Tetapkan semula carian
Costa RicaCosta Rica
SatelitSunting laluan

Costa Rica

Januari - Mei 2023
Pengembaraan 133hari oleh Riccarda Baca lagi
  • 49footprint
  • 3negara
  • 133hari
  • 369gambar
  • 60video
  • 16.0kkilometer
  • 14.9kkilometer
Ikuti Kalendar Kongsi Senarai baldi
Tarikh menaik
  • PengembaraCosta Rica
    Hari 30

    Uf e Märt in Alajuela

    4 Februari 2023, Costa Rica ⋅ 🌩️ 24 °C

    Endli Wochenend! D Uni do esch zwor ned so sträng, aber trotzdem freued mer eus natürli wenn Wochenend esch. Vonere Professorin wo mer scho us Lund kenned esch eus de Märt in Alajuela empfohle worde. Drom hemmer eus am Morge direkt uf e Weg gmacht. Alajuela esch näbe Heredia eini vo de grosse 'Vorstädt' bi San José. Das mer chli schneller vorwärts chömid hemmer es Uber bstellt wo eus direkt zom Märt gfahre hed. Det acho semmer werkli ned entüscht worde. D Halle esch riesig gsi ond öberall send Tesch voll met frösche Fröcht ond Gmües gsi. Es paar Sache hemmer vo Europa oder vo eusne erste paar Woche do kennt, es paar anderi Sache send komplett neu gsi. I aller rueh semmer dor alli Ständ dore gloffe ond hend ab ond zue natürli au öpis gchauft. Wo alli eusi Täsche voll gsi send hemmer eus no öpis chlises zom Zmittag gchauft. A eim Stand heds en Art Empanadas gäh (das send Teigtäsche wo ursprönglech us Argentinie chömid, veli Länder hend aber eri eigeti Art wo so ähnlech esch). Die vegetarisch Version esch met Härdöpfel Föllig gsi ond sie esch sehr fein gsi. Nor s Ztrenke wos dezue gä hed esch e chli e Flop gsi. Serviert eschs ned im ne Bächer worde sondern im ne Plastiksäckli ond es hed zemli secher ned meh als Zocker ond Chemie denne gha.. Nochem Märt hemmer de Bus zrog uf Heredia gno ond hend för es bezli ide Wohnig entspannt. Am Obe goz de no wiiter uf San José wo mer mol s Usgangsviertel gönd go erkonde.Baca lagi

    Lihat terjemahan
  • PengembaraCosta Rica
    Hari 34

    Kaffi, Kaffi, Kaffi!

