Reset search
HudideiHudidei
SatelliteEdit route
traveled in 16 countries Read more Schweiz
  • Hudireise
    Day 53

    Playa Del Carmen and Finish 🫶🏽☀️

    July 26, 2023 in Mexico ⋅ ⛅ 32 °C

    Sitere Wuche simmer da in Playa del Carmen. ich sitze grad aktuell bim Pool und mier warted bismer am halbi 2 vom Taxi abgholt wärded zum wider zrugg id Schwiiz z cho.
    Mier sind imene sehr grossä all inclusive Hotel gsi und hend s Areal die ganz Wuche nie verlah. Es hed en paradiisische Strand, en riise Pool, 5 Restaurants, en Jungelteil mit Tier zmitzt im Areal, vieli verschideni Aktivitäte zum mache, und und und gha.
    Die erschtä zwei Täg hemmer üs ah die viele Lüüt und das grossä Hotel zerscht mal müesse gwöhne, sind fascht chli überfordered gsi nachdem mer ide andere Hotels allig praktisch für üs gsi sind.. 🤭 Isch en superschöni Wuche gsi. Zwüsched 6000 und 10’000 Schritt hemmer am Tag nur ide Ahlag gmacht. 😅
    Für d Chind heds Chinderpool, Spielplatz, Kidsclub für d Mila und Abigprogramm gäh. S Mili isch sogar mal anere Pijamaparty gsi am Abig. Es isch eifach en supertolle Abschluss für üs gsi.

    Fazit vo üsere Rei insgesamt:
    Wauw etz sind die 2 Mönet scho verbi. Sooo viili Ihdrück, Erläbnis und Erinnerige chömmer mit heinäh.
    Es isch en wunderbari Erfahrig gsi das chönne mit üsne Chind z erläbä. Vo A-Z isch die ganzi Reis eifach super gloffä, 2-3 Sachä sind chli en Useforderig gsi für üs all. Han dänkt die zähl ich doch etz au mal uf, eifach zum nid nur immer nur alles Positive z schribä, obwohl mier üs eich würkli nid dörfed beschwäre..
    1. s Ocho Rios Erläbnis isch würklich s schlimmschte Erläbnis vode ganze Reis gsi und ich muess etz nu vill ah de Bueb und die Family dänke.
    2. de Ilai hed ide erschtä Wuche Jamaika d Spitzeblattere nach de Mila aunu duregmacht, jedoch zum Glück nid so starch, d Folge sind paar schlaflosi Nächt gsi
    3. in Costa Rica hend üsi Chind insgesamt 3 Täg Fieber gmacht mit Huestä, sind ih derä Ziit au mehrheitlich im Hotel und Umgebig blube und hend paar Medis ide Apothek für si gholt.
    4. In Costa Rica hed üses Auto mal bimene Parkplatz kei Batterie meh gha, mier hend de amene sone Service ahglüte wo üs de ghulfe hed.
    5. de Ilai hed in Costa Rica zwüsched dure mal müesse chötzle im Auto willer dur die viele holprige Strasse und Kurve reisechrank gsi isch. Hend den ihm ahschliessend vor grossä Reise es Zäpfli gäh und den isch das keis Problem meh gsi.
    6. Irgendöbis hed de Dani nid so verlittä, hed ca. En Wuche Magedarmproblem gha, und ei Abig Fieber, zum Glück ohni erbräche.
    7. ja zwei Mönet ih eim Zimmer z 4. isch au mängisch chli en Useforderig gsi… Das chönder üch ja öbä vorstellä meh muessi glaub au nid dezue sägä. Hed meischtens gued funktioniert, doch zwüsched durä ischs au mal zum devo springä gsi. 🫢😂

    Mier sind unglaublich stolz uf üsi Chind.
    Und mier sind eifach nur überglücklich über all die Erläbnis wo mier zämä als Familie hend dörfä erläbä. Zum Glück hend mier zämä de Schritt gwagt, hend üsi Koffer packt und sind die Reis ahgangä. ❤️ Mit chli Muet und Zueversicht hemmer üs en grossä Traum erfüllt. 🫶🏽

    Und somit Beänd ich hüt üse Reiseblog mitmene lachende und brüelende Aug, hed mier freud gmacht öbä widermal niderzschribä was mier so erläbt hend und hed mich au gfreut dass ier üsi Reis chli mitverfolgt hend.

