Kaimū

Der Marc und d Raven si super Gastgeber. Si hei hie ires chline Paradies erschaffe und verwöhne üs mit feine Frücht, interessante Gschichte und guete Reisetipps. Im Jahr 2018 hets allerdings genau hie e grosse Vulkanusbruch gä und vo dem Schock het sich ömu der Marc nie ganz erholt. Verständlich: Rund herum hei ihri Fründe ihri Hüser verlore und si wegzoge. Di troumhafte Stränd, wo der Marc als Coast Guard gschafft het, gits nüm. Dert isch itz e Lavawüeschti. Der Kīlauea isch der Vulkan, wo sit 1983 ununterbrochen aktiv isch. Er het so viel Leid agrichtet. Der Marc het gmeint, es sig ds viel Lava für eis Mönscheläbe. Bis im 2018 sigs immer e "sichere" Vulkan gsi. We denn e Lavastrom is Meer gflosse sig, heig me d Grossmuetter ar Hand gno und sig häre glüffe, um das Schouspiel vo nächster Nächi ds bewundere. Bim Usbruch 2018 sigs ganz anders gsi. Da heige d Mönsche ihres Daheim innert Sekunde müesse zrügg lah.
Genau dä Kīlauea simer i Volcano Nationalpark ga bestune. U da me d Lava ersch bi Dunkelheit guet gseht, simer zersch no anes paar Stränd gange. Zersch a South Point, der südlichst Punkt vo de USA, när a Green Sand Beach. Um zu däm anedscho, simer e halb Stund hinger ufeme Jeep mitgfahre. Mir hätte o chönne loufe, üs isches aber ds heiss gsi. Dä grüen Sand isch echt speziell gsi, aber nur schwierig uf Föteli festdshalte. Schliesslich simer o no ane Strand mit schwarzem Sand gfahre, wo e Schildchrott am pfüsele isch gsi. Am Punaluʻu Beach wäre mir gärn no länger bliebe. Aber das scho fasch am Idunkle isch gsi, heimer witer müesse, sodass mer am Abä am 8i de d Lava hei chönne luege.Okumaya devam et