    8 Februari 2023, Costa Rica

    Höt hemmer eusi ersti Usflog met de Uni gha. E Professor wo Theme zo Kaffi ontersuecht hed eus metgno zo de Kooperative Tarrazu. Das esch e relativ grossi Kaffikooperative ide Bärge südlech vo San José. D Fahrt hed rond 2 Stond dured. Dass mer vor de grosse Rushhour us San José use cho send hemmer am 5.45 Abfahrt a de Uni gha. Das heisst de Bus am 5i vo eusem Airbnb ad Uni. Es esch scho chli früeh gsi, aber es hed sech absolut glohnt. D Fahrt esch wonderschön gsi. Am Afang hemmer e riise Ussecht öber die ganz Stadt ond alli Vorstädt gha. Spöter semmer de rechtig ide Bärge gsi wo mer nor ab ond zue dor es chlises Dörfli cho send. Ond trotzdem hed mer emmer ond öberall gseh dass d Lüt im Gebiet sehr aktiv send. Praktisch jede Hang esch voll vo ergendwelcher Landwirtschaft gsi. De grösst Teil esch secher Kaffi gsi. Aber well Kaffipflanze setted Schatte ha werd Kaffi hüfig zäme met Platanos (Kochbanane) oder anderne Produkt wo uf höchere Bäum wachsed zäme apflanzt. Ech has allgemein rächt idröcklech gfonde wie vell i dere asprochsvolle Bärggägend produziert werd. Chorz bevor mer bi de Kooperative acho send hemmer no imne chline Restaurant halt gmacht. Die wo hend welle hend chönne öpis Zmorge näh, ech ha eifach es grosses Kaffi gha. Au us dem Restaurant hed mer e wonderschöni Ussecht uf die omlegende Bärge gha ond d Loft hed noch frösch gröstetem Kaffi gschmöckt wo d Bsetzer vom Restaurant im Nochbergebäude selber produziered. Gstärcht semmer de zom Hauptsetz vo de Kooperative. Det hemmer zerst öpe e Stond e Präsentation öbercho das mer d Hintergrönd vo de Kooperative chli besser kennelered. Dezue heds natürli es Kaffi ond öpis Spitzbuebe ählechs gä. Ond nocher hemmer de entli öpis chönne go aluege. Öpis speziells vo Kooperativene esch dass sie ned nor zäme Kaffi produziered sondern de Mitgleder au no anderi Sache bieted. Mer hend de Supermarkt, e Lade met vell Maschine, e Lade met Handwerksache ond eine met Dünger etc. wo sie selber produziered chönne aluege. Denn semmer metem Auto es paar Minute witer gfahre ond hend det chönne luege wie d Schale vo de Kaffichriesi tröchnet werde (us dem gez spöter Dönger). Direkt näbe dra heds Kaffipflanze gha ond mer hend alli es paar Kaffichriesi chönne id Hand näh. Mer Hend sie au uf do ond denne d Kaffibohne gseh. Ond wenn mer d Kaffichriesi abschläckt send sie enne ganz Süess :). Grad im Hus näbedra esch s Labor gsi wo Dünger hergstellt werd wo perfekt uf d Bodequalität vo de Region abgstemmt esch ond wo ohni schädlichi Chemikalie zrächt chond. E Mitarbeiteri hed eus det e chli meh verzellt. Ufem Weg zrog zom Hauptsetz hemmer vo osse gseh wo de Kaffi tröchnet ond för e Export verarbeitet werd. Wäge ergendwelche Richtlinie hemmer aber leider ned ine döffe. Do semmer alli es bezli entüscht gsi. Die Entüschig hemmer aber am Nomitag chönne kompensiere. Mer send nämli no zom ne Mikroonternähme gange, aso e ganz e chline aber onabhängige Kaffiproduzent. Zerst hemmer det s traditionelle Zmittag öbercho wo Arbeiter amig uf de Kaffiplantage essed. Ond denn hemmer alli Schrett chönne go aluege. Mer hend gseh wo de Kaffi gwoge, sortiert ond gwäsche wird. De hemmer gseh wo er tröchnet wird. Es ged verschednigi Methode: natürlech, Honig ond gwäsche. För e natürlech Kaffi werded die ganze Kaffichriesi tröchnet, för e Honig Kaffi wird nor die össersti Schale wäg gno (d Kaffibohne cha de s süesse vo de Frocht bim Tröchne ufnäh ond drom heisst er Honig Kaffi), ond före gwäschnig Kaffi wird nor d Bohne tröchnet. Die tröchnete Bohne werded de metere Maschine noch grössi (=Qualität) sortiert ond i Säck abpackt. De meisti Kaffi werd als ‘grüene Kaffi’ exportiert ond de i andere Länder wie ide Schwiz gröstet. Vo dem Onternähme sends nor 7% wo för e Costa Ricanisch Eigeverbruch send, ond das esch meistens de Kaffi met de schlechter Qualität. Das hani chli schad gfonde, dass mer im ne Land wo so guete Kaffi produziert werd nor schlechtere Kaffi trenkt… Am Schloss vo eusere Tour hemmer no die drü Arte (natürlech, Honig ond gwäsche) chönne probiere. Ech ha de natürlech am liebste gha ond de Honig Kaffi öberhaupt ned. För mech escher eher suur als süess gsi. Ech ha au no d Chance packt ond ei Packig Kaffi postet. Die werd am 18. Mai im Länzehof serviert ;). De esches au scho weder ufe Heiweg gange. Das mol ben ech vore ghocket ond ha no chli chönne Spanisch üebe ond glichziitig die wonderschön Ussecht gniesse.Baca lagi