    Freued üs etz fescht uf üsi schöni Schwiiz uf üses Dihei und uf üsi liebschtä Mitmänsche. ❤️🥰

    Seee you friends ✌🏽    Read more

    See translation
  • Hudireise
    22111
    Day 46

    Bacalar 🌊🫧

    July 19, 2023 in Mexico ⋅ ☁️ 33 °C

    Bacalar, es wunderschöns Städtli wo chli meh als 10’000 Ihwohner hed. Es liid amene See wo au „Laguna de Bacalar“ oder „Lagune der 7 Farben“ gnännt wird. Er isch 42 Km lang aber relativ schmal. En Zämeschluss vo 7 Cenote isch verantwortlich für d Entstehig vo derä Lagune oder äbä gnau gnu dem See. S Wasser lüchted türkisfarbig und isch glasklar, mer hed s Gfühl es isch gar nid ächt, unglaublich schön. Anschiinend heigs ih dem See au Krokodil, mier hend aber keini gseh und es sig au siicher zum Bade, drum hemmer üs gar kei Sorge gmacht.
    D Stadt isch voller Streetart und Artiste. Si ziehnd dur d Restaurants und möched Musig oder Kunststückli. Zmitzt inne isch nu en chlini Burg „Fuerte de San Felipe“, das isch damals gmacht worde wäg de ständige Pirateahgriff zum Schutz vode Stadt.
    D Strasse sind voller wunddrschöne Graffitis und chline Lädeli und Cafes. D Stimmig vode Lüt isch sehr gechillt.
    Mier hend die 2 Täg verbracht mit Bädele ide Lagune. Mier sind amene Ort gsi wo vorallem d Locals bädeled hend. Si hend iri Täsche voll mit Ässe packt, hend sich mit de Family usbreited, Musig glost und de Tag gnossä, genau so wie mier. En grossi Familie näbed üs hed üs mit Chueche, Süessem und Nachos verköstiged.. Ohni grossi Kommunikation hend si üs das Züg immer wider zwüscheddure eifach id Hand drückt, fründlich glächled und sind wider ewäg gloffä. Mier hend das sehr gschätzt und üs mit Gracias und eme Lächle zrugg bedankt. So unkompliziert und härzlich sinds. Und üsi Chind hends gliebt und mitm Ilai chli umegschmüseled. So chlini Geschtä möched eifach nur Freud. 🫶🏽
    Am Abig simmer durs Städtli zoge und hend sehr fein ih chline härzige Restaurants ade Strass gässe und s Gscheh beobachted. Irgend es Ritual füehreds teilwiis ide Lokal dure, si räuchered mit Wiirauch us (weiss nid gnau für was oder warum) und es schmöckt eifach voll gued (mier liebed zum Glück Wiirauch). 🤭
    Ja und somit gömmer hüt zu üsere letschtä Destination uf üsere Reis. Wahnsinnig wie die Ziit schnell verbii gangä isch.
    Jetzt gnüssemer die letschti Wuche nu ih voller Züg in Playa del Carmen bevor mier den wider ih üsi schöni Schwiiz zrugg chömed.
    See you soon ✌🏽🫶🏽
    Familie hudidei    Read more

