Reset search
4/7- Wältreis
  • Jasmin Steiner
  • Daniel Felder
Oct 2024 – Jun 2025

4/7- Wältreis

De Dani ond d'Jasi gönd mol go luege, wies a anderne Orte so esch. Read more
+5
FollowInsightsCalendarShareShareBucket list
Newest first
  • 4/7- Wältreis
    Gauchos in Fäschttagsmontur
    Typischi Strossehindernis in NordargentinieFuchs. Das Beld esch gstellt, dommi Mönsche im Auto vor üs send ne am Füettere...Kapelle of de PasshöhchiRecta del Tin TinOf de Ruta 42Chele vo MolinosSportlechi Betätigong nochemene Tag Auto fahre

    Tag 171: Molinos

    April 2 in Argentina ⋅ 🌙 15 °C

    Nochdem d'Melissa geschter Nomittag of Mendoza gfloge esch ond d'Rachel hött Morge de Bus of San Pedro de Atacama gnoh hed, semmer weder z'zwoite gsi. De hötig Tag hed e Fahrt of Molinos vorgseh, wobii mer die interessanter Stross döre Parque Nacional de los Cordones hend welle näh. Bevors öberhaupt los gange esch, hed üs weder s'leidige Thema Gäld beschäftiget. Vo desne hemmer ghört, dass im Süde vo de Provinz Salta Chartezahlig oft ned möglech seig. Mer hend zwoi Täg lang hin- ond här öberleid, öb mer jetz wörklech nomol mössed go hole, oder öb das, wo mer hend, länged. Am Morge vom Malvinas-Tag, amene nationale Fiirtig, hemmer de dänkt, es wär wohl gschiider, doch no chli meh Bargäld z'ha 🙈 Jo, mer hend de erscht chli spöter chönne losfahre als plant.
    Luut Google Maps esch d'Stross vo Seclantas of Molinos gsperrt gsi, was d'Jasi chli veronsecheret hed. Nochdem mer aber benere Strossekontrolle üses Ziel gnennt hend ond döregwonke worde send, semmer chli beruhigt gsi. D'Route esch bes det äne ned so toll gsi, interessant esch aber gsi, dass mer emmer weder a Gauchos verbii gfahre send, wo offebar s'Fäschttags-Sattelzüüg föregnoh hend. Die grosse Läderflögel a de Sättel hend zwor speziell usgseh, öb sie aber praktisch send, hemmer bezwiiflet.
    Noch de Kontrolle semmer zerscht mol dörne Schlocht öber korvigi Strosse gfahre, de Strossebelag teilwiis scho nömm so top. Wo mer us de Schlocht use cho send, hed sech die öppig Vegetation chli gliechtet, de "Bärgabschnett" hed agfange, dezue esch no de Naturbelag of de Stross cho. Met üsem guete Auto esch das aber keis Problem gsi ond noch mehrere Ussechtsstopps semmer of de Passhöhchi Piedra de Molino acho, wo mer e chorzi Mettagspause gmacht hend. Wels dosse kei Setzglägeheite gha hed ond mer üs au chli vorem Wind hend welle schötze, semmer drom i Kofferruum ghocket.
    Ännet em Bärg heds de langsam weder chli afoh noch Wüeschti usgseh ond nochdem mer amene Ussechtsponkt Halt gmacht hend ond wenig spöter no es Beld vo de Recta del Tin Tin (= e langi ond gradi Stross) gmacht hend, eschs (för üsi Verständnis) abentüürlech worde: Mer hend die schön asphaltierti Ruta 33 noch Cachi verloh ond hend üs of d'Nommere 42 gwogt. Je noch Informationsquelle esch en 4x4 of dere Strecki zwingend oder ned, mer send of jede Fall froh gsi, eine z'ha. Steinig, chiesig, sandig, met Querige vo trochne Flossbett ond (was eigentlech am Schlemmschte gsi esch) ruckligi Wällblächpischtene. In Neuseeland hed die ganz Campingchochi hende enne gklapperet, wo mer so Strosse gfahre send, dämol eschs chli ruhiger gsi. Noch dere choschtelose Powerplate-Behandlig semmer of die berüehmti Ruta 40 cho, allerdings nor chorz: Die vo Google aköndigti Strossesperrig heds tatsächlech gäh, allerdengs schiint die scho paar Woche alt z'sii. D'Omleitig esch of jede Fall guet signalisiert gsi ond so semmer ohni Problem of Molinos cho.
    S'Dorf hed üs of Ahieb gfalle ond au d'Onderkonft imene 1920 baute Landhuus esch super gsi. Bem aschliessende Spaziergang dör s'Dorf hemmer de Park ond d'Chele agluegt, hend imene sehr familiäre Restaurant gässe ond send de zrogg id Onderkonft.    Read more

    See translation
  • 4/7- Wältreis
    Quebrada de las Flechas
    Ruine vonere BodegaCafayateSanddüne12Taller de EmpanadaÜsi erschte Versüech1Im Wiimuseum

    Tag 172 & 173: Cafayate

    April 3 in Argentina ⋅ ☀️ 25 °C

    Vo Molinos eschs wiiter of de Ruta 40 of Cafayate gange. Of dem Wäg esch d'Quebrada de las Flechas, vo dere ned nor üsi Metreisende gschwärmt hend, sondern au de Globetrotter i sim Südamerikaprospekt. Die Begeischterig chömmer nor teile! Dör die bizarri Felslandschaft z'fahre esch wörklech speziell. Klar, dass mer all Nase lang weder hend mösse ahalte zom Fotene mache. Bemene Ussechtsponkt hemmer Mettagspause gmacht, wenig spöter hemmer scho weder aghalte, zom i de Ruine vonere Bodega chli of Entdeckigstour z'goh.
    In Cafayate acho, hemmer festgstellt, dass de eint Hond wo üs onterwägs gjagt hed, tatsächlech is Auto bisse ond Bissspure henterlo hed.
    Nochem Iichecke hemmer Cafayate no chli z'Fuess erkondet, bevor mer weder is Auto ghocket send. Of Facebook geds en Groppe met 60'000+ Franzose, wo alli ehri Reisetipps för Argentinie dönd teile (anschiinend geds sone Groppe zo jedem Land). D'Melissa (Französin) hed det vomene Agriturismo erfahre, wo Empanada-Körs abietet, mer wederom hend dä "Gheimtipp" vo ere becho. Das hemmer also före Obig plant gha.
    Wel das aber erscht am sebni agfange hed, hemmer no en chorze Stopp benere Sanddüne gmacht, wo sowieso am Wäg gläge esch ond de semmer no paar km vo de Quebrada de las Conchas, de Muschelschlocht, gfahre. Dank de Sonneondergangsstemmig eschs mega schön gsi. Guet, fahremer öbermorn of dere Stross weder i Norde. Denn ändlech eschs Ziit gsi för Empanadas. De Hof esch zemmli abgläge, trotzdem hend sech det öppe 12 FranzösInne ond zwoi Franco-Kanadierinne iigfonde. Ond mer. Die meischte hend aber gärn met üs Änglisch gredt ond nochdem de Stromusfall ändlech behobe gsi esch, hemmer agfange: Üsi härzlech Gaschtgäberin hed (en español) üs Schrett för Schrett erklärt, wie mer Empanadas macht, agfange be de Föllig, aschliessend, wie mer sie faltet. Als wär en ganze Tesch met Vegi- ond Fleischempanadas ned scho gnueg, hed sie üs au no zeigt, wie mer Tortillas macht. S'esch vel glachet worde be de Zuebereitig ond wo die rohe Teigtäschene alli parat gsi send, hed üs d'Señora use zom Ofe gfüehrt, wo üsi Wärch bache worde send. Natürlech hemmer vel z'vel gha ond wo mer üs am halbi eis weder ofe Heiwäg gmacht hend, hemmer no paar Empanadas döffe metnäh.

    Am nöchschte Tag hemmer usgschlofe. D'Provinz Salta, und do im Bsondere Cafayate ond sini Omgäbig, esch för ehri Wiiabautradition bekannt, drom hemmer en Bodega welle bsueche. Of arote vo de Hostelreceptionistin hii semmer aber zerscht no is Wiimuseum.
    Chalti Empanadas send au fein ond so hemmer üs gstärcht i d'Wiiwält begäh. Det hemmer erfahre, dass s'Valles Calchaquíes gueti Abaubedingige hed, wils de Tag döre warm ond i de Nacht chüehl esch, wenig Niederschlag hed ond höch gläge esch. S'Museum esch wörklech guet gmacht gsi ond d'Möglechkeit, im Aschloss i de Museumsbar no zwoi Wii z'degustiere, hemmer grad gnötzt. Onmettelbar näbem Museum esch d'Bodega Domingo Hermanos, wos üs im Aschloss förne Degustation hii verschlage hed. 4 Wii ond e Chääsplatte för omgrächnet 8 CHF p.P. esch meh als fair ond wo mer fertig gsi send, hemmers scho rächt loschtig gha (Empanadas ond chli Chääs gänd jetz ned sooo vel Bode). De Powernap im Hostel (=Usnüechtere) hed üs guet toh ond am Obig semmer de no einisch i d'Stadt go ässe ond före Dani en Mate-Bächer go sueche.    Read more

    See translation
  • 4/7- Wältreis
    El Obelisco
    Afang vo de spontane Wanderig (30' heds gheisse, gieng sie)Tres Cruces1AnfiteatroEnd of the roadDicke Näbel am nöchschte TagRekordhöhchi 🥳 (also, eigentlech sends 4838 m ü. M. d'Jasi esch ned gnueg schnell gsi met föttele)

    Tag 174 & 175: S. Salvador & S. Pedro

    April 5 in Argentina ⋅ ⛅ 10 °C

    Am 10. Tag vo üsem Roadtrip semmer weder Rechtig Norde gfahre. Wie scho am Donnschtigobig semmer of de Ruta 68 us Calafate use gfahre ond scho bald be de Quebrada de las Conchas gsi. De erschti Halt bem Obelisco esch interessant gsi, s'mässig guete Wätter hed aber ned so zom Verwiile iigladt. Wiiter eschs gange, met em eigentleche Ziel vom Mirador Tres Cruces. Google Maps hed üs aber ofene Wanderwäg ufmerksam gmacht, wo mer denn spontan aghalte hend zom "mol schnell go luege". Naja, us dem send am Schloss einehalb Stond worde, i dene mer zwösche Felse i de bontischte Farbe ond Forme omenand gloffe ond usem Stuune nömme usecho send.
    Froh, dass sech dä spontani Stopp so glohnt hed, eschs wiiter gange. Die aschliessende Pönkt wie de Mirador Tres Cruces oder s'Anfiteatro send im Vergliich gar nömm sooo toll gsi ond före Garganta del Diablo hemmer drom au nömme aghalte.
    Met em Ändi vo de Quebrada de las Conchas esch d'Omgäbig weder grüener worde, s'Wätter deför au schlechter ond zom erschte mol i de letschte zäh Täg hemmer soöppis wie Räge gha. Suuber esch s'Auto wäge dem aber nonig. De Räscht vo de Fahrt esch ned ereignislos gsi (merkwördigi Navigation zom z.B. Salta omfahre, komischi Chreisel, wo mer plötzlech ofem Chieswäg anstatt de Autopista stoht, etc.), vel mömmer dezue aber au ned verzelle. D'Onderkonft beme private Gastgäber esch sehr grosszögig gsi, leider aber so ab vom Schoss, dass mer vo San Salvador de Jujuy nüüt gseh hend. "Zentral" ond "einfache Anfahrt mit Parkplatzgarantie" send noch üsere Erfahrig i nordargentinische Städt ned veriibar ond mer hend üs för letzeres entschede.

    De nöchschti Tag hed wättermässig det wiitergmacht, woner am Vortag ufghört hed: Bewölkt. Det druus esch noch ca. 30 Minute Näbel worde, wo ziitewiis so deck gsi esch, dass mer nor no öppe 35 km/h hend chönne fahre ond au de beliebti Warnblinker, wo do i allne Verchehrssituatione zom Iisatz chond, hed nor beschränkt gholfe.
    Wel de Dani scho set Tage of de Suechi nocheme traditionelle Matebächer us Chörbis esch, hemmer no en (verzwiiflete) Halt bemene Souvenirlade gmacht, leider nor met halbem Erfolg: Bombilla gfonde, Bächer ned. Wel Mate im Norde vo Chile (wo mer hött weder zroggfahred) ned so verbreitet esch wie in Argentinie, stönd d'Chance wohl nömm so guet, a sone Bächer z'cho...
    Je wiiter i Norde mer cho send, desto besser esch s'Wätter worde ond so hemmer die üs mettlerwiile fascht scho bekannti Ruta 52, wo schlossändlech ofe Paso de Jama füehrt, rechtig chönne gnüüsse. Nocheme erneute Blitz-Gränzöbergang eschs ofem
    27gi of San Pedro de Atacama gange, wo mer am Obig d'Rachel nomol ofenes Bier ond Pisco Sour troffe hend.    Read more

    See translation
  • 4/7- Wältreis
    Bi de Laguna Baltinache
    I de Lagune. No elei.1Afängeri 😉1Valle de Marte / Valle de la Muerte3

    Tag 176: San Pedro de Atacama

    April 7 in Chile ⋅ ☀️ 23 °C

    Nochdem üs d'Rachel, wo jo scho set es paar Täg do esch ond drom scho paar Sache ondernoh hed, geschter chli hed chönne berote in Sache "lohnenswärti Usflög", hemmer üs dezue entschlosse, am Morge zo de Laguna Baltinache usezfahre. Die Salzwasserlagune esch chli wiiter wäg vo San Pedro als z.B. d'Laguna Cejar, was theoretisch weniger Bsuecher bedüüte wörd.
    Wär üse Plan so ufgange, wie mers üs vorgstellt hätted, wäremer vor de Tourbüssli dete gsi ond hätted de Ort för üs elei gha. Leider semmer be de Akonft vor verschlossne Schranke gstande (of Google-Öffnigsziite esch eifach kei Verlass) ond i dere halb Stond, wo mer hend mösse warte, send grad drüü so Büs cho. Ond en Camper. Wie Shoppingwüetigi i de USA am Morge vom Black Friday semmer losprescht, wo d'Schranke ändlech uf esch. Obwohl mer als erschts bem PP acho send, hed d'Ortskenntnis vo de Tourguides denn doch dezue gfüehrt, dass zwoi vo drüü Groppene vor üs d'Billettverchäufer hend chönne in Beschlag näh ond mer drom hend mösse warte. De Daniel hed sech grausam öber "die sch**** Groppene ond ehri Guides" ufgregt, döber, dass "mer wäge dene jetz voll i Stress chömed" ond au, dass die vom Ticketschalter so ineffiziänt gschaffet hend. Wel mer z'zwoite aber emmer no schneller send als e Groppe, hemmers trotz omzieh ond met strategischem Parke (PP2, wo nöcher esch bem Schwimmteich) no vor de Groppene is Salzwasser gschafft.
    Wer scho mol im tote Meer gsi esch, könnts: Mühelose Uftrieb, absuufe onmöglech. Wie chliini Chend hemmer 20 min lang de Plausch gha i dem Wasser, bes mer gnueg gha hend ond die erscht Groppe uftaucht esch. De Räscht vo dem Lagunekomplex esch de gar nömm so spannend gsi ond so semmer üs üsi Salzchroschte go abdusche ond weder zrogg of San Pedro, wo mer met de Rachel abgmacht gha hend.
    Nochem Bad im Salzwasser hemmer üs erneut met Salz bedeckt, indem mer Velos gmietet hend ond i de Mettagshetz is Valle de Marte gfahre send. Wedermol semmer dör spektakuläri Felsformatione gfahre, wo eim tatsächlech glaube lönd, mer seig ofem Mars. De Dani hed de no mösse probiere, wies esch, im tüüfe Sand Velo z'fahre. Fazit: Weniger loschtig als dänkt.
    En Teil vom Wäg hemmer de no ohni Velo zrogg gleid, was üs zomene schöne Ussechtsponkt brocht hed. Noch dem Usflog hemmer d'Velos weder zrogg brocht ond hend üs no gmeinsam es Glace gönnt, bevor mer üs (vorläufig) zom letschte Mol vo de Rachel verabschiedet hend.
    Im Hotel hemmer üs före dretti Programmponkt vo dem Tag parat gmacht: Stargazingtour. Mer hends leider wedermol gschafft, d'Tour inere ongönschtige Mondphase z'bueche, interessant esch es aber trotzdem gsi. Wels chli e Repetition gsi esch vo dem, was mer in Lake Tekapo scho gseh ond ghört gha hend, hemmer au meh chönne metnäh us de Usfüehrige. D'Jasi hed sech sogar Notize gmacht, die alt Streberin. Im Vergliich zo dene, wo mer in NZ gha hend, send d'Teleskop aber ned so guet gsi, was chli schad gsi esch. De Abschloss hed au do e gmüetlechi Rondi am Füür beldet, begleitet vo Snacks, Wii ond Pisco Sour.
    All das hemmer i ei Tag packt, entsprächend müed semmer denn au gsi, wo mer denn ändlech is Bett send.    Read more