    Lihat terjemahan
  • PengembaraCosta Rica
    Hari 35

    Pflanze ond Schmetterling

    9 Februari 2023, Costa Rica

    Am zwöite Tag vo eusne Uni Usflög hemmer am Morge e Zierpflanzefarm ond am Nomi en Schmätterling Zucht agluegt. D Pflanzefarm esch am nördleche Rand vo Heredia (d Vorstadt vo San José wo mer wohned) gsi. Ganz i de Nöchi esch de Vulkan Barva, drom esch au de Bode sehr nährstoffrich. Die ganz Farm bestod us vellne lange Beet met verschednige Pflanze. Leider esch för die meiste grad ned Blüeteziit gsi, trotzdem sends aber schön gsi zom aluege. Verchauft wärded sie je noch Sorte zwösche 10 ond 50 Rappe pro Pflanze ond e grosse Teil god uf Amsterdam ond werd denn vo det in Europa verteilt. Alli Pflanze wo det abaut wärded werded ohni Pestizid etc. ahbaut. Stattdesse stelled sie ehre eigeti Dünger met Mikroorganisme här wo genau uf dä Bode abgstomme esch. De Bsetzer vo de Farm hed eus öberall dore gfüert ond eus alli einzelne Schrett erklärt. De wechtigsti Schrett vo de Produktion send tatsächlech die wo am Schloss d Pflanze usenand nämid, potzed ond denn entscheided welli gnueg guet send före Export ond weli ned. Verpackt werded sie ohni Wasser inere Schachtle ond werded nocher metem Flogzüg a eri Destination transportiert. Mech heds erstunt dass d Pflanze ohni Problem es paar Täg chönd ohni Wasser ond Liecht imne Kartong öberläbe. Bevor mer eus weder ufe Wäg gmacht hend hemmer no e Snack met vellne Fröcht ond Kokosnuss zom trenke öbercho. Denn semmer i es chlises Restaurant wiiter obe am Bärg go Zmittag ässe. S Restaurant esch de Vorschlag vo eim vo de Professore gsi wo det i de Nöchi wohnt ond es esch definitiv e super Tipp gsi. D Terasse esch scho halbe im Wald gsi, mer hend Bsuech vomne Eichhörnli öbercho (es hed anschinend gwösst dases emmer e Snack öberchond..) ond s Esse esch mega fein gsi. Ech ha chlini Tortillas metere Härdöpfelföllig gha. Ond a allne Wänd hend Gäst e chlini Nochrecht uf Notizzätteli henderlo. Guet gstärkt semmer de wiiter zo de Schmetterlingfarm. I drü Zelt send det verschednigi Arte Schmetterling gsi. D Farm zöchted det neui Raupe/Schmetterling ond dued au Schmetterling wo stärbed so zuebereite dass sie nocher i Musee chönd usgstellt werde. Es esch rechtig entspannend gsi i dene Zelt omezspaziere ond d Schmetterling z beobachte. Ganz bsondrig send die grosse, blaue Morphos gsi. Das send lüchtend blaui Schmetterling wo handflächegross werded. In Manuel Antonio hani scho eine i de Wildniss gseh, aber do hed mer sie nomol ganz in Rueh ond ganz nöch chönne beobachte.Baca lagi