    See translation
  • Hudireise
    11121111
    Day 43

    Mérida ☀️

    July 17, 2023 in Mexico ⋅ ☀️ 37 °C

    Am Mittwuch simmer in Mérida ahcho.
    Es isch d Hauptstadt vo Yucatán und hed ca 950 000 Ihwohner. Es isch mal en Mayastadt gsi und hed Ti’ho gheisse. Ja den sind die cheibe Spanier wider cho, hend Mexico ignu und die hend 1542 d Stadt in Mérida umbedännt, glich wie die spanischi Stadt. Hüt seid mer Mérida sig s Tor zur Wält vode Maya. Es sig au en sicheri Stadt und mier hend gläse das si au nid vo dene Drogekartell ignu worde isch.
    Was nu isch Merida, gilted as die heissischti Stadt vo Mexico und jep das hemmer aso scho au gmerkt, ultra heissi 37-38 Gra, teilwiissigssogar wiit über 40 Grad☀️Was aunu en spannende Fact isch: si lid am Rande vom Chicxulub-Krater, det wo einst de Meteroit ihgschlage hed und somit d Dinosaurier usgstorbä sind. Mer gsehd jedoch nüd meh vo dem nur dur Mässige chamer das nachewise.
    Jedefalls hemmer üs dänkt mier gönd doch nachdem mer ahcho sind grad mal is grosse Mayamuseum. Mier hend vieli Interessanti Sachä gseh wie alti Wärkzüg, Schmuck, Vase und sogar Skelett. S Mili hed gseid sig nid so interessant gsi, s Dinosauriermuseum gfalli ire besser. De Dani und ich hends aber super gfunde. 😂 am Abig simmer nu ine Mall und hend spöter s erschte Mal uf üsere Reis imene Fastfood Restaurant gässe, im guetä alte Burger King mit Chinderspielplatz.
    Etz mal zum Hotel nu so 2-3 Sachä. Aso ehrlich gseid isches so mittel.. es isch en Hacienda. En Riisigi Ahlag mit grossem Garte und vill Zimmer.. ich glaube es wär mal es superschöns Hotel gsi aber chli in die Jahre gekommen.. d Fassadene sind am bröckele, d Wasserhähne funktioniered teils nid, ih üsem Zimmer hemmer en Überschwämmig gha wills Wc usgloffä isch, usw. Eifach alles chli am lödele und ernüered oder restauriert wirds nid würkli. Vooll okeeii für üs, halt eifach so mittel weni das müesst bewärte. 😉
    Am Dunnschtig simmer nachm Zmorgä ca. En Stund gfahrä und hend en Tour imene Wage uf Gleis gmacht wo es Ross zoge hed. Und so hemmer zmitzt im Caco usse 3 wunderschöni Cenotene chönnä bsuechä. De Tag isch heissi 37 Grad gsi und das isch eifach nur es wahnsinnig cools Erläbnis gsi wommer üs immer wider hend chönne abchüelä. Teilwiis simmer ganz elei ih dene Cenote gsi. Und mier sind ächt au ultra stolz uf üsi Chind das si mit üs so Züg mitmöched, die hend det inne bädeled und freud gha. Ei Abstiig vonere Cenotä isch ächt Steil es Leiterli durab gangä dur Felsigi Wänd. Jep wen das d Schwiizer Behördä gseh hätt wie mier mitm Ilai det durab wäred, de hättemer
    öbä meh as en Buess am Hals. 😂 Ei Cenote isch so inere Tropfsteihöhli gsi mit viele Stalaktite, wunderschön.
    Am Abig simmer id Stadt und hend üs bim Hauptplatz Plaza Grande ufghalte. Jede Tag gids det irgendwelchi Uffüehrige und Spektakel für d Bevölkerig. Mier hend ufere Dachterasse Znacht gässe und hend so d Liechtershow ade Fassade vode Cathedrale voll gued gseh. Sehr schön gsi.
    Am Fritig hemmer zerscht bis am Nami chli am Pool verbracht nah simmer wider ca. En Stund zude Mayastätte Uxmal gfahrä. Es isch liecht bewölkt gsi und mier sind erscht am halbi 4i ine (hed bis 17:00 Uhr offä) und es hed fascht kei Lüüt gha. Au seeehr en schöne Ort, hed üs fascht besser gfallä as Chíchen Itzà. Au da heds ide Mitti en riiisigi Pyramide, mer nännt sie ‚die Pyramide des Zauberers‘. Si isch speziell da si rundi Eggä hed. Es gid en Sagä vomene Zwärg wo die ih nur einere Nacht buut heig.. Ander säged es heigi 300 Jahr dured zum die erstellä. D Mila isch jedefalls dur die Gschicht sehr Fan und glaubt fescht ah de Zwärg. 😂 Es hed kei einzige Verkäufer am ganzä Gländ und irgendwie isch d Stimmig det ganz speziell magisch. Gwüssi Ruine hedmer chönne bestiige und au ine gah. Sehr cool gsi.
    Nu öbis wiiters zude Mayagschicht.
    Am Abig hed de Dani für üs Pizza gholt und mier hend alli zämä im Bett Pizza gässe und Film gluegt.
    Und hüt gads wiiter uf Bacalar. ☀️
    Es grüssen die Hudideis 🫶🏽    Read more

