Cerro Crocket

Hüt chani usschlofe und das tuet guet :) Lustigerwiis started all Toure einigermasse früeh und ich verwache denn au wo di andere sich parat mached. Also gits Zmorge (es Brötli und Konfi usere Art Plastikbütel) und denn suechi es Velo zum miete. Schliessli bringt mi de Bus uf Santa Rosa, was erhöht ide Inselmitti liit. Dete sölls Rieseschildkrotte i Farme, Lavatunnel und zwei Vulkangipfel zum bewandere geh. Ufem Weg zum erste Lavatunnel überrascht mi tatsächlich e freilebendi Schildkrott am Strasserand 🥰 Und wils ned di einzig blibt, strichi denn de Bsuech uf de Ranch grad. Wieso sötti zahle, wenis do au gseh...? Bim Lavatunnel acho stuuni, dass si ned belüchted und dementsprechend stockdunkel isch... Qué loco, zum Glück hät mer ja es Handy ^^ Ich laufe entlang vo dem beidruckende Gebilde und plötzlich goht denn s'Liecht a. Glaube es isch kaput gsi wil dusse sinds was am bastle gsi... Jetz ischs dütlich eifacher und nachere chline Chreseleinheit chumi denn au uf de andere Siite bim Usgang a und chere um. Mues ja s'Velo wider mitneh... En Guide woni atriffe meint, dases na e anderi schöneri Höhli git woni no sött apeile und das machi denn au. De Ufeweg mitem Velo isch ide scho brüetende Hitz denn en rechte Kampf aber he, bitz Sport schaded nie. Jetz isch au das Hüsli unterwegs bsetzt und si wend gern na 7.50 $ vo mir, was definitiv z'viel isch aber was wetti au mache... Di zweit Höhli isch Teil vonere Range und dete chunnt denn für 5 $ au na öper mit, wo verzellt, wie das ganze entstande isch und so, was grundsätzlich recht eifach isch: Es flüsst viel Lava und di oberst Schicht tröchnet us Gründ wie Rege oder plötzlicher Chälti schneller als das wo unedra wiiterflüsst. Zack, fertig und wunderschön zum aluege ^^ Nachher entscheidi mi gege e Wanderig wils doch scho fast Mittag isch und ich am Nami no an Strand wett. Also lohni mi (nach Stops bi es paar Schildkrotte meh) vode Schwerchraft zrugg is Dorf bringe. D'Tafle, dases chönnt Schildkrotte uf de Hauptstross ha, isch definitiv ned umesust wie sich usestellt ^^ Zrugg ide Zivilisation schnappi mer Schnorchelzüg, mache en Zmittagstop am Hafe und spaziere denn in Richtig Playa de Tortuga, wo so heisst wils dete kei tortugas git 😂 De Weg füehrt dur en Waldähliche Teil mit lustige Kakteebäum und Eidechsli 😍 Nach 30 min chumi zum Tortuga Bay, wo sehr schön isch aber zum schwimme sind d'Strömige z'starch. En Strand wiiter ischs denn besser und ich gange is Wasser. Das isch z'warm zum abchüele und viel z'dreckig zum öpis gseh. Janu, schön ischs glich ^^ Denn höckli mi an Strand und lise e Rundi :) Hüt isch vogeltechnisch en guete Tag. Gseh eine, wo sich grad irgend e Motto gschnappt hät und eine miteme frisch gfangne Fischli. Au mit mir am Strand sind ganz viel Meerechse. Die lebed nume uf Galapagos und sind di einzige Echse, wo im Wasser und a Land lebed. Mis letste ToDo vom Tag isch denn na Toure für di negste zwei Täg sueche und bueche. Defür muesi mi nume vo einere vo dene vielne Agencys aspreche und beriesle la... Ich entscheide mi für schnorchle uf de Isla Floreana morn und tauche irgendwo bide Isla Seymour Norte übermorn. Und denn buecht mer de Typ grad au na Fähre für all Inselüberfahrte, was vorallem für de Fritig gar ned so eifach isch wili anschinend bitz spoht dra bin. Han ja au ned chöne wüsse, dases nume zwei Verbindige pro Tag git wo eingentli immer mehreri Täg vorher zimli usbueched sind... Es schiint aber so, als obs verschideni Abüter für uf di glich Fähre git wil öppe nachem füfte Telefon hani denn es Ticket 😅 Zum alles zahle hani ned gnueg Geld debi, drum machi mitem Velo vo ihne en Usflug zum Bancomat. Min Berater begleited mi lusterwiis wiler Angst hät, dasis elei ned finde und zeigt mer grad na es paar weniger bekannti Plätzli im Dorf ^^ Churz spöter bini ganzi 425 $ ärmer aber he, bi ja nume eimal uf Galapagos 🤷🏻‍♀️ Das ganze Prozedere hät länger duured als denkt, drum machi mi denn zimli direkt uf de Heiweg, choche, dusche und gange früeh go ligge. Nebst eus sind au na es paar Mugge und Chäfer im Zimmer... Wobi min Muggespray sini Ufgab sehr guet tuet und jeglichi Ungeziffer fernhalted. Im Gegesatz zum Chäfer, wo am Zimmerkolleg über s'Gsicht spaziert 😂Read more