    Lihat terjemahan
  • PengembaraCosta Rica
    Hari 36

    ESPH Heredia

    10 Februari 2023, Costa Rica ⋅ ☀️ 22 °C

    Es bezli onerwartet hemmer gester erfahre dass mer au höt no en Usflog vo de Uni hend. Das Mol esches zo de Firma gange wo för d Wasserversorgig im grösste Teil vo de Städt ond Dörfer ide Omgäbig zueständig esch. D Tour hemmer vo eim öbercho wo i mim erste Johr z Schwede au a dem Ustusch metgmacht hed, nor omgekehrt, ond vo Costa Rica es Semester uf Lund cho esch. Met ehm semmer verschednigi Tanks ond Quellegebiet go aluege wo s Wasser för die velle Hushält lefered. D Mängene vo Wasser ond die abglägne Ort wos här chond send beidrockend gsi. Zmetzt im Wald, ganz abgläge vom nöchste Dorf heds riesigi Rohr gha wo komplett met Wasser gföllt gsi send. Mer hend au glehrt wie klar s Wasser vo Natur us esch in Costa Rica ond was för Vorschrefte müend ighalte werde dass d Ökosystem i dene Gebiet no gnueg Wasser hend. Noch dere Tour hemmer alli zäme no es spots Zmittag gno. Mer send imne super Restaurant gsi ond hend det entli die karibisch Variante vo 'Rice and Beans' chönne probiere. Es esch sehr fein gsi.Baca lagi

    Lihat terjemahan
  • PengembaraCosta Rica
    Hari 37

    Sightseeing i de Näbelsoppe

    11 Februari 2023, Costa Rica ⋅ ☀️ 13 °C

    Am Wochenend hemmer d Ziit welle nötze zom öpis vo Costa Rica z gseh. Relativ nöch vo San José heds mehreri Vulkän ond mer hend eus entschede i Vulkan Poas Nationalpark z goh. Es hed ei Bus he ond ei Bus zrog gha. Wel mer met dere Verbendig aber nor 1.5h im Nationalpark gha hät hemmer eus entschede chli früener es Taxi he ond de de Bus hei z näh. Die ganz Fahrt hed de doch es Wiili dured ond mer send ganzi 90 Minute onterwegs gsi. Deför esch d Ussecht rechtig schön gsi. Mer esch dör högligi Gebiet gfahre wo ganz vell Kaffi about werd ond a gwössne Ort hani mi sogar fast wie i de Schwiz gfühlt. Au die andere hend gseid dases rechtig wie i de Alpe usgsed. Je nöcher mer eusem Ziel aber cho send, desto näbliger esches worde ond mer hend langsam chli Angst gha das mer schlossendlech gar nüd gsehnd. Aber mer hend versuecht de Muet ned z verlüre. S Taxi hed eus am Igang vom Nationalpark usegloh ond langsam hemmer eus ufe Wäg rechtig Krater gmacht. Erwartet hemmer e Wanderweg wo vellecht zwöschedenne au chli asprochsvoll esch ond mer öpe mol is Schnufe chond. Es esch aber alles e breiti, asphaltierti Stross gsi wo sogar Autos hätted chönne drof fahre. Ond acho am Krater hemmer tatsächlech rein gar nüd gseh. Mer send i de deckste Nebelsoppe gsi ond mer hed ned emol chönne erahne wo de Kratersee wär. De einzig Hewis dases de Vulkan werkli ged esch de Schwefelgroch gsi wo mer zwöschedenne gschmöckt hed. Näb de grosse Stross wo mer ufem Hewäg gno hend heds au no e chlinere Trail gäh wo öber en Omweg dor de Wald weder zrog zom Igang gfüert hed. Dä esch eigentli ganz schön gsi ond mer hend au es paar härzigi Tier (zom Bispel Kolibris) ond beidrockendi Pflanze gseh. Aber so lang esch dä de doch au ned gsi ond mer hend denn glaub verstande wieso mer metem Bus nor 1.5 Stond Ziit hed im Park. Das hätti definitiv glänged. Aber naja. Mer hend eus d Ziit no bimne Kaffi vertrebe ond send denn ufe Bus. Alles i allem esches trotzdem e schöne Tag gsi, aber d Erwartige hend scho chli anders usgseh. Weder acho ide Stadt hemmer gmerkt wie gross de Temperaturontersched esch. I de näblige Bärge hemmer fast chli gfrohre ond donne semmer weder i de pralle Sonne gsi. Bevors hei gange esch semmer imne chline Restaurant go Pattys ässe. Das send gföllti Teigtäsche wo i de Karibik verbreitet send. D Bsetzer vom Restaurant send rechtig sympathisch gsi ond hend euses Ässe met ganz vell Liebi zuebereitet ond es esch echt fein gsi! Mer hend sogar no e chlini Vorspiis dezue öbercho wel mer gester scho det hätted welle go Ässe, sie aber kei Pattys me gha hend. D Vorspis esch e Salot imne chline Nachos Päckli gsi. Ech glaube das esch do no verbreited dass sie anderi Sache ines Chipssäckli dezue ine düend ond de det drus löffeled. Es esch ned schlecht gsi aber scho chli speziell. De Obe hemmer de gmüetlech dehei verbrocht. Morn goz jo de au scho weder a nöchsti Ort.Baca lagi