    See translation
  • 4/7- Wältreis
    Wanderig im Cañon
    "Hände hoch!"1Sonneondergang öberem Valle de la LunaCerro Toco: Halbi Strecki gschafft. Onde gseht mer de PP.1Gschafft!1Abe eschs dütlech entspannter gsi.1Letschti Chance gnötzt, Mote con Huesillos z'probiere. Gar ned mol so schlächt gsi 🙂

    Tag 177 - 179: San Pedro de Atacama

    April 8 in Chile ⋅ 🌙 17 °C

    Noch dem stränge Tag vo geschter hemmers hött mol chli gmüetlecher gnoh. Am Morge hemmer paar Toureabieter ufgsuecht, wo üs hätted chönne ofe Cerro Toco metnäh. D'Rachel hed en Abieter gfonde, wo sie nor 65'000 Pesos zahlt hed, s'beschte Agebot, wo üs gmacht worde esch, esch 75'000 gsi. So vel hemmer aber ned welle zahle, wel mer gwösst hend, dass dä Bärg au ohni Guide machbar esch. Eifach sini Höchi vo 5604 m ü. M. hed üs betzli veronsecheret, wel mer bedi no nie so höch obe gsi send. D'Rachel z.B. hed of ehrere Wanderig arg met Öbelkeit z'kämpfe gha. Meteme Guide hättemer üs chli secherer gfühlt, aber mer hend üs de gseid, dass mer jo jederziit omchehre chönd, wenns ned sött goh. Osserdem werd eim öberall gseid, dass mer eigentlech ned ohni Guide ufe döfi, paar möcheds aber gliich.
    Öppis hemmer aber buechet: E Drüütagestour of Uyuni. De ursprönglech Plan, en Diräktbus vo Calama of Uyuni z'näh, hemmer (au uf Arote vo de Rachel hii) verworfe ond nähmed stattdesse d'Panoramaroute, wo mer onderwägs a verschedne Pönkt wärded ahalte ond hoffentlech paar Individualtourischte of d'Närve goh :)
    Am Nomittag hemmer üs noch Guatín ufgmacht, wo mer im Cañon am Rio Puritama entlang send go wandere. Wedermol send üsi Chlätterfähigkeite in Sandale of d'Prob gstellt worde. Nochdem mer ei Stond flossabwärts gchlätterwanderet send, hemmer gchehrt ond send weder zrogg, allerdings ned of San Pedro, sondern zomene Ussechtsponkt, wo mer en schöne Sonneondergang gseh hend. Am Obig semmer ändlech erfolgriich gsi met de Suechi nocheme Restaurant, wo ned nor Pastel de Choclo ofem Menü hed, sonderns au tatsächlech hed.

    Am nöchschte Tag semmer ziitig los för üsi Wanderig ofe Cerro Toco. Of 4000+ m ü. M. (wo mer bereits 4 Verbotsschilder passiert hend) ond ere holprige Chiesstross hed üses Auto chli müesse kämpfe ond bemene steile, steinige ond löchrige Abschnett hemmer üses Glöck ned welle usefordere ond hend s'Auto de loh stoh ond send die letschte paar Höhemeter bes zom Parkplatz ufegloffe. Scho ofem Parkplatz hemmer üse persönlech Höherekord broche gha, met jedem Schrettli heds en neue gäh. D'Höhchi hed sech met betzli Chopfweh bemerkbar gmacht, dank Huusmetteli wie Coca-Zältli ond vel trenke ond em Gheimtipp Ibuprofen hemmer aber guet vorgsorgt gha. Am Afang eschs rächt guet gange, leider hemmer üs aber denn före diräkter ond somet steiler ond asträngender Wäg entschede. D'Verschnuufpausene send i chörzere Abständ erfolgt ond dezue no länger, aber (nochere chliine Routekorrektur) am Ändi hemmers ofe Gipfel gschafft 🥳 zemli en interessanti Erfahrig, wie sech d'Höchi of de Körper ond d'Atmig bemerkbar macht.
    Chorz noch üs esch e Groppe Brasilianer met ehrem Guide cho ond hed met üs zäme dä Momänt gfiiret. De Röckwäg esch natürlech vel agnähmer gsi, allerdings hemmer chli Chopfweh gha ond send sehr müed gsi. Zrogg im Hotel semmer drom grad go schlofe. Vel hemmer a dem Tag de nömme gmacht, ossert es spots z'Mettag imene härzige Kafi gnoh ond am Obig no Znacht g'ässe ond eis go nä.

    Abgabetag vom Auto. Usnahmswiis hemmer mol chli länger gschlofe ond send gmüetlech i Tag gstartet. Eigentlech hättemer welle vor de Abgab im 100 km entfärnte Calama no de Vormittag im Valle de la Luna verbringe, d'Tatsach, dass de halb Vormittag scho döre gsi esch ond üs 14'000 Pesos pro Person före Iitrett chli vel donkt hend, hed üs of dä Usflog verzechte loh. S'Auto esch ohni Beastandig zrogggnoh worde ond mer send meteme Shuttleservice zrogg of San Pedro. De Räscht vom Nomittag hemmer am Pool verbrocht ond dasmol ganz onkompliziert Gäld gwächslet. Morn gohts wiiter of Bolivie.    Read more

    See translation
  • 4/7- Wältreis
    Z'Morge be ca. 0 Grad
    Laguna BlancaDo lauft dä Cheib zom Beld us!Laguna verdeDesierto Salvador DalíBim ThermalbadGeysir1Laguna Colorada1

    Tag 180: San Pedro - Villa Mar

    April 11 in Bolivia ⋅ ☀️ -4 °C

    Üsi drüütägig Reis of Uyuni hed am Morge am sächsi agfange. Mer send abgholt worde meteme Büsli ond bes a die Chilenisch-Bolivianisch Gränze gfahre worde, wo üs i de biissende Chälti es öberraschend riichhaltigs Z'Morge serviert worde esch. Debii hemmer die andere vo de Groppe könneglehrt: E Sebnergroppe us Neuseeland, zwoi Irinne ond e Schwiizerin us Lausanne. Dass mer be wiitem ned die Einzige gsi send, wo sone Tour möched, hend of de Chilenische Siite die vele Sprinter, of de Bolivianische Siite die vele Landcruiser bewese.
    Nochdem d'Formalitäte of beidne Siite erlediget gsi send, hed sech üsi Zwölfergroppe of zwoi Autos ufteilt ond los eschs gange of holprige Chiesstrosse is Reserva Nacional de Fauna Andina Eduardo Avaroa. Erschti Halt esch be de Laguna Blanca gsi, wo mer scho de erschti Flamingo gseh hend. Leider hed er sech wie Mani Matter's Chue am Waldrand verhalte ond esch de Jasi emmer zom Beld us gloffe. Die nöchschti Lagune esch grüen gsi ond luut em Gio, üsem Guide/Fahrer au hochgiftig, wel sie ehri schön Farb wägem enthaltne Chupfer ond Arsen hed. Denn also lieber bem nöchschte Stopp go bade: Aguas termales Chalviri.
    Nocheme Bad im warme Wasser hemmer det grad no z'Mettag gässe. Im Aschloss eschs ofe höchschti Ponkt vo de Reis gange, nämlech of ca. 4900 m ü. M., wo mer d'Geysire "Sol de Mañana" send go aluege. Im Gägesatz zo iidröcklechere Geysire wo Wasser meterhöch i d'Loft schiessed, dönd die ehnder gmüetlech vor sech hii blubbere, cool eschs natürlech trotzdem gsi (trotz em Schwäfelgroch).
    För de letschti Stopp vom hötige Tag, de Laguna Colorada, semmer chli länger gfahre. Die Lagune esch wäg de enthaltne Alge rot, was wederom vel Flamingos azieht. Dämol hemmer usgiebig Glägeheit gha, die spezielle Vögel z'fotografiere, dezue heds före Dani no es Kafi gäh. D'Jasi, wo scho de ganz Tag Chopfweh gha hed, hätt gschiider en Coca-Tee gnoh. Hed sie aber ned, niemer weiss werom. Of de Fahrt of Villa Mar, em Öbernachtigsort, hemmer vom Gio einiges öber Lamas erfahre, d'Natur do im Allgemeine ond au sin Musiggschmack. S'Hostel in Villa Mar esch eifach gsi, hed aber warm Wasser zom Dusche gha. En Luxus, wo anderi, wo sone Tour gmacht hend, offebar ned gha hend.    Read more

    See translation
  • 4/7- Wältreis
    1❤️
    De Dani esch vom Elvis zo dem Foti zwonge wordeS'KamelCañon de la AnacondaD'Chele in San CristóbalDe Dani hed es neus Velo gfonde. Ändlech es BMX, ond was för es glänzigsSonneondergang bem Salar. De Dani esch truurig.11Salzhotel. Es hed de Schläcktescht bestande.

    Tag 181: Villa Mar - Colchani

    April 12 in Bolivia ⋅ ☀️ 14 °C

    De nöchschti Tag esch im Zeiche vom Fels gstande: Zerscht semmer zonere Asammlig vo Felse gfahre, wo sech "Italia perdida" nennt. Det hemmer chli chönne omechlättere ond de Dani hed sogar es Viscacha gseh. Wenigi Meter wiiter esch d'Felsformation "Copa de Mundo" gstande, wo tatsächlech chli wie de Fuessballpokal usgseht. Do hed de Elvis, de ander Fahrer/Guide, sini Chance gwitteret ond de Dani zomene loschtige Beld gnötiget. Die letschti Felsformation wo mer send go aluege esch s'Kamel gsi. D'Groppe esch aber mettlerwiile chli öbersättiget gsi met de Felse ond hed sech meh för d'Lamas interessiert, wo i de Nöchi gsi send.
    Bemene chorze Stopp anere Laguna hed sech die söscht rächt stilli Salomé metere Iiheimische onderhalte ond debii usegfonde, dass die Frau vom (mettlerwiile) rächt wiit entfärnte Villa Mar esch ond det ehri Lamas am hüete esch. Wiiter esch es zonere Schlocht gange, wo mer iidröcklechi Secht i d'Tüüfi gha hed. Ohni jeglechi Abschrankige, verstoht sech. De letschti Halt a dem Tag esch s'Bärgbauörtli San Cristóbal gsi, wo mer alli no d'Möglechkeit becho hend, chli go chrömle ond s'Dorf aluege. De Dani hed sech natürlech es exotischs Bier gchauft, d'Jasi eifach es Glace.
    Aschliessend semmer of Colchani gfahre, wo mer s'Zemmer i üsere zwoite Onderkonft bezoge hend, emene Salzhotel. Ganz es anders Level als s'Hostel vom Vortag: Privatzemmer met eigetem Bad ond sogar e Heizig hemmer gha (in Bolivie setzt mer meh of mehreri Lage Bettdechi)! Mer zwe hend üs vorem Z'nacht no zom Salar ufgmacht, wo in Gehdistanz zom Hotel liid, ond wo mer de Sonneondergang hend welle aluege. Schlossändlech esch aber de Mondufgang fascht spektakulärer gsi met sine Farbe. Z'frede, die Chance gnötzt z'ha, semmer zrogg is Hotel, hend dusched ond send go z'Nacht ässe. Morn geds e früehchi Tagwach, wel mer de Sonneufgang i de Groppe gönd go aluege. Zom Glöck hemmer vorem Iischlofe no rächtziitig gmerkt, dass mer de Wecker of 5.50 statt 4.50 gstellt hend - ond zwar beidi 🙈    Read more

    See translation
  • 4/7- Wältreis
    112Zogfriedhof

    Tag 182: Uyuni

    April 13 in Bolivia ⋅ 🌙 9 °C

    Wie im letschte Post scho akündiget, hed dä Tag früeh agfange. Es hed niemer verschlofe ond so hemmer alli i de Donkelheit vorem Hotel d'Gummistefel in Empfang gnoh ond send i d'Auto iigstege. D'Jasi vermesst set geschter ehri Chappe ond Händsche, wo be dene tüüfe Temperature bsonders gfählt hend. No i de Donkelheit eschs met de Autos ofe Salzsee gange. Om die Johresziit esch de Salar no gfluetet, je noch Stell bes zo 20 cm tüüf. Demet de Motor ned z'vel vom Salzwasser abbechond, semmer drom met knapp 10km/h onderwägs gsi.
    De Gio hed üs i dere schier onändleche Flächi anes Plätzli änebrocht, wo wiit ond breit niemer gsi esch ond wo mer de Sonneufgang hend chönne gnüsse. Obwohl mer i üsne Stefle d'Füess bald nömm gspört hend, eschs wonderschön gsi. S'früehche Ufstoh hed sech glohnt! Wo d'Sonne de ändlech au ufgstande esch, hemmer üs ane trochneri Stell begäh, wos, ähnlech wie am Tag 1 vo dere Tour, weder es "Fäldzmorge" gäh hed. Nochhär semmer wiiter zom erschte Salzhotel in Uyuni, wo hött als "Museum" dient und en Souvenirshop hed. Näbedra esch no d'Plaza de las Banderas, wo Flagge us aller Wält wäied. S'Schwiizer Chrüüz hemmer aber ned gfonde. D'Entstehig vo dem Platz esch wohrschiinlech ofs berüehmte Dakar-Renne zroggzfüehre, wo vor paar Johr drü mol do stattgfonde hed.
    Im Aschloss hend üs de Gio & Elvis zom Fotispot brocht, wo mer, für üse Gschmack chli z'vel, Ziit demet verbrocht hend, loschtigi Perspektivfottene z'mache. Paar gueti Belder heds aber scho au gäh.
    Demet esch üsi Uyuni-Tour fascht fertig gsi. Vorem z'Mettag hemmer no en chorze Halt bem Cemeterio de Trenes gmacht, wo veli Dampfloks ehri letschti Ruhestätt gfonde hend. Froh öber die Erfahrig, müed ond au chli truurig, dass es jetz scho fertig esch, semmer zom letschte mol i Palomo (so nennt de Gio sis Auto) gstege ond of Uyuni ine gfahre. Mer send be üsne jewiilige Onderkönft abglade worde, ändgöltig hemmer üs aber nor vom Gio ond em Elvis verabschedet. Üsi Groppe, vo dere mer die einzige gsi send, wo d'Nacht no in Uyuni verbrenged, hed för spöter no zom z'Nacht abgmacht. Mer send is Hostel, hend chorz gschlofe ond send nomol use, s'Städli chli go aluege. Ossert em Märt heds leider ned vel z'gseh gäh.
    Die vergangne Täg hend be de Jasi Spure henderloh, sodass sie sech met Ibuprofen förs z'Nachtässe hed mösse dope. S'Znacht met desne im Kaktus esch zwor fein gsi, hed aber v.a. vo desne vel Gedold ond Vertraue bruucht, wels doch zemmli lang gange esch, bes s'Ässe ändlech cho esch. Wenn mer en Nachtbus verwötsche muess, rächt onagnähm. D'Warterei hemmer üs met Golfluege vertrebe, wo v.a. d'Irinne met em am Ändi erfolgriiche Rory McIlroy metgfieberet hend. Nochhär hemmer de definitiv "ade" gseid. Wer weiss, vellecht gsähmmer jo es paar spöter of de Reis nomol.    Read more

