Hudidei

Achtung de Blog isch laaaang 🙈
Vorgeschter simmer nachmene usgibigä Zmorgä über d Bärge ca. 2 Stund uf Kingston gfahrä.
Mier hend en Zwüschästopp in Castleton gmacht zum eine vodä ältischtä botanischä Gärte ide Karibik ahzluegä. Superschöni Pflanze hemmer gseh und hend üsä erschti Kolibri dörfä beobachte. D Mila isch ganz ufgregt gsi.
Womer in Kingston ahcho sind hemmer am Nami eifach chli s schönä Hotel und de Pool gnossä und sind am Abig fein go Znacht ässe.
Ade Stadt mündet d Blue mountains, en Bärgchetti wo au de jamaikanischi Kaffee härchund de ‚Blue Mountain Coffee‘.
Geschter hemmer en grossi Tour um ganz Kingston gmacht. Zerscht simmer uf Port Royal. Das isch en alti Piratestadt gsi, jedoch isch dur es Erdbebe 1692 zweidrittel vode Insle im Meer versunkä. Ca 3000 Menschä sind damals ums Lebe cho.

Falls sich öber bitz für Gschicht vo Jamaika interessiert hie es paar Fakte:
De Christoph Columbus hed 1494 Jamaika beträte und s Land isch ab dem Ziitpunkt vom spanische Königshuus beasprucht worde. 1665 sind d Ängländer cho und hend unteranderem in Port Royal krieged und schlussändlich d Spanier verschücht, die hend sich uf Kuba zrugzogä. Ab dem Ziitpunkt isch Jamaika en englischi Kolonie gsi. Leider isch dur d Herrschaft vo England damals d Sklaverei wo scho bestah hed, nu vill schlimmer worde. 1834 hedmer d Sklaverei beendet. Sit 1962 sind si erscht unabhängig vo England und isch Mitglied im Commonwealth.

Ich schribä das au willmer en Festig sind go ahluegä in Port Royal wo d Spanier gägä d Ängländer kämpft hend.

Soo.. wiiter zu üsem Trip gester… ahschliessend simmer id City gangä. Zerscht dur Downtown gfahrä. Meeega busy, sehr viel läde und Markt, d Kadesha hed üs devo abgratä uszstiegä suscht würed üs d Verchäufer id Läde inezieh zum Zügs verchaufä, das wär zwar elei nu issi, mit chind aber müehsam..
Nah hemmer en Gartä mit so Gräber vo Nationalheldä ahgluegt. Vieli devo hend en grossä Teil dezue biitreit das d Sklaverei ufghört hed. Nachher hemmer d Wall of Fame ahgluegt und denn simmer zum Bob Marley sim Huus gfahrä, wo jetzt s Museum isch. Es isch soooo interessant gsi, mer hed sini Instrument, die alt Chuchi, s Tonstudio, sis Schlafzimmer, Chleider, tausende vo Schallplattene, Löcher ide Wand (nachdem er mehrmals ahgschossä worde isch!), und und und chönnä ahluegä. Föteli im Huus sind verbotä gsi. 😏
Verussä isch en ältere Herr ghöckled, de Bongo Herman, er isch geilä Siech. Das isch de Bongo Spieler vom Bob gsi, er hed üs öbis vortrümmeled und chli verzellt, de Ilai und d Mila hend au dörfe trümmele.
Am Schluss simmer nu s Devons House go ahluegä, das isch es Huus vom erschtä Milliardär in Jamaika gsi. Det heds au superfeins Glace gäh und d Mila und ich hend chli mit de Chind im Park gspielt. Meeega härzigi Kind, d Mila und ich hend gar nüm wellä gah. Mier hend den zum Znacht det en Pizza bimene Italiener gässe. Huerä fein gsi, hend dänkt gid öbä nid so gueti Pizzas da. 😅
Thats the end for today.
Next Stopp: Montego Bay wo üse letschti Halt isch bis mer am Sunntig wiiterziehnd uf Costa Rica.Leer más