    Lihat terjemahan
  • PengembaraCosta Rica
    Hari 38

    Es regelrechts Wohnigs-Upgrade

    12 Februari 2023, Costa Rica ⋅ ☀️ 21 °C

    Höt esch weder en Omzog agstande. Wel mer ursprönglech ned gwösst hend wie lang mer in San José send hemmer euses AirBnb chli zwenig lang gmieted ond hend för es paar Täg no es anders brucht. Die neu Wohnig esch imne grosse, moderne Hochhus z San José. D Isabel ond d Marie hend eri erst Nacht z Costa Rica scho i dem Gebäude verbrocht, mer andere send aber grad chli erstunt gsi was eus erwartet hed. S Hus esch rechtig modern ond hed vell Gmeinschaftsbereich wo mer au döfid metbruche. Dezue ghöred es Coworking Space, es Fitness, e Poolterrasse, e Yoga Room ond e Dachterrasse im 29. Stock. Eusi Wohnig esch im 27. Stock ond mer hend e top Ussecht öber die ganz Stadt. Zom Znacht semmer nomol i die chli 'Food-Mall' wo velli chlini Restaurant e Stand hend. Det semmer letzt Samstig vorem Usgang scho gsi. Au das Mol esch s Esse weder top gsi. Ech ha de Nochteil dasi ufem Sofa mues schlofe. Aber deför hani vor mer es riesigs Fenster met Ussecht uf die ganz Stadt. Ech freu mi scho morn met dere Ussecht z verwache. Guet Nacht!Baca lagi

    Lihat terjemahan
  • PengembaraCosta Rica
    Hari 41

    Die letzte Täg Stadtläbe

    15 Februari 2023, Costa Rica ⋅ ☀️ 22 °C

    Eusi letzte Täg z San José send relativ ruhig gsi. Mer hend vell a eusne Masterarbete gschaffed. Mängisch semmer i obersti Stock vom Hus is Coworking Space, mängisch semmer aber au i eis vo de härzige Cafés wos i dem Quartier ged. Natürlech hemmer au vom Pool, vom Fitness Center ond vom Yoga Rum (au im 29. Stock met grosse Fenster) Gebruch gmacht. Mer hends nomol so rechtig gnosse well morn goz jo scho ab ufs Land ond det werded mer wahrschindli ossert Natur ned so vell ha. Fast jede Tag hemmer gmüetlech zäme öpis gchoched. Ond am Valentinstag heds för alli selber gmachti Härz-Pancakes gä. Am letzte Obe semmer aber no i ned schöns, traditionells Restaurant go ässe. S Esse esch au det weder super fein gsi. Jetzt gniessemer nomol die schön Ussecht ond send gspannt was mer morn alles erlebed ond wies eus de im neue Dehei gfallt.Baca lagi

    Lihat terjemahan
  • PengembaraCosta Rica
    Hari 42

    De Tag esch cho, es god uf Hojancha!