    See translation
  • 4/7- Wältreis
    Üse Bus för of Potosí
    Potosí met em Cerro Rico im HendergrondEine vo de velne Omzög wo mer i de 2 Täg gseh hendIm Casa de la MonedaSo hend d'Sklave früehner i de Giesserei gschaffetOnd so send d'Walzene atrebe worde.Velfältigs BolivieIm Chloschter vo de Iglesia de San FranciscoI de Katakombe.1Plaza 6 de Agosto1Met Ton lose :)

    Tag 183-184: Uyuni + Potosí

    April 14 in Bolivia ⋅ ☁️ 3 °C

    Nochem Zmorge am Sächsi eschs för üsi Wiiterreis noch Potosí a Busbahnhof gange. Det hemmer als erschts bim Abieter verbi welle, zom üs amälde, leider semmer det vor verschlossne Töre gstande. Im Gspröch metere hilfsbereite Passantin hemmer usegfonde, dass de Abieter "11 de Julio" i dem Busbahnhof zwoi Büro hed ond mer zom vordere müessed. Das hed denn au offe gha, mer hend s'Check-in gmacht ond send zom Bus gange. Ned grad de komfortabelscht ond vertrauenswördigscht Bus wo do of üs gwartet hed. D'Front esch schön verbüled gsi, was vermuete loh hed, dass de Bus scho mindestens ei Onfall hender sech hed.
    Im Bus enn hemmer s'Glöck gha diräkt voremene Baby z'setze. D'Sicherheitsgort hemmer vergäbens gsuecht, de Jasi ehri Röggelähne hed sech au emmer weder sälbständig gmacht.
    Die vierehalb Stond im Bus send aber abgseh defo zemli agnähm gsi ond mer send beid emmer weder igschlofe. Chorz vor Potosí esch denn en Kontrolleur igstege, wo ad Kontrolle aschliessend agfange hed dörnes Mikrofon z'rede. Mer hend beid ned werklech zueglost, bes dä Herr plötzlech im Dani es Päckli met Pulver id Hand dröckt hed. Denn hemmer gschnallt, dass do grad en Verkaufsshow à la "de bellig Jakob" im Gang esch ond är Quinoapulver verchaufe wott. Wenn mer sine Uussage Glaube schänke wott, esch das offebar s'Allheilmittel, wo d'Mönschheit set Anbeginn am sueche esch, helft das doch be Konzentrationsstörige, Schlofstörige, Läberbeschwärde, Impotenz, Frauebeschwärde ond wohrschiinlech au no gäge Chräbs. Ond enthaltet dezue no alli erdänkleche Vitamine ond meh.
    I de med 4'090 m ü. M. höchschte Stadt vo de Wält acho hed denn öber vo üs gmeint es seig schlau, vollbepackt med läärem Mage (2 Toastbrot am sächsi) of 4'000 Meter öber Meer i de Mittagssonne 40 Minute zo üsem Hostel z'laufe.
    Det acho hed de Honger üs zom nöchschte Restaurant gfüehrt ond aschliessend semmer rasch is Hostel go legge, wil d'Jasmin noch de chalte Täg in Uyuni ned sonderlech fit esch.
    Betzli fitter semmer spöter denn dör d'Altstadt gschländeret, bis d'Jasi d'Symptom weder stärcher gspört hed. Si esch drom zrog id Onterkonft ond de Dani esch no rasch elei go Znacht ässe.
    Dä Tag esch denn relativ früeh för üs z'Änd gange.

    Plan före nöchschti Tag esch gsi: D'Stadt nomol chli go aluege, z'Nacht ässe ond de a Busbahnhof, wo mer met em Nachtbus of La Paz wärded fahre. Wo mer welle hend uschecke ond zahle esch no en wiitere Gascht bi de Reception verbi cho ond mer hend ehm de Vortrett glo, do sin Bus bereits inere Stond gfahre esch. Mer send denn Züge vonere heftige Usenandersetzig worde, wo de Bsitzer en Fantasiezahl för d'Omrächnig vo US-Dollar i Bolivianos verlangt hed (1 USD = 13 Bolivianos vs. 6.9, was de offizielli Kors wär). De ander hed das natürlech ned welle zahle ond beid send sichtlich agspannt gsi ond hend sech gägesiitig med de Polizei droht. Mer hend üs au emmer weder iibrocht ond de Bsitzer gfrogt, wie är of die Zahl chond. Är hed ergendöbis vo Kommissione verzellt, werkli drus cho semmer ned. De Gascht hed denn sin Betrag (gmäss aktuellem Kors) of de Tisch gleit ond esch devo gloffe.
    So, ond de send mer dracho med zahle. Nochdem mer das ganze Theater als Zueschauer scho hend chönne beobachte, hemmer üs of en Usenandersetzig i de Hauptrolle gfasst gmacht, woner üs gseit hed, wie vel mer zahle müend. Vellecht hed er üs lieber gha als dese, vellecht hed er aber au kei Loscht meh gha ofene wiiteri Diskussion, of jede Fall hed er üs dä Betrag gnennt, met dem mer eh grächnet gha hend. Mer send zemli verwerrt gsi, hend zahlt, üsi Rocksäck deponiert ond send ines Kafi go z'Morge ässe.
    De nöchscht Stopp esch d'Casa de la Moneda gsi, es Museum öber d'Silberverarbeitig in Potosí. Potosí hed im 17te Johrhondert zo de gröschte ond riichschte Städt vo de Wält ghört - wägem Silbervorkomme im Bärg Cerro Rico. Mer hend Glöck gha, wels gnueg Ned-Spanischsprächendi gha hed, esch för üs d'Füehrig of Änglisch gmacht worde. So hemmer vel Wössenswärts öber die vergangene Glanzziite vo dere Stadt glehrt ond au, wie das wärtvolle Metall im Lauf vo de Jahrhondert verarbeitet worde esch.
    Nochem Zmittag hemmer üs noch paar chlinere Stopps zo de Iglesia de San Francisco ufgmacht ond det di nöchscht Tour buechet, dasmol esch si of Spanisch döregfüehrt worde. Wil de Guide aber so flott gsi esch ond langsam gred hed, glaubemer, s'meischte verstande z'ha. D'Highlights vo dere Tour send de Bsuech vo de Katakombe gsi ond de no de Zuetritt ofs Dach, vo wo us mer en super Bleck öber d'Stadt gha hed.
    De Räscht vom Nomittag hemmer ofem Plaza 6 de Agosto verbrocht, wo mer i de letschte Sonnestrahle vom Tag no chli am Blog gschrebe hend. Wos sächsi gsi esch, hemmer üs zom userwählte Restaurant ufgmacht, wo denn hätt selle ufmache. Natürlech esch esch noni offe gsi, drom hemmer nomol en Ehrerondi dreit. Wo mer zroggcho send, hed das emmer noni offe gha! Erscht ofe dretti Alauf heds de klapped ond mer hend u.a. e feini Kalapurka-Soppe gässe. Wo mer üsi Rocksäck im Hotel gholt hend, hed üs de Sohn vom Bsetzer agsproche. "Super, dä wott jetz secher meh Gäld vo üs" hemmer dänkt, aber nei, sini Strategie esch en anderi gsi: Üsi Öbernachtig hed er of Booking storniert ond üs ufgforderet, die Stornierig entsprächend z'bestätige. So mönds a Booking natürlech kei Gebühre zahle. Bi so öbisem wemmer ned med mache, ond so hemmer dä Vorfall spöter gmolde.
    Die aschliessend Taxifahrt zom Terminal esch au interessant gsi: S'Auto muess scho es paar tuusig km drof gha ha so wies usgseh hed ond erscht rächt, wies sech agfühlt hed. Setzpolschter döre, Dämpfer komplett döre, gschaltet heds au nömm so schön. Dezue esch ofem Biifahrersetz de (vermuetlech) Sohn vom Taxifahrer gsässe, es riesigs Stöck Torte ofem Schoss. Mer hend üs aber nätt onderhalte met em Fahrer ond noch 20 min Fahrt dör die höglig Stadt semmer de ändlech acho. I de Abfahrtshalle esch gschäftigs Triibe gsi, akustisch ondermolt vo luute Rüef vo de Billetverchäuferinne, wo ehri jewiilige Destinatione apriesed. Schliesslech hemmer de chönne iistiige ond send positiv öberrascht gsi, dass mer en sehr moderne Bus verwötscht hend, wo sogar no Sässel met Massagefunktion gha hend! Nice to have, zom schlofe bruucht mer das aber ned.    Read more

    See translation
  • 4/7- Wältreis
    Busbahnhof La Paz
    Mercado de las BrujasFriedhof onterhalb vo de SeilbahnFähri öbere TiticacaseeWels scho lang keis Ässensfoti meh gäh hed: Mango-CevicheBasílica Catedral de Puno

    Tag 185 & 186: La Paz & Puno

    April 16 in Bolivia ⋅ ☁️ 9 °C

    Nochere einigermasse erholsame Nacht semmer in La Paz acho. S'Hostel esch zom Glöck grad bem Busbahnhof gsi, de hemmer d'Rocksäck chönne deponiere ond üs ofe Wäg zomene Kafi mache, wo mer met de Rachel abgmacht hend.
    Wel zom Atemwägsinfekt vo de Jasi au no es Mage-Darm-Problem dezue cho esch, hed sie i de letschte zwoi Täg chli gfaschtet, bzw. vorsechtig gässe. Noch dere WC-technisch ruhige Nacht hed sie aber Hoffnig gschöpft ond hed sech förnes Pancake-z'Morge met Kafi entschede. Öb das e gueti Idee gsi esch? Nochem z'Morge semmer chli dör d'Gasse gloffe, hend Halt gmacht i paar Handwärchslädeli ond send am Mercado de las Brujas verbiicho, wo mer tröchneti Lama- ond Färli-Föte för Ritual chaufe cha. Im Aschloss semmer is MUSEF (Museo Nacional de Etnografía y Folklore). S'Museum esch sehr asprächend iigrechtet, de einzig Hogge esch, dass alles of spanisch esch. Of de verschedne Stöck hemmer üs denn med Bolivie usenandgsetzt, onter anderem med de Wichtigkeit ond em Iifloss vo Wasser of di verschedne Landschafte, traditionelli Chleidig ond d'Produktion devo, Maske, Schmuck ond Hüet us tierische Bestandteil ond d'Bedütig ond Gwönnig vo Silber ond Gold währed de Inka- ond de Kolonialziit.
    Währedem Museumsbsuech hemmer osserdem gmeinsam bestomme, dass mer d'Reservation, wo mer förs s'Zmittag imene schicke Restaurant gha hätted, storniered, wel 2/3 vo üs is Chrankjeitsgrönd eh nüüt g'ässe hätted. D'Rachel hed sech drom verabschedet ond esch go schlofe, mer zwoi send wiiter ond hend en Fahrt med de Loftseilbahn öber d'Stadt onternoh, bevor denn au d'Jasi ehres öppige z'Morge hed afo bereue ond zrogg is Hostel welle/mösse hed. Det hed de Dani sech es spots z'Mettag gönnt ond nochere längere Pause semmer noeinisch use zom no paar Iichäuf för de nöchscht Tag erledige.
    Nochhär hemmer üs nomol med de Rachel troffe ond de Obig gmeinsam i de Rooftop Bar vom Hostel verbrocht, wo mer üs denn au ändgöltig vo ehre verabschedet hend, wil sech üsi Wäg of dere Reis nömm chrüze wärded.

    Öberpönktlech semmer 7.30 för üse Bus, wo am achti fahrt, bem Schalter vo üsem Reiseonternähme acho. D'Frau heds denn plötzlech sehr eilig gha, hed üs gseit mer selled ehre noche ond esch devo gspronge. Mer, vollbepackt, ehre noche ond osser Atem bimene Bus acho wo bereits ofem Wäg zom Terminalusgang gsi esch ond wäge üs en Stau verursacht hed... Det semmer denn vom Busfahrer gstresst worde, mer selled üsi Rocksäck iilade, hopp hopp iistiege. Mer hed chönne meine, jedi Sekonde entscheidet öber Läbe ond Tod. So semmer also en halb Stond früener als plant imene absolut onbequeme Bus ghocket, ohni jeglichi Info dröber, werom mer spontan of dä Bus verfrachtet worde send ond öberhaupt, was lauft.
    De Bus hed zwöschetdöre am Strosserand aghalte, wo denn no zwoi anderi Gäscht ufglade worde send, ond gsamthaft en Stond bruucht zom usem Stau vo de höchschtglägnige Hauptstadt vo de Wält z'cho. Jetz hemmers verstande: jedi Sekonde hed zählt.
    Noch rond 3.5 Stond esch üs denn gseit worde, mer müesed usstiege. Mer hend de Bus also verloh ond denn erscht realisiert, dass mer anere Fähr-Alegestell send. Esch üs im Vorfäld natürlech au ned gseid worde, au ned, dass s'Billett för d'Öberfahrt ned inbegriffe esch. Zom Glöck hemmer am Busbahnhof kei Ziit meh gha, söscht hättemer üsi letschte Bolivianos usgä. So hemmer üs die Tickets (2 Bolivianos je) chönne chaufe ond send imene chliine Boot of die ander Seesiite brocht worde, während de Bus separat sini Reis öbers Wasser aträtte esch. Dass för die wenige hondert Meter Seeöberquerig kei Brogg baued, liid anschiinend dra, dass de Fährbetrieb als en Iinahmequelle för en grossi Azahl Mönsche bestoh bliibt.
    Of de andere Seesiite semmer denn weder i Bus igstege ond wiitergfahre, wo in Copacabana d'Ändstation gsi esch. Au das hemmer ned gwösst: Mer hend de Bus müesse wächsle. So hemmer also rond en Stond Ziit gha, om üs i dem chliine Dorf am Titicacasee z'vertriebe.
    Bi de Iifahrt is Dorf hed de Dani vom Bus us gmeint, är heig d'Alex vo de Uyuni-Tour imene Kafi gseh, also semmer det hii gloffe ond tatsächlech send det d'Neuseeländer gsi! Au sie hend en Reisetag, send aber onderwägs of Cusco ond warted ofe Nachtbus, wo erscht i sächs Stond fahrt. Nocheme chorze Zämehöckle hemmer üs weder vo ehne verabschedet ond send i wäsentlech bequemer Car igstege, wo üs öber d'Gränze noch Peru brocht hed.
    S'Programm för Puno esch denn klar gsi: Gäld uftriebe ond en Tour för de nöchscht Tag ofem höchschtglägne schiffbare See vo de Wält organisiere. S'erschte hed sech erneut als schwieriger als dänkt usegstellt: Die erst Western Union-Verträtig heds ned oder nömme gäh ond die zwoit hed en zemlech zwielichtige Iidrock gmacht. So hemmers bimene ATM welle probiere, aber de eint hed en mega tüfi Limite gha ond de ander onverschämt höchi Gebühre verlangt.
    All das hed dezue gfüehrt, dass mer nömm werkli vel Ziit gha hend, üs en schlaue Toureabieter z'sueche (respektiv hemmer au do de eint, wo mer gsuecht hend, ned gfonde). So hemmer schliesslech eine a de Haupttouristross ufgsuecht.
    Nochere chorze Duschi semmer imene sehr feine Restaurant go z'Nacht ässe. För d'Jasi heds Mango-Ceviche ond peruanischi Teigware gä ond för de Dani en Quinoa-Suppe ond äbefalls es peruanischs Teigwaregrecht. Dezue en Pisco Sour.
    Z'frede ond öbersatt semmer go pfuuse.    Read more

