allgemeine glehrt ond im Bsondre au diversi Gschechte us de hinduistische Mythologie wie die vom "Verwirbeln des Milchozeans" (Samudra Manthan) zom as Elixir vom ewige Läbe cho. Rächt abgspaceti Gschecht...
    Wiiter hemmer no öppis zo de wechtigschte Khmer-Könige glehrt ond wie jede vo dene em ganze Angkor-Komplex sin eiget Stämpfel ufdröckt hed. Noch füüf Stond hend üsi Chöpf grüücht ond üsi Mäge gchnurrt. Mer hend aber för am Obig imene guete Restaurant reserviert gha ond üse Honger drom nor met chli Nüssli ond Wasser zähmt.
    S'Haven esch vomene Schwiizer Ehepaar is Läbe gruefe worde, wo of ehrne eigete Reise dör Kambodscha erfahre hed, dass Heimchend dank velne Steftige zwor e gueti Schuelbeldig bechömed, die, wo aber nochhär ned no wiiter ane Uni chönd, ohni Möglechkeit förne Bruefsusbeldig do stönd (wel jo kei Familiebetrieb ome esch, wos chönnted öbernäh) ond oft Opfer vo Mönschehandel wärded. I ehrem Restaurant belded sie drom genau die Jugendliche im Gastrobereich us ond gänd ehne so d'Chance, i eim vo de vele Hotels in Siem Reap e Stell z'gfende. Gueti Sach! S'Ässe, die Agstellte ond de Chef send au sehr guet gsi :)    Les mer

    Se oversettelse
  • 4/7- Wältreis
    Erschti Chauf in Thailand: En Inhalator :)
    Vogel, Art unbekanntBienenfresserBekassineHornbillWaran500-jähriger Ficusergend en KauzWisse GibbonDie hemmer verpasst...Mer send de gliich nomol i dem Resti go ässe 😋

    Tag 73, 74, 75: Nationalpark

    25. desember 2024, Thailand ⋅ ☀️ 28 °C

    För d'Ziit vom 25.12. bis 12.01. semmer noch Thailand greist. Am Mäntigmorge semmer vomene Bus ad Gränze chauffiert worde, det hemmer üs z'Fuess ond ohni bürokratischi Onderstötzig of die thailändisch Siite gmacht (wechtig: au als Fuessgänger muess mer de Wächsel vo Rächts- of Linksverchehr beachte). Üses Ziel, d'Stadt Pak Chong nördlech vom Khao Yai Nationalpark, esch e drüüstöndigi Autofahrt vo de Gränzstadt Aranyaprattet entfärnt gsi. Gäg de spöter Nomittag semmer is Hostel cho ond hend en chlini Erkondigsreis dör de Ort, inklusive Restaurantbsuech, absolviert. Pak Chong sälber esch jetz ned grad voller Sehenswördigkeite, s'Ässe esch aber sehr fein gsi ond vor allem hemmer s'Ässe no nie so schnell serviert becho! Fascht wie imene Fast Food Restaurant. D'Bsetzer vom Resti hend so Freud gha a üs Farangs, dass üs gfrogt hend, ob mer am nöchste Tag nomol chömed. Ofem Wäg zom Hotel semmer no amene Wiehnachts-/ Neujohrsfestival verbii cho, wos a diverse Ständ Ässe, Chleider ond no meh Ässe gäh hed. För d'Onderhaltig vo jung ond alt hed en Sänger gsorgt, wo sone riesigi Böhni elei för sech gha hed, dass mer de Iidrock gha hend, dass er en lokali Berüehmtheit sii chönnt. Die arme Häsli, Färli ond Gitzi im Streichelzoo hend offesechtlech leider kei VIP Status gha...
    Em Dani sin Darm hed s'Ässe ned so fein gfonde ond so hed er sech i de erste Nacht in Thailand met de Toilette agfröndet.

    Am nöchschte Tag semmer i Nationalpark. Vom urspröngleche Plan, dete z'zälte, semmer wäge Buechigsschwerigkeite ond em Gröcht öber diebischi Affe abcho ond hend stattdesse en Tagesusflog öber s'Hostel bueched. Erwartigsgmäss semmer chli en grösseri Groppe gsi, mer hend üs de met de Asia-Fraktion agfröndet. So hemmer ned nor öber die lokali Tier- ond Pflanzewält öppis glehrt, sondern au öber China ond Macau. D'Tina, üse Guide, hed üs mehreri Stond döre Wald gfüehrt ond mer hend debii diversi Vögel ond vo wiitem au Gibbons gseh. "D'Hauptattraktion" vom Park aber, d'Elefante, hemmer leider ned gseh, wohl aber ehri Spure in Form vo Gägel ond malträtierte Bäum.
    Mer hend d'Hoffnig ofene Elefantesechtig noni welle ufgäh ond hend am nöchschte Tag en Roller gmietet, zom nomol i Park goh ond imene andere Gebiet sueche. Leider semmer för de gwönschti Hike Nr.5 (wo mer mit Guide mache muess!) 20' z'spot cho ond so hemmer de gliich Hike Nr.3 mösse mache, wo sehr ähnlech gsi esch wie das am Vortag. Üse Guide, wo mer de Name ned mol erfahre hend, hed leider kei Änglisch gredt, s'Nötigschte a Infos hed är üs aber metere Öbersetzigsapp zuecho loh. Wo mer grad e riesigi Spinne am betrachte gsi send, hed sech en düütschi Familie (wo in Biel läbt) üs agschlosse ond so esch us ere Privatfüehrig e Groppefüehrig entstande. I dem Fall hed üs das ned gstört, wel de Mystery Guide eh nüüt gredt hed. Am Ändi vo dere Tour hemmer no Nommere ustuuscht met de Familie ond mer send denn no of eigeti Fuscht es Waldstöck go erkonde - in Bezog of Tiersechtige leider weder sehr erfolglos. Mer send denn weder hei ond chuum semmer im Hostel acho, hemmer vom Steffen, em Familievater, en Standort via WA gscheckt becho, inkl. Beld: En Elefantefamilie...    Les mer

    Se oversettelse
  • 4/7- Wältreis
    Blick vo de Hotelterrasse
    De Dani fröndet sech met em Hotelpersonal aBuddhachopfWat RatchaburanaWat RatchaburanaWat Phra Si SanphetWat Chai WatthanaramWat Chai WatthanaramD'Jasi of ChlätterentzogWat LokkayasuthaWat Phu Khao ThongWat Yai Chai MongkhonWat Yai Chai MongkhonZrogg hemmer de d'Fähri gnoh...Üses charmante Hotel

    Tag 75 & 76 : Ayutthaya

    27. desember 2024, Thailand ⋅ ☀️ 33 °C

    Noch üsem Usflog i Nationalpark hemmer no am gliiche Tag wiiter welle of Ayutthaya. D'Fahrt vo Pak Chong det äne hed sech als wiitus komplizierter usegstellt, als mers üs vorgstellt hend, wel, wie mer leider z'spot gmerkt hend, keis Grab i de Region verfüegbar esch (mer hend eifach druf vertraut gha, dass mer denn scho eis bechömed). D'Alternative, de Zog, esch zo dem Ziitponkt leider au wäggfalle, wel d'Frischt för d'Billetbuechig scho döre gsi esch. Glöcklecherwiis hed üs de Typ vom Hostel grad no die letschte zwe Plätz ofeme Büssli chönne organisiere, wo of Bangkok gfahre esch. Zwor esch au die Fahrt chli chaotisch gsi aber schlossändlech semmer am Ziel acho ond hend üses Zemmer imene öber 100-jöhrige Huus chönne bezieh.

    Triggerwarnig Mäsi: Noch zwoi Täg Natur werds weder Ziit för echli Kultur! Ayutthaya esch bes 1767 Hauptstadt vom siamesische Königriich gsi ond nocheme Chrieg gäge Burma ufgäh worde. Im historical park send d'Ruine vo dere ehemals imposante Stadt för Bsuecher zuegänglech, was au üses hötige Programm gsi esch. Mer hend üs Velos gmietet ond üs scho noch 10 Minute in (gfühlti) Todesgfohr brocht, wel mer, of Ussag vom Vermieter hii, öberne vierspurigi Brogg gfahre send.
    De erschti Ponkt vo üsere Tour esch de Wat Mahatat Ayutthaya gsi, e buddhistischi Tämpelruine meteme ine Baum iigwachsne Buddhachopf als Highlight. Nochem benochbarte Tämpel Wat Ratchaburana semmer d'Öberräschte vom Tämpel Wat Phra Si Sanphet go aluege. Vom goldige Buddha im Tämpel näbedra hemmer wäge Renovierigsarbete leider nüüt gseh. Währed mer of üsne Drohtesle de nöchschti Tämpel agfahre send, hend anderi leider en tieronfröndlecheri Fortbewegigsart gwählt ond send of Elefante grette. Üsi böse Blick send ehne hoffentlech iigfahre ond sie gönd nie meh go Elefanteriite. Nochem Wat Chai Watthanaram hemmer emmer noni gnueg Tämple gseh gha ond send no drüehalb wiiteri go aluege, bes mer de ändlech gnueg gha hend. Wer jetz metzellt hed, chond of 8.5 Tämple. Vo dene velne Iidröck ond Velofahre be strahlendem Sonneschiin semmer total döre gsi ond send nocheme feine z'Nacht grad go schlofe.    Les mer

    Se oversettelse
  • 4/7- Wältreis
    Nachtbus
    Morge am 5i ond all warted gedoldig of de AschlossbusFein, gsond ond fotogen - es perfekts z'Morge im Much & MellowChlini Abchüelig im SpeicherseeStrample i de KautschukplantageKautschukmelchNoras (ned Apsaras) med zwoi Touris

    Tag 77, 78 & 79: Reise nach Ao Nang

    29. desember 2024, Thailand ⋅ ☁️ 30 °C

    Zom of Ao Nang / Krabi z'cho, semmer einehalb Täg onterwägs gsi, nämlech vo Ayutthaya met em Bus noch Bangkok ond denn vo Bangkok met em Nachtbus noch Surat Thani, wo mer omgstege ond wiiter of Ao Nang gfahre send.
    In Bangkok hemmer es paar Stonde zom Öberbröcke gha ond send nochem Deponiere vo üsem Gepäck ines Kafi go läse. Demet mer pönktlech weder zrogg bem Busbüro send, hemmer üs förnes früehchs Znacht entschede ond send of die füfi ines Restaurant, wo erscht grad före Obigservice sech am parat mache gsi esch. Entsprächend hend vor üs erscht öppe vier oder füüf anderi Persone öppis bstellt gha. Gnueg Ziit also zom bis am Sächsi fertig sii. Wos de 17.45 gsi esch ond mer emmer no nüüt z'Ässe gha hend, send mer (ond no zwoi anderi) denn langsam närvös worde. Die hend wohl jedes Gricht einzeln zuebereitet... Met es betzli pressiere hemmers rächtziitig zrogg gschafft. Ond was förnes Chaos hed üs do erwartet! Vorem Busbüro tuusigi vo Mönsche, alli met ehrem Gepäck ond alli met em gliiche Ziel: Iichecke. All hend en Chläber inere bestemmte Farb becho, je nochdem, was s'Reiseziel gsi esch. Mer send chli skeptisch gsi, wie das denn funktioniere sel ond send einisch meh öberrascht worde. Obwohls (för üs) sehr onöbersechtlech ond hektisch gwerkt hed, heds de Aschiin gmacht, als ob all ofem rechtige Bus glandet seiged. Mer send uf all Fäll ofem gwönschte Bus Rechtig Süde greist.
    Nochemene Zwöschestopp om Metternacht ond emene Buswächsel i de früehche Morgestonde met emene wiitere Stopp semmer gäg de Mettag wohlbehüetet in Ao Nang acho. De Willi, en alte Familiefrönd vom Dani wo det läbt, hed üs härzlech empfange. Bem Willi ond sinere Fröndin Maria semmer för die nöchschte Täg ondercho. Mer hend also üses Zimmer bezoge ond en Duschi gnosse, bevor mer a Strand ines Reschti send, wo mer de reschtlech Tag verbrocht hend.