    16 Februari 2023, Costa Rica ⋅ ☀️ 28 °C

    De Tag esch cho wo mer endlech uf Hojancha wiitergfahre send. Fast es Johr hemmer ez stets vo Hojancha ghört, met Lüt vo det telefoniert ond eus Gedanke gmacht was mer det genau wettid ontersueche i eusere Masterarbet. Am Morge beni scho chli ufgregt worde. Vor allem hani eigentli ghofft dases mer de au werkli gfallt wenn mer acho send, wel do wärdemer die längsti Ziit verbrenge. Als ersts semmer metem Taxi ad Uni. Vo det hend eus zwöi Professore, je met eim Auto, begleitet. Die ganz Fahr esch öpe 5 Stond gange. Zwöschedenne hemmer recht beidrockendi Ussechte gha, ab ond zue semmer aber au fast chli iignickt. Om d Mettagsziit hemmer imne chline Restaurant halt gmacht ond öpis gässe. E zwöite Stop hemmer no am Fluss gmacht wo d Halbinsle vo Guanacaste (de Kanton wo Hojancha denne esch) vom Rest vo Costa Rica trennt. Mer send mehrmols druf hegwese worde ned z nöch as Wasser z goh wells scho möglech wär das det enne es Krokodil uf ne Snack wartet. Eis gseh hemmer aber zom Glöck ned. Je nöcher das mer zo Guanacaste ond zo Hojancha cho send, desto trochner esch d Omgäbig ond desto wärmer esch d Loft worde. Ech ha scho die chli Vermuetig dass mer s 'chüele' San José scho gli werded vermesse. Lang esches nömme gange bis mer z Hojancha acho send. S Zentrum esch relativ chli ond öbersechtlech. Es gsed ned wahnsennig spektakulär us, aber trotzdem ganz härzig. Im Zentrum semmer aber noni ganz i eusem Dehei gsi. För das hemmer no öpe 4 Kilometer ufere Schotterstross de Hoger doruf müesse. De semmer z El Toledo acho. Das esch es chlises Hostel zmetzt ide Natur. Det hed de Emel scho uf eus gwartet. Er esch glaub so chli en Dorfberüemtheit wo öberall emmer debi esch. Onter anderem ghört ehm au El Toledo. Ond sis guete Netzwerk werd eus secher au bi de Recherche för d Masterarbet helfe. Chli spöter hemmer au de Pablo kenneglehrt. Er wohnt fix z El Toledo (soscht wohnt niemer do fix), sini Familie esch ursprönglech vo do ond er esch au scho ganz engagiert im Dorf. Aber er esch öpe i eusem Alter ond esch drom wie e rechtige Kolleg i eusere Groppe. Mer hend e chlini Tour do öbercho. Alles z erkläre esch glaub chli z lang, ech mache de einisch es chlises Video metere Tour. Aber es esch alles i allem sehr schön. D Isabel, d Marie ond ech hend zäme es Zimmer ond d Jungs hend eres eigete. Am Obe semmer no zom ne Ussechtsponkt. Det hed eus de Emel chli verzellt was mer alles öber d Gägend setted wösse. Ond mer hend de wonderschöni Sonneontergang agluegt. Am Horizont hed mer sogar s Meer gseh. Ech hoffe mer gönd no ab ond zue det ufe!Baca lagi

