Conjunto Florida Verde

Willi bim 1. Mal nur so churz in Medellín gsi bin, bini nomal cho 🙂
S wätter isch echt ******** gsi, jede namittag hetts gschiffet. Aber easy, 1 mal is Escobar Museum, ei Mal go Trampolingumpe usw.
S Escobarmuseum wird vo sim Näffe gfüehrt wo am Pablo scho ih sinnere Ziit d Bankkonte ide Schwiiz gfüehrt het. Drum sind bi dere Tour alli Poliziste und Regierigsmitglieder Pendejos, malparidos und hijoeputas gsi.. Aber guet, ihdrücklich isches gsi was de Typ alles gha het und waser alles gmacht get wenner Glust gha het. Vo dem Wassertöff z.B. sind nur 10 Stuck für en James Bond Film produziert worde. De Pablo het denn alli 10 kauft. Sini Frau het es Einhorn uf de Geburtstag welle. Will er keis gfunde het, het er ihre halt en Zoo mit Tier us aller Wält erbaue.
Comuna 13 isch es ehemals kriminells Viertel. Mega schön aber, dass sie jetzt gmerkt hend, dass s Tourismusgschäft nachhaltiger wie Drogegschäft und Bandechrieg isch, so dass es hüt zu de sicherschte Viertel vo Medellín ghört. "Niemmer langt dete Touriste ah". Entweder mer buecht d Tour zude Comuna 13 über e Reiseagentur, oder mer fahrt eifach mit eme Bus det ane und luegt wo dases grad en Lokale umehet wo eim alles zeigt. S 2te isch die spannender Variante, will da werded dir au persönlichi Familiegschichte vo de staatliche Ihgriffschrieg verzellt.

D Fuessballfans dreied dure und stönd uf Gländer, im Stadion herrscht Alkoholverbott, wenn aber de ambulante Stadionverkäufer 6.- gisch, bsorged sie dir 38%ige Aguardiente. Nach dem hend denn au mir ufs Gländer welle 🙂

Uf de Altstadttour wird der gseit, dass du bi nacht jah nöd allei id Altstadt söttsch gah. Ebeso wird verzellt, dass d Regierig Architäckte useme Projekt userüered wills meined, sie chönged s Werk genau so guet selber z Änd füere. Lueged s Bild vom schwarz-wisse Gebäude mitem kuppelförmige Dach ah. De Teil isch under eme Architeckt baue worde. De rächti Teil denn, isch de Teil vom Gebäude wo d Regierig ohni Architekt baue het 😂

Medellín isch e rächt e florierendi Stadt wo "leider" unter em Ihfluss vom Escobar sehr viel glitte het. Attentät uf Ziviliste (uf Passagierflugzüüg oder während Konzert) und gezielti Mörd sind ade Tagesordnig gsi. Hüt isch das nümme so, was aber immerno d Schattesiite vode Stadt sind, sind d Armuet wo mit de Pandemie um es 3fachs gstiege isch, de Droge- und Prostitutionshandel wo au zu Diebstähl füert und d Korruption ih verschiedene Ämter.

Als Tourist isches aber eigentli zimli sicher, sofern ihne kei Papaya gisch (en Grund zum dich beklaue, wie z.B. Markechleider Träge oder mitem Handy uf e anderi Sprach redisch etc.).En savoir plus