    See translation
  • 4/7- Wältreis
    En Insle vo Uros
    Of BsuechOf de Insle Taquile🙈Onterwägs noch CuscoIn Cusco

    Tag 187 & 188: Puno & Cusco

    April 18 in Peru ⋅ ☁️ 7 °C

    Pönktlech am sebni semmer för üsi Tour ofe Titicacasee abgholt worde. D'Frau, wo üs abgholt hed, hed chli en gstresste Iidrock gmacht ond wo mer sie de gfrogt hend, wevel Lüüt denn a dere Tour teilnähmed (indiräkt: Wie gross die Abholrondi werd), meint sie: "72". Jo, det esch üs bewosst worde, of was mer üs do iigloh hend... Mer hend jo gwösst, dasses of de Uros-Insle touristisch esch, aber das hed üs denn doch öberrascht.
    D'Hoffnig, dass sech die 72 Lüüt vellecht spöter i chliineri Groppene wörded uflöse, hed sech ned bewohrheitet, im Gägeteil! Am Hafe esch eis Usflogsboot näbem andere atäut gsi, dezue no wiiteri Touregroppene vo üsere Grössi (dezue mues mer aber no säge, dass mer zemmli secher ned so vel gsi send, ehnder 40 oder so, d'Groppe esch glaub öbe halbiert worde).
    Mer also üses Boot bestege, wo üs als erschts zo de schwömmende Insle vo Uros brocht hed. Im Boot hemmer zerscht anere musikalische Darbietig glauscht bevor de Giovanni, üse Reiseleiter, üs paar wössenswärti Sache öbere See, d'Religion ond Uros metteilt hed, wie z.B. dass Titicaca obersetzt "graue Puma" bedüüted, wel de See ofem Chopf betrachtet d'Omriss vomene Puma hed. Öber Uros hemmer erfahre, dass es us rond 120 schwimmende Insle bestoht, wo us Schilf härgstellt wärded ond jewiils vo öppe 4-5 Familiene bewohnt wärded. Es gäb Schuele ond au wiiteri Iirechtige. Ond mer bechämed jetz die einzigartig Chance, dene Lüüt be ehrem tägleche Läbe döffe zuezluege! Üses Boot hed üs be sonere Insle usegloh, wo de Giovanni üs no aschaulech zeigt hed, wie die Schilfinsle härgstellt wärded. Noch sine Usfüehrige hend denn die vier Familieoberhäupterinne (d'Manne send ergendwie niene gsi) vo de Insle äxtra för üs, ehri liebe Tourischtefrönde, gsonge. Währenddesse hend sech paar vo üsere Groppe nömme gschpört ond hend onabrochti Fotene met de Locals ond ehrne Chend gmacht. Noch de Gsangsiilag hed üs d'Amalia zo sech i ehres dehei iiglade. Det hed sie üs ond paar anderne vo ehrem Alltag verzellt. Nochdem das ganze Empfangsprozedere abgschlosse gsi esch, hed d'Verchaufsshow agfange. Mer hend üs schliesslech zom Chauf vo zwoi Sache entschede (wobii mer üs oneinig dröber send, öb die wörklech nötig send), leider aber be de Falsche. D'Amalia hed üs nochhär nämlech druf ufmerksam gmacht, dass mer doch EHRI amigos suizos seiged ond mer doch bitte ehri Sache au söled cho aluege. Jo, de hemmer halt no öppis be ehre gchauft... Es hed sech alles so falsch agfühlt, gliichziitig hemmer üs als Tourischte sehr onder Drock gfühlt gha, det (vel) Gäld uszgäh. Wenn mer d'Möglechkeit gha hätted, wäremer scho lang weder gange, stattdesse esch jetzt s'nöchschte Highlight cho, nämlech d'Fahrt ofemene traditionelle Schilfboot, natürlech doppelstöckig, demet au alli Touris drof Platz gfendet, wo üs ofene anderi Schilfinsle brocht hed. Dämol send d'Chend för die musikalisch Onderhaltig zueständig gsi, was no onagnähmer gsi esch. Zom Glöck hemmer kei Mönz gha wo mer ehne hätted chönne gäh. Die Öberfahrt esch natürlech ned gratis gsi ond of üses Omegäld wartemer höt no.
    Nochemene chorze Zwöschehalt of dere Insle met Verpflegigs- ond wiitere Souveniriichaufsmöglechkeite eschs weder of üses Usflogsboot gange, wo üs ofem höchschtglägnige schiffbare See vo de Wält of die natürlech Insle Taquile brocht hed met ehrne rond 2800 Iiwohner.
    Au die hend sech fescht öbere höchi Bsuech gfreut ond grad en Tanz ufgfüehrt, wo schliesslech es paar us üsere Groppe metgmacht hend. Bsonders ei älteri Dame esch debii met ehrem Selfietanz onagnähm ufgfalle. De Fruscht öber dä bishär misslongni Tag hed üs zemmli of d'Luune dröckt, was mer enand leider chli hend loh gschpöre. Nochhär heds z'Mettag gäh, im Aschloss hemmer no chli Ziit gha, d'Omgäbig of eigeti Fuuscht chönne z'erkonde. D'Insle sälber esch sehr schön ond vom Dorfplatz us, wo zemmli ofem Bärg obe esch (ond en entsprächend asträngende Astieg bedingt), hed mer en schöne Blick ofe See. Nochhär semmer weder ofs Boot, wo üs noch Puno brocht hed. Mer send de no go z'Nacht ässe ond nochdem de Dani es Oatmeal Breakfast Stout gha hed, esch d'Wält weder in Ornig gsi.

    De nöchscht Tag esch schnell verzellt: Met em Bus eschs dör die schön högelig peruanisch Landschaft vo Puno noch Cusco gange, det semmer gäg die drü acho. Met emene rassige Taxifahrer semmer zo üsem Hostel, wo mer zerscht ned gfonde hend, wil das niene agschrebe gsi esch. Loschtigerwiis esch ei Tag spöter s'Scheld weder dosse ghanget.
    Mer send denn no chli dör Cusco gschlenderet, hend zwoi Toureabieter, wo mer vorgängig recherchiert hend, ufgsuecht ond denn bimene dritte per WhatsApp zwoi Toure buecht, währed mer es feins z'Nacht gnosse hend. Aschliessend hemmer d'Altstadt vo Cusco chli wiiter inspiziert. Per Zuefall semmer denn bi de Bar vo de Brauerei 7 Vidas verbi cho, wo mer de Rescht vom Obig verbrocht ond met de Brauerei bi Live-Musig ehre erschti Gebortstag gfiiret hend.    Read more

    See translation
  • 4/7- Wältreis
    Glöcksbrenger ofem DachDie ursprönglech Stadtgränze vo Cusco gliicht emene Puma2Drüü BroggegenerationeOfem Wäg zo de RägebogebärgeHärdöpfelfäldPalcoyo1Cañon Ananiso2Wie vel Chinchillas send of em Beld?1

    Tag 189 & 190: Cusco & Palcoyo

    April 20 in Peru ⋅ ☀️ 14 °C

    Hött hemmer chli öppis welle öber Cusco lehre ond hend drom e Stadtfüehrig buechet. Obwohl die met 11.00 ned öbermässig glii agfange hed, semmer am Schloss gliich no i Stress cho, wel mer vorhär no öppis Chliises hend welle ässe ond natürlech i de Nöchi vom Träffponkt nüüt Guets gfonde hend. Mer send de gliich no pönktlech gsi ond send im Verlauf vo de folgende zwoiehalb Stond vom Sergio (wo öbrigens grosse Bärn-Fan esch) öber d'Urspröng vo diverse Strossenäme, Mythene öber heiligi Mumie ond Jesusstatue, emmer no sechtbari Spure vo de Inkas ond d'Entstehig vo Cusco ufklärt worde. Of Nochfrog hed er üs au verzellt, wie är als Iiheimische d'Veränderig vo de Stadt döre Tourismus wohrnehmt. Natürlech ned nor positiv (Biispel: Früehner hesch am Plaza de Armas no es Kafi för 2 Soles chönne trenke. Neus Kafi, neui Priise: 12 Soles). E wiiteri loschtigi Anekdote: D'Fahne vo Cusco, d'Rägebogefarbe, sorgt be velne Gays zerscht för Begeischterig, denn för Ernöchterig.
    Cusco gfallt üs sehr guet, aber es schmärzt scho z'gseh, dass osser Tourischte niemmer im Zentrum wohne cha - ond dass d'Spanier d'Stadt of de alte Inkastadt errichtet hend.
    Noch de Tour hemmer welle go Gäld abhebe. Wies mettlerwiile normal esch be üs wenns om Gäldfroge goht, hed au das ned of Ahieb klappet, aber gschafft hemmers am Ändi de doch. Als nöchsts hemmer de Jasi ehri verlorne Händsche ond Chappe welle ersetze. Wel sie e rächt genaui Vorstellig defo gha hed, was sie wett (oder ehnder: ned wett) ond komischerwiis nor öppe 10 % vo de ganze Läde in Cusco Füüschtling öberhaupt im Agebot hend, hed sech d'Suechi als sehr ziitintensiv ond närveraubend usegstellt. Mer hend d'Hoffnig scho fascht ufgäh gha, wo de Dani im x-te Souvenirlade onder all de Händsche ond Chappe au paar Füüschtling gfonde hed ond sie de Jasi zeigt hed. Ond tatsächlech: Grössi stemmt, einigermasse schön, Alpakawolle. Ändlech! Noch dere Asträngig semmer no Gerstesaft go chrömle ond de zrogg is Hostel. Före nöchschti Tag esch e früehchi Tagwach agseid gsi.

    De Start i Tag hed medem Weckton vom Handy am 5 vor 4i gstarted, 4.25 Uhr semmer nämli abgholt worde för üse Usflog noch Palcoyo, zo de Rägebogebärge. Mer hend üs bewosst gäg Vinicunca entschede, wil det täglech tusigi vo Lüüt hiiströmed. Im Büssli send näbscht em Fahrer ond zwoi Guides 6 Französinne ond Franzose gsi, en gmüetleche Rahme also. Noch rond zwoi Stond hemmer imene chline Dorf z'Morge gässe ond send denn wiiter, no einisch öbe en Stond de Högel ufe. Onterdesse eschs hell worde ond mer send wach gsi, sodass mer d'Natur chönne hend gnüsse. Ofem Ufewäg hemmer vel Alpaka ond natürlech entstandni Terrasse gseh, mer hend üsi Ussicht gnosse.
    Bim Parkplatz acho hemmer üs parat gmacht för üsi rond 3 stöndig Wanderig. Mer send z'zwoite medem Joel onterwägs gsi, demet mer en änglischsprächende Guide hend, die andere sächs hend de Jimy gha, wo Französisch gredt hed.
    De Ufstieg zom höchschte Ponkt of chli weniger als 5'000 Meter hemmer relativ bald gschafft ond vo det obe för üs elei d'Ussicht gnosse. D'Franzose send denn scho rächt wiit zrogggheit gsi.
    Do en chorze geografische Ischub zor Entstehig vo de Rägebogebärge: Öber veli Millione Johr hend sech im damals no vorhandene Meer mehreri verschedni Schichte ofenand abglageret, jewiils met onderschedlecher chemischer Zämesetzig, was die verschedne Farbe erklärt. Wo sech denn d'Nazca-Platte onder di südamerikanisch gschobe hed ond dör das d'Ande entstande send, hend sech die Schichte vonere horizontale Position ine sänkrächti verschobe, wobiis zo de Beldig vo dene Rägebogebärge cho esch.
    Vo det hemmer üs denn of en Abstieg ines anders Tal gmacht, onterwägs hemmer niemmer atroffe ond üses z'Mittag gnosse.
    Wo mer denn bim Büssli, wo det scho of üs gwartet hed, acho send, hed de Joel gmeint, die andere heiged wohl no en Stond, bis bi üs seiged. Mer hend üs denn dezue entschede z'Fuess noch Ananiso ond zom Cañon, wo det esch, z'go. Au dä Teil vo üsere Wanderig esch landschaftlich sehr schön gsi. Ofem Wäg zom Cañon hemmer ganz vel Alpaka ond bim Cañon Chinchillas gseh.
    Wo mer scho weder ofem Röckwäg gsi send, hed de Joel d'Nochrecht becho, dass di andere z'müed seiged ond de Cañon nömm wärded bsueche.
    Bim Bus acho hemmer denn au gseh, wie di meischte bereits halbtot im Sitz hanged. Bim nöchschte Stopp, om vo obe i Cañon z'luege, send denn aber all usgstege. Vo det eschs wiiter gange, zrog noch Cusco. Bald hemmer de nöchscht, onvorhärgsehnig, Stopp igleit. De Sohn vo de einte Familie hed entweder Müeh med em Fahrstil vo üsem Fahrer, em Edy, oder med de Höchi gha ond hed üs das luutstarch ond med Material medteilt. Zom Glöck i Sack. Mer glaubed ehnder, dass am Fahrstil gläge hed, wel de Edy scho wiene Wahnsinnige gfahre esch: Waghalsigi Öberholmanöver send sini Spezialität, Kulanz anderne gägenöber könnt er ned, was fascht zomene Onfall gfüehrt hätt. Do esch üs au schier schlächt worde. Mer hends aber heil of Cusco gschafft ond send am Obig imene coole Resti go vegan ässe. Vorhär hemmer aber no üse Röckflog id Schwiiz bueched.    Read more

    See translation
  • 4/7- Wältreis
    I de Textilmanufaktur in Chinchero
    Salzmine vo MarasMorayOllantaytambo us de DistanzOfem Wäg d'Stäge ufePlaza de Armas in CuscoJasi ond ehre neu Kolleg, de Cosco1Inkatrail: De Luis erklärt s'Velo, v.a. d'BrämsCuyBlick usem Fänschter, wo mer die erscht Nacht verbrenged

