Puerto Escondido

Die ganz letscht wuche hemmer imne spanisch- und surfcamp verbracht. Gschlafe hemmer inme hotel, well d unterkünft vom camp scho usbuecht gsi sind. Es esch ganz ungwohnt gsi weder mal so e greglete tagesablauf z ha, immer s gliiche, wüsse was eim erwarted 😅
Üsi täg händ wie folgt usgseh:
Am 5.40h lüüted de wecker. Mer kämpfed üs ohni vill z rede usem bett ond is badzüg ond schliched denn liislig usem hotelzimmer, verbi a de huuseigene bäckerei wo mer gsehnd wie s brot bached wird womer spöter zum zmorge wärded ässe 🤭
Mit üsem roller, em roberto, fahremer dur die dunkle strasse zu de surfschuel ond am 6.15h hockemer scho im büssli wo üs a strand fahrt. Mit em erste tagesliecht möchemer üs ready ond stürzed no vor sunneufgang id wälle. De grossi vorteil a dere uhrziit: es hed no ned so vill lüüt. D luft esch no rächt früsch aber s wasser deför agnähm warm. Abwächsligswiis paddlemer zu üsem surflehrer wo üs tipps gid, hilft uszsueche weli wälle mer söled näd ond üs wenn nötig no chli id wälle schüpft 😉 währedem warte chammer die wondervolle farbe churz vorem sunneufgang bewundere: rosa, rot, orange, gälblich, alli blautön. Im hintergrund gsehd mer schemehaft die hügelig landschaft vom festland, devor die letschte liechter vo de schlafende stadt. Immer wieder stürzt sich e pelikan zwüsched die wartende surfer ond schnappt sich e fisch. Vill ziit zum all das gnüsse bliibt aber ned, d wälle send eifach z phantastisch! Es esch en pointbreak, alli wälle bräched schön am gliiche ort vo rächts nach links wäg. Sobald die erste sunnestrahle über de nächst hügel chrüücht chömed au scho wiiteri surfschuele ond langsam werds voll ond mer muess ufpasse dass mer niemert umfahrt (oder umgfahre werd 🤭).
Aschlüssend fahremer zrug id surfschuel ond mitm roller weder is hotel. Det geds zerst mal e warmi duschi ond denn es usgiibigs zmorge. Es esch erst halbi 10ni, mer müend erst am halbi 1 im spanisch si, also gönnemer üs nachem zmorge no en siesta - so früeh ufstah esch sträng 😅
Churz vorem 12i möchemer üs mit em roller uf id stadt. De erich chauft sich e kaffi, ich e früsch presste fruchtsaft. So möchemer üs ufe wäg id spanischschuel. 2 stund mit me privatlehrer: vill rede, vill läse, vill grammatik. Aschlüssend esch üses "pflichtprogramm" erfüllt ond mer gnüssed de namittag: a strand, i pool, go e märt bsueche, grossi wälle go aluege...jede tag öpis anders. Um die 6i gömmer zrug is hotel go dusche ond aschlüssend z fuess (ja mer send sehr vernünftig - don't drink and drive) id stadt go znacht ässe, mängisch ellei, mängisch met lüüt vo de surfschuel.
Denn hauemers id fädere well mer am nächste tag weder frürh use müend.
Es esch e mega tolli wuche gsi! Jetzt höcklemer no es letschts mal am strand bevors de mitm nachtbus (sorry erich!) uf oaxaca gad 😊 Czytaj więcej