    See translation
  • Hudireise
    1
    211
    Day 40

    Valladolid und Chichén Itzá

    July 14, 2023 in Mexico ⋅ ☀️ 36 °C

    Die Stadt isch eifach so härzig. Am Mäntig sinmer vo Cancun da anegfahrä. Aso erschtens: die Strasse womer bis etz gseh hend sind im Verglich zu Costa Rica 1A. Und bim anefahre sind üs ca. 5 Autos entgäge cho und ca. 5 Autos hemmer überholt. Also ultra ahgnähm gsi.
    Ahcho ide Stadt im wunderschöne chline härzige Hotel hemmer direkt üses Züg packt und sind z Fuess zunere Cenote gloffä. En superschöni Abchüelig gsi, hed es paar ander Lüüt gha aber hed sich voll in Gränze ghalte. D Temperature aktuell sind am Tag grad ächt warm, zwüsche 34-35 Grad und Räge hemmer sitmer in Mexico sind nu nie mitbecho. Ahschliessend simmer s Städtli go erchunde und hend üs für es schöns Restaurant zum Znacht entschiede, hend richtig fein Mexikanisch gässe.
    Am Abig hed de Dani chli Fieber becho, ide Nacht hend er und ich den chli Buchweh gha und sind am nächschte Tag au eifach nid so fit gsi. Drum hemmer de ganz Tag am Pool verbracht, s Mili isch nie usm Pool use. 😂 Am Abig ischs beidne scho vill besser gangä und mier sind de bimene Italiener go Pizza ässe.
    Geschter hemmer nachm Zmorgä d Mayastätte Chichén Itzá bsuecht. Die Mayastätte ghört zum UNESCO Wältkulturerbe und Pyramide isch eis vode nüe 7 Wältwunder.
    Aso zerscht mal s negative oder das wo üs chli gstört hed.. Mier hend öbä 40 min müesse det anefahre. Nach öbe 10 Minute sind am Strasserand irgendwelchi Type mitere Möchtegernweschtä dettä gstande und hend üs usepfiffe. Si hend üs gfragt obmer zu de Mayastätte wend. Üs isch das ultra komisch inecho, mier hend verneint und sind eifach wiitergfahrä. Nah hemmer d Ihfahrt gnu wo gross ahgschribe gsi isch mit Ihgang. Es hed üs aber bide Barriere niemer vo dene 3 Lüt informiert dasmer ine Privatzone inechömed. Det ahcho warteds scho wie die Geier uf üs zum üs Irgendwelchi Fakeinfos z gäh wie z.b. falschi Parkinggebühre womer müessi zahlä wemmer zum offizielle Parkplatz gieng, oder de Wäg bis zum Gländ gieng mind. 2 Kilometer. Es choschti nur 200 Peso meh aber mier bechämed nu es Zmittag und si begleited üs. Mier hend den wider dankend abglehnt. Bim Offizielle Parkplatz und au im Gländ sälber sind überall Verkäufer. Es sind Ihheimischi wo vom Tourismus läbed, das verstah ich völlig, mier hend det au öbis kauft zum si unterstütze aber gwüssi sind würkli ächt ufdringlich gsi..
    Jedefalls muemer teilwiis es dicks Fäll ha. 🙈
    Im Gländ sälber hend sich d Lüt sehr gued verteilt und mier hend üs ohni Tourguide die Ruine ahgluegt und den für üs d Gschicht dehinter nachegläse.
    Etz de schön und spannend Teil.
    Paar Facts über El Castillo oder Kululcan Pyramide:
    Im März und Septämber gids paar wenigi Täg wo die El Castillo Pyramide so im Sunneliecht stad, das s Schattebild uf de Siite vode Stäge en Schlangekörper bilded und sich mit de Schlangechopfstatue am Ahfang vode Stäge verbinded.
    De wichtigsti Gott vode Maya isch de Kukulcan (gefiederte Schlange) gsi, darum die Schlangene überall. Jaguare sind au heiliGi Tier gsi.
    Oder nu sone spannende Fact. Es gid genau 365 Stägetritt insgesamt. Uf 3 Siitene je 91 Stägetritt und uf einer Site 92, aso glichvill wie d Täg im Jahr. D Meinige gönd da aber usenand, gwüssi säged es sig Zuefall, ich jedefalls säge: die sind cheibe Gschid gsi, die hend das zum Fliiss gmacht. 🤭

    Die Mayas hend sich au intensiv mit de Astronomie usenand gsetzt. Eis Gebäude s Observatorium ‚El Caracol’ hends für d Stärnebeobachtig benutzt. Im Innere vom Turm heds en Wändelträppe drum de Name Caracol = Schnecke.
    Wiiteri Ruine wie z.b. de Chriegertämpel mit de 1000 Säulen, de rituelli Sportplatz‘ und d Inglesia (Kirche) hemmer aunu gseh.
    Die Mayas hend ganz vill verschideni Götter gha und hend Tier und teils au Mänsche für die Götter gopfered, z.b. uf de Stäge vode Pyramide oder mer hed Mänsche oder wärtvolli Gegeständ id Cenote grüert. D Pyramide stad gnau ide Mitti vo 2 Cenote. Adligi hend au ires Bluet gopfered indem si sich mit Dorne d Zunge durchbohred hend und s Bluet ufgfange hend. Bluet sig au heilig gsi..
    so fertig Gschicht für hüt. 😅
    Jedefalls lohnt es sich det anezgah au wenn das ganze Drumherum chli müehsam gsi isch.
    Spöter simmer zrugg gfahre, sind im Pool üs go abchüele und den hemmer im Hotel schön Znacht gässe.