    191 & 192: Valle Sagrada & Inka-Trek 1/4

    April 22 in Peru ⋅ ☁️ 13 °C

    Ned ganz so früeh wie am Vortag semmer vom Fahrer Edy el Loco, wie mer ehn set geschter im Gheime nenned, em französischsprächende Jimy ond üsere Dolmetscherin Charlène abgholt worde.
    Hött werd en Tag, a dem mer gliichziitig üses Spanisch, Französisch ond Änglisch chönd bruuche 🥳 De Jimy hed em Räscht vo de Groppe of Französich erklärt, was de erschti Halt vo dem Tag werd sii, d'Charlène hed üs das of Änglisch öbersetzt: Chinchero, es Dorf metere lange Textiltradition. Mer hend benere chliine Manufaktur aghalte, wo mer vonere Frau e gueti Demonstration becho hend, wie d'Wolle gwäsche, gsponne, gfärbt ond am Ändi gwobe werd. Mer hend denn die fertige Stoff agluegt ond die verschedne Symbol erklärt becho. Dezue heds no Gschwellti met Chääs ond en Tee gäh. D'Charlène hed no chli mösse i ehri Rolle als Dolmetscherin inegfende, aber met üsne vereinte Frömdsprochekenntnis hemmer scho zemmlech vel ohni ehri Helf verstande.
    Nochhär semmer weder zom Edy is Büssli gstege ond send zo de Salzmine vo Maras gfahre. I dem Tal onde semmer usgstege zom die terrassierte Fälder chli us de Nöchi azluege. Jimy & Charlène hend erklärt, wie d'Salzgwönnig fonktioniert. Wel grad noni rechtig Trocheziit esch, lauft aber ned so vel of dene Fälder.
    Ned wiit vo de Salzfälder esch s'Agrolabor vo de Inkas in Moray, wo (vermuetlech) of verschedne Terrassestufe verschedni Pflanze usem Inkariich apflanzt worde send, zom die ideale Wachstumsbedingige usezgfende ond so au en effiziänti Someproduktion z'erziele.
    Denn esch es au scho Ziit gsi för s'Zmettag, wo mer amene Ussechtsponkt iignoh hend. Noch dere Pause semmer gstärcht gsi före strängschti Teil vo dem Usflog, nämlech Ollantaytambo met sine Tämpelruine, wo mer rond 350 Stägetrett spöter vo Nöchem hend chönne aluege ond üs üsi eigete Gedanke dröber hend chönne mache, wie genau as d'Inkas vor 500 Johr so grossi Felsbröcke of sone Bärg hend chönne brenge. Das esch de letschti Ponkt vo dere Tour gsi. Imene Resti hemmer bemene Inka-Kola ond Kafi ofe Edy gwartet, wo üs i sim gwohnt rasante Fahrstil zrogg of Cusco brocht hed. Alt semmer a dem Obig ned worde, wel mer am nöchschte Morge of üsi viertägig Wanderig zom Machu Picchu ufbroche send.

    Wel üses Hostel chli osserhalb liid, hemmer üs am Morge am sächsi ofe Wäg zom Träffponkt im Stadtzentrum gmacht. Zwösche halbi sebni ond sebni heds gheisse, wärdemer abgholt. E halb Stond hemmer em Triibe ofem Platz zuegluegt, de semmer chorz noch de sebne abgolt worde ond los eschs met 9 anderne, em Guide Luis ond em Fahrer Ramiro
    Rechtig Abra Málaga gange.
    Of dere Passhöhchi semmer usegloh worde, wo mer scho länger (nie?) nömm gwäschni Schotzusröschtig ond Bikes in Empfang gnoh hend. För d'Ängländer ond Aussies i üsere Groppe hed de Luis äxtra nomol betont, dass d'Brämse do andersch send als sies sech gwöhnt send. No vor em erschte Halt hed eine vo de Australier g'OTB'd, wel er versehentlech d'Vorderbräms zoge hed. Zom Glöck esch nüüt Schlemmers passiert, är hed de aber nömme möge fahre ond esch met em Ramiro im Büssli hender üs härgfahre, bes mer noch fascht 2000 Höhemeter ond gfühlte 20° C Temperaturdifferänz im Tal acho send.
    Det hemmer fein z'Mettag gässe ond üsi Reisegspändli chli könne glehrt. Die, wo hend welle, send no go river rafting mache, de Räscht (inkl. mer) hend no chli länger Mettagspause gha, bevor mer meteme Shuttle zom Usgangsponkt vom Wanderwäg zo de Onderkonft brocht worde send. D'Wanderig döre Wald esch chli fordernd gsi, hed üs aber sehr guet gfalle; au, wel die Gröch i dem Wald üs a Öbige i Sommerlager erenneret hend.
    Mer hend bemene chliine Hof aghalte, wo de Luis üs öppis öber die lokale Pflanze verzellt hed, vor allem hed er öber d'Coca-Pflanze gredt ond au öber d'Kokainproduktion. Nochhär semmer go Meersiuli füettere, wo do kei Huustier send (das esch sträng betont worde!). Noch dere lehrriiche Pause eschs wiiter gange ond noch ca. 20' hemmer d'Onderkonft erreicht. Eifach, offni Fänschter ond schön im Grüene gläge. Nochere chalte Duschi hemmer üs no chli im Zemmer iigrechtet, do send d'Riverrafter au weder dezue cho. Vor ond währed em z'Nacht hemmer d'Glägeheit gha, enand no chli besser könne z'lehre, ond so esch die Groppe zämegstellt: Jamie, William ond Erin us GB (J+W=❤️, J+E= Cousine, alli 19ni), Andy ond Aaron us Australie, Delaney ond Max us de USA (Frönde us de Schuelziit), Laura ond Alessandro us Italie ond mer. Schiint e gueti Groppe z'sii.    Read more

    See translation
  • 4/7- Wältreis
    Die glöst Schale werd vo de Bohne separiert
    De werd gröschtet...... ond gmohle...... bes zom (bald) fertige Produkt.De "Pachamama-Altar"23

    Tag 193: Inka-Trek 2/4

    April 24 in Peru ⋅ ⛅ 19 °C

    Tag 2 vom Inka-Trail hed ned met emene z'Morge agfange, sondern met emene Kors im Kafi Röschte. Scho am Vortag semmer of de Wanderig a Kafiplantagene verbii cho ond hend det die rote Chriesi chönne probiere, wo d'Kafibohne enthalted. S'Usgangsmaterial zom Röschte send de scho tröchneti Kafibohne gsi, wo mer metere "Schälmaschine" vo de Huut befreit hend. Nochhär hemmer d'Bohne imene Tontopf gröschtet, was, je noch Talänt vom jewiilige Groppemitglied, meh oder weniger guet klapped hed. Am Ändi hemmer met Körperiisatz d'Bohne gmahle. Glöcklecherwiis hemmer üs abgwächslet, de eschs ned so sträng gsi. Üses fertige Produkt hemmer de bem aschliessende z'Morge chönne probiere. Fazit: Ned schlächt. Nochem z'Morge hed üs de Luis met emene Schlange- ond Chrüüterschnaps of die bevorstehend Wanderig vorbereitet. Är hed üs debii weder einiges öber d'Quechua-Kultur verzellt ond z.B. au, wie s'Protokoll bem Trenke usgseht. "Sulpeiki" (= zom Wohl) esch debii nor de Abschloss vo mehrere Ehrerbietige gägenöber Pachamama, de Muetter Ärde. So gstärcht hemmer üs ofe Wäg gmacht, wo üs be scho rächt warme Temperature bärguf dör dechti Vegetation gfüehrt hed. Noch öppe 40' hemmer anere Stell Pause gmacht, wo e chliini Höhli förnes Ritual dient hed. Als Gabe hemmer Cocablätter driigleit, met Palo Alto Holz gräucheret ond Honig-Chicha drufgläärt. Drufabe no e symbolischi Reinigong met Agua Florida. Die abschliessende Omarmige onderenand send aber vellecht ned s'Agnähmschte gsi, wel mer alli vom Ufstieg zemmli verschwetzt gsi send, Agua Florida hin oder här. Mer hend das Ritual als en gueti Erfahrig gseh, wil es hed secher zomene stärchere Groppegfühl biitreid.
    Mer send bes zo de Mettagspause wiitergwanderet, zwöschetdöre hemmer Halt gmacht a Ussechtspönkt, interessante Pflanze ond Tier, wo de Luis weder öppis z'verzelle gwösst hed. Bem z'Mettag hemmer gmerkt, dass de Max sehr en grosse Tierfrönd esch ond de Alessandro sehr liideschaftlech cha wärde, wenns om Spaghetti goht.
    De Nomittag esch denn ähnlech wiiter gange met wandere. Ofem Programm esch eigentlech no bade imene Thermalbad ond för die, wo hend welle, Ziplining ofem Programm gstande. Wos of die halbi vieri zuegange esch ond mer emmer no onderwägs gsi send, hemmer üs afo froge, wenn das alles no stattfinde sel. Nochere loschtige Flossöberquerig inere Seilbahn semmer chorz drufabe bem Thermalbad vo Santa Teresa gsi. Team Zipline hed ehri Rocksäck det deponiert ond esch meteme Shuttle zom Ziplineabieter gfahre, wo mer d'Usröschtig becho hend ond zom erschte Drohtseil gloffe send. Nochere verwirrende Instruktion hend mer zwoi grad de Afang gmacht ond send zäme losgfahre. Hed Spass gmacht! D'Jasi esch för die zwoit Fahrt omgekehrt is Gstältli gsteckt worde, dass sie im Supermanflog öbers Tal cha gleite. Dass mer die usbreitete Ärm ned Metti Strecki plötzlech sött ine näh, hed sie of peinlechi Art sälber mösse usegfende, indem sie nochhär helflos om die eiget Achse dreit esch bes d'Fahrt ändlech fertig gsi esch 😂
    Nochem Zipline semmer zrogg zom Thermalbad, wo paar vo üs send go bade. Mer hend aber ned so Loscht gha ond send eifach det benere Bar blobe ond hend chli öppis tronke ond Chips gässe bes desi fertig gsi send. Meteme Büssli semmer denn all zäme is Dorf brocht worde, wo mer, nochdem mer alli e wohlverdienti Duschi gha hend, zäme send go z'Nacht ässe.    Read more

    See translation
  • 4/7- Wältreis
    02:54, bereit zom Abmarsch
    Akonft in Aguas Calientes am halbi sächsiBegossni Pudel. De Aaron hed d'Schueh abzoge i de Hoffnig, sie so chönne troche z'bhalte.Ändlech! Noch 2,5h astoh hemmer s'Nömmerli becho.Astoh Nr. 2

    Tag 194: Inka-Trek 3/4

    April 25 in Peru ⋅ ☁️ 8 °C

    Obwohl mers eigentlech besser gwösst hätted, hemmer üs ned scho vor zwoi Mönet om d'Iitrettsbillet of Machu Picchu kömmeret. Före 26.04. send die online verfüegbare Billet drom usverchauft gsi, es Schlopfloch geds aber zom Glöck: In Aguas Calientes wärded jewiils nomol 1000 Billet före Folgetag verchauft, allerdings nor persönlech. Vo Santa Teresa of Aguas Calientes hemmer theoretisch öppe 3h, wel 06:30 de erschti Zog achond ond us dem vel Lüüt wärded go astoh, hemmer ombedengt vor dem mösse in Aguas Calientes sii. 02:50 send de Luis, Andy, Aaron, d'Erin, Jamie ond mer zwoi i de Lobby vom Hostel gsi, liecht onusgschlofe. D'Jamie hätt ned mösse metcho wel sie s'Billet scho gha hed. Sie esch eifach nätt ond begleitet ehri Cousine. Noch 30' im Auto semmer in Hidroelectrica acho, wo üse Marsch agfange hed. Entlang de Bahngleis semmer meh oder weniger stillschwiigend gloffe, bes de Aaron, s'Schlossliecht vo üsere Vierervorhuet, plötzlech en spitze Schrei vo sech gäh hed: Onbemerkt hed sech en grosse Hond üs agschlosse gha, was em onvorbereitete Aaron i de Donkelheit im erschte Momänt en Schrecke iigjagt hed, woner mol hendere gluegt hed. Üs anderne au.
    Be Tagesabroch (5:30) semmer in Aguas Calientes acho, d'Schlange esch noni allzu lang gsi ond mer hend üs iigreiht ond hend afo warte. Stondelang astoh elei esch jo scho schlemm, erscht rächt, wenn mer z'wenig gschlofe hed ond vorhär no fascht 10 km gloffe esch. Denn heds aber au no afoh rägne... Paar send zwor i Schärme gstande, aber mer hend jo mösse üse Platz i de Schlange bhalte, so esch emmer mindestens öpper im strömende Räge gstande. Hochkonjunktur för d'Strosseverchäufer, wo Rägeponchos verchauft hend! Am achti hed denn ändlech de Schalter ufgmacht ond mer hend üsi Tickets chönne go hole. Das send aber noni die rechtige Billet, sondern erscht en Zäddel, wo e Nommere ond Ziit droffe stoht, wenn mer die eigentleche Billet chönd go hole. D'Billet hemmer zwor of secher, mönd aber am Obig am sächsi nomol go astoh... 🙄 Tropfnass ond döregfrore semmer imene Resti go z'Morge ässe, bevor mer am 10ni is Hostel chönne hend, wo leider nor e lauwarmi Duschi of üs gwartet hed. Bes ca. 13:00 hemmer chönne legge, de semmer als mettlerwiile weder kompletti Groppe go ässe.
    Bes am sächsi hemmer Ziit zor eigete Verfüegig gha ond send de Ort chli go aluege ond öppis go trenke. De Dani hed debii sin Chartetrick zeigt ond hed demet v.a. de Max begeischteret, wone grad sälber hed welle lehre.
    Of die sächsi semmer also weder vor em Gebäude gstande, wo mer vom Morge här scho könnt hend. Fascht, als wäremer e Sportmannschaft ond är üse Trainer, hed de Luis üs erklärt, wies jetz werd laufe denne ond was üsi Strategie werd sii: Möglechscht Curcuit 2, am beschte Iilass vor de achte, de chömmer met em Räscht vo de Groppe goh. Före Fall, dass die Plätz scho vergäh send, hemmer no Plan B, C ond D döregspelt. Wer hätt dänkt, dass en Iitrett zo Machu Picchu so komplex cha sii? Met 515 Lüüt vor üs, aber ufteilt of 150er Groppene zo verschedne Ziite, esch d'Schlange zwor lang gsi, aber s'esch vorwärts gange. Beldscherme hend in Ächtziit die verbliibend Azahl a Tickets för die jewiilige Circuits agäh, was üs närvös d'Azahl Lüüt vor üs hed afoh loh zelle. Am Ändi hemmer Plan B chönne realisiere: Circuit 2, aber erscht am 13:00. Före arm Luis bedüüted das, dass är morn Morge am sächsi die erscht Hälfti vo üsere Groppe in Machu Pichu omefüehre daf, am eis denn die ander Hälfti. För d'Sächsigroppe heissts früeh ufstoh morn, för üs: Party 🥳
    De letscht Obig hemmer drom met de fascht gliiche Lüüt wie am Morge verbrocht ond d'Jasi hed dank ehrem Jenga-Talänt sogar no 10 USD gwonne. Bevor mer ändlech is Bett hend chönne, hed üs d'Töre zom Hostel vorne schier onlösbari Ufgab gstellt. Öb mer die Ufgab nüechtern schneller hätted chönne löse, wössemer ned, aber met vereinte Chräft hemmers de doch no gschafft ond send de go schlofe.    Read more

