Patate

Ich bi wie erhofft fit :) Leider isch s'River Rafting usbueched drum gangi hüt scho go chlettere und hoffe s'Wetter hebed. Es gseht scho zimli bewölkt us. Zunere Ziit meiner Wahl chani mi im Hostel abhole lo. Das isch denn schliessli am 10ni. Ich wirde mitem Auto zum Büro vom Abüter gfahre und chume dete Chletterfinke und en Guide über (wo zimi nume Spanisch redt). Er meint, dasmer mitem Töff zum Spot gönd. Wie bitte? Hocke ned sonderlich gern hine ufeme Töff aber was wetti... Unterwegs lademer na di restlich Usrüstig uf und erreiched unfallfrei und sicher d'Chletterwand. Ufem churze Spazierweg pflückemer na frischi Mandrindli als Snack🤭 Und denn gohts au scho ad Wand. Es chömed denn au na zwei anderi Lüt, was en längere Ufenthalt für mich bedüted :) Ich han wele mitere eifache Route afange aber de Angelino schiint mich masslos z'überschätze. Ich schaffes kei 5 Meter höch und bi zimli frustriert. Au di zweit Route isch ned viel besser. Was häter sich überleit...? Bi bitz hässig und segem das denn au. Dementsprechend wechslemer tatsächlich a di eifach Wand und ich han endlich au viel meh Spass und Erfolg :) D'Ziit rast und womer denn na zude spektakulärste Route gönd isch scho drü und es fangt a niesle. Zum Glück ischs überhängend und de Guide git namel sis beste. Für all andere isch das aber definitiv z'heftig - es schöns Plätzli ischs trotzdem :)
Zrugg ufem Töff regnets scho zimli fest. De Angelino und ich gönned eus ufem Zruggweg na es Empanada (han zum Zmittag nume Mandrindli und Banane gesse), mached bi ihm dehei e Wohnigsbesichtigung zum Material ablade und hend so eusen Spass wil er mich mit vorgspielte "mir-gheied-jetz-denn-um" Manöver ärgered...
Im Hostel lerni mini neue Zimmerkollege kenne. Schiined lustigi Lüt z'si aber ewigs chani ned rede, han zum Znacht mit de Schwiizerinne bim Venezualer abgmacht. Es isch es lustigs Znacht, bevori de Rest vom Abig mit verschidenste Lüt ide Hostelbar verbringe und denn müed is Bett gange, wo all andere id Stadt wiitergönd 😇Read more