Acheim

Au hüt gits nachere guete Nacht es usgiebigs Zmorge uf de Dachterrasse. Denn wird alles verpackt und de Koffer über d'Schotterstei zumene Taxi transportiert. D'Hoffnig, dasmer en alte Mercedes verwütsched halted ned lang und so stiigemer eifach is negst best Taxi, wo eus id Nöchi vode Autovermietig bringt. Genau findemers denn dank Google Maps. Nach gfühlte 15 Mal unterschriibe und de Bestandesufnahm vode Schäde a eusem Dacia Dokker gohts los. De Verchehr isch tatsächlich chaotisch aber mir (also vorallem de Simon am Stüür) schaffeds guet zur Stadt use und vo denn a ischs keis Problem meh. Churz nach Abfahrt findemer use, dass sowohl d'Klimaalag wie au Bluetooth bestens funktioniered - beides sehr wichtigi Sache! Hüfig müemer uf eusem Weg is Atlasgebiet langsami Trucks überhole, was fast so hüfig bi uszogner Sicherheitslinie passiert. Gstrichled gits recht selte aber mir hend eus sege la, dass das halb so wild isch wemer es bitz vorus luegt und uf d'Warnsignal vom Gegverchehr achted, zum allfälligig Polizeikontrolle übersta. Bide einzige Kontrolle ufem Weg werdemer ned aghalte... D'Strosse werded immer kurviger und enger und es erschiined immer meh Berge im Saharastaub. Hüfig fahremer a ungsicherete Felswänd verbi wo dementsprechend viel Stei uf de Stross ligged. Hoffemer eifach, dass jetz ned grad öpis abechunnt. Problemlos schaffemers uf Imlid und sueched dete zerst en Weg i eusen Ortsteil oberhalb vom Dorf und denn dete na en Parkplatz und schliesslich au na s'Hotel, was alles gar ned mal so eifach isch. Vom Host werdemer in schlechtem Englisch begrüesst, verstönd eus aber trotzdem - au dank Google Translator. Fazit: s'Auto chömer nöcher ane parkiere, er organisiert en Guide womer morn ide Berge bruched und bringt eus en Willkommenstee mit Guetzli. Nehemer alles sehr gern a :) Zum parkiere begleitet er eus denn und schleppt grad au na de Koffer is Hotel ufe. Wil de Parkplatz grad e Baustell isch, müemer chli spöter na go umparkiere. Hoffemer mal, dasmer denn währedem wandere ned im Weg stönd 😂  Wil nachem Zimmerbezug erst Mittag isch, gömer s'Dorf go erkunde ide Hoffnig, dasmer na öppis z'esse finded - sehr erfolgriich. Ufem fast höchste Punkt gits es anders Hotel, wo eus gemäss eusem Wunsch "just salad" zuebereitet. Was das alles beinhalted gseht mer ide Fotis. Mir werded dementsprechend meh als satt, hänged denn na bitz dete ume wils gmüetlich isch (und im Gegesatz zu eusem Hotel stabils Wlan hät ^^). D'Ussicht uf d'Berge rundume isch sowohl i dere wie au i eusere Unterkunft super. De Zruggweg laufemer via Wassfäll unterhalb vom Dorf. Zrugg im Hotel erwartemer eigentli zwüsched 4i und 5i euse Guide für morn, zum mal s'eint oder ander bespreche. Anschiinend wirds aber halbi siebni biser söll uftauche. Also isch umegammle und lese agseit ^^ Es bitz spöter stellt sich use, dass au de Guide - wie viel Lüt do obe - vorallem Arabisch und Berbisch chan und ned soo guet Englisch. Es wird aber länge. Mir bespreched, wenn dases wo los goht und wasmer müend mitneh. Snacks chunnter denn grad au na mit eus go organisiere ^^ Und denn gits scho Znacht. Suppe und Tajine mit Poulet und Bire zum Dessert. Alles isch sehr fein und dases öpis gsunds zum Desseet git findi super (isch au am Mittag scho so gsi). Nachem Znacht heissts packe und ziitig go ligge :)Leia mais