    See translation
  • 4/7- Wältreis
    De Dani freut sech ned so ofe Ufstieg
    De Jasi ehri Chifrijos

    Tag 195 & 196: Inka-Trek 4/4 & San José

    April 26 in Peru ⋅ ☁️ 15 °C

    Usgliichendi Grächtigkeit: Die, wo geschter no hend chönne "usschlofe", hend hött scho chorz noch de viere mösse loslaufe, mer hend dämol chönne usschlofe. Nor d'Jamie hed sech met ehrere Guethärzigkeit sälber es Ei gleid gha, wel sie jo met ehrem früehziitig buechte Ticket zo de früehche Groppe ghört hed.
    Nochem Usgang vom Vorobe hemmer üs ofs Usschlofe gfreut, send aber vom Hostelbsetzer am 09:15 gweckt worde, wo gmeint hed, am 9i seig uschecke gsi. Üsi Erklärig, de Luis heig üs 10ni gseid, hed er zwor akzeptiert, use hemmer gliich mösse. I de Lobby hemmer denn die andere troffe ond send zäme imene Kafi go z'Morge ässe. Öppe am 10:30 hemmer üs ofe Wäg Rechtig Machu Picchu gmacht. De Wanderwäg esch im Zickzack steil duruf gange, emmer weder hemmer die starch befahrni Stross gchrüützt, wo üs Lüüt us de Büs use mitleidig (oder vellecht au anerkennend) agluegt hend. Noch rond 100 Minute Wandere i de Mettagshetz eschs de ändlech gschafft gsi ond mer send dobe bem Iigang acho. Chorz vorem Eis esch denn de Luis uftaucht ond mer send all zäme ine. Die Meischte vo de früehche Groppe send noch ehrere Füehrig scho weder gange, nor d'Jamie ond de William send set em Morge am sächsi tapfer am Usharre, demet sie zäme met de Erin d'Füehrig chönd mache.
    Noch de obligatorische Fotisession bem Ussechtsponkt hed üs de Luis of de Füehrig paar interessanti Fakte zo dem Ort metteilt, of Froge esch die simpli Antwort oftmals gsi: Mer weiss es eifach ned. Zom Biispel, werom Strukture im Prä-Inka-Stil öber Inka-Baute errechtet worde send. Oder werom a gwössne Stelle riesigi Felsbröcke unbehaue ine Muur garbeitet worde send.
    Noch de Füehrig semmer met em Bus weder is Tal gfahre, wo mer ned mol meh Zit gha hend förnes spots z'Mettag, wel mer meh oder weniger diräkt ofe Zog hend mösse. Muess d'Jasi halt luege, dass sie in Cusco no ergendwo es Meersäuli cha go ässe. D'Zogfahrt esch zerscht no ganz loschtig gsi. Im Bummlertempo hed sech de Zog dör die grüene peruanische Täler gschlänglet, mer hend üs met läse, Musig lose oder UNO spele d'Ziit vetrebe. Denn esch de Zog aber stohblobe. Zwöschetdöre heds grocklet, meh als das hed er sech aber ned bewegt. Ergendwenn esch denn d'Dorchsag cho: Lokstörig. Super. Loschtigerwiis eschs aber bald drufabe wiiter gange, leider hed d'Lok denn weder en Ussetzer gha. Met wevel Verspötig mer in Ollantaytambo schlossändlech acho send, wössemer gar ned. Det hed ämu s'Büssli of üs gwartet, wo üs i rond einehalb Stond of Cusco brocht hed. D'Fahrt esch sehr loschtig gsi, wel mer währenddesse es Musigquiz gspelt hend, was ab ond zue ines Karaoke öbergange esch. Öppe am halbi nüüni semmer de ändlech in Cusco acho.
    Wie de Blitz semmer is Hostel, wo mer scho vor de Wanderig gsi send, hend e dringend benötigti Duschi gnoh ond send i frösche Chleider zrogg is Stadtzentrum. Dass mer met de anderne no gmeinsam noime wörded go z'Nacht ässe, hemmer üs sowieso mösse usem Chopf schloh, jetz hemmer mösse luege, dass mer öberhaupt no öppis z'ässe bechömed. Am Ändi eschs denn e chalti Chääsempanada usem Supermärt gsi :( Noch dem onbefredigende z'Nacht semmer zo desne i ehres Hostel, wo de niederländischi Königstag gfiiret worde esch. Die drüü jonge Brite send scho relativ glii is Bett, met em Andy ond em Aaron hemmer de no chli Billard gspelt. Wo mer is Bett send, hemmer no chli meh als zwoi Stond Schlof gha, bevor mer weder hend mösse ufstoh zom a Floghafe goh.
    Chlini Randbemerkig: De Andy hed sech i dene Täg ned als sehr sprachaffin zeigt. Es einzels schwiizerdütsches Wort heder sech nome med grosser Müeh chönne merke. Bsonders loschtig hemmer drom sini Gschicht gfonde, wo är sech am erschte Tag in Peru bi öberem welle hed bedanke ond debi "Grazi" gseit hed. De Aaron hed ehn vorgängig öbrigens no dezue aghalte, dass är doch chli Spanisch lerne sel.

    S'Taxi hed üs ohni Zwöschehalt a Floghafe brocht, Check-in ond so esch au alles ohni Problem gange. Schlof nochehole hemmer ned wörklech chönne, aber Kafi ond Sandwich hend üs au weder chli of d'Bei gholfe. Noch Omstiege in Lima semmer am Nomittag in Costa Rica acho. Weder imene Land z'sii, wo Palme wachsed, hed scho öppis (wobiis in Peru au scho Palme gha hed, aber ned öberall).
    Wie emmer imene neue Land, hemmer zerscht mösse d'Gäldfrog kläre, bevor mer zom Hotel send, wo üs d'Chilizocht vo de Inhaber sehr beiidrockt hed. Ond scho bem Check-In hemmer en Kolibri gseh! Zom z'Nacht semmer ines lokals Restaurant, wo mer beidi Chifrijos gässe hend. Sehr fein gsi, möchemer dehei de au mol.    Read more

    See translation
  • 4/7- Wältreis
    Playa Carmen1Üse neu Frönd1

    Tag 197 - 199: Santa Teresa

    April 28 in Costa Rica ⋅ 🌧 27 °C

    Am nöchschte Tag hemmer nochem z'Morge üsi Sache packt, zwoi Chilis för üsi eiget Zocht metgnoh ond send zom nöchschte Hotel, em HolidayInn, gloffe. Det esch nämlech de Träffponkt för üses Shuttle gsi, wo üs, zäme met paar anderne vo San José diräkt of Santa Teresa zom Surfcamp sött brenge. Ofe erschti Bleck hend üs einigi vo üsne Metreisende de Iidrock gmacht, als giengemer ines Insta-Camp. Mol luege...
    Am halbi nüüni esch de Bus de ändlech cho, losfahre hemmer de aber noni grad chönne, wel d'Fahrer met de Mängi a Gepäck, wo 12 Mönsche halt so met sech füehred, chli öberforderet gsi send. Nochere Rondi Gepäck-Tetris of höchschtem Level eschs ändlech los gange. D'Strosse do send send ned super guet usbaut , dezue chond no die högelig Landschaft, was d'Höchschtgschwendigkeit do of öppe 70 km/h beschränkt. Ehnder gmächlech semmer drom of Puntarenas gfahre, wo mer ofene Fähri send, wo üs of de andere Siite vom Golfo Colorado in Paquera usegloh hed. Det hed weder en neue Shuttlebus of üs gwartet. Noch de agnähme Temperature of de Fähri esch mer sech i dem Auto aber vorcho wie imene Bachofe, wel d'AC ergendwie gsponne hed ond heissi Loft üs a d'Füess blose hed.
    Wo mer denn am Nomittag am drüü ändlech im Camp acho send, hemmer weder mol mösse of üses Gepäck warte. Zom Glöck esch die Verspötig "nor" emene Platte bem Gepäcktransporter gscholdet gsi. Mönd also ned nomol go Chleider iichaufe.
    Gsamthaft semmer öppe 35 Campteilnähmer, die meischte bluetigi Afänger. Die einzige Level 3-Fahrer im Camp send loschtigerwiis de Timo ond Pascal us Zöri. Nochem sehr feine z'Nacht hemmer üsi Campgspändli be Speli no chli besser könne glehrt.

    Erschti Surftag! Mer send i de Groppe A gsi, wo a dem Tag de früehchi Slot gha hed, was bedüüted, dass mer am Morge am viertel vor sächsi vorem Surfboardhüsli hend mösse sii, wo mer d'Boards zueteilt becho hend. Die send de verlade worde, mer send z'Fuess zom Playa Carmen gloffe, wo mer zerscht mol d'Theorie ond es Secherheitsbriefing gha hend, bevors is Wasser gange esch. Wels dodezue zerscht mol en 1:1 Betreuig bruucht hed, hend paar dosse am Strand mösse warte, bes sie dra cho send. Wenn mer de dra cho esch, eschs folgendermasse gange: Mer send zom Coach use gwatet, send denn ofs Board gläge, wo mer denn öber Wällene manövriert worde send, bes en geigneti cho esch. De hed üs de Coach rechtig Strand positioniert ond im rechtige Momänt en Schopf gäh. Üsi Ufgab esch denn gsi, of dem gleitende Brätt ufzstoh ond möglescht droffe z'bliibe. Gar ned so eifach, paar erfolgriichi Versüech hemmer denn aber doch gha.
    Noch ca. 2 h esch d'Groppe B dra cho, mer send zrogg is Hotel/Camp go z'Morge ässe. De Räscht vom Tag hemmer am Pool verbrocht met betzli Theorie, spöter de metere Poolparty.

    Am Mettwoch hemmer döffe "usschlofe" ond scho vorem surfe z'Morge ässe (Breakfast Burritos!), wel d'Groppe B dämol früeh esch go surfe.
    Wel d'Bedengige in Carmen ned so top send, semmer dämol zom Playa Hermosa, was e chorzi Fahrt metem Büssli bedüüted hed. Wel d'Hauptstross dör Santa Teresa grad ei riesigi Baustell esch, hemmer z'Fuess dem Shuttle mösse entgäge laufe, demet er ned öfter als nötig dör das Chaos fahre muess. Met schön beheizte Füess semmer in Hermosa acho, wo s'Tagesziel gsi esch, ohni Hilf vom Coach e passendi Wälle (mer fahred no Wiisswasser, d.h., d'Wälle hed sech scho broche) uszsueche, die z'verwötsche ond of dere bes zom Strand z'surfe. Au das hemmer paar mol rächt guet äne becho. Am Nomittag hemmer nomol en Theorieblock gha ond am Obig semmer m.o.w. alli zäme oswärts go ässe. De om die Johresziit typischi allobendlech Starchräge hemmer huutnöch z'gspöre becho, wo mer ohni Scherm, deför aber d'Handys wenigstens imene Plastiksack iipackt, hend mösse zrogg zom Hotel laufe. De Autofahrer of de Baustelle-Hauptstross eschs aber au ned besser gange. Froh hed chönne sii, wer en 4x4 met Schnorchel gha hed.

    Bilder vom Surfe hemmer leider keini, wel üs sträng empfohle worde esch, s'Handy ond alli Wärtsache dehei z'loh.    Read more

    See translation
  • 4/7- Wältreis

    Tag 200 & 201 : Santa Teresa

    May 1 in Costa Rica ⋅ ☁️ 28 °C

    Am 1. Mai semmer ned öppe of d'Stross, sondern eifach weder go surfe. Weder früeh, weder Playa Hermosa. Ziel: Korve fahre. Hemmer zwor einigermasse änebecho, Verbesserigspotential bestoht aber scho. Met de Skills "Boardkontrolle", "sälber Wälle ussueche ond fahre" ond "Korve fahre" wärdemer i d'Wiisswassersurf-Sälbständigkeit entloh, wo mer ohni Coach döfed go Wiisswasser surfe. Motiviert dör dä Erfolg, hemmer üs scho chli Gedanke gmacht, öb mer am Nomittag au no söled go surfe.
    D'Bedingige in Playa Carmen (einzigi Strand in Gehdistanz zom Camp) send aber ned so guet gsi, drom hemmers loh sii. Am Obig heds es Musigquiz gäh im Camp, wo üsi Groppe, au Dank üsne drüü Silversurfer Jeanne, Jana ond Janet us de USA, gar ned so schlächt debii gsi esch. Denn esch die letscht Kategorie vom Quiz cho, nämlech die zom entsprächende Lied passende Tänz z'tanze. De Macarena hemmer m.o.w. no chönne, die andere Lieder hemmer ned mol könnt. Mer "Alte" hend do vel Pönkt legge loh ond send am Ändi nor dretti worde. Paar send dör das Quiz offebar in Tanzluune versetzt worde ond im Aschloss no i Usgang, mer send aber is Bett.

    Am nöchschte Tag hed kei Surfonderrecht stattgfonde. Mer hend üs förne Tagesusflog zo de Isla Tortuga agmolde ond send zäme met 13 anderne usem Camp pönktlech am 07:45 parat gsi. Einzig de Paul schiints nächti z'weld trebe z'ha, är esch nämlech ned uftaucht. Met em Bus semmer zerscht of Montezuma gfahre, wo mer ofs Boot gwächslet hend. Rasant eschs öber s'Wasser gange, bes öpper plötzlech usgruefe hed ond s'Boot sehr schnell abbrämst hed. Delfine! Paar Minute lang hemmer dene schöne Tier chönne zueluege, de eschs wiiter gange. Be de Insle Alcatraz hemmer en natürleche Steiboge agluegt, während üse Guide üs öppis öber d'Natur of de Insle ond im Wasser verzellt hed. Nochhär semmer zonere Insle, wo sogenannti Spider Monkeys, bzw. Chlammeraffe, dehei send ond sech offesechtlech scho a Ananas-Lieferdienscht in Form vo Usflogsboot gwöhnt hend. Ond denn semmer go schnorchle. Hed Spass gmacht, aber kei Vergliich zo Indonesie (was sech sooo wiit wäg afühlt) 🙂
    Noch dere Aktivität hemmer üs üsi Mettagspause ond en Coco Loco redlech verdient gha! Do sone Tagesusflog zo de Isla Tortuga en beliebti Touristeaktivität esch i dere Region, semmer natürlech ned die einzige gsi, was People Watching par excellence bedüütet. Bsonders eine esch spannend zom beobachte gsi, wel är, in Badhose, Schwimmweschte ond Helm kleidet, wiene gstrandete Wal im Sand gläge esch ond sech vom Wasser omspüele loh hed. Mehrmols hed s'Wasser ehn vom Buuch ofe Rögge ond omgekehrt kehrt, einisch heds ne sogar fascht wäggspüelt. Nochdem mer lang gnueg glachet hend, hemmer üs de aber doch afo Sorge mache ond de Dani esch zo ehm äne gange go froge, öb alles ok seig. Die onfröndlech Antwort hed üs beruhigt wiiterlache loh. Är esch eifach nome betronke gsi.
    Noch de lange Mettagspause hemmer üsi Sache packt ond send weder met Boot ond Bus zrogg of Santa Teresa, wo mer de Räscht vom Tag gmüetlech am Pool verbrocht hend. Am Obig esch Movie Night agseid gsi. Velne hed "My Octopus Teacher" ned zuegseid, ond so semmer am Ändi nor drüü gsi, wo sech ofene Doku-Obig iigloh hend. Leider hed de Felm noch öppe 20 min gstockt ond wo sech vo de Camp-Verantwortleche niemer dem Problem agnoh hed, semmer halt au gange.    Read more