    Hüt gads wiiter uf Merida. 🚙    Read more

    See translation
  • Hudireise
    1
    111111
    Day 37

    Hallo Mexico, hallo Cancun 🇲🇽☀️

    July 10, 2023 in Mexico ⋅ ☀️ 31 °C

    Am Fritig hemmer wider Reisetag gha und sind vo Costa Rica uf Mexico gflogä. Es isch alles riibigslos verloffä, de Ilai hed gueti 2 Stund im Flugzüg pfüseled und s Mili hed chli Filme gluegt.
    Etz hemmer 3 Nächt in Cancun verbracht.
    Mier sind abwächsligswiis am Strand und Pool gsi und hend eigentlich nid vill anders gmacht als bädeled. D Temperature sind grad wie bi üch ide Schwiiz sehr warm (33-34 Grad) und s Wasser isch da die beschti Abchüelig für üs.
    Mier hend ide sogenannte Zona Hotelleria üses Hotel gha, aso chönd üch öbä dänkä was da abgad. Ei Hotelburg nach de andere. Üses Hotel gad bi all dene riise Hotels völlig under und mier sind ächt froh drum. Es isch chli, wunderschön, superfründlichs Personal und es hed alles wo mer sich für Ferie wünscht. Es isch zum Glück nid Hochsaison, vo demhär isch es ächt ahgnähm vode
    Lüt här.
    Cancun wird unterteilt dur 2 Abschnitt, die Zona Hoteleria und de Downtown Cancun, die traditionell Innestadt. Leider gilted die wunderschöni Stadt Cancun zu eine vode gfährlichste Städt vo Mexico und isch 2023 uf Platz 8 vode gfährlichschte Städt in ganz Mittelamerika. Drum hemmer d Downdown gmiede und hend üs nur ih dere Hotelzone bewegt wo mier üs sehr sicher gfühlt hend. 🥰
    Geschter simmer zu de La Isla gfahrä, so en Shopping und Touristemeile. Mier hend s beschtä Sushi gässe womer je gässe hend, hend üs de nu es Glace gegönnt, sind chli go shoppe und chli umeflaniert und hend de Abig ih vollä Züg gnossä.

    Hüt gads wiiter nach Valladolid.
    Es grüsst
    Familie Hudidei    Read more

    See translation
  • Hudireise
    1211
    Day 33

    Am Fusse des Poas 🌋

    July 6, 2023 in Costa Rica ⋅ 🌧 18 °C

    Mier hend etz 3 Täg am Fusse vom Poas Vulkan verbracht.
    Am Ziischtig simmer de Wasserfall La Paz go ahluegä. Es hed es Wägli under de Wasserfall gfüehrt. Am nami hemmer üs entschide richtig Stadt San Jose z fahrä, wills den afe Rägne hed. Mier sind ine grossi Mall gangä wos en Hüpfburgeplatz gha hed. Mier hend dänkt mier möched widermal öbis für üsi Chind und si hends fescht gnossä und hend sich ustobed. Mier hend üs den aunu entschide am Ilai d Haar z schnide willmer en Coiffeur gfunde hend mitmene Autositz und Fernseh, hed also supergued funktioniert, er hed gstrahled wie en Maiechäfer und supergued aneghebt. Am Abig simmer bim zruggfahrä ines Steakhouse go Znacht ässe, sehr fein gsi.
    So schnell paar facts zum Vulkan:
    De Poas lid ufere Höchi vo ca. 2700 m.ü.M. De aktivi Krater isch de 2. gröschti Krater vode Wält. Er hed insgesamt 2 Krater. De aktivi Kratersee gilted zude suurschte Seeä vode Wält de Ph-Wärt isch unter 1, also ultraätzend, gsehd au mega giftig grüen-bläulich us. De Krater hed en Durchmässer vo ca. 1500m.
    Am Mittwuch simmer am Morgä früeh bi Räge und Sturm ufgstandä und hend üs ufe wäg zum Vulkankrater gmacht, leider ohne Erfolg.. de Näbl hed üs en Strich dur üsi Rächnig gmacht. De Krater isch nid ersichtlich gsi… meega schad hätted huerä Freud gha de z gseh. Nah ja.. Mier hend den det eifach chli umeblödled und sind den es Kaffee gu näh. S Wätter chamer halt nid beihflussä..
    Am Nami hemmer en 2 stündigä Trail vom Hotel us dur Fälder und Wald gmacht, sehr schön gsi und hends sehr gnossä, d Sunne hed sich denn au wider zeigt und d Chind hend super mitgmacht. D Natur hed üs chli ad Schwiiz und ah Neuseeland erinnered. Am Abig simmer nu fein go Znacht ässe imene Restaurant mit Chinddreggä, sehr entspannt gsi.
    Hüt gömmer für en Nacht ines Näbestädtli in San Jose und am Fritig Morgä ziehnd mier wiiter uf Meeexicooo. 🇲🇽 Mier freued üs fescht druf wider es nüs Land chönnä z entdeckä und wend nu gar nid as heigah dänkä.. 😁
    mier ghöred üs demfall s nächscht mal wemmer scho det sind.
    Fazit zu Costa Rica: superschöns Land, die puuri Natur, s puurä Läbä, wie si da so schön säged: PURA VIDA 🇨🇷
    Greetings to everyone ✌🏽    Read more

