Paseo De Los Pobladores

Üsi letschte 4 täg i de USA hämmer nomol z LA verbracht.
Nachdem mer s wohnmobil abgäh hend, hämmer im hotel afig dörfe go s gepäck deponiere, bis s zimmer ready esch, hämmer aber no chli müesse warte. Also simmer ine park i de nöchi ond händ det üsi sandwiches gässe ond siesta gmacht. Aschlüssend simmer go ichecke ond denn anes baseballspiel: d LA dodgers gäge Chicago. Au wenn mer s spiel ned ganz verstande händ ond s bier sehr tüür gsi esch, esches no e lustige obig worde.
Am nächste tag hämmer e tour dur d warner brothers studios bueched. Mer händ eigentlich met em bus det äne welle, aber de cheib hed eifach ned aghalte ond esch a de bushaltestell verbi gfahre 🙈😅 also simmer halt mitem uber gange. Es esch werkli sehr spannend gsi. Well sunntig gsi esch, esch ned so vill dreiht worde ond drum hämmer i mehreri "sound stages" chönne ond aktuelli film- ond seriesets go aluege. Bi de sets verusse händs üs immer verzellt, wele ort mer vo welem film chönnt känne 😊 nachär heds no es chliises museum gha, womer lustigi föteli händ chönne mache 😅
Nach dem tolle erläbnis simmer met de ubahn ond em zug no zum santa monica pier gfahre. Au das esch sehr idrücklich gsi aber voll überloffe. Mer send de zum znacht go momos ässe, das hämmer scho es halbs jahr nömme gha ond händ rechtig freud gha 😅
De nächsti tag esch min geburtstags-gschänk-tag gsi 😍😍😍 am 8i hed de wecker glüted ond ich ha de erich scho s erste mal i wahnsinn triibe mit mim hibbelige "schnell ufstah ond los" 😂 denn simmer i ne super beck go zmörgele ond denn mitm uber - ändlich - i six flags magic mountains park 😍 de tag esch ächt es erläbnis gsi! Soooooooo vill eifach richtig (es ged keis besser wort) GEILI achterbahne 🤩 üsi lieblingsbahn esch eini gsi, wo eim so kippt hed, dass mer wie ufem buch gläge esch ond denn wie en superheld über bäum ond alles gfloge esch. Es hed au no e achterbahn gha womer gstande esch, eini wo zmitst inne plötzlich hindersti gfahre esch, eini wo immer nor eine im wägeli platz gha hed ond somit alli hinderenand ghocked send.....ond vell me 🤩 mer händ de zwoiti alauf för de parkbsuech werkli clever planed ond send extra am erste tag nachem springbreak gange, somit heds meeeega wenig lüüt gha ond mer händ nie meh als e viertelstund müesse astah! De ganz tag esch also definitiv e riiiiiiiese liebesbewies vom erich gsi: er hasst nämlich eigentlich achterbahne 🤭 so abm mittag hed er eigentlich gnueg gha ond öpe e stund vor parkschluss hed mer ehm de au agseh, dasses jetzt eidütig gnueg esch 😅 so simmer de no chli umegschländeret ond denn kaputt aber überglücklich (zumindest i mim fall 🤪) zrug is hotel.Leia mais