●●●PANAMA●●●

PANAMAAAAAA mir chömed!
Ändlich isch es so wiit! 🥳

Nach wuchelangem plange hämmer gestert ändlich wele go Vorabig-ichäcke und eigentlich än ruhige Abig mit feinem Z'Nacht mit dä Family verbringe... betonig uf "wele"... 🙄

Mir chönnted au nüt dägliche tue und eifach es Flughafe Föteli poste, aber mir sind ehrlich, au wänns rächt peinlich isch... 😅

Voller Elan und Vorfreud simmer gestert Abig am Swiss Check-in Schalter gstande und ich ha mi scho gfiired das min Rucksack nur 15kg schwer isch. Bis die netti Check-in-Frau frägt wo dänn euses ESTA isch...? Hm... weles ESTA!? Verdammt. 😵

Ja mir Idiote händ doch glatt, warum au immer, nöd dra dänkt, dass wämmer über Miami flüged, au wänns nur Transit isch, das doofe ESTA bruched.
Scheisse und jetzt? Sie hät eus vom Check-in 3 is 2 übere gschickt, det hegis än Schalter, die hälfed eim und mir chönned det es ESTA notfallmässig becho.
Ok, Gepäck wieder uf dä Rugge gschnallt und zägg zägg det übere.
Jaaa... leider sind die zwei Schalter sit em 17:00 zue oder us Personalmangel hüt gar nöd bsetzt gsi. 😱 Toll.
Die schikki-mikki Tantene vom Schalter näbed dra sind sowas vo absolut nöd hilfsbereit, geschweige dänn nett gsi, zum schäll ä Info gäh und mir sind dänn zimmli verlore än Momänt umegirrt...
Irgendwo mummer doch für so Fäll chönne fräge? 🤔
Spontan bini zu dem nett usehende Herr vom British Airways Schalter (det isch känn Mänsch agstande) und ha dem (scho dä Träne nah) eueses Problem gschilderet. Er hät sich mega bemüäht, no ume telefonieren, aber schlussändlich leider nöd chönne wiiter hälfe.

Mir müässed s ESTA online anforderä, es stächi zwar es gäch 72h, aber meistens chämis früäher und da mir erst morn morge flüged, klappis villicht...
Ich wür mich nöd als Drama-Queen bezeichne aber immer das "villicht" hät mi scho grad biz fertig gmacht. 🫣
Ok, Bänkli, versueche dure schnuufe, Panik das mer nöd chönd Flüge morn ignorieren und die gfühlt 7000 Frage im ESTA Formular usfülle, und "Nei" ich ha tatsächlich kei terroristischi Absichte 🙈 Ich bi no unsicher gsi, will ich no es "JA" ha müässe agäh im ESTA bi dänne tolle Frage und zwar willi mal z Kuba gsi bin... hoffe nur das isch nöd än Grund wos gnauer prüäfed. Dänn klicksch det "JA" und dänn chunnt "sind sie würkli sicher, dass sie wänd "JA" agäh?" Ääääh nei finds scho nöd geil, aber ich muen! Lüge isch glaub au nöd so optimal... 🤨

Guet, irgendwänn hämmer dä Fötzel usgfüllt, zahlt und händ nur chönne warten und hoffe das die Ussag es chämi nach öppe 3h au würkli stimmt. Ha mer sogar churz überleit öb ächt bätte hilft, aber so wiit bini doch nonig 🤭

Mit eusem ganze Grümpel simmer zrugg zum Auto und is "Mamma Mia" z Glattbrugg zu minnäre Family, wo sit em 19:45 det uf eus gwartet hät.
Bizli, oder au bizli fest, dur dä Wind (also vor allem ich, aber dä Nico isch au nüm ganz so tüüfe entspannt gsi wie suscht) simmer det acho, 1.5h später als abgmacht...
Vo Hunger kei Spur und das heisst was bi eus zwei. Bizli Spaghetti sind aber glich abegange.

Scho dä Plan B und C am usmale und dänn plötzlich! Dä Nico chunnt es Mail über. Die zwei Minute bis bi mir öppis cho isch sind eeeewigs gange.
Und dänn tadaaa:
"Autorisierung genehmigt".
Halleluja! 🙌🏽

Dä ganzi Stress für nüt! 😅 Uf das abe hämmer grad no es Tiramisu brucht.
Die netti Chällnerin hät das ganze biz mitbecho und eus no paar Guetzli für dä Flug mitgäh und versproche, dass sie eus morn Düme druckt, dass jetzt alles klapped und mir morn chönd ohni Problem icheckä und dänn finally chönd flüge.

Neue Tag, neus Glück. Cheibe früäh hämmer uf müässe, aber wer brucht au meh als 5h schlaf. 😴

Nomal Swiss Check-in Schalter und schwuppdiwupps, plötzlich klappt alles ganz riibigslos. 😅

Hey nei, ich bi scho so oft gfolge und ha glaub alles erläbt uf minnäre Wältreis, aber dä seich hät mi mega gstresst. Die Ungwüssheit öb mer chönd Flüge oder nöd, wäg eusere eigene Dummheit, hät mi fertig gmacht. 🤦🏼‍♀️

Fazit, nägstmal biz früähner studiere und vor allem bim Flug bueche so Sache ufschribe oder besser grad mache... will uf dä Flugbestätigung staht natürlich nieneds meh öppis vom ESTA... 🤷🏼‍♀️

So.... jetzt höckled mer i de Center Bar am Flughafen und gönned eus en Mimosa, prooost!!Read more