    See translation
  • 4/7- Wältreis
    De Dani ofem Surfboard i de erschte Woche1Danis Unfallstelle ohni WasserOnderwägs zo de neue Onderkonft, d'Stross emmer no halbe gfluetet vom nächtleche RägeHend Gsellschaft becho bem z'Nacht

    Tag 202-204: Santa Teresa

    May 3 in Costa Rica ⋅ ☁️ 28 °C

    Noch em Pausetag vo geschter esch weder surfe agseid gsi. Obwohl eigentlech jedi Person Afangs Woche es Surfboard zuegwese becho hed, heds es Dörenand met de Boards gäh, sodass d'Jasi ehres Brätt öpper anderem hed mösse öberloh ond stattdesse eis becho hed, wo düütlech grösser gsi esch als das, wo sie beshär gha hed. Das hed sech denn of die folgend Surfsession usgwörkt: D'Jasi esch die ganz Ziit gheit ond heds voll scheisse gfonde. De Dani hingäge esch wie emmer Herr der Wellen gsi. Am Nomittag hemmer üs met em Silvan, wo de Dani vom Schaffe här könnt ond sinere Frau, de Meli, troffe. Die beide läbed d'Hälfti vom Johr in Costa Rica ond hend üs vel öber s'Läbe do chönne verzelle.
    Wel mer jo jetz au sälber döfed go Wiiswasser surfe, hemmer de verpatzti Morge am spötere Nomittag weder welle guetmache ond send (met de rechtige Surfboards!) a Strand. Obwohl d'Bedengige ned so top gsi send - öberall am Strand heds grösseri Stei gha (mer hend üs paar mol d'Füess agschlage) ond mer rächt z'kämpfe gha hend met de stärchere Wälle do, esch die Session subjektiv gseh besser gsi als die vom Morge. S'Znacht heds hött weder oswärts gäh, dämol im "Kooks", wo leider düütlech wiiter wäg liid vom Camp als s "La Choza" vom letschte mol. "Leider", wel de allabendlech Rägegoss scho gliiner agfange hed ond mer, nochere 10-minütige Pause im Schärme, die letschte 300 Meter zom Restaurant im Sprint zrogg gleid hend. De Burger esch aber fein gsi ond ofem Heiwäg hed de Räge wenigschtens so wiit nochegloh gha, dass mer eifach hend chönne laufe. De starchi Räge hed aber en Schacht so gfluetet, dass es ofe erschti Blick wiene Glongge usgseh hed. De Dani esch det genau driigstande ond bes zo de Höfte i dem Schacht verschwonde. D'Schramme a de Höfte werd mer wohl no lang gseh...

    Und täglich grüsst das Murmeltier. Ufstoh, surfe, Räscht vom Tag met entweder läse, Podcast lose, bädele oder ässe verbrenge. Mängisch semmer im Lade no es Bier oder sösch öppis go chrömle oder au mol, wie a dem Nomittag, a Strand. Det send scho de Marien, Max, Simon, Charles, Leah ond Kelsey gsi, die einte am Surfe, die andere am Päusele oder met de Drohne am filme (Max). Mer send ned is Wasser, sösch hätts vo üs au cooli Ufnahme ofem Surfboard gäh (de Dani hät einewäg wäg de Schmärze ned welle).

    De Mäntig esch de letschti Tag gsi vom Surfcamp. Wel mer nor paar 100 m wiiter zöglet, hemmers ned so pressant gha met uschecke ond hend nomol rechtig bem feine z'Morgebuffet zuegreffe. Met de bede Franzose Max ond Marien ond de Kanadier Charles ond Simon, met dene mer üs guet verstande hend, semmer no chli hocke blobe, bes desi schliesslech ehres Auto bepackt gha ond sech ofe Wäg gmacht hend. Mer hend üs met üsne Rocksäck dör die müehsam Baustell kämpft ond send schliesslech be de Andrina ond em Jean acho, be ehrem Casa Calocita. Wel de Bau vo ehrem Huus no in vollem Gang esch, wohned au de Silvan ond d'Meli vorübergehend do, komplettiert werd de Huushalt vo drüü Hönd ond öppe 1'000'000 Mogge. Mer hend de Tag gnötzt, zom de Jasi es neus Bikini z'sueche, was gar ned so eifach gsi esch ond au för üs beidi no en Rashguard. So usgröschtet, semmer parat gsi för de morgig Surfonderrecht bem Dylan, wo mer s'erscht mol is Line up use wend, d. h., die rechtige Wälle surfe. Leider hed üs de Dylan in letschter Minute abgseid, was üs schlossändlech, of Empfählig vo de Andrina hii, zom Dennis gfüehrt hed. Är werd üs die nöchschte drüü Täg as "rechtige" Surfe änefüehre.
    Am Obig semmer go Tacos ässe ond hend e härzigi Tischnochberi gha.    Read more

    See translation
  • 4/7- Wältreis
    Di einzig Ufnah wo mer hend vo dene drü Täg stammt vom Dennis 😂 Surfspot Manzanillo

    Tag 205 - 207: Santa Teresa

    May 6 in Costa Rica ⋅ ☁️ 29 °C

    Am Ziischtig hed üs de Dennis of die 07:30 zo sech i d'Surfschuel bstellt. Die esch z'Fuess ca. 30 min wäg gsi, was mer förne schöne früehmorgendleche Strandspaziergang gnötzt hend. Sini Schuel esch grad am Playa Santa Teresa gläge, wo d'Grössi vo de Wälle üs scho zemmli Respäkt iigflösst hend. Zom Glöck hed er aber gmeint, dass mer ane andere Strand gienged, wo d'Wälle chli afängerfröndlecher seiged. Of de Hiifahrt hemmer grad no döffe zueluege, wiene Nasebär öberfahre worde esch...
    In Manzanillo acho heds zwor ruhiger usgseh, d'Jasi esch aber im Gägesatz zom Dani noni so öberzüügt gsi, öb sie wörklech is Line up use wel. Allfälligi Zwiifel send denn aber abegschlöckt worde, met ehne leider au vel Salzwasser. Während d'Jasi no demet z'kämpfe gha hed öberhaupt us de sogenannte Impact Zone, wo d'Wälle bräched, usezcho, hed de Dani bereits sin erscht Versuech i de grüene Wälle erfolgriich gmeischteret. Ändlech im Line up acho, hed de Dennis d'Jasi nochere chorze Verschnuufpause i ehri erscht Wälle gscheckt, was aber nor paar Sekonde lang guet gange esch. Nochem Storz is Wasser hed de ganzi Chrampf vom "us de Impact Zone use cho" weder agfange. Am Ändi vo de Surfsession send üsi Meinige öber s'Surfe diametral usenand gange: De Dani heds abgfiired, d'Jasi hed scho halbe as Ufhöre dänkt.
    Beidi semmer aber total müed vo dere Session gsi ond send is Hotel go schlofe. De Nomittag hemmer zerscht zom Plane im Co-Working Space vom Hotel verbrocht, aschliessend semmer a Strand. En chorze Stopp bemene Autovermieter hed üs zo de Idee verleitet, das Ganze doch online abzwickle, wel vermeindlech gönschtiger. Wir werden sehen...

    Neuer Tag, neues Glück. D'Jasi hed es grössers Board becho ond hed sech zerscht mol im Wiisswasser as neue Board gwöhnt ond neus Sälbstvertraue gholt. Ergendwenn hed sie sech denn weder use traut und siehe da: Erschti Wälle grad verwötscht ond bes a Strand gsurft. A dem Morge eschs för üs beidi guet gloffe ond d'Kokosnoss, wo üs de Dennis jewiils nochem Surfe spendiert, hed beidne gschmöckt.
    Wel d'Johresziit (Räge!) ond de generelli Strossezuestand üs chli veronsecheret hend, hemmer em Dennis sini Meinig welle wösse. Subaru Crosstrek vs. Toyota RAV4? Obwohl de Toyota ehnder en Stadt-SUV esch, esch das sin klari Favorit gsi. Met dere Empfählig semmer is Hotel zrogg, hend zomene verdächtig guete Priis online de Subaru (sorry, Dennis) gmietet ond 30' spöter feschtgstellt, dass im Versecherigsvertrag Costa Rica als Wohnsitzland agäh gsi esch, was jo ned stemmt ond d'Versecherig drom ongöltig. Ond do hend d'Problem agfange: Chondedienscht via Chat ond Mail versuecht z'erreiche, ned gange, telefoniere hemmer ned (nonig) welle. Wel mer no en Tag de Ziit gha hend, hemmer no abgwarted.

    Am nöchschte Tag weder go surfe, d'Erfolgsquote esch be beidne gfühlt ca. 70 % gsi, was jo ned so schlächt esch.
    Wel sech s'Mietautoproblem noni glöst gha hed, hemmer zrogg is Hotel pressiert ond hend zom Telefon greffe. Noch 40 Minute Warteschleife, wiitergleitet wärde, us de Leitig gheie ond weder warte, esch üs als Lösig abote worde: Neui Buechig via VPN mache ond de met de neue Buechigsnommere nomol alüüte, demets die alt Buechig gebührefrei chönd storniere (dezue muess mer säge, dass es gar ned üse Fähler gsi esch, sondern s'Buechigssystem - wohl wäg de IP-Adrässi - eifach automatisch Costa Rica als Wohnsitzland agnoh hed, was üs ned azeigt worde esch ond mer somet ned chönne hend ändere). Wo mer gseh hend, wie vel tüürer s'Mietauto met Schwiizer VPN esch, hemmer d'Stornierigsgebühr in Chauf gnoh ond das Ganze abbroche.
    Also nomol persönlech bem Autovermieter verbii. Das esch wenigschtens schnell ond onkompliziert gange, wenn au tüürer als ursprönglech erhofft. Do jetz d'Autofrog klärt gsi esch, hemmer aber de Grillobig met Jean, Andrina, Silvan und Meli chönne gnüsse.

    Was mer beshär nie erwähnt hend, aber was üse Alltag in Santa Teresa ab ond zue chli beiiflosst hed, send d'Stromusfäll. Kei Tag ohni, meischtens nor chorz, vereinzelt länger, was müehsam esch. Einisch i de Nacht sogar on-off, was üsi Klimaalag ständig meteme Piepston vermäldet ond üs so stöndlech gweckt hed.    Read more

    See translation
  • 4/7- Wältreis
    Emmer die Föteli med dene doofe Tafele
    En LandchrabbePlaya Cabo Blanco... ond die Ortsbeschreftige send au völlig sinnfrei. Ech weiss doch, wo ech be.Salto-Abgang2Am Timing muess no gfielet wärde...Ond wem die ghöred, weiss au niemer

    Tag 208 & 209 : Montezuma & Sámara

    May 9 in Costa Rica ⋅ ☁️ 29 °C

    Noch einehalb Woche Ufenthalt in Santa Teresa ziemmer hött wiiter. S'Auto hemmer zwor of die achti am Morge reserviert, en heftige Rägegoss hed üs aber de no e halb Stond im Hotel usharre loh, bevor mer los send. Bem Vermieter acho, hemmer es "Upgrade" becho: Die nöchschte 23 Täg wärdemer wie die gröbschte Sieche imene Toyota Hilux dör Costa Rica cruise. Bezöglech Grössi gar ned das, was mer üs gwönscht hend, deför aber zueverlässig, was do scho no wechtig esch. Zom a üses Zwöscheziel, de Cabo Blanco Nationalpark, z'glange, hemmer üs trotzdem före weniger abentüürlech Wäg im Landesinneri entschede. Mönd jo ned scho am erschte Tag s'Auto useme Floss bärge loh.
    In Cabo Blanco acho semmer ofem Wanderwäg i knapp zwoi Stond zomene Strand gwanderet. Die höch Loftfüechtigkeit ond di warme Temperature hend d'Wanderig ehnder onagnähm wärde loh, e chläbrigi Meschig us Moggemettel, Sonnecreme ond Schweiss hed üsi Huut bedeckt, wo mer ändlech de Strand erreicht hend. Bade esch det leider ofgrond vo de Wälle ned wörklech möglech gsi ond so hemmer die chläbrig Meschig met no meh Moggemettel ergänzt ond send weder zrogg.
    Tiersechtige hemmer leider ned so vel verschedni gha: Chrabbe (massehaft!) ond ei wiibleche Tuberkelhokko. Obwohl de Hokko en grosse Vogel esch, hemmers gliich ned gschafft, ehn z'föttele.
    Noch de Wanderig semmer wiitergfahre of Montezuma, wo mer es chliises Déjà-vu-Eläbnis gha hend: Ned nor semmer a üsem Tagesusflog of Isla Tortuga do scho verbii cho, nei, au de Typ, wo üs jede Morge vom Surfcamp zom Surfspot ond weder zrogg chauffiert hed, esch do ofem Trottoir sitzend sini Gitarre am spele gsi. Öb er do wohnt oder was de söschtig Grond deför chönnt sii, dass mer ehn in Montezuma aträffed, wössemer ned, mer hend ne ned agsproche.

    Nochere mässig erholsame Nacht (erschti Onderkonft in CR, wo kei AC im Zemmer gha hed) hemmer üs ofe Wäg noch Sámara gmacht. De diräktischt Wäg wär Rechtig Norde de Küschte entlang gsi. Scho i de Trocheziit esch dä Wäg, wo e Flossdörquerig beinhaltet, rächt abentüürlech. Jetz, Afang Rägeziit, hed üs de Silvan klar defo abgrote, det döre z'fahre. Obwohl - woner üs dä Rotschlag gäh hed, hed er noni gwösst, met was föreme grobe Charre mer wärded onderwäg gsi. Leider aber ohni Schnorchel, drom hemmer üs för die secheri Alternative entschede, wo met 161 km zwor dopplet so lang gsi esch, deför aber gliich lang duuret.
    Gäge Mettag semmer in Sámara acho, wo mer s'Zemmer im Hostel bezoge hend. Juhuu, weder kei AC ond no dezue keis Moskitonetz vorem Fänschter. Wenigschtens en Ventilator. Nocheme gsonde z'Mettag semmer a Strand, wo mer üs no es Surfboard gmietet ond üs abwächselnd im Wasser ustobet hend, bes donkli Wolche am Himmel üs zom Ufhöre zwonge hend.
    Z'Nacht hemmer imene Sushi-Restaurant gha, wo mer di einzige Gäscht gsi send    Read more

    See translation
  • 4/7- Wältreis
    D'Afahrt zom Näbelwald vo Monteverde
    Z'Nacht ofem Balkon vo üsem Hüsli. De Tucan esch scho lang wäg.Snail-eating snakeQuetzalWeisskehldrosselNachtigallMenelaus-Blaumorpho, leider scho chli ergraut.Agouti2En JasminNäbelwaldKolibriKolibriKolibriSiesta

    Tag 210 & 211: Monteverde

    May 11 in Costa Rica ⋅ ☁️ 18 °C

    Wie erwartet, esch au die Nacht ned so erholsam gsi. S'Zmorge hemmer in Gsellschaft vo Mogge zo üs gnoh, wobii die Tierli wohrschiinlech besser gsättiget de Tesch verloh hend als mer. Nocheme chorze Videogruess a üses Gwösse in Mönscheform semmer weder onderwägs gsi.
    De Ort Monteverde, üses Ziel före hötig Tag, hed sin Name wörklech verdient: Mer send gröschteteils imene Bärggebiet onderwägs gsi, d'Stross esch korvig ond teilwiis rächt steil, de Belag hed zwösche Asphalt ond Naturbelag ond allne Zwöschestufe gwächslet. Wo mer in Monteverde acho send, hemmer no Zuetate förs Z'Nacht iigchauft ond send no imene Kafi öppis go trenke, bevor mer üs zo üsere "Romantic Cabin", so zomindescht de Name vo de Onterkonft, begäh hend. Met dem Frachtschiff vomene Auto esch s'Iiparkiere bem Hüsli chli e Challenge gsi, dank Teamwork hemmers ohni Büüle oder Lackschade gschafft. Zom acho hemmer grad mol en Sott öbertoh ond während d'Jasi d'Maschine usgruumt hed, hed sech de Dani oms Ufgänke ofem Balkon kömmeret. Do rüeft er plötzlech: "Jasi, chom schnell! Do esch en Vogel meteme grosse Schnabel, aber kei Papagei!" Was er gseh hed, esch en Tucan gsi, d'Bezeichnig esch ehm i de Ufregig aber ned i Sinn cho. Leider esch er scho wäg gsi, wo d'Jasi esch cho luege.
    Wel mer för am sächsi scho e Nachttour buechet gha hend, hemmer früeh gässe ond send de zom Parkiigang gfahre. Üse Guide hed üs am Afang chli öber de Park ond sini Bewohner verzellt, de hed d'Suechi noch de Tierli agfange. Onter anderem Frösch, Chlammeraffe, e schlofende Kolibri, e Schlange ond en Oger-Spinne hemmer gseh, dezue no en biolumineszierende Pilz, Orchidee ond es verlassnigs Vogelnäscht met Ei. Mindestens so iidröcklech wie d'Tier hemmer d'Fähigkeit vo de Guides gfonde, i de Donkelheit die Tier z'gfende.