    See translation
  • Hudireise
    12111
    Day 30

    Manuel Antonio ☀️

    July 3, 2023 in Costa Rica ⋅ 🌧 29 °C

    Am Dunnschtig sind mer vom Näbelwald richtig Manuel Antonio gfahrä. Das isch es Dorf näbedem Städtli Quepos.
    Mier hend da 4 Nächt verbracht und jede Tag Action gha. Es gid sooo vill cooli sachä zum machä. Mier hend au imene superschönä Hotel übernachtet. Es hed 4 verschiideni Restaurant mit Themene, z.b. ih eim stad en Zugwagon oder ih eim stad sogar es ganzes Flugzüg. S Ässe isch au sehr sehr fein gsi.
    Mier hend da au wider ganz vill Tier gseh und de Tukan hemmer sogar vor üsem Balkon chönnä beobachte.
    Spannend findi au dass d Aras (die grossä Papageie) bide Karibikküschte grüen und hie bide Pazifikküschtä rot sind. Au vo dene Hmmer es paar dörfe beobachtä.
    Am Fritig hemmer üs es Surfbrätt und es Bodybord gmieted. De Dani und ich hend üsi erschte Surfversüech gmacht und sind ächt ufe Gschmack cho. En Surflehrer hed üs denn im Wasser chli zeigt uf was mer müend achtä und so hemmer 2-3 x gschafft bis zum Ufer z surfe. Isch ganz schön ahsträngend so es paar Stündli umenand zruedere. Mier hend üs immer wider chli abgwächsled. De Ilai isch mitm Sand und Wasser beschäftigt gsi und d Mila hed mitm Bodybord chli d Wälle grittä.
    Am Samstig hend d Mila und ich en Ziplinetour gmacht und de Ilai und de Dani hend üs vo unne ahgfüüred. D Mila isch sooo cool druf gsi und hed gsr kei Angscht gha, si hed sich sogar mal truut chopfüber z gah. 🙃 ih dem Park heds aunu en Schmätterlingpavillon gha und paar Krokodil, eis sig ultra agressiv wo scho Mänsche gässe hed, drum ischs etz det im Park… 🙈
    Am Sunntig hemmer en Sägeltour mitmene Holzsägelschiff gmacht. Nur es andrrs Päärli und mier sind Passagierä gsi, es hätti aber für 49 Lüüt Platz. Es gsehd us als wärs es Pirateschiff, meeega schön. Jedefalls hed üs leider s Wätter plötzlich en Strich dur d Rächnig gmacht und mier hend den schlussändlich müesse abbräche. Es hed afe winde und rägne, de Wällegang isch sehr starch gsi. Mier und am Ilai isch den trotz Medis nümmä so wohl gsi und die ander Passagierin hed de Fisch es paar mal Fuetter gäh, üs ischs jedoch bitz bessr gangä as ire. 😅 So hemmer us Sicherheitsgründ wägm Wätter den müesse abbräche. De Erfahrig isch aber glich toll. Am Abig simmerden als letschts nu is Flugzügrestaurant gangä, d Chind vorallem d Mila isch ultrafan vo dem.
    Mier chönted nu vill länger da si, will es gfallt üs würkli sehr, jedoch sinmer au gspannt was üs uf derä Reis nu so erwarted und drum ziehnd mier hüt wiiter id Nöchi vom Vulkan Poas.
    Übrigens geschter hemmer halbziit vo üsere Teis gha. 🙈
    Mier freued üs uf es nächschts Abentüür.
    Bis gliiiii ✌🏽    Read more

    See translation
  • Hudireise
    111111
    Day 26

    The Cloudforest ☁️

    June 29, 2023 in Costa Rica ⋅ ☁️ 16 °C

    Am Mäntig morgä simmer losgfahrä richtig Cloudforest. Will de wäg sehr lang zum fahrä isch hemmer ei nacht im Casa Turire verbracht. Es wunderschöns Hotel womer widermal für üs ganz elei gha hend. Sind det zerscht ih Pool go bädele und hend nacher mi d Farm ahgluegt vom Hotel, hed es paar hübschi Caballos gha. 🐎
    Am nächschte Tag simmer wiitergfahrä und hend en Zwüschehalt bim Hacienda Orosi halt gmacht wos heisse Quelle hed. Mier hend det es paar stündli chli Bädeled. Es isch es unglaublich schöns Plätzli gsi mitere schönä Ussicht is Tal.
    Bim wiiterfahrä hed üs zerscht s Navi chli verarscht und mier sind plötzlich ufere ultrasteilä Strass (Wanderwäg) glandet, unmöglich die z befahrä. En Mah hed üs de klar gmacht das d Navis scho paar lüt hed wellä det ufefüehre.. nach 2 Stunde Fahrt duruf hemmers den gschafft und sind bim Ort San Gerardo de Dota ahcho.