    I letscht Tag vom Johr hemmer metemene usgezeichnete Zmorge im Much & Mellow gstartet (Jasi: "S'beschte Zmorge of de Reis bis jetzt!"), bevor mer z'vierte im Wald send go bike. Bevor mer met dere Aktivität hend chönne starte, hemmer no es vierts Bike müesse uftriebe, was schweriger gsi esch als dänkt ond was mer de becho hend, esch leider onbefriedigend gsi.
    Wo mer de ändlech los hend chönne, esch es bereits zemmli warm gsi ond s'Mietbike hed d'Fahrt met sim Achti, de knappe Gäng ond de schwache Bräms ned grad agnähmer gmacht. Nochdem de Dani no schnell ine See gompet esch, semmer zrogg ond hend üs förs z'Nacht parat gmacht, wo mer weder imene Strandrestaurant verbrocht hend. So hemmer s'24gi loh usklenge ond send relativ bald noch Mitternacht im Bett gsi, wil mer am nöchschte Tag früeh uf send.    Les mer

    Se oversettelse
  • 4/7- Wältreis
    Longtailboat
    Railay BeachFree soloFree solo II / Ofem "Wäg" zom Ussechtsponkt & de Lagune1Abstieg zo de Lagune1Ao Phra Nang BeachOnd retour of Ao NangKhao Ngon Nak Nature Trail

    Tag 80 & 81: Ao Nang / Krabi

    1. januar, Thailand ⋅ ☁️ 30 °C

    De Start is 2025 esch perfekt gsi: Mer send gsi go chlättere of de Halbinsle Rai Leh. Do kei Stross dethii füehrt, hemmer es Longtailboot vo Ao Nang Beach noch Rai Leh gnoh, wo mer nochem z'Morge send go Chlätterusröschtig miete. Dass mer kei Guide dezue hend welle, esch wohl chli ongwöhnlech gsi aber schlossändlech keis Problem. Obwohl de Dani sini Chlätterusbeldig lang vor de Jasi gmacht hed, semmer beshär no nie zäme gsi go chlättere. Es ged also emmer no erschti Mol be üs 😊 Binere Wand bem Diamond Cave hemmer üs onder de ufmerksame Beobachtig vom Willi, sälber en ehemolige Chlätterer, gägesiitig gsecheret ond för di nöchschte paar Stond ometornet, bis üsi Ärm kei Chraft me gha hend. De Willi ond d'Maria send nochhär weder zrogg, mer hend aber no Chraft gha i de Bei ond hend ofem Wäg a Strand no en Abstächer zomene Ussechtsponkt ond zonere Lagune gmacht, wo tüüf im Wald gläge esch. De höchscht abentüürlech Wäg hed sech definitiv uszahlt. Am Strand hemmer drom gar nömm so vel Ziit gha, bevor mer met em Boot weder retour send. Gmeinsam hemmer denn am Nopparat Thara Beach in Ao Nang gässe.
    Am Tag 2 vom neue Johr hemmer z'zwoite en Wanderig ofe Khao Ngon Nak Nature Trail gmacht. De Wanderwäg hed dör emmergrüene ond tropische Wald gfüehrt - entsprächend höch send sowohl d'Temperatur als au d'Loftfüechtigkeit gsi, was üs bem Ufstieg rächt is Schwetze brocht hed. Ofem Wäg hemmer onder anderem met Spinne ond chliine Chamäleon (glaubemer) Bekanntschaft gmacht. D'Ussecht am Ändi vom Wäg hed sech glöcklecherwiis uszahlt, die verflossne Schweissperle send ned omesöscht gsi. Noch üsere Röckkehr a Start vom Trail hed üs es TukTuk is Restaurant brocht, wo de Willi ond d'Maria d'Ziit "öberbröckt" hend. De räschtlech Tag hemmer gmeinsam verbrocht.    Les mer

    Se oversettelse
  • 4/7- Wältreis
    Am Start vo dene 1260 Stufe
    Ändlech dobeHappy Birthday!Michi, Sarah (& Manu) of üs am WarteBangla RoadNo en chliine Snack för di eine, Gatorade för die andere

    Tag 82 & 83: Ao Nang / Krabi & Phuket

    3. januar, Thailand ⋅ ⛅ 25 °C

    Weder mol früeh ufstoh heds am Berchtoldstag gheisse. I üsne "Ferie" (Jasmin im Dezember 2024: "Mer hends do stränger als dehei") stömmer jo fascht emmer früeh uf, mer chönt meine, mer wörded ned gärn usschlofe, aber am 3. esches nomol gliiner los gange, wel mer en
    Sonneufgangswanderig bim Tiger Cave of de Wat Tham Suea-Tämpel hend welle mache. Gmäss Internet sends 1260 Stägetrett bis ufe, üsere Meinig no hätteds paar meh döffe sii, ned wäg de fählende Useforderig, sondern wel d'Trett mängisch onmönschlech höch send. Au do hed sech d'Asträngig weder glohnt ond mer send met emene bezaubernde Usbleck belohnt worde. Au de Sonneufgang esch zemmli okay gsi - schad för all die, wo chorz nochär erscht dobe acho send (vermuetlech, wels die 1260 Stägetrett onderschätzt hend). Ofem Wäg zrogg send denn au d'Affe wach gsi, wo munter of de Stägegländer ometornt hend. Ei Bsuecherin vom Tämpel hed offesechtlech e panischi Angscht vor Affe gha. För sie esch de Abstieg wohrschiinlech schlemmer gsi als de Ufstieg. Noch dere früehmorgendleche Aktivität hemmer denn chli Schlof nochegholt. Jo, mer schlofed eigentlech gärn. Aber FOMO, you know?
    Frösch ond munter hemmer üs no ofs Abentüür "Thailand Post" iigloh. Dank de Hilf vo de Maria hemmers gschafft, es paar öberschössigi Chleider ond söschtigi Iichäuf met emene Päckli i d'Schwiiz z'schecke. Fingers crossed, dass es achond 🤞 Am Obig semmer weder imene Restaurant fein go ässe.

    Als hättemers so plant, hemmer a üsem letschte Tag in Ao Nang no de Gebortstag vom Willi döffe fiire :) Om das entsprächend z'zelebriere, hed de Willi sech för en Bsuech im 'Into the Woods' entschede, es Restaurant, wo, wies de Name scho erahne loht, imene Wäldli gläge ech. Mer hend det gmeinsam gässe, Chueche verdröckt ond gsonge. Die gmeinsam Ziit esch denn scho weder zomene Änd cho ond mer send via Fähri wiiter of Phuket, wo mer di nöchschte bekannte Gsechter troffe hend.
    Nochere länger als dänkte Fahrt noch Phuket hend im Hotel bereits de Manu, Michi ond d'Sarah of üs gwartet :)
    Zor Erklärig: D'Alina esch vo Megge ond schafft jetz als Tauchlehrerin in Phuket. De Manu, de ehemalig Metbewohner vom Dani ond Dooq-Gspändli vo de Alina, esch för 10 Täg of Phuket cho ond de Michi ond d'Sarah send Frönde vom Manu, wo met ehrem "Bierfender" of Wältreis send. So hemmer also in Phuket es Megger-Tereter-Chamer-Träffe chönne organisiere.
    Ofs z'Znacht esch d'Alina no dezue gstosse ond mer hend d'Plän före Obig besproche. S'esch beschlosse worde, dass mer üs s"Full Phuket Experience" gänd ond i d'Bangla Road gönd. För das hed d'Alina denn no de Hubi organisiert, en Taucherkolleg ond sälbschternannte King of Bangla Road. D'Bangla Road esch öppe das, was mer sech vorstellt, wo d'Jungs us Hangover 2 ehre Obig gstartet hend, bevors usgartet esch. Puri Reizöberfluetig in Form vo Bars, Pingpongshows, Streetfoodständ, no meh Bars ond vor allem vel Mönsche. Mer send a zwoine Orte öppis go trenke, wo nochhär d'Idee ufcho esch, no ine Club z'goh. S'Illuzion schiint en Name i de Discowält z'ha, üs hed ei dortanzti Nacht det aber glänget. S'Partytuktuk hed üs zrogg zom Hotel brocht ond abschliessend chömmer no säge: "De DJ esch en Hueresohn" 🎶    Les mer

    Se oversettelse
  • 4/7- Wältreis

    Tag 84 & 85: Phuket

    5. januar, Thailand ⋅ ☁️ 32 °C

    [In Bearbeitung] Nochem Usgang hed üse Tag spot agfange. Zom z'Morge hemmer üs Burger gönnt ond send spöter de no a Nai Han Beach gange zom för die verbliibende drüü Stond d'Sonne chli gnüsse, bevor sie de ondergange esch (d'Sonne goht in Thailand aber au scho am halbi sebni onder). Üses z'Nacht hemmer det imene Thai- Resti gnoh, wo sech aber ehnder ofe russischi Gaume spezialisiert hed. Tja, wie das halt so esch nochem Usgang - de nöchschti Tag esch oft ned so spektakulär, so au be üs.

    Am nöchschte Tag esch weder meh los gsi. Zom üsi Tauchskills chli uffrösche, hed d'Alina de Manu ond üs ofene Refreshertauchgang im Kata Beach metgnoh. Vel z'gseh heds i dere Bocht ned gäh, abgseh vellecht vo vier Lüüt, wo onuffällig is Meer bislet hend. D'Sarah ond de Michi hend üs vom Ufer us beobachtet. Met 70+ Tauchgäng hend sie kei Refresher meh nötig gha. Met ehne hend au de Jean-Mi ond d'Marie am Ufer of üs gwartet. Ehne ghört d'Tauchschuel, wo d'Alina regelmässig Körs leitet ond be ehne wärdemer die nöchschte zwoi Täg de Advanced-Kors mache.
    Noch dem Tauchgang semmer, nocheme chorze Abstächer ine Tauchshop, zäme go z'Mettag ässe ond a nöchi Strand go Siesta mache. D'Energie bruuchemer nämlech för s'Muay Thai Training, i das mer d'Alina am Nomittag begleitet hend. Be de warme Temperature esch de Schweiss nor so gloffe, aber natürlech au, wel mer alles gäh hend. Ohoii! Es hed uf jede Fall mega Spass gmacht ond die bede Clubmaskottchen send för d'Jasi grad no es zuesätzlechs Highlight gsi. Liecht agfixt vo dem Sport hemmer also zuegseid, wo üs d'Alina vorgschlage hed, am nöchschte Obig en Kampf go z'luege. Noch dem Training hemmer üses Znacht imene spezielle Restaurant verdient: Quasi es Szene-Restaurant, wo veli Muay Thai-Kämpfer bsueched ond wo d'Alina au de Inhaber könnt.    Les mer