    Lihat terjemahan
  • PengembaraCosta Rica
    Hari 43

    Mer lehred Hojancha kenne

    17 Februari 2023, Costa Rica ⋅ 🌬 32 °C

    Euse ersti rechtig Tag z Hojancha esch rechtig voll packt gsi. Am halbi 7i am Morge hemmer eus alli troffe för en Spaziergang dor d Waldweg vo El Toledo. Öpe 300 Meter d Stross dorab heds e chline Wald wo schön zwäg gmachti Weg hed ond das alles ghört au zo El Toledo (wie det wo mer schlofed). Was speziell spannend gsi esch esch das mer hend chönne gseh wie alte ond neue Rägewald usgsehd. Costa Rica hed Metti 20. Johrhondert e riiesigi Abforstig gha ond hend denn aber öber die letzte paar Johrzähnt rechtig vell weder ufgforstet. Uf dem Weg wo mer gloffe send hed mer links gseh wie de Wald usgsed wo nie abgholzt worde esch ond rechts wie dä usgsehd wo relativ chörzlech weder ufgforstet worde esch. Aber ned nor das sondern au d Natur im Allgemeine esch rechtig beidrockend gsi. Die riesige Bäum, die velle Vögel, Liane, ond ond ond. Am Waldrand heds au no e Garte wo au zo El Toledo dezue ghört. Det wachsed Tomätli, Salot, Basilikum, Aubergine, Chilis ond wahrschindli no vell meh woni scho weder vergesse ha. Nochem Waldspaziergang hemmer Zmorge gno. Die erste zwöi Täg werd för eus gchoched wel mer relativ vell Programm hend. Natürlech heds ganz vell Costa Ricanischs Esse gäh (Riis ond Bohne, Platanos, Eier, ...). Gstärcht semmer denn Rechtig Dorf gfahre. Det hemmer e Termin im 'Oficina de la Mujer' gha. Das esch es Büro vom Kanton wo sech met Fraue beschäftig ond sie onterstötzt be erne Projekt (selbständig z werde etc.). Es esch rechtig spannend gsi z ghöre was sie alles möched, vor allem au was sie alles möched met de wenige Mittel wo sie zor Verfüegig hend. Im Aschloss semmer wiiter zo de Kaffikooperative vo Hojancha, Coopepilangosta. Det hed eus de Pablo e Tour gäh, er schafft det nämli. D Tour esch ähnlech gsi wie de letzt wo mer scho gmacht hend, aber es hed trotzdem gholfe alles chli besser z verstoh. Ond am schloss hemmer no es Kaffi-Tasting gmacht. Mer hend 3 verschednigi Sorte chönne degustiere ond müesse errote wele wele esch. De eint esch e ganz e spezielle gsi wo nochere gheime Art fermentiert werd. Er heisst Matambú, wie s indigene Volk wo in Hojancha wohnt. Vo dem werdi denn secher au es Päckli hei näh! Denoch esch au scho Ziit förs Zmittag gsi. För eus esch weder gchoched worde ond mer hend nor müesse he hocke. Am Nomittag semmer de no e chlini Farm go aluege wo e Frau Bio-Gmües ond Pilz abaut. Vor allem Pilz send do öpis ganz speziells ond werded eigentli chum gässe. Alles in allem esches e sehr spannende Tag gsi, aber au e sehr länge ond mer send froh gsi wo mer de endli is Bett hend chönne.Baca lagi

    Lihat terjemahan
  • PengembaraCosta Rica
    1
    Hari 45

    De ersti 'Dorfevent'

    19 Februari 2023, Costa Rica ⋅ 🌬 32 °C

    De Morge höt hemmer brucht zom chli entspanne ond eus vom volle Programm vo de letzte paar Täg z erhole. Nochem Mittag hemmer denn abgmacht dass eus e Kolleg vom Pablo abholt ond mer alli zäme uf Monte Alto gönd. Das esch s nöchste Dorf wemmer d Stross do wiiter de Berg doruf fahrt. Det esch das Wochenend nämli e chlini 'WM' gsi. Alli verschednige Dörfli ond Quartier vo de Omgäbig hend eres eigete Fuessballteam zämegstellt ond send gägenand atrette. Ond all die wo ned ufem Spielfeld azträffe gsi send send am Spielfeldrand gsi ond hend zuegluegt. Do hend mer natürli ned döffe fähle. Met eus hed öbrigens au e chline Hond zuegluegt. Kei normale Hond, sondern eine met gfärbte Ohre, das hemmer alli ez au zom erste Mol gseh! Insgesammt hemmer zwöi Speli gluegt. Bim zwöite hed de Pablo sogar spontan no metgspellt. Leider heds aber ned ganz glänged.. Länger blibe hemmer de aber nocher nömme welle. Sobald d Sonne onter gange esch esches nämli super chalt worde. Wel mer i de grösste Nomittagshetz gange send hemmer au alli natürli nüd warms debi gha. Aber ned schlemm, es chond secher weder einisch e Glägeheit wo mer bim ne Dorfevent chönd debi sii.Baca lagi

    Lihat terjemahan
  • 2024© FindPenguins
  • Utama
  • Mengenai kami
  • Blog
  • Penjejakan kumpulan
  • Akhbar
  • Terma
  • Privasi & Cookies
  • Sokongan
  • Cetakan
  • Melayu