    De Ort lid zmitzt im Nebelwald. Es gid insgesamt 3 Nebelwälder in Costa Rica. Am Morgä ischs da lut Iheimische meischtens schön und gägä Namittag ziehd über d Wälder de Näbel uf, das hend au mier so wahrgnu. Dur de Näbel isch ganzjährig de gröschti Teil vom Wasserbedarf abdeckt. D Nebelwälder sind eis vode wichtigste Ökosystem vode Erde. Nid nur, will sie kontinuierlich Wasser liefered, sondern au, wills det en extrem großi Vielfalt a Flora und Fauna gid.
    Üses Hotel isch ca. 2500 m.ü.M. höch obe und dementsprächend au relativ chüel. D Mila und ich hend zerscht mal gfrohre bi 11 Grad bismer üsi Pullis und lang Hosä ahgha hend.
    Es wunderschöns Hotel hemmer da gha, en Kabine zmitzt im Wald wo d Kolibris und ander Vögel verbigluegt hend. Leider hemmer bis etz nu kei Quetzal und kei Tukan gseh, stad aber wiiterhin uf üsere Lischtä. 🦜
    Geschter am Morgä hemmer nachm Zmorgä üse Rucksack packt und hend en 2 stündige Trail bewandered. D Mila hed d wägkarte under sich gha und regelmässig wider abcheggt womer genau sind, mier sind nämlich zmitzt im Nirgendwo gsi. D Mila hed das ächt super gmacht und supergued mitgwandered und de Ilai hed gueti 2 Stund ide Trage pfüseled. Am Namittag simmer is Dorf abegfahrä und hend es wunderschöns Cafe gfunde mitmene ultra schönä Spielplatz. Mier hend üs Kaffee Öpfelchueche und Schoggimousse gegönnt und hend spöter chli ufm Spielpi gspielt. Am Abig hed de Dani mit de Chind ih üsem Zimmerjacuzzi es Bädi gnu.

    Hüt gad üsi Reis wiiter uf Manuel Antonio. 🚙    Read more

    See translation
  • Hudireise
    1
    Day 23

    Puerto Viejo ☀️

    June 26, 2023 in Costa Rica ⋅ ☁️ 29 °C

    Etz simmer scho 3 vo 8 Wuchä unterwegs 😳
    Am Dunnschig simmer im Hotel in Puerto Viejo ahcho. Vorm Zimmer isch en Parkahlag womer mehreri Fuultier, Leguane und am Sunntig sogar es Rudel Brüllaffä gseh hend. Mier hend am Abig im Restaurant nebedrah ‚Spicy Coconut‘ meega fein Znacht gässe. Mier hend det cooli Begägnig mitere Schwizer Familie gmacht wo au 2 Chind hend (2 und 4 jährig), d Familie Wilhelm. Si sind aktuell au ufere 5 Wüchige Reis in Costa Rica. Mier hend den grad fürnes Znacht abgmacht ide nächschte Täg willmer üs ultra gued verstande hend (nid nur sprachtechnisch 😜).
    Am Fritig simmer durs härzige Städtli gschlendered und hend danach chli am schönä Strand umeblödled und spöter nu in Pool go schwimmä. D Poolahlag im Hotel isch super und all hends fescht gnossä. Am Abig hemmer es wiiters feins Restaurant ide nöchi teschted womer au geschter numal sind go ässe.
    Am Samstig simmer es Rescuecenter für Tier go ahluegä. Es sind Tier mit Fählbildige, Traumas, Verletzige und Chrankheite womer hend dörfe kennelerne. D Tour isch uf Hochdütsch gsi und d Mila heds fescht gnossä will si ändlich au mal öbis verstande hed. 🤭 Mier hend glernt dases 2 Arte vo Fuultier gid, d 2 Klaue Fultier sind die Brune und 3 Klauefultier sind die Graue. 🦥
    D Papageie und 2 Affe det sind früehner als Huustier ghalte worde und hend es riise Trauma devo erlitte. Z.b. isch ei Aff am Hals mitere Chetti ahgmacht gsi. Dur das dreiht er sich etz nu ständig um die eigeni Achs als hätt er d Chetti nu am Hals. Mega trurig. In Costa Rica isch jeglichi Huustierhaltig vo Wildtier verbotä, doch wirds trotzdem nu vill z hüfig gmacht und regelmässig werded so Tier bi dem Zenter abgäh.
    Am Nami isch en Sturm mit viel Niderschlag ufcho und mier hend üses Züg am Pool schnell packt gha.. Ih Tropeländer gids das nid wenig hends gseid. Am Abig hemmer üs mit de Familie Wilhelm bimene Italiener troffä, hend üs chli ustuscht, d Chind hend zämä gspielt und mier hend richtig gschlemmt, sehr en schönä Abig gsi.
    Geschter simmer am Morgä zum Wasserfall ‚Two Waters‘. Mier hend det die unberüehrti Natur und s chüele Wasser sehr gnossä, d Chind hend gar nüm wellä gah. Am Nami simmer ah Strand und hend mega Glück gha , denn wo d Mila und ich chli am Wällegumpe gsi sind isch üs es Bodyboard entgägegspüelt worde. Mier hend de ganz Nami mit dem chli Wälle gritte bis de Bsitzer vo dem das wider zrugg hed wellä. 😂 d Strömig isch starch und d Wällene relativ gross gsi drum sind usser ah dem Ort überall Roti Fahne ghanged. De Ilai hed nid so trut is Wasser z gah, er hed defür umso meh Freud am Sand gha. Nachdem mer am spötere Nami numal ih Pool sind hemmer üse letschti Abig bimene feine Znacht beändet.