    Se oversettelse
  • 4/7- Wältreis

    Tag 86: Phuket

    7. januar, Thailand ⋅ ☁️ 29 °C

    Am erschte Tag vo üsem "Advanced Adventurer"-Tauchkors semmer alli am Morge grad bem Hotel abgholt ond zom Chalong Pier brocht worde, wo d'Alina, d'Marie ond de Jean-Mi scho of üs gwartet hend. Es rosa Büssli hed üs ganz use ofe Pier gfahre, wo üses Boot scho gwartet hed. D'Usmass send chli anderi gsi als mers beshär gwöhnt gsi send. Anstatt emene Holzböötli met eim Motor ond emene Kapitän i de Badhose hed üs es Schiff zo üsne Tauchspots brocht, wo Platz för rond 90 Lüüt hed, zodem no drü meh oder weniger funktionierendi WCs, es Büffet (zom z'Morge heds Fried Rice ond Rüehrei gäh) ond - grosse Luxus - e Süesswasserduschi. Ond das esch s'chline Boot, ofem grosse häts no en Gaming-Ruum gha.
    D'Fahrt zom erschte Tauchspot esch aber au met dem grosse Boot rächt holprig gsi ond d'Jasi hed s'erscht mol so öppis wie en flaue Mage becho ofem Schiff. Ässe esch aber trotzdem gange ond nochdem de morgendlech Honger gstillt gsi esch, hed d'Marie, üsi Korsleiterin, met üs es Briefing zom erschte Tauchgang in Racha Noi gmacht. Det eschs vor allem drom gange, üsi Tarierfähigkeite no chli z'verbessere ond das hemmer met de sogenannte Löffelüebig gmacht: Drüü Löffle send i Meeresbode gsteckt worde ond mer hend jewiils mösse met em Mundstöck die berüehre. Gar ned so eifach; d'Jasi esch bem erschte Versuech vel z'schnell cho ond hed statt de Löffel fascht de Meeresbode kösst. Före zwoiti Tauchgang hed üs d'Marie de Omgang met em Kompass nomol erlüüteret ond aschliessend esch das Glehrte grad i d'Praxis omgsetzt worde. De dretti Tauchgang vom Tag hemmer in Racha Yai gmacht. Coole Tauchgang gsi, wo mer es Wrack agluegt hend ond i de könschtleche Betonwörfel (zor Bespassig vo de Taucher) hemmer vel interessanti Tier gseh. Noch dem lange Tag ofem Schiff ond onder Wasser chönnt mer meine, mer wörded am Obig nömm vel mache, aber nei - de Muay Thai Kampf stoht a. Dä hed erscht am nüüni agfange ond während die meischte sebejöhrige om die Ziit scho im Bett send, geds anderi, wo om die Ziit i Ring stiiged ond de Kampfobig eröffned. Ned so eifach gsi zom Zueluege... Im Aschloss send d'Fraue ond denn d'Herre dra cho. De inoffizielli Höheponkt vo dem Obig esch en Kampf zwöscheme Holländer ond eme Russ gsi. De Holländer esch im Vorfäld ständig fröhlech am Grense gsi ond hed wienes 1.85m grosses Büebli usgseh. Harmlos. De Russ hingäge - met sinere x-fach brochne Nase ond dem böse Blick wottsch dem lieber ned im Donkle begägne. Aber wie so oft hemmer üs vo Össerlechkeite tüüsche loh ond hend s'Büebli luuthals agfüüret, woner i de letschte Rondi de Russ fascht usgnockt gha hed. Obwohl dä sech chuum meh hed chönne uf de Bei bhalte, esch är zom Sieger ernannt worde ond mer hend d'(Thai-Box)Wält nömm verstande. Die zwoit Öberrschig esch im letschte Kampf cho: Athletisch-muskulöse Boxer gäge Typ Lauch (lang ond dönn). Au en vermeintlech klare Fall. Mit sine lange Ärm ond Bei hed aber de Lauch gfühlt einisch boxt ond einisch de Chopf vom Gägner "gfühlvoll" a sis Chnüü gfüehrt - ond scho esch dese usgnockt am Bode gläge. Das esch au onerwartet gsi. De Obig esch of jede Fall sehr onderhaltsam gsi.    Les mer

    Se oversettelse
  • 4/7- Wältreis
    3Wer gseht de Hai?
    Wer gseht de Leonardo Di Caprio?11Do hed wohl öpper z'vel Gigelisoppe gha 😄

    Tag 87: Phuket

    8. januar, Thailand ⋅ ☁️ 29 °C

    Noch dem erschte lehrriiche Korstag hemmer üs ofe zwoiti Tag met de Marie (& em Jean-Mi, aber är esch för de Michi ond d'Sarah zueständig gsi) gfreut. Dämol hed üses Ziel Koh Phi Phi gheisse, de erschti Tauchspot sälber esch Koh Bida Nok gsi. De Hauptgrond, werom mer das Advanced Adventurer Zertifikat macht, esch, dass mer offiziell of 30m abetauche daf, ond genau om das eschs ofem erschte Tauchgang gange. Dä sogenannti "Deep dive" hed aber inere flache Bocht agfange, wo mer sogar Haie gseh hend. Nochhär eschs i d'Tüüfi gange, wo d'Marie üs anhand vomene rote Papierli zeigt hed, wie d'Farbe onder Wasser verschwindet: Of 25m onde esch das Papierli schwarz gsi. Wo sie aber met de Taschelampe drufglüüchtet hed, hemmers weder als rot wohrgnoh! Faszinierend, die Physik! 😄 Näbscht de Useforderig, ständig üsi Tüüfi ond Nollziitgränze im Aug z'bhalte, hemmer no gägene gueti Strömig mösse aschwemme. Eigentlech hättemer de Marie no mösse wederspräche, wo sie tüüfer taucht esch, als im Briefing abgmacht . Do hed sie üs welle teschte, aber mer zwe send ehre, ganz nochem Motto "als Tauchlehrerin weiss sies secher besser" ond "je tüüfer desto besser", ohni Wederred nochegschwomme. Mer daf äbe ned emmer glaube, was eim de Lehrer seid oder vormacht.
    Noch em Tauchgang heds scho z'Mettag gäh (wo mer üse Tesch gäge dreischti Mettaucher hend mösse verteidige) ond de scho weder is Wasser före Tauchgang Nr. 2 ond 3. Vom zwoite Tauchgang nähmemer die schöne Fischschwärm met, vom drette die spannend Höhli. Obwohl mer bem "Test" vom erschte Tauchgang driigheit send, hemmer de Kors trotzdem bestande 🥳
    Froh, hender das Vorhabe au chönne es Höggeli z'setze, semmer zrogg is Hotel. Det hemmer gässe ond tronke ond plötzlech hed üs de Inhaber vom Hotel es Chüechli abote. Die Naive hend eifach dankend zuegreffe, de Dani hed secherheitshalber gfrogt, öb do no öppis denne seig. S'Grinse vom Hotelbsetzer esch Antwort gnueg gsi... esch aber au legal in Thailand. Mer hend uf jede Fall no en sehr loschtige Obig gha, wo mer öber d'Rätsel vom Dr. Knobel ond d'Nacktheitsbestemmige im 3er-Zemmer vo Manu, Michi & Sarah glachet hend. Ond d'Jasi esch jetz au es Johr älter.    Les mer

    Se oversettelse
  • 4/7- Wältreis
    Im Chatze-Kafi. Zo de ächte semmer aber ned ine.
    Adeee!Vellecht hed aber au en Durian före Tumult im Flogi gsorgt 🤢Geboriässe. Pad ThaiBootsfahrt in BangkokSkyline#&☆F%!Figure för s'chinesische NeujohrsfäschtChina TownJuhee!Bangla Road vo Bangkok. 5' hemmers usghalte2Scharf. Aber sehr fein :) ond das esch erscht d'VorspiisGäld verprasse.So schön gschmöckti Laschtwäge gseht mer in Südostasie öberall

    Tag 88 - 91: Bangkok

    9. januar, Thailand ⋅ ⛅ 28 °C

    Mer hend üs för de 9. entschede, ned allzu früeh ufzstoh, nochdem mer i Gebortstag vo de Jasi inegfiiret hend.
    Somet esch denn au scho Ziit gsi zom gmeinsam brunche, öppis wo d'Jasmin sehr gärn macht :) Mer hend denn au en passende Ort gfonde zom üs verköschtige (wo a dem Tag aber kei Avocados gha hed - goht Brunch ohni Avocado?). Es esch leider ned de beschti Brunch aller Ziite gsi, au ned vo dere Reis.
    Die drüü Herre i de Rondi send all scho set emene Wiili nömm bim Coiffeur oder Barber gsi, was üs dezue veraalasst hed, eine in Phuket z'sueche. Nochdem mer dör d'Altstadt gwatschlet ond bi zwoine abbletzt send, hemmers wäg de Hitz ufgäh ond send ines Chatze-Kafi om d'Ziit bes zo üsere Abreis z'öberbröcke. Plötzlech esch es denn Ziit gsi ond mer hend üs leider müesse vonenand verabschede. Desi drüü bliibed no es paar Täg in Phuket, bevor de Manu weder zrogg i d'Schwiiz goht ond Sarah & Michi wiiter of Australie reised. För üs eschs Rechtig Bangkok gange.
    De Flog of Bangkok esch no ganz spannend gsi: Wo sech s'Flogzüg scho ofem Wäg zo de Startbahn befonde hed, esch im hendere Teil vom Flogzüg plötzlech Gschrei ond Hektik usbroche, mehreri Persone send ufgstande, eini esch sogar före grennt ond hed gruefe s'Flogzüg müessi omchehre! En medizische Notfall, wie sech denn usegstellt hed. Wie die Situation sech denn schlossändlech ufklärt hed, hemmer ned so wörklech metbecho. S'Handgepäck vo dere Person esch glaub usglade worde, d'Person wohl au (wohrschiinlech öber die hender Töre).
    Spot in Bangkok hemmer üs no erfolglos of d'Suechi nochemene Gebortstagschueche för d'Jasmin gmacht ond hend no öppis gässe.

    Tags darauf hemmer üs of Erkondigsreis dör Bangkok begäh, oder besser gseit dörne chliine Teil vo Bangkok. Obwohl mer technisch gseh jetz scho zom drette mol i dere Stadt send, hemmer no gar nüüt vo ehre gseh. Dör China Town a Floss ond denn met emene Flosstaxi wiiter ines riesigs Iichaufscenter, wo mer öber mehreri Stond üs vo Etage zo Etage ufegarbeitet hend. Erschöpft vo so vel Konsumwahn hed sech d'Suechi nochemene Barber fortgsetzt. Entsetzt hed de Dani de usgwählti Barbershop noch 30 Minute weder verloh. Entgäge sine Aawiisige hed de Barber ehm en schöni Frisur gschnette. Mehreri Mönet härti Hoorwachsarbet send somet verschwändet gsi. Während sech de Dani d'Hoor hed loh schniide, hed d'Jasi d'Wimpere mache loh. D'Jasi esch z'frede gsi medem Resultat, s'Entsetze vom Dani allerdings esch no grösser worde.
    Denn hemmer no nochegholt, was mer am Vorobig ned gschafft hend: Fein go Znacht ond Gebortstagschueche ässe. Nochhär hed üs de Wäg öber China Town bi Nacht ine guete Pub gfüehrt. Jetzt esch au de Dani weder zfrede gsi.

    Üse letscht Tag in Bangkok semmer zemmli ruhig agange. Nochdem mer bem königliche Palascht kei Bock of die tuusig Lüüt gha hend (ond z'freizögig agleid gsi send, jo, mer hätteds besser müesse wösse), semmer noch paar Omwäge zrogg is Hotel ond hend üs dra gmacht, einigi Sache för Neuseeland z'plane ond z'organisiere. D'Ziit esch denn zemmli schnell verbi gange ond osser imene tolle familiegfüehrte Restaurant z'Nachtässe ond imene Pub gueti Bier trenke hemmer nüüt meh gmacht.

