Tysnes

Hüt am morge simer ca. am 7ni uf, so dasmer no es Nutellaschnittli chöi ässä u aus ufruume u packe für d Witerreis. Mir hei e Fähre buechet gha, mit derä erfüuimer grad zwo sache. 1. Mir chöi üsi Outofahrerei chli abchürze u 2. Mir chöi dr Nærøyfjord, e Sitearm vom Sognefjord, us nechschter Nechi erläbä. D Fähre fahrt pünktlech am 9:15 Uhr ds Kaupanger ab u mir tuckerle los richtig Aurlandsfjord. Es isch grad richtig schöns Wätter u mir chöinis ds erschtä mau so richtig d Gsichter lah erwerme vor Sunne. Di Fähre isch super, da chame so richtig di Fjordelandschaft gniesse u muess nid Angscht ha mi fahr grad ame Angere hinger iche... spetischtens wo d Fähre rächts het abboge i dä Nærøyfjord, ds isch dr schmeust u dr ahgäblech schönscht Fjord vo Norwege u isch äuä oh wägä dessi im UNESCO Weltkulturerbe, hetsech dr relativ höch Priis glohnt. Es isch nämmlech schone cheibe schöne Fjord u relativ schwär zuegänglech. U gäbig isch haut dasme am Ändi ds Outo grad bisech het u nid no eis zrugg muess zum Outo. Abder Fähre ache gfahre, entfernemernis grad vom Sognefjord furt u fahre richtig Hardangerfjord. Ufem wäg machemer no schnäu e haut bime riisige Wasserfau "Tvindefossen". Isch sicher oh e Bick wärt gsi. När fahremer äbä bis zu däm Hardangerfjord u när aues am Ufer entlang witer bismer zu üsem planete Ziu "Oddland Camping" chöme. Leider isch ds dert e chli enttüschend gsi u hetnis nid so passt, mir wei nämmlech Zäutle u dr Inzig Platz fürnes Zäut wär äuä ufem Spiuplatz gsi. Chli komisch, e Campingplatz ohni Zäutplatz... aber item, mir hei ouso e nöie Campingplatz gsuecht u fündig worde. Ca. 1,5h witer richtig Stavanger, (ds Ziu vo morn) am Bjørnafjord, heimer es gmüetlechs Camping ufgfunge u mir hei morn oh no grad chli weniger ds Fahre. Bim Campingplatz isch ganz unkompliziert dr Bsitzer vom Platz cho u hetnis aus erklärt u nis gloub oh nid so viu ghöische. Wone ume Priis gfragt ha heter ömu hurti überleit u när 200nok gseit, hetmi fair tüecht. Mir hei ahschlissend natüürlech üses Zäut ufboue u Räste mit üser Camping Usrüstig kochet. Für öppis heimer das Züg ja oh kouft. Fein gsi! Nächhär hetnis aber irgendwie no chli dr glust nach "Øl" u Schoggi packt drumm simer no hurti chli öppis gah gänggele. Zum a See spaziere u di nächschte Täg plane heimer das Züg konsumiert u womer dunger am Fjord no chli ghocket si heinis no 5 Ching zwüsche ca. 5i u 12i bau gschockt. Di hei i öppe 10 min. hurti 5 Krabbene u 1 öppe 30cm Fisch usem Wasser zoge. Üs si fasch d Ouge usgheit, vorauem wüui no überleit ha, genau dert wosi ds Züg usezoge hei, gah ds bade.
Mir heinis när i ds Zäut verschloffe. I luege no Schutte FRA-NED, wos näbädranne scho schnarchlet. Super... es 0:0... huere Längwiler... So itz legemi aber oh uf di fuli Hut. Guet Nacht!Read more