    Hüt gads wiiter richtig Cloudforest mit Zwüschestopp in Turrialba.

    Nu es chlises Update zum Bueb us Ocho Rios:
    D Kadesha hed üs gschribe dases sehr erfreulichi Nachrichtä gid. De Bueb sig etz diheime bide Familie, wärdi nu regelmässig untersuecht aber es gieng ihm scho vill besser und er sig bi bewusstsii 🥰 das hed üs uhsinnig gfreut z ghörä.    Read more

    See translation
  • Hudireise
    11313121
    Day 19

    Tortuguero 🌿🦥

    June 22, 2023 in Costa Rica ⋅ ☁️ 30 °C

    Nachdem mer in San Jose acho sind und üses Mietauto abgholt hend simmer am Mäntig ca. 3 Stund zunere Fähre gfahrä. D Strasse sind also nid würkli de börner, Schlaglöcher as hell und steinig, das sind d Hauptstrasse in Costa Rica halt.
    Denn hemmer d Fähri uf Tortuguero gnu, sind ca. 1.5h gfahrä zum zu üsem Hotel cho, andersch chammer das nämli nid erreichä. (Siehe Foto, mier sind uf dem dünne streifä zwüsched Meer und Fluss).
    Ich sägä üch die Hotelahlag isch eifach nur de Wahnsinn, superschön und riiisig. D Natur und d Tier vorm Zimmer, s Ässe isch ächt Gourmet und die Tourä wommer gmacht hend eifach nur ihdrücklich.
    Zerscht hemmer d Hotelahlag ahgluegt und sind spöter en Strandspaziergang go machä. S Meer isch sehr wild. Starki Strömigä und d Rochä hindered üs drah detä go z Badä, sig verbotä hends gseid. Umso schöner ischs eifach chli go entdeckä und öbä es Chräbsli z gseh.
    Am Ziischtig hemmer am Morgä s chline Städtli Tortuguero ahgluegt. De Name chund vode Schildchröt Tortuga, vo Juli bis Oktober chömed d Meeresschildchrött go Eier leggä am Strand. S Städtli isch voll härzig und wunderschön.
    D Hotelahlag isch ahliegend ah Nationalpark Tortuguero. De isch ca 20‘000 Hektare gross, en fascht unberüehrte Regewald voll vo wunderschönä Pflanzä und Tier. Ca. 300 verschiedeni Vogelarte gids hie zum entdeckä. Am Nami hemmer en Bootstour dur d Kanäl vo dem Nationalpark gmacht und hend eifach nur gstuuned. Soooo en unglaublich schöni Natur. Mier hend verschideni Vögel, 3 verschideni Sortä vo Affe, Leguane, Flussspinnä und Flussschildchröt gseh, d Krokodile hend sich leider zu guet versteckt.. 🐊
    De Tourgide hed gseid wemmer ih die chline Kanäl inegad söttmer immer en erfahrene Kenner debi ha, suscht verirrt mer sich uh schnell, will de Kanal ganz tuusigi Wägli ih dichti Regewald hed und mer elei nümme usechämt. Stelled üch vor, ca. d Hälfti vode Vogel- und Reptilieartä in Costa Rica läbed ih dem Urwald. Si reded hie oft vode Flora und Fauna (Pflanzen & Tierwelt) wommer besser nid chan entdeckä. Anschinend läbed au Jaguare hie. Die hend immer wider d Schildchröt gfrässe. Will die aber vom Usstärbe bedroht sind, wärded die etz vo Mänsche beschützt, lüüt wo ade Stränd wach haltet. Jetzt jaged dieJaguare d Hünd wo da umenand ziehnd.. 🐆
    Am Mittwuch hemmer am Morgä chli ide Hotelahlag chillt. Es isch en brutali Hitz gsi, 30 Grad und en Luftfüechtigkeit vo guete 90%. 💦 Am Nami hemmer en Tour gmacht rund um d Ahlag mit Guide (2 Hektare grosses Grundstück). Mier hend ganz vill Leguane, Chäferli und sogar es Fuultier gseh.
    Üse Serviceman hed üs grad gseid dasmer glücklich chönd si dasmer etz da gsi sind will ab nächscht Wuche started d Turtleseason und es wärded tuusigi vo Mänsche da si und Tourä machä. 😳

    Hüt gömmer zrugg mit Boot zu üsem Auto und ziehnd wiiter zum Playa Cocles Puerto Viejo Talamanca ide nöchi vom Städtli Puerto Limòn.
    Bis gliii ier Liebä ❤️    Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English