    Noch onzählig velne schöne Momänt im for üs sehr tolle Asie eschs am 12. Januar wiiter gange. Vor de Abreis hemmer no müesse üsi thailändische Baht loswärde, drom semmer no "förschtlech" go z'Morge ässe (ändlech heds Avocado gäh) ond denn ines Kafi zom Neuseeland wiiterplane. Wel üse Flog erscht am spötere Obig gsi esch, esch üs denn am Floghafe no vel Ziit zor Verfüegig gstande, wo mer aber guet z'nötze gwösst hend. Am Obig hemmer denn s'Flogzüg nach Melbourne bestiege.    Les mer

    Se oversettelse
  • 4/7- Wältreis
    Mt. Aoraki oder so... niemmer weiss
    ChristchurchÜses rollende Dehei för die nöchschte 4 Woche.De Dani souverän am StüürÄssens- ond Bieriichäuf: ✔️11Lake Tekapo, aka Gatorade-See11Lake Tekapo

    Tag 92-94: Christchurch bis Lake Tekapo

    13. januar, New Zealand ⋅ ☁️ 10 °C

    De Flog vo Bangkok of Melbourne esch för d'Jasi beshär de ongnähmschti gsi, wels so chalt gsi esch im Flogi. Entsprächend onusgschlofe semmer in Melbourne acho, s'Omstiige esch aber tiptop gange. D'Vorfreud of Neuseeland hed üs aber die Strapaze vergässe loh ond nochdem mer ohni Problem dör die erschti Iireisekontrolle cho send, semmer as Gepäckband gstande. Ond hend gwartet. Ond gwartet. Nochdems üsne Rocksäck in Melbourne offebar so gfalle hed, dass sie grad det blobe send, esch üsi Stemmig in öppe so wiit abegchüehlt wie die lokale Temperature. Üs esch am Gepäckschalter versechert worde, dass üs s'Gepäck nochegscheckt wärdi, sobald as es acho seig. Met nüüt als üsem Handgepäck ond ongnüegend warmer Chleidig semmer of Christchurch ine, hend im einzige Lade, wo no offe gha hed, Zahnbörstene ond -pasta, Seifi, Onderhose ond Bier (riiiiiiesigi Craft-Bier-Uswahl i de Läde, gföhrlech!) gchauft ond send go Burger ässe. Nochhär zrogg is Hostel. Hoffentlech chömemer morn üses Gepäck weder öber.

    Emmerno fascht ohni Gepäck hemmer üs am nöchschte Tag i d'Innestadt vo Christchurch ufgmacht, zom s'Nötigschte a Chleidig bsorge, denn zom Autovermieter üse Campervan go in Empfang näh ond aschliessend go z'Ässe ichaufe. Das alles hed paar Stond in Asproch gnoh, aber denn semmer parat gsi zom losfahre. Do de international Füehrerschiin vo de Jasi met em räschtleche Gepäck ergendwo gsi esch, hed sech d'Frog wer fahrt liecht glöst. Ofem Campingplatz in Geraldine aaglangt hemmer üs gfreut, mol weder sälber z'choche. D'Teigware send fein gsi, d'Temperature no tüüfer als am Vortag (ca. 13° - das söll Sommer sii?!).

    Üsi nöchscht Destination esch de Lake Tekapo gsi. Mer hend bereits am Vorobig gmerkt, dass mer ned gnueg warmi Chleider poschtet hend ond do mer emmer noni gwösst hend, wenn üses Gepäck achond, hemmer d'Möglechkeit wohrgnoh, in Tekapo no öppis z'bsorge. Wels do aber nor ein Sportlade ged, esch d'Uswahl leider beschränkt gsi. D'Jasi hed z.B. nüüt gfonde, was ehre gange oder gnueg gfalle hätt. Noch dem erneute shoppe hend d'Ross vo de Mackenzie Alpine Horses of üs gwartet. Währed 2 1/2 Stond hend üs de Barney ond Benjamin secher öber Stock ond Stei treid ond mer hend d'Ussecht gnosse. Nochem Abstiige hemmer üs a üsi drüütägig Töfftour in Vietnam erenneret gfühlt. Im Camping hed sech d'Jasi denn nomol met de Floggsellschaft omegschlage, wel mer emmerno kei Informatione zo üsem Gepäck gha hend. Flüged ned met Jetstar, de Chondedienscht esch lausig!
    De Obig hed aber sehr schön met em Sonneontergang am See gändet. De Dani hed drom vorgschlage, de Wecker früeh z'stelle zom de Sonneufgang chönne bewondere.    Les mer

    Se oversettelse
  • 4/7- Wältreis
    1Ofem Wäg zor Stargazing Tour
    Im Schwärt vom Orion befendet sech dä Näbel (Foti met em digitale Teleskop gschosse)Jupiter meteme Mond (Io?)Lake Pukaki1Chalt!!!Hooker Lake met Mt. Aoraki im HendergrondRöckwägD'Wäge send do super usgschelderet!Ufstieg zor Mueller HutMueller Hut3Juheee

    Tag 94-96: Lake Tekapo & Mt. Aoraki

    15. januar, New Zealand ⋅ ⛅ 13 °C

    Em Sonneufgangsplan vom Dani esch d'Jasi zuvor cho, sie hed de Dani nämlech bereits 23:40 gweckt ond metteilt, dass sie als Öberraschig es Stargazing Experience bueched heig. Lake Tekapo esch i de Astronomecommunity rächt bekannt, wels zor Himmelsbeobachtig sehr gueti Bedengige bietet ond dementsprächend vel so Stargazingtoure abote wärded. Chorz drufabe hemmer üs also z'Fuess ofe Wäg zo de Chameleon Stargazer, em Abieter, gmacht. Zom d'Liechtverschotzig möglechscht greng bhalte, hed dä Alass ofere Brache chli osserhalb stattgfonde. Leider esch aber Vollmond gsi... Mer send met warmer Schoggi ond Deckene versorgt ond denn dröber informiert worde, dass de Alass us drüü Teil bestohd: Theorie, Blick dör zwoi Teleskop ond am Schloss Marshmallow brötle öberem Füür.
    Im Theorieteil esch üs veles öber de Nachthimmel i de südleche Hemisphäre, Distanze ond Stärnbelder verzellt worde. Debii hemmer sowohl öber die "westleche" Stärnbelder als au öber d'Stärnbelder vo de Maori ond ehrne Erzählige dröber glehrt. Im "praktische Teil" hemmer en Blick of galaktischi Näbel, üsi Nochbergalaxie, de Jupiter ond de Mond becho. Össerscht iidröcklech.
    Nochem Abschloss am Füür eschs denn zrogg i chalti Campervan gange, wo mer bis am 9i gschlofe hend ond met de Nochrecht verwachet send, dass üses Päckli, wo mer in Thailand ufgäh hend, bereits acho esch.
    Müed hemmer üs in Tekapo no met letschte Sache iideckt, bevors noch Mt. Aoraki/Cook wiitergange esch, wos kei Iichaufsmöglechkeite ged.
    Noch diverse Stopps bi Ussechtspönkt, emene Information Centre zo de lokale Gschecht ond Lavendel-Glacé-Verchaufsstand hemmer de Wäg ofe Camping gschafft, vo wo us mer am spötere Nomittag e chliini Wanderig ofem Hooker Valley Track a össerscht chalt Gletschersee Hooker Lake met wonderbarer Secht of de Aoraki (Mt. Cook) gmacht hend.

    E Tageswanderig zo de Mueller Hut esch s'Programm före Friitig gsi. Früeh los om ned i de pralle Sonne z'laufe hemmer de Ufstieg i ongföhr 3 Stond hender üs gha ond üs a dem betzli Schnee erfreut, wo mer öberquert hend. Chli meh Schnee, bzw. Iis heds ofem gägenöber liegende Mt. Sefton gha. Dass det Bewegig esch i de verblobne Gletscherräschte hed mer emmer weder ghört ond au gseh.
    De Abstieg ofem gliiche Wäg esch betzli asprochsvoller als erwartet gsi, wil de Wäg gröschteteils relativ steil ond v.a. au rötschig gsi esch. Met zettrige Bei semmer weder ofem Camping acho ond hend üs of d'Duschi gfreut. D'Duschene send im Dorf gsi ond just wo mer onderwägs zom Dusche gsi send, hed plötzlech s'Handy vo de Jasi glütet. Nochdem mer set em Mäntigobig ohni üses Gepäck am Reise send, i de Nacht chalt gha hend, de Dani kei After Sun Lotion för sin arm verbrönnt Nacke gha hed ond mer mehreri Mails gschrebe ond Telefongspröch met em obligatorische minutelange Warte i de verdammte Warteschlaufe verbrocht hend, hed üs d'Paris die guet Nochrecht öberbrocht: Üsi Rocksäck wärdid hött (Friitig) Obig no zo üs of de Camping glieferet. Mer hend üs naturlech noni z'fescht traut freue noch all dene Erfahrige wo mer met Jetstar gmacht hend. Nomol: Flüüged ned met Jetstar 😄
    Nochem z'Nacht esches denn aber tatsächlech so wiit gsi: Demets de Kurier liechter hed, semmer met üsne Campingstüehl a Iigang vom Camping ghocket ond am halbi achti hemmer vo wiitem es Kurierfahrzüüg gseh cho. Das muess er sii! Dankend hemmer üses Gepäck in Empfang chönne näh ond send sehr erliechteret gsi. Paar Minute vorem Aaruef hemmer nämlech beschlosse gha, dass mer am nöchschte Tag zrogg of Christchurch fahred zom det vor Ort mol chli Drock mache (mer hend jo währed all dene Täg kei Informatione gha, weder wos sech befendet, no wenn mer demet rächne chönd). Zom Glöck hed sech das erlediget, wel mer beidi ned guet chönd ofe Tesch chlopfe. Met em eigete, warme Schlofsack ond de Erliechterig, d'Reis dör Neuseeland jetz "rechtig" chönne z'starte, schloft sechs grad vel besser.    Les mer

    Se oversettelse
  • 4/7- Wältreis
    Clay Cliffs
    4D'Leopardefamilie. Die send sehr sälte, mer hend grosses Glöck gha.Das, was mer vo de Maori-Malerei no erkenntElephant RocksMoeraki BouldersFrösch gschlöpfte Dani.Ofem Wäg zor Sandfly BaySeehönd am Sandfly Bay1Seelöwe nochem "Surfe" im WasserMettagspause benere stillgleite ChääsfabrikNugget PointBaldwin Street1Nin-Jasi

    Tag 97 & 98: Reis nach Dunedin ond Owaka

    18. januar, New Zealand ⋅ ☁️ 17 °C

    Am Samschtig hemmer usere vierstöndige Fahrt en Tagesusflog met diverse Halt gmacht.
    De erscht Stopp esch bi de Clay Cliffs gsi. Eigentlech semmer scho am Wägwiiser zo dene verbii gfahre, hend denn aber imene Lädeli en Postcharte met dene Cliffs gseh ond send de gliich nomol zrogg. De Wäg zo de Cliffs esch e Chiesstross, dör die intensivi Befahrig leider aber sehr wällig, was d'Fahrt sehr holprig ond luut (hend jo no e chliini Chochi hende enne) gmacht hed. Die holprig Aareis hed sech glohnt, mer hend die spannende Gsteinsformatione usgiebig chönne aluege, alänge ond zwösche dene Süüle omekraxle. Sogar e mönschlechi Leopardefamilie hemmer gseh.
    Nöchschti Halt esch bi maorische Höhlemalereie gsi. Leider heds det nömm so vel z'gseh gäh, wels entweder verbleche send oder ergend en schlaue Europäer gmeint hed, är müess es Stöck Wand usebräche ond ines Museum stelle.
    De zwoitletscht Onterbroch vo de Fahrt esch bi de Elephant Rocks gsi. Wind ond Wasser hend usem ehemalige Meeresbode die interessante Gsteiformatione beldet, wo tatsächlech chli ane Elefantehärde of de grüene Fälder erenneret. Met es betzeli Fantasie hemmer det au no Gsechter, Kamel ond Schlangene erkönnt. Handstand üebe, Fangis oder Versteckis spele, chlättere... dä Ort esch en einzige riesige Spelplatz ond hed üs sehr gfalle.
    Au üse letscht Stopp hed Stei golte: d'Moeraki Boulders diräkt am Strand. Dör Köschteerosion hend sech die chogelronde Stei usem sie omschliessende Schlamm- ond Grondstei useglöst. D'Legände vo de Maori beseid, dass es sech be dene Chogle om Chörbis handlet, wo vom grosse Reisekanu Araiteuru a Land gspüelt worde send, wos bi de Landig in Neuseeland Schiffbroch erlette hed.
    Spöter hemmer in rekordverdächtiger Ziit im Camping z'Nacht zuebereitet ond gässe, wil mer üs no Chance of en Pinguinsechtig am Sandfly Beach usgrächnet hend. Elei d'Fahrt det hi hed sech uszahlt, wel d'Jasi Spass am Fahre of de kurvige Bärgstross gha ond de Dani debii Fotene vo de tolle Landschaft gmacht hed. Am Strand hend üs Seehönd ond -löwe erwartet, teilwiis so guet als Baumstamm im Sand tarnt, dass mer sie erscht gseh hend, wo mer fascht scho i sie ine gloffe send. Die meischte hend eh gschlofe. Die sältnige Gälbaugepinguine hemmer leider ned atroffe. Anschiinend geds nome no rond 1'500 wältwiit, devo send rond 500 in Neuseeland.