    Am nöchschte Morge semmer scho of die nöchscht Tour, dämol i de Hoffnig, paar tagaktivi Tier z'gseh.
    Als erschts hemmer grad es Quetzal-Wiibli gseh, eine vo de ikonischte Vögel in Costa Rica. Chli spöter en Crested Guan, wo d'Lüüt do früehner als "Soppe of zwoi Bei" bezeichnet hend, wel die Hüehnervögel so eifach z'foh send. Anderi Vögel send gsi: Goldhähnchen-Waldsänger, Weisskehldrossel, Kolibri ond Nachtigall. Au met zwoi Flögel, aber kei Vogel, esch de Schmätterling Menelaus-Blaumorpho gsi. Üses Exemplar esch aber wohl scho chli älter gsi ond scho nömm so chräftig blau. S'einzige Süügetier wo mer a dem Tag gseh hend, esch es Agouti wo üse Wäg gchrüützt hed ond schnell weder im Wald verschwonde esch.
    Noch de Tour hemmer üs sälber als Tierbeobachter versuecht, send aber ned so erfolgriich gsi. Die Suechi noch dene Tier esch zemmli ermüedend gsi, drom hemmer am Nomi nochem Bsuech vom Kolibri-Kafi eifach chli Siesta gmacht ond em Räge zueglost.    Read more

    See translation
  • 4/7- Wältreis
    NasebärSo wörd de Río Celeste normalerwiis usgseh...1... ond so jetz. De Dani esch not amused.De Vulkan Arenal schön i Wulche iipacktZ'Morge / Kafi Nr. 1Kafi Nr. 2Bem z'MettagDe Vulkan Arenal gäg de Obig

    Tag 212 & 213: La Fortuna

    May 13 in Costa Rica ⋅ 🌩️ 25 °C

    Scho glii hemmer üs ofe Wäg zom Nationalpark Tenorio gmacht. Dä esch bekannt för de Río Celeste, wo sin Name ofgrond vo de himmelblaue Farb vom Wasser becho hed. Je nöcher mer aber dem Park cho send, desto schlächter esch s'Wätter worde ond de erschti Räge hemmer de gha be üsem früehche z'Mettag am halbi elfi. D'Chällnerin hed üs no metleidig gfrogt, öb mer i Park weled ond de gmeint, dass de Floss im Momänt ehnder bruun anstatt blau werd sii. Das hemmer ofgrond vom Wätter au scho vermuetet.
    Do mer för dä Park d'Billett im Voruus muess chaufe, semmer trotzdem gange. Mer send noni mol 100 m gloffe, do send üs scho zwoi Nasebäre öbere Wäg gloffe. "Guete Start" hemmer üs dänkt ond send frohen Mutes wiiter. Leider esch tiermässig de nömme vel cho ossert paar Chäfer ond ei Kolibri. Au de Wasserfall hed met sinere "normale" Farb chli enttüüscht. De Wäg esch no chli wiiter gange, verbii anere Stell, wo Schwäfelgröch eim d'Nöchi vom Vulkan weder in Erennerig gruefe hend. Am Wändeponkt vom Wäg wörd mer be weniger Wasser gseh, wie zwoi Wasserläuf zäme chömed ond sech det dank ere chemische Reaktion d'Farb vom Wasser veränderet. Ofem Röckwäg hemmer no zwoi Tucane i de Färni gsechtet ond ghört ond send währed de Vogelbeobachtig met de Patricia, anere Wahllozärnerin, is Gspröch cho. Z'drette semmer weder a Usgang vom Park gloffe, wo mer nomol en Nasebär gsichtet hend ond wos aschliessend erneut paar Minute lang rechtig abegloh hed. Öbe zom vierte Mol a dem Tag.
    Mer hend üs denn vo de Patricia verabschiedet ond send nomol rond 1,5 h of La Fortuna wiiter gfahre. Det hemmer nor no üsi Onderkonft bezoge ond send imene Soda (lokals Resti) go z'Nacht ässe.

    De Räge hed üsi urspröngleche Plän före nöchschti Tag sprechwörtlech is Wasser gheie loh. Be Räge ond ohni Sicht of de Vulkan Arenal hemmer ned welle ine Nationalpark go wandere, imene Floss bade au ned ond en Wasserfall hemmer jo geschter scho gseh. Mer send also zerscht mol loszoge zom go z'Morge ässe ond de chli in La Fortuna go omelaufe. Bem zwoite Kafi wo mer ufgsuecht hend, hed sech d'Patricia dezue gsellt ond mer send be regelmässige Rägegöss verhocket, bes Mettag gsi esch ond mer üs ines Restaurant verschobe hend. Au det: Gredt, während mer druf gwartet hend, bes d'Sonne före chond, was leider nie passiert esch. Am halbi vieri semmer weder zrogg is Apartment ond send am Obig nomol z'drette go z'Nacht ässe. Ossert rede ond ässe hemmer a dem Tag ned vel gmacht, aber s'esch schön gsi.    Read more

    See translation
  • 4/7- Wältreis
    Aareis i Tortuguero Nationalpark
    Ara am ÄsseGrossi Ufregig vorem is Bett gohEn Sack Hond oder Chatz?... hemmer grad eine gchauft!1Rotaugenlaubfrosch1E Boa wiit obe im BaumEn Vogel meteme grosse Schnabel, aber kei PapageiFuultierBasilisk, au bekannt als Jesus Christ Basilisk, wel sie öbers Wasser chönd laufeWolfsspenne

    Tag 214: Tortuguero Nationalpark

    May 15 in Costa Rica ⋅ ☁️ 29 °C

    S'Wätter hed au am Donnschtigmorge noni werkli besser usgseh, wo mer üs of de Wäg Rechtig Tortuguero Nationalpark ufgmacht hend. Bevor mer La Fortuna verlo hend, semmer aber no go z'Morge ässe.
    Wo mer zom Auto zrogg cho send, hed üs öpper druf hiigwese, dass mer grad zemli Glöck gha heiged. So wie mer s'Auto parkiert hend, hätt üs en riese Buess droht, mer hend nämli grad gäge drü Gsetz verstosse:
    1. Mer send verchehrt ine Einbahnstross ine ond hend 2. s'Auto a eim vo de wenige Ort abgstellt, wo mer das ned darf, bimene Strosseegge. Zuesätzlech hed en gälbi Linie signalisiert, dass det es Parkverbot esch. Ned s'letschte Mol, wo mer a dem Tag Glöck gha hend :)
    Ohni Zwöschefäll semmer am halbi zwölfi bi de Fährstation La Pavona acho, meh als gnueg Ziit, bis d'Fähri am eis fahrt. Chorz drufabe semmer aber met de Fähri bereits onderwägs gsi. Wieso wössemer ned.
    En schöni Fahrt dör de Rägewald spöter semmer im Dorf acho. Üsi Onterkonft befendet sech aber osserhalb, us dem Grond hed üs de Willis IV, Sohn vom Bsitzer Willis III, det med sim Boot abgholt.
    Nochemene Begrüessigssaft hend mer üs zom Strand ufgmacht. De Wäg hed üs anere Horde Aras ond öberne Landebahn för Chliiflogzüüg gfüert.
    Aschliessend a Strandbsuech semmer am vieri medem Boot-Shuttle weder is Dorf, wo mer es früechs z'Nacht zo üs gno hend, do mer am sächsi en Nachtspaziergang medemene Guide buecht hend.
    D'Warteziit of d'Tour esch vonere sehr ahängleche Chatz verchörzt worde :)
    De Eddy, üse Guide, hed üs währed chli meh als zwoi Stond dör d'Gägend gfüehrt ond mer hend osserordentlech vel Tier gseh. Wie bereits gschrebe, hemmer üs au do sehr glöcklech gschätzt. Scho noch wenige Meter hemmer en Rotaugelaubfrosch gseh, gfolgt vomene Fuultier. Zo üsne Sichtige hend sech no diversi wiiteri Tier hinzuegsellt: drü wiiteri Fuultier, en Boa, zwoi Tucan, e Wolfsspenne, grossi Heugömper ond en grosse Leguan.
    Öberglöcklech, bi jetzt starchem Räge, hemmer üs nocheme wohlschmöckende Bier ond ere Kokosnoss zrog of de Wäg is Hotel gmacht.    Read more

    See translation
  • 4/7- Wältreis
    Leguan am Sonne tanke
    D'Jasi könnt jetz all Vögel vo Costa Rica...... de Dani ned.De Tiger Heron a.k.a Pianovogel esch sini Fädere am Tröchne.Zwoi jongi Tiger Heron (Marmorreiher of Dütsch)KaimanÄrdbeerfröschliDe schlofend ZwärgameisibärMenelaos-BlaumorphoAmeisistrossNomol en LeguanChlammeraffApèro

    Tag 215 & 216: Tortuguero

    May 16 in Costa Rica ⋅ ☁️ 26 °C

    Noch dere erfolgriiche Nachttour hemmer üs druf gfreut, was üs de Tortuguero NP am Tag alles bietet. Am früehche Morge semmer met paar anderne Hotelgäscht met em Boot ofe Floss ond hend zerscht mol osserhalb vom Park verschedeni Vögel, Chlammeraffe ond Leguane gsichtet. Wo mer denn offiziells Nationalparkwasser beträte hend, esch s'Sechte vo de Tier chli schweriger worde dör die dechter Vegetation.
    D'Tucane kristallisiered sech langsam zo üsne Wonschtier use, wel mer sie zwor scho paar mol chli gseh hend, aber eifach no nie so schön vo nöchem oder wenn, denn eschs donkel (Nacht) gsi. Au of de Bootstour hemmer Collared Aracaris gseh, die chliinschti Tucanart do, aber weder nor vo wiitem. Was mer deför us de Nöchi hend chönne aluege, esch en Caiman gsi, wo de Dani dank sim wache Blick gspotted hed. Of de Röckfahrt zom Hotel hed üs de Willis IV. no chli abgfrogt zo de Sache, wo mer of de Tour glehrt hend. Zäme hemmer sini Froge zo Affe, Leguane ond Tiger Heron (Marmorreiher) chönne beantworte ond so üses z'Morge verdiene.
    Nochere Pause semmer am halbi elfi all zäme weder is Boot gstege ond hend üs erneut zom Parkiigang loh fahre.
    Obwohl mer ofe Rot vom Willis III glost hend ond zueni Schueh agleid hend, esch das noch em Räge vo de Nacht doch ned s'passende Schuehwärch gsi. Praktischerwiis chamer det aber grad au no Gummistefle miete. Mer zwe üs also in gwohnt gmächlecher Manier ofe Jaguartrail begäh, während sech s'holländische Paar ond die spanisch Familie scho glii abgsetzt hend. Ehre Fähler, wel während mer ganz vel roti Frösch, en schlofende Zwärgameisibär, en "normale" Ameisibär, Chlammeraffe ond Blaumorphos gseh hend, hend sie üs vo ehrem Misserfolg brechtet. D'Holländerin hed aber es Video vo ehrem Maa amene Baum hangend gmacht ond gmeint, sie heig deför e sältni Fuultieronderart gseh.
    Im Dorf hemmer no z'Mettag gässe ond send de weder abgholt worde. Am Nomittag ond Obig hemmer eifach gläse ond send am Strand go jogge.

    Noch Nachttour, Bootstour ond Jaguartrail hemmer en andere Teil vom Nationalpark welle go aluege. D'Patricia, wo mer in La Fortuna könneglehrt hend, esch i de Zwöscheziit au in Tortuguero acho ond so hemmer üs förne Bsuech vom Cerro Tortuguero verabredet. S'Shuttleboot hed üs praktischerwiis grad bem Hotel abgholt ond paar Minute spöter semmer alli bem Henderiigang vo dem Nationalparksektor abgsetzt worde. Dank Charteapp ofem Handy hemmer gwösst, wele Wäg wo döre goht ond hend üs entschede, zerscht ofe "Gipfel" ufezlaufe, wel de Himmel chli noch Räge usgseh hed. Weder hemmer roti Frösch, Eidechse, Leguane, Spenne ond en Schlange gseh. Leider au Hönd, paar met ehrne Bsetzer, zwoi send sälbschtändig onderwägs gsi ond hend üs wohrschiinlech alli Weldtier vertrebe... Ämu e Chatz hed eine ufe Baum ufegschüücht, was zonere absurde Situation gfüehrt hed: Jetz reisemer ine costaricanische Nationalpark zom gseh, wiene Chatz apisst im Baum hockt ond de Hond am Bode de Baum abällt.
    Met em Boot eschs weder zrogg gange ond mer hend chli Ziit am Pool verbrocht. Am vieri hemmer üs före is Dorf schippere loh, wo mer nomol met de Patricia abgmacht hend. Zerscht heds zom Apèro en Coco Loco gäh, aschliessend semmer no zäme go z'Nacht ässe. S'Retour - Shuttle zom Hotel hemmer drom verpasst, aber so hemmer d'Chance ofene "romantische" Spaziergang in stockfinsterer Nacht becho. Naja, met Handyliecht ofeme Wäg laufe, wo links ond rächts Dschungel esch, esch ned so romantisch. Schlemmer eschs allerdings am Strand, wel das Liecht so vel Insekte azieht, dass mer nor met wiit usgstrecktem Arm laufe cha. D'Abzwiigig zom Hotel hemmer zom Glöck guet gfonde ond hend denn chönne go schlofe.    Read more

    See translation
  • 2025© FindPenguins
  • Home
  • About us
  • Group Tracking
  • Press
  • Terms
  • Privacy Policy & Cookies
  • Help Center
  • Legal notice