    Bevor mer am Morge de Camping verloh hend, hemmer no chli die nöchschte Täg plant ond send denn of Dunedin die steilscht Stross of de Wält go bestuune ond ablaufe, d'Baldwin Street. Eigentlech sigs jo noch einere in Wales nome di zwoitsteilscht. Det hemmer en onplante längere Schwatz medem Dave Kernahan gha, wo die Stross i jöngere Johre täglech mehrmols als Laufstrecki gnötzt onds au als "King of Baldwin Street" i diversi Newsblätter gschafft hed.
    Vo de Baldwin Street eschs zom Nugget Point wiitergange, wo mer en chorze Spaziergang zom Lüchttorm gmacht hend. Ganz i de Nöchi esch d'Roaring Bay gsi, e Bocht, wo före mönschlechi Zuetritt gsperrt esch ond för die mer de heissi Tipp becho hend, dass gäg die füfi met Gälbaugepinguine z'rächne seig. Demet mer sie au jo ned verpassed, hemmer üs scho am halbi füfi i de Beobachtighötte iigfonde, wo üs die dienschthabendi Hobbyornithologin dröber informiert hed, dass das Johr nor eis Päärli i de Roaring Bay beobachtet worde seig, leider ohni Nochwochs. Mer hend fascht 2 Stond gwartet ond denn onder anderem wäge Honger ufgäh. Die cheibe Vögel hend kei Verbarme gha met üs ond sech erneut ned loh blecke ond so hemmer üs of Owaka ufgmacht, wo mer s'erscht mol hend welle freedom campe, d.h. " wild", aber ofeme Gländ (Chiesplatz), wos erlaubt esch. Mer send jo schliesslech kei Kriminelli. Meischtens heissts bem Freedom Campe "de Schneller esch de Gschwender" ond "s'hed solangs hed". Do hemmer denn meh Glöck gha als bi de Pinguine ond hend üs es ned so lauschigs Plätzli chönne sechere ond hend denn de erneuti Fähler gmacht, üs es Curry z'choche - ned sone gueti Idee imene Büssli.
    Nochhär hemmer üs ofem Spelplatz i de Nöchi no als Ninja Warriors probiert. Potential esch do, Loft noch obe aber au.    Les mer

    Se oversettelse
  • 4/7- Wältreis
    Wäg zom Purakaunui-Wasserfall
    Purakaunui-WasserfallIisteg id HöhliI de HöhliSpure vo de GlüehwörmliMer send schiinbar ned die erschte gsiÄndgägnerNin-Jasi hed sech för di nöchscht Ufgab qualifizert, 1/3 vo de Folgende äbefallsWassertaxiUssecht be de Luxmore Hut. De Dani hed meh welle.Besser, oder? Aber au das hed ehm noni glängt...Mount Luxmore

    Tag 99 & 100: Te Anau

    20. januar, New Zealand ⋅ ☁️ 24 °C

    För die nöchschte Täg hemmer üs in Te Anau welle niederloh. De Mäntig esch dezue do gsi, üs det hii z'brenge.
    Am Morge semmer de Purakaunui-Wasserfall go aluege.
    De Wäg zom Wasserfall esch dörne wonderschöne Wald gange, wo mer vo dehei oder au vo üsere bishärige Reis här so no gar nie gseh hend: Moosbewachsni Bäum ond verschiedenschti Farne, drinenne en Bach. Zäme met em morgendleche Liecht hed das so höbsch usgseh, dass mer in Gedanke "Ohh" ond "Aah" gruefe hend ond entsprächend begeischteret gsi send. Am Ändi vom Wäg esch de Wasserfall gsi, wo üs ned halb so fescht beidrockt hed. Mängisch esch äbe doch de Wäg s'Ziel.
    Före Räscht vom Wäg hemmer kei feschti Plän gha ond send so eigentlech, Google Maps sei Dank, zuefällig zo de Clifden Caves cho. Im Gägesatz zo de bishärige Caves wo mer in Asie bsuecht hend, esch das tatsächlech e Höhli gsi, wo mer of eigeti Fuuscht erkonde cha. Met Stirnlampe ond Handyliecht usgröschtet hemmer üs also onder d'Ärde gwogt ond send noch 15' scho weder dosse gsi. Komisch, ofem Schild heds doch gheisse, es gieng rond 45'...? Of de Suechi nochem wiitere Wäg semmer of en ca. 1 Woche alte Chuehkadaver gstosse, en andere Zuegang zo de Höhli hemmer aber ned gfonde. Mer send also weder det ine, wo mer versehentlech use cho send ond hend denn erscht d'Wägwiiser i de Höhli gseh. Ändlech ofem rechtige Wäg, esch es jetz deför emmer tüüfer i d'Höhli gange. Es Päärli, wo au grad onderwägs gsi esch det enne, hed üs de gseit, mer seled d'Lampene mol usschalte ond dämol hemmer luuti "Ohh"s ond "Aah"s vo üs gäh, wel mer unter Tage de Stärnehimmel gseh hend! Mer send öberrascht gsi, do Glüehwörmli z'gseh. D'Glüehwörmli hend üs total begeischteret ond vo det a hemmer all paar Meter s'Liecht usgmacht ond hend omegluegt. Währed chli meh als einere Stond semmer dör das Höhlesystem gloffe ond gchroche, onterwägs de Chopf agschlage, üsi Chleider dräckig gmacht ond üs dör Wasser kämpft. Gäg de Schloss heds mehreri met Wasser gföllti Vertüüfige gäh, wo mer ned genau gseh hed, wie tüüf as die send. Die hed mer aber relativ guet chönne omgoh. De "Ändgägner" vo dem Höhleabentüür esch denn aber en Ruum met emene Wasserbecki gsi, wo zemmli tüüf usgseh hed ond en Dorchmässer vo ca. 6m gha hed. Dröbergompe esch also scho mol ned gange. Mer hend zom Glöck de Tipp becho gha, links ofeme chliine Vorsprong drom ome z'laufe, aber au do esch mer bes zo de Chnüü im Wasser gsi. Wo mer demet beschäftiget gsi send of die ander Siite z'cho, hend zwoi Fraue met ere Teenagerin zo üs ufgschlosse. Bevor mer öppis chönne hend säge, esch d'Teenagerin i eim vo de chline (aber tüüfe) Wasserlöcher verschwonde ond pflotschnass gsi. Mer hend ehne no gseid, dass sie links am Rand entlang selid goh, det giengs ned schlächt - zwoi Schrett ond die zwoit vo ehne esch verschwonde gsi, plumps im Becki. Sie hends beid met Humor gnoh (wohl au, wel Handy ond Autoschlössel das onfreiwillige Bad öberläbt hend) ond send wohlbehalte dosse acho, die jong auditiv wahrnähmbar erliechteret. Loschtige Usflog esch das gsi.
    Chli meh als en witeri Stond spöter hemmer denn üses Tagesziel erreicht.

    S'erschte Boot-Taxi hed üs am Morge vo Te Anau of die ander Seesiite brocht, was üsi Wanderig om einigi Kilometer verchörzt hed. Im Fiordland Nationalpark hed de Wäg zo de Luxmore Hut üs dör en schöne Farnwald gfüehrt. Es Scheld hed üs verrote, dass do wildi Kiwis ome seiged, aber gseh hemmer natürlech keini. Öppe 30 Minute vo de Hötte entfärnt semmer denn us dem Wald usecho ond i de Sonne zo de Luxmore Hut gloffe, wos es Znüni gäh hed, bevor mer üse Ufstieg fortgsetzt hend. De vermeintlech tolli Ussechtsponkt bem Höhleiigang wiiter obe hed sech als inexistent usegstellt. Ned ganz einig dröber, wie wiit ufe dass mer no wennd goh, hemmer üs denn trennt. Kei Angsxht, nome vorübergehend. De Dani esch no ofe Gipfel vom Mt. Luxmore, d'Jasi hed sech weder a Abstieg gmacht, schliesslech hemmer s'Wassertaxi zrogg of Te Anau am halbi füüfi welle verwötsche. D'Landschaft i de Region gseht jo sowieso us wie bim Vierwaldstättersee, drom hed sech en wiitere Ufstieg au gar ned glohnt ;)
    Onderwägs hemmer üs weder vereint ond am Strand ofs Taxi retour gwartet. Det hemmer s'erschte mol Bekanntschaft met de verfluechte Sandflies gmacht.    Les mer

    Se oversettelse
  • 4/7- Wältreis
    Onterwägs zom Milford Sound
    Blick usem PanoramabusHafe vo Milford SoundStart zor Bootstout leider echli wolcheverhangeDe Dani esch z'fredeMt. Pembroke met GletscherOfem Röckwäg1Pie zom z'Morge. D'Jasi esch z'fredeWas mer de Tourischte alles verchaufe cha... Gschäftsidee för d'Jasi, wenn sie weder zrogg chond.Gorge Road in Queenstownhttps://youtu.be/lLMVhr7zqbk?si=wMgHaKQjzAmuMa-2 (NotBad - Brandon Semenuk, Brett Rheeder, Cam...)QueenstownUedliger hend de Pub au scho ufgsuechtTSS Earnslaw in Queenstown

    Tag 101 & 102: Milford Sound, Queenstown

    22. januar, New Zealand ⋅ ☀️ 19 °C

    Noch langem hin ond här, bueche ond weder storniere, met Tourischte ond Iiheimische rede hemmer üs schlossändlech doch dezue entschlosse, en Bootsfahrt im Milford Sound z'mache. Mer hend allerdings üsi Beförchtige gha vor dem doch sehr touristische Usflog.
    Bem morgendleche Träffponkt hed de Touri-Terror scho demet agfange, dass e Touregroppeleiterin sech luuthals öber s'Ticketingsystem ufgregt hed.
    Fascht pönktlech hed de Usflog denn gstartet ond mer send met emene extra deför usgleite Reisecar (d'Sitzreihe liecht zo de grosse Fenster grechtet ond es Panoramadach) losgfahre. De Wäg vo Te Anau us duuret chli meh als zwoi Stond ond esch dör teilwiis liecht zynischi Kommentär ond teilwiis lahme Wetz vom Busfahrer begleitet worde.
    D'Strecki noch Milford Sound esch wörklech sehr malerisch ond wäremer sälber gfahre, hättemer wohl einigi Stopps meh igleit als de Car.
    In Milford Sound acho esch de Reisecar dör es Scheff tuuscht worde ond mer hend üs liecht öber einigi Metreisendi g'ärgeret, aber werkli nome es betzli.
    Ofem Scheff eschs denn offesechtlech drom gange, sech de beschtmöglech Platz z'schnappe ond dä nömm z'verloh. Genau üsi Wält. Mer hend üs bald vom oberschte Deck verabschedet ond send en Stock tüüfer, wo mer am Afang fascht för üs gsi send. Am Bug hemmer denn d'Ussecht, Sandwich ond s'lokale Craftbier gnosse.
    D'Route esch onter anderem wohl so beliebt, wils de am meischte fotografierti Bärg vo Neuseeland, de Mitre Peak, ond de Pembroke-Gletscher, wo die sältnig Kombination vo Gletscher, Floss ond Meer bietet - wo mer näbscht Milford Sound nome no in Patagonie fendet -, z'bestuune ged. Rond zwoi Stond spöter esch es met em Car ond dasmol mehrere Stopps zrogg noch Te Anau gange.
    Det aglangt heds en chorze Schwomm im See gäh. De Dani esch nämlech langsam chli gstresst gsi wäg de ned vorhandene Plän ond Buechige för Patagonie ond esch de Jasi demet of d'Närve gange. Met beschte Absechte zrogg ofem Camping esch denn doch nüüt us de Planig worde, wil mer üs zemmli lang met üsne Campsite-Nochbere, emene Paar us de Schwiiz onterhalte hend. Aschliessend hemmers gliich no rasch med plane versuecht, d'Buechigsplatform för d'Wandertour in Patagonie hed aber ned so welle wie mer ond de Dani sini Gedold verlore. Naja, denn planemer halt es anders mol 🙈

    Noch drüü Nächt in Te Anau folged drüü Täg i de Grossstadt Queenstown med ehrne rond 12'000 Iiwohner:inne.
    Zom z'Morge in Te Anau heds lokals Ässe gäh, nämlech en Pie, för d'Jasmin en Lamb Mint Pie ond före Dani de Veggies of the day.
    Gstärkt vom z'Morge hemmer üs ofe Wäg noch Queenstown gmacht, wo mer als erschts de legendäri Gorge Road Bike Park send go bestuune. Wäg schlächte Wätterverhältnis esch leider niemer of de wonderschön gshapte Dirtspröng onterwägs gsi.
    Aschliessend as Iichecke im Camping hed üs de Wäg ine Pub gfüehrt, wo mer näbschtem Verzehr vo Burger ond Bier üsi Planig erfolgriich fortsetze chönne hend.
    Zom Verdaue semmer dör d'Stadt gschlenderet ond send öberrascht gsi abem grosse Agebot a Restaurant, Kafis ond Pubs, aber au ab Läde wie Louis Vuitton, Moncler oder Burberry.
    Zom dä ernährigstechnisch össerscht gsondi Tag met Pie, Bier, Burger, Poutine ond French Fries abzronde, heds no Chips zom z'Nacht gäh.    Les mer

    Se oversettelse
  • 4/7- Wältreis
    11KāreareaRuruKeaStockänte dosse, Pāteke denneKererū, d'RiesetuubeU181

    Tag 103 & 104: Queenstown

    24. januar, New Zealand ⋅ ☁️ 9 °C

    S'Wätter esch perfekt for en Tag ofem Bike gsi: Räge am Vorobig ond agnähmi Temperature am 24. Januar. Hemmer a dem Friitig also vel Glöck gha.
    Mer hend vorgängig bimene Bikeshop Bikes för üs reserviert: Es Downhillbike vo Mondraker för d'Jasi ond es Trailbike vo Forbidden före Dani. Trek hends leider ned gha ;) För beid eschs es erschts Mol gsi: D'Jasi esch no nie ofemene Bike met so vel ond de Dani no nie of eim met so wenig Fäderwäg gsi. Au d'29 Zoll-Reife send öppis Neus gsi.
    Pönktlech of de Start vo de Gondelbahn semmer med üsne Bikes bi de Station gsi ond hend üs a Start vo de Trails befördere loh, währed mer d'Sicht of Queenstown ond Omgäbig vo obe hend chönne gnüsse.
    Noch drü Abfahrte esch au scho Mettag gsi - ond mer hend en Pause chönne bruuche. Nochem Onterbroch semmer no wiiteri 3 Mol gmeinsam gfahre, bis de Jasi d'Händ so weh toh hend, dass sie hätt chönne schwöre, sech Mikrofrakture i de Mettelhand zuezoge z'ha. Hed sie natürlech ned, aber gliich - de ganzi Fäderwäg esch ned gnueg gsi of dene Trails. De Dani esch no zwoi wiiteri Mol gange, hed aber met sim chorze Fäderwäg d'Brämsrille bsonders guet z'gspöre becho ond sini Händ am Ändi chuum no am Länker chönne hebe. De hed au är mösse ufgäh.
    Obwohl mer beid vorsechtig onterwägs gsi send, mer wennd üs jo of üsere Reis ned verletze, hemmers gschafft, üs jewiils eis Mol änezlegge. Abgseh vonere höbsche Schörfwonde bem Dani esch aber zom Glöck nüüt passiert. Trotzdem duet üs noch dem Tag alles weh,
    Frei nochem Yilmaz Z. selig: Alles duets üs weh.
    Noch de sportleche Aktivität hemmer üs no of d'Suechi nocheme warme Pulli för d'Jasi gmacht, wils in Queenstown relativ vel Outdoor-Gschäft ged. Mer hend scho mol paar Idee gsammlet ond bi üsem letschte Stopp no en "Evakuierig" meterläbt: "Evacuate this building. Go to the closest exit."
    Anschiinend hed de Elektronik-Lade näbedra en Rauchmaschine nömm wörklech im Griff gha ond de Alarm esch usglöst worde. Samt Füürwehriisatz.
    Zom z'Nacht heds Älplermagrone gäh :) Trotz Schmärze en tolle Tag.

    Am nöchschte Tag semmer ganz muetig gsi, mer hend nämlech kei Wecker gstellt! Vel brocht heds ned, d'Sonne ond spelendi Chend hend üs denn am Morge gweckt.
    Wiit hemmer a dem Vormettag ned müesse, mer send nämlech i Kiwi Park, wo sech diräkt näbem Camping ond de Bahn befendet. I dere Iirechtig wärdid bedrohti neuseeländischi Tierarte zöchtet, ufzoge ond spöter, wenns gross ond starch gnueg send, i d'Natur freigloh.
    Die erscht halb Stond hemmer üs vo Gheg zo Gheg g'arbeitet ond debii Keas, Kākās, Kāreareas oder au Rurus chönne beobachte. Denn hed s'Kiwi-Huus för 30 Minute ufgmacht ond mer hend die sehr onterhaltsame nachtaktive flogonfähige Vögel imene Dunkelruum dörfe beobachte. Einigi send of de Suechi noch Nahrig sehr aktiv gsi. Ergendwenn heds üs denn z'vel (ond leider au z'luuti) Mönsche i dem Huus gha, ond mer send wiiter gange.
    Währed de nöchschte halb Stond esch de Parcours fortgsetzt worde, bis mer pönktlech of d'Conservation Show weder bim Iigang gsi ond die Uffüehrig gluegt hend.
    D'Siria hed üs vel zo de iiheimische Tierarte verzellt ond au, was iigfüehrti Tierarte wie z.B. Opossums förne Schade i de lokale Tier- ond Pflanzewält aarechtet ond esch be de Beschriibig vo de Bekämpfingsmassnahme au sehr ehrlech gsi. Als Zueschauer semmer sogar dezue ermuetiget worde, Produkt us Opossumfäli (Finke send sehr beliebt!) z'chaufe. Noch dere lehrriiche ond chorzwiilige Show hemmer no die räschtleche Gheg agluegt, nämlech das met de Kererū, anere riesige Tuubeart, ond au d'Tuatara semmer no vo nöchem go aluege. D'Siria hed metere bsondere Begeischterig vo dene Tier verzellt, sends doch trotz de össerleche Ähnlechkeit ned nöch met de Echse verwandt ond stelled e ganz eigeti Groppe im Stammbaum vo de Reptilie dar.
    Langsam hongrig hemmer üsi gestrig Suechi nochemene warme Pulli erfolgriich abgschlosse ond hend üs ofs Ramenrestaurant gfreut, wo mer usgsuecht hend.
    Am Nomittag hemmer üs weder im Mountainbike gwidmet, dasmol semmer aber ned sälber in Aktion gsi, sondern mer send en Alass go bsueche. Währed üsem Bsuech in Queenstown hed s'jöhrleche McGazza Fest stattgfonde, wo im Adänke a verstorbnig neuseeländisch Bike-Profi Kelly "McGazza" McGarry gwidmet esch. Öber drüü Täg fended verschednigi Events statt, wo mer cha go luege ond bi einige au sälber metmache.
    Mer hend üs drom zom Dream Track, en Mountainbike Strecki, ufgmacht, wo s'Highlight vo dem Festival, de Dream Jam, stattgfonde hed. Mer send extra früeh los, om üs en guete Platz z'sichere. De Wäg, wo mer üs usegsuecht hend, esch an sich scho e halbi Wanderig gsi. Verschwitzt dobe acho hemmer festgstellt, dass mer be wiitem ned die einzige met dere Idee gsi send.
    Währed 4 Stond hemmer zerscht de Juniore (Dreikäsehochs wo freihändig öber 4 Meter höhchi Jumps sprenged 🙈) ond denn de Erwachsne zuegluegt, wie sie dä Kurs met waghalsige Tricks ond gemeine Störz gmeischteret oder äbe ned gmeischteret hend. Wie emmer a so Aläss esch au do fliissig Bier tronke worde ond obwohl d'Kiwis gärn kaloriereduzierts Bier trenked, en tüüfere Alkoholghalt hed das definitiv ned... Nochem Alass semmer met de Mängi ofeme sehr vel eifachere Wäg weder zrogg i d'Stadt/ofe Camping ond hend üs en gmüetleche Obig gmacht.    Les mer

    Se oversettelse
  • 4/7- Wältreis
    D'Frau Christen wär stolz! Hose flicke nochem Storz.
    Ussecht ofem CampingMorgestemmig ofem Wäg zom Roys Peak1Ussechtsponkt3Roys PeakThunder Creek FallsStei. Wow!Bruce BayGlüehwörmli oder Stärne?Glüehwörmli oder Stärne?Glüehwörmli oder Stärne?

    Tag 105 & 106: Wanaka & Fox Glacier

    26. januar, New Zealand ⋅ ☀️ 16 °C

    Am Sonntig, üsem letschte Tag in Queenstown, hemmer üs ofne wiitere Alass vom McGazza Fest gfreut: De Gorge Road Jam. Wels aber zemmli grägnet hed, esch dä abgseid worde. Üs hed drom also nüüt meh in Queenstown bhalte ond so hemmer de Wäg of Wanaka scho paar Stond gliiner als plant in Agreff gnoh.
    In Wanaka esch s'Wätter nor onmerklech besser gsi ond so hemmer paar Sache plant. Wo de Räge ufghört hed, hemmer denn no en Spaziergang am See ond dör s'Städli gmacht.
    Am Obig hed üs no en gemeini TimTam-Diebin ufgsuecht (Guetzli). De Dani hed 5 Sekonde ned gluegt, ond schwupps sends wäg gsi. De Dani hed erstuunt ond d'Jasi z'frede driigluegt. De Fall esch wiiterhin ned klärt, sachdienlechi Hiiwiis bitte per WA oder Signal a Dani. Sprochnochrechte wärded ned beachtet.

    Frühener als üs lieb gsi esch, hemmer üs am Folgetag ofe Wäg zom Roys Peak gmacht. De Maurice, wo aktuell au no in Neuseeland esch, hed üs verzellt, dass de Parkplatz bi ehne am halbi sächsi am Morge bereits fascht gföllt gsi seig. So früeh semmer denn doch ned dete gsi, aber de Maurice hed rächt gha: De Gratisparkplatz esch bereits of de letscht Platz gföllt gsi. Zom Glöck heds näbedra no es Fäld gha, wo mer gäge e chliini Gebühr s'Auto hed chönne änestelle.
    De Ufstieg hed sech denn zemmli hiizoge, esch aber vo Afang a vo öberragender Ussecht begleitet worde. Bem Ussechtsponkt hemmer s'obligatorische Foti gmacht, de eschs no wiiter gange. Ofem Roys Peak eschs denn nomol es Stöckli imposanter gsi. D'Wanderig hed sech trotz de vele Lüüt, wo det ufegloffe esch, dorchus uszahlt.
    Als "Belohnig" för d'Wanderig hemmer im 'Big Fig' gspese, es Restaurant wo üs de Maurice ond d'Katharina - mehrmols ;) - wärmschtens as Härz gleit hend. Es esch sehr fein gsi, danke.
    Vollgässe esches ofem State Highway 6 Rechtig Fox Glacier gange, onterbroche vomene Halt bi de 28 Meter höche Thunder Creek Falls, wo üs d'Stei ond d'Farb vom Haast River aber dütlech meh interessiert hend. Wiiteri chorzi Stopps hemmer bim Knights Point ond Bruce Bay igleit. De Wäg ofem Highway esch so toll gsi, dass mer no vel hüüfiger chönne hät halte.
    Zom Znacht heds för d'Jasmin denn ehri Nudelsuppe gä, wo si set Japan met sech omeschleppt.
    Nochdems iidonklet hed, semmer i Wald näbem Camping, zom üs of d'Suechi noch Glüehwörmli z'mache. Of d'Suechi mache hed mer sech aber gar ned müesse, mer hed sie eigetlech ned chönne öbersehe. Wonderbari Momänt voller Stuune ond Freud hemmer i dem Zauberwald gha, bevor en italiänischi Groppe üs noch öbe 20 Minute iigholt ond üse Friede luuthals gstört hed. Met de Taschlampe of höchster Stufe hends natürlech nüüt gseh. Dä Fähler hends de realisiert, wos gmerkt hend, dass mer, bländet vo ehrem Liecht, üsi Auge zue gha ond üs wägdreit hend. Die aschliessend Donkelheit ond Stelli esch s'Zeiche deför gsi, dass sies ändlech au tscheggt hend. Ob d'Daniela us Vietnam debi gsi esch, hemmer ned festgstellt.
    Aschliessend hemmer üs no nochemene geignete Ort för d'Nachthimmelbeobachtig of d'Suechi gmacht.    Les mer

    Se oversettelse
  • 4/7- Wältreis
    Hängebrogg Nr. 4 oder soEm Dani sin neui SperrbeldschermChli chlättere hed mer au müesseKeas1Franz Josef GletscherLake Ianthe, üse Platz för d'Nacht. Apèro be Sonneschiin.Räge am nöchschte Tag. Zom Glöck semmer ned met em Zält onderwägs.HokitikaWer erkennt de Haas?Bi de Pancake RocksNikau-Palme im Nordweschte vo de Südinsle.Pancake Rocks

    Tag 107 & 108: Franz Josef & Punakaiki

    28. januar, New Zealand ⋅ ☀️ 14 °C

    Am 28.01. semmer am Morge weder ziitig uf, wel mer d'Parkplatzsituation vom Roys Peak no im Henderchopf gha hend. Nochere halb Stond Fahrt semmer am Alex Knob Parkplatz acho ond hend tatsächlech no de letscht Platz verwötscht. S'Zmorge, wo mer us Ziitspargrönd ufgschobe hend, hemmer jetz no gnoh, bevors denn ofe Roberts Point Track gange esch. S'Ziel vo üsere hötige Wanderig esch en Ussichtsplattform, vo wo us mer de Franz Josef Gletscher relativ guet sött chönne gseh. De Afang esch dör, för üs mettlerwiile zwor nömm neu, aber emmer no faszinierende Wald gange, bevor mer vomene Schild iidrenglech of d'Gföhrlechkeit vo dere Wanderig hiigwese worde send. Liecht veronsecheret semmer trotzdem wiiter. S'Wätter esch zwor guet gsi aber wer weiss, was de Räge vo de letschte Täg chönnt agrechtet ha of dem Wanderwäg? Öber vel Stöck ond no meh Stei esch es emmer wiiter talufwärts gange, emmer em Verlauf vom Waiho River folgend. De Wäg esch öber mehreri Hängebrogge gange ond a einere Stell hed mer mösse chlättere. En Autobahn, wie mers vo velne vo de bishärige Wanderige könnt hend, esch das definitiv ned gsi, aber grad Angscht om üses Läbe hemmer nie mösse ha.
    Plötzlech hemmer Vogelluut ghört, wo mer usem Kiwi Park in Queenstown no in Erennerig gha hend - Keas! Amüsiert hemmer dene loschtige Papageie debii zuegluegt, wies Blueme ond Blätter zerropft ond spelerisch metenand kämpft hend. Wo sech zo dem Vogelzirkus denn au no es Gämschi dezue gsellt hed, esch s'Wildtiererläbnis fascht zu perfekt gsi.
    De Gletscher esch trotz drüüstöndiger Wanderig vo de Plattform us no wiit wäg gsi. D'Mönsche, wo i de Helis ständig öber üs gfloge send, hend secher die schöner Ussecht ofe Gletscher gha, aber mer hend üs dänkt, dass mer z'Fuess em Gletscher de grösser Gfalle mached. Glii semmer nömm die Einzige gsi of dere Plattform ond wo denn eini ehri Insta-Biiträg hed afo schniide, semmer gange.
    Wel mer scho so früeh los send, semmer am zwoi scho weder bem Parkplatz gsi ond send no wiiter Rechtig Norde gfahre. Als Öbernachtigsort hemmer of de Campermate-App en onbediente Campingplatz am Lake Ianthe gfonde, was also s'Ziel gsi esch. Vorhär hemmer aber no amene andere See Halt gmacht, wo mer hend welle go bade. Ond do esch es passiert: Bem Röckwärtsfahre hed XY en Stei ned gseh ond esch schön driigfahre. Zom Glöck esch üses Büssli aber scho so verbüült, dass en allfälligi wiiteri Delle gar ned uffallt. Aber mer sed halt ned müed Auto fahre.
    Am Lake Ianthe aglangt, heds en Apèro gäh met aschliessendem Powernap. Mer hend üs scho gfreut, dass mer so en tolle Öbernachtigsplatz gfonde hend, wos cho send: Sandflies! Met ehne send au no ehri ähnlech onbeliebte Frönde, d'Mogge, cho ond hend üs dezue zwonge, üses Curry (scho weder! 🙈) im Büssli zuezbereite. Paar hends leider zo üs ine gschafft ond hend üs e onruhigi Nacht bereitet.

    S'Grüüsch vo de Rägetröpfe ofem Dach hed üs gweckt. S'Wätter hed üse Tatedrang chli brämst, mer send drom erscht noch de Zähne weder onderwägs gsi. In Hokitika hemmer chorz Halt gmacht zom iichaufe ond hend no wägeme Campingchocher gluegt. För üsi bevorstehend Drüütageswanderig hemmer zwor ganz vel gfrüürtröchneti Campingnahrig gha, e Lösig, wie mer zom heisse Wasser för die Mahlziite chömed, aber ned wörklech. Imene Lade heds paar Optione gäh, d'Jasi esch aber noni öberzüügt gsi. I de nöchschtgrössere Ortschaft Greymouth heds aber no e Filiale vom gliiche Gschäft gha, das hed ehre denn glöcklecherwiis d'Möglechkeit gäh, nomol 30 Minuter öber dere Entscheidig z'brüete. 35 Minute spöter semmer meteme Gaschocher ond emene Wasserfilter usem Gschäft in Greymouth usegloffe ond glaubed, s'Rechtige gchauft z'ha.
    Emmer no be Räge semmer wiiter gfahre zo de Pancake Rocks. Det acho, hemmer wohrschiinlech s'einzige trochne Ziitfänschter a dem Tag verwötscht ond hend die uffallende Steiformatione guet chönne go aluege.
    S'Camping esch denn nor no paar Meter wiiter gsi. S'Check-In esch chli kompliziert gsi, wel mer zwor vier Nächt buechet hend, aber eigentlech nor zwoi defo tatsächlech ofem Platz send. Aber au das Dörenand hed sech klärt ond wo mer nochem z'Nacht abgwäsche hend, hed d'Jasi no es erfreulechs Telefon becho: Sie esch Gotti worde 😊    Les mer

    Se oversettelse
  • 4/7- Wältreis
    Parat för Tag 1 vom Paparoa Track
    Sorry scho mol för die vele Baum-Fötteli wo folged 🙈Erennerig a vergagni Ziite1Z'nacht. D'Carbonara esch guet gsi, d'Pasta Vegetariana mässigStart i 2. Tag11ObigstemmigGroppeselfieTag 3

    Tag 109-111: Paparoa Track

    30. januar, New Zealand ⋅ ⛅ 13 °C

    Hött esch de erschti Tag vonere Drüütageswanderig ofem Paparoa Track. Mer send früeh ufgstande zom fertig packe ond Auto omparkiere ond scho ofem Wäg zom Träffponkt gsi, do esch em Dani no i Senn cho, dass mer üsi Sandwich no im Chüehlschrank hend. As Bier för NOCH de Wanderig i drüü Täg hed er dänkt, aber üses z'Mettagässe esch fascht vergässe gange. Priorities... (d'Jasi hätt aber beides vergässe)
    Wel die Wanderig en andere Usgangs- als Zielponkt hed, semmer meteme Shuttle zom Afang vom Track brocht worde. Üsi Fahrerin hed sech au grad no als Guide verstande ond hed üs onderwägs emmer grad no chli met Infos ond Anekdote gfüetteret. So hemmer erfahre, dass s'Hilton Pub in Blackball nocheme Rächtsstriit met de Hotelchetti sech hed mösse ombenenne, ond dass im gliiche Dorf e fliissigi Meersäulizöchterin läbt ond die Tierli meh oder weniger frei omelaufe chönd, was mer denn au gseh hend.
    Met üs send no e Frauegroppe us Neuseeland gsi, d'Trinu us Estland ond de Connor, wo dä ganzi Track i eim Tag hed welle laufe.
    Zerscht eschs döre Wald gange. Dör das as es geschter de ganz Tag grägnet hed ond hött de Näbel zwösche de Bäum ghanget esch, heds ganz e spezielli Stemmig gha. Onderwägs hemmer no en chliine Schlänker zo de Öberräschte vonere alte Goldgräbersiedlig us de 1930er Johr gmacht. Ossert anere alte Hötte heds det ned vel z'gseh gäh, die alt Sagi hemmer üs drom gschänkt.
    Mettagspause hemmer denn binere Hötte gmacht, wo mer alli vom Bus weder gseh hend ond enand chli könneglehrt hend. Mer hend erfahre, dass mer alli die gliiche Plän hend för die nöchschte drüü Täg ond es liechts Gmeinschaftsgfühl esch do scho ufcho. Noch de Ces Clark Hötte, wo mer de Mettag Verbrocht hebd, esch es im onbewaldete Gländ wiiter gange, vo wo us mer zwiifellos e schöni Ussecht gha hätt. D'Wolche hend üs dä Gfalle aber ned welle mache. I de eigete Gedanke oder im Podcast versonke, esch es öber Stock ond Stei zo de Moonlight Tops Hötte gange, wo mer üsi Plätz im 12er-Schlag bezoge hend. Zo üsere "Höttegmeinschaft" send no zwoi Zwoiergroppene ond d'Valerie, e Fröndin vo de Trinu, dezuegstosse.
    S'Choche a dem Obig hed sech als sehr eifach usegstellt: Wasser ufchoche (met üsem neue Chocher) ond i Büütel lääre, warte - fertig. Gschmöckt heds mässig-guet. Met de Valerie ond de Trinu hemmer üs denn chli agfröndet ond e Rondi Yatzee gspellt. Au d'Margaret, eini us dene Zwoiergroppene, hed sech zo üs gsellt. Abgseh vo de Frauegroppe, wo ganz offesechtlech weiss, wie mer ofere Hötte aperölet, ond üs zwoi, send alli früeh is Bett.

    Vo Sonnestrahle ond em hin und här im Masseschlag gweckt, hemmer üses Fertigzmorge welle zuebereite. Bevor mer üs dem aber gwidmet hend, hemmer no müesse die toll Morgestemmig dosse vor de Hötte gnüsse. Geschter hemmer dankem Näbel nüüt gseh ond för höt wär eigentlech liechte Niederschlag ond Wolke vorusgseit gsi, s'tatsächleche Wätter hed aber Hoffnig gäh.
    Bim z'Morge hemmers ned mol gschafft, d'Zuebereitigsaaleitig met de füüf Beldli ond em entsprächende schriftleche Vermek of de Jasi ehrem Müesli rechtig z'läse ond hend chochends statt chalts Wasser igföllt. Sie hed sech dör das aber zom Glöck ned vergeftet, d'Lektion före nöchschti Tag esch aber glehrt.
    Chorz vor de 8er-Groppe Neuseeländerinne semmer als zwoitletschti losgloffe. S'Wätter esch perfekt gsi för en Tag i de Bärge. Als erschts semmer betzli onderhalb vom Grat ond oberhalb vom Wald Rechtig Norde gwanderet ond hend beinahe permanänt d'Bärgwält chönne bestuune. Bald scho esch de Wäg i Wald gange ond mer hend weder mol en Märliwald gha. Moosbewachsni Bäum öberall, dezue d'Morgesonne ond hie ond da Näbelschleier. De Dani esch vor luuter Begeischterig chuum vorah cho.
    Zwoiehalb Stond nochem Abmarsch hemmer d'Hälfti vo de Wanderig bereits hender üs gha ond bi de Notonterkonft üsi Mettagspause igleit. D'Trinu ond Valerie send bereits dete gsi, d'Margaret ond de Miles send chorz drufabe iitroffe ond d'Reisegroppe no chli spöter.
    Noch de (fascht; -2 Persone) gmeinsame Pause hemmer de zwoit Teil in Agreff gno, wiiteri 10 Kilometer gröschteteils abwärts, leider chli weniger spektakulär als bishär.
    En Teil vo dem Abschnett semmer gmeinsam met de Margaret gloffe ond hend üs onterhalte, bevor mer denn weder üses Tempo ufgnoh hend ond am halbi drü bi de Hötte itroffe send.
    Dank chorzer Chatzewösch bim Brönneli semmer weder frösch gsi ond hend denn of de Terrasse s'Wätter, d'Ussecht, en Kafi, s'Znacht ond d'Gsellschaft gnosse.
    Abgrondet worde esch dä schön Tag vomene rechtig kitschige Sonneontergang, wo sech nomol fascht all (-4 Persone, +1 Stefan) versammlet hend. Es send natürlech vel Belder gschosse worde ond d'Valerie hed üs no paar Songs of de Ukulele, wo sie of de ganze Wanderig met sech treit hed, vorgspelt. Teilwiis esch sogar chräftig metgsonge worde.
    Währed die Ziile verfasst wärded, wartemer druf, ob mer no paar Stärne gseh chönd, aber osserem Stefan, wo höt Obig zor Groppe gstosse esch, esch niemmer meh wach. De Stefan heds vorhär au scho rasch gno ^^ Leider esch de Stärnehimmel ned bsonders beidrockend gsi ond mer send chorz noch de obe verfasste Ziile is Bett.

    Am Morge vom drette Wandertag heds de Dani scho chli gliiner us de Fädere gschafft als d'Jasi ond hed met de Valerie zäme de Tag dosse begrüesst. Debii hed er no s'Glöck gha, en dopplete Rägeboge z'gseh.
    S'Zmorge esch dämol au rechtig zuebereitet worde ond so hemmer gstärcht die verbliibende 16 km onder d'Füess gnoh. S'stetige Abwärtslaufe esch zwor ned so toll gsi, de Märliwald ond de emmer wederchehrendi Floss hed üs vo de schmärzende Füess ond Chnüü chönne ablänke. Noch 10 km hemmer d'Valerie iigholt, wo zom Ukulele spele mol e Pause iigleid gha hed, 1 km spöter semmer de au no a de Frauegroppe verbii cho, wo ehri letschte Vorröt för die verbliibende 5 km am Ässe ond Trenke gsi send. Schlau: 1. Liechtere Rocksack, 2. fröschi Energie
    Mer hend üs kei Pause gönnt ond wo mer of de letschte km im mettlerwiile palmedörsetzte Wald gsi send, hemmer de no d'Margaret ond de Miles iigholt. Be all dene Begägnige onderwägs esch chli d'Onsecherheit ome gsi, ob mer sech jetz "Ade" oder "Bes spöter" säge söll... Mer "jöngere" (= Valerie, Trinu, Frauegroppe & mer) hend ofenes Bier im Pub am Ändi vom Track abgmacht, was d'Margaret ond de Miles noch Beändigong vom Track mache wend, hemmer aber ned gwösst.
    Ändlech am Ziel acho heds gheisse: Duschi cha warte, zerscht geds öppis z'trenke ond z'ässe. Mer hend de no e loschtigi Rondi gha, wo mer no Tipps för üsi wiiteri Reis becho hend. D'Neuseeländerinne send denn gange, mer send met de Valerie ond de Trinu zrogg ofe Camping, wo sie fertig packt hend ond schliesslech au wiiter send. De semmer weder elei gsi, bes d'Jasi d'Margaret ofem Fraue-WC atroffe hed. Mer hend de met ehne förs z'Nacht abgmacht ond send grad nomol i das Pub. Au dä Obig hemmer in sehr nätter Gsellschaft verbrocht.
    I de Nacht send d'Stärne nömme so schüüch gsi ond mer hend lang i Himmel ufe gluegt.    Les mer

    Se oversettelse
  • 4/7- Wältreis
    Ofem Wäg noch Motueka
    Wattspaziergang in MotuekaTriangle Flat1Wharariki BeachTschüss

    112 & 113: Motueka & Pūponga

    2. februar, New Zealand ⋅ ☀️ 21 °C

    Noch dere agnähme Fahrpause eschs i üsem rollende Dehei weder of d'Stross gange. D'Route esch wiiter entlang de ruuche Westküschte Rechtig Norde gange. Üses schwachbröschtige Gfährt hed met de Aastieg jewiils zemmli z'kämpfe gha ond Gschwendigkeitsverlöscht vo 40 km/h (vo 80km/h of 40km/h abe) send kei Sälteheit gsi. Üse alti Corsa hed üs aber glehrt, i so Momänt Glasseheit z'bewahre ond so send vel Uswiichstelle gnötzt worde, zom de ufghaltnig Verchehr verbii loh. För dä Tag hemmer eh nüüt Bestemmts plant gha, drom hemmer üs chönne Ziit loh.
    In Westport hemmer üsi Vorröt weder ufgstockt, bevors vo de Küschte is Landesinneri gange esch. S'Ziel vo de höttige Fahrt esch es Freedom Camping in Motueka gsi. I de Kommentär of de App Campermate heds nocheme beliebte Platz tönt ond so hemmer einigermasse be Ziite welle dete sii. Us dem Grond (ond au, wels tatsächlech au ned vel anderi Grönd gäh hed zom ahalte), hemmer of öberflössigi Pausene verzechtet ond send scho am früehche Nomittag a üsem Ziel acho. Ond zwor genau rechtig: Zwoi Plätz heds no gha, chorz noch üs esch de letschti Platz de au wäg gsi. Mer hend üsi Campingstüehl, d'E-Reader ond de Sandfly-Spray iipackt ond send före a Strand. De Spray hemmer zom Glöck ned bruucht, de (sehr) starchi Wind hed üs die Plagegeischter vom Liib bhalte. Leider esch das aber au de einzig Vorteil gsi. Nochdems au diräkt am Bode ned agnähmer gsi esch zom läse ond mer au es Höngerli gschpört hend, semmer noch öppe 20 Minute weder zrogg zom Büssli ond hend üs es warms z'Vieri gönnt.
    Chli spöter semmer of Wattspaziergang gange ond hend debii allerhand spannendi Moschle, Vögel ond onidentifizierbari (Läbe?)Wäse agluegt. De Kiter hemmer au no chli zuegluegt, bevor mer weder Rechtig Ufer zrogg send. Was mer bsonders cool gfonde hend: Am Ufer esch en Meerwasserpool gsi, wos ermöglecht, dass Lüüt au be Ebbe (oder Storm...) gmüetlech ehri Bahne chönd zieh.
    Bem Znachtchoche ond -ässe send of de Suechi nocheme Stellplatz emmer weder neui Campervans cho ond erfolglos gange. Met enere absolut ongrächtfertigte Öberheblechkeit (mer hend üse Platz schliesslech met vel Glöck ond zuegäh, chli Ziitplanig, becho) hemmer ab dene nor chönne de Chopf schöttle: "Meined die ärnschthaft, dass om die Ziit no en Platz do bechömed?! Pfff.. " Jo, s'Läbe im Camper hed üs (ok, nor d'Jasi) i gwössne Pönkt älter wärde loh.

    Am nöchschte Tag hemmer üs zom vorussechtlech nördlechschte Ponkt vo üsere Neuseelandtour begäh, de Golden Bay, gnauer noch Pūponga. Onderwägs hemmer es chliises Kommunikationsproblem onderenand gha, was chli för schlächti Stemmig gsorgt hed. Chond halt au mol vor.
    De erschti Stopp esch bemene Ussechtsponkt gsi, wo leider meh versproche hed, als dass er hed chönne halte. Nochhär semmer diräkt bes ofe Parkplatz vom Triangle Flat, em Usgangsponkt vo üsem plante Strandspaziergang. De erschti Teil esch öber ca. 4 km a de Innesiite vonere sichelförmige Landzonge gange. Schön, aber ned sehr spannend, hed sech rächt zoge. Denn hed de Wäg öber spektakuläri Düne gfüehrt, wo eim s'Gfühl gäh hend, ofeme Wüeschteplanet glandet z'sii. Of de Ossesiite vo de Halbinsle esch de Wind zemmli starch gsi ond vor allem onablässig. De Wüeschteplanet hed do sini herti Siite zeigt ond mer send met düütlech meh Müeh als no bem Hiiwäg weder Rechtig Parkplatz gloffe. De Dani hed sogar onfreiwellig es Wettrenne gäge Wind mösse mache, wonem es Papierli us de Hand gheit esch. Onderwägs hemmer no en tote Wal ond en tote Chogelfisch gfonde. Mer hends zom Glöck läbig zrogg zom Büssli gschaft ond üse Platz imene Camping bezoge.
    Am Obig semmer no a Wharariki Beach före Sonneondergang. Obwohl mer of üsere Reis scho sehr vel Sonneondergäng gseh hend, esch das wohl eine vo de schönschte gsi. Gar ned mol so sehr wäg de Sonne, sondern wägem Strand: Iidröcklechi Felse ond Felsböge im orange Liecht, Seehondwälpe bem Spele, d'Wiiti vom Strand... all das heds eifach sehr speziell gmacht. Zrogg bem Camping hemmer no gmeint, mer heiged es Rieseglöck, wel mer gmeint hend, Kiwis z'gseh. Im Liecht vo de Stirnlampe hend sech die "Kiwis" aber als Wekas usegstellt, was de scho nömm so ufregend gsi esch.    Les mer

    Se oversettelse
  • 2025© FindPenguins
  • Hjem
  • Om oss
  • Gruppesporing
  • Presse
  • Vilkår
  • Personvern & Cookies
  • Hjelpesenter
  • Avtrykk