SKANDINAVIEN 2022

July 2022 - March 2024
Mit mim umboute Büssli geits ab uf Skandinavie. Lofote isch eis Ziu, dr Rest wird sech ergä.
Currently traveling
  • 61footprints
  • 6countries
  • 614days
  • 754photos
  • 18videos
  • 8.4kkilometers
  • Day 1

    Packe, ufrume, abfahre

    July 24, 2022 in Germany ⋅ 🌙 23 °C

    Hüt isch dr Tag cho vor Abreis. Bevors het chönne losgah, hani aber no aues Startbereit müesse mache. Ufrume, aues ihpacke, Wasserkanister füue u Ihchoufe. Ca. am 3 bini losgfahre. Zersch mau zur Sabrina. Si isch mini Reisebegleterin für di nächste 2.5 Wuche. Mir hei ei Zwüschestopp uf dr Outobahn gmacht u hei üs ungrwegs e Standort zum Übernachte usegsuecht. Iz simr chli oberhaub vo Frankfurt ufemne Parkplatz am Strasserand. Zum zNacht hets Pasta mit Tomatesauce gä u gässe hei mr direkt us dr Pfanne. 🤪😂
    Gli geits iz Näst.
    See you tomorrow🥰
    Read more

  • Day 2

    Weiterfahrt, Shopping

    July 25, 2022 in Germany ⋅ ☁️ 17 °C

    Ja, mir ässe gern usem Pot.😂🤪 (de muess mä weniger abwäsche🤷🏽‍♀️)
    Hüt isch ni viu passiert. Vomne feine Müesli usem Pot, zur erste Ihweihig vor Trochetrenntoilette, zur Witrfahrt, zum Stou uf dr Outobahn (het gfüut au Kilometer e Bousteu), zumne kurze Zwüschestopp, zumne Shoppingusflug ir Ernst August Galerie, zur Witerfahrt dür Hamburg, zumne Zoom während dr Fahrt, zur Entleerig vom Grauwasser, zure rise Überschwemmig für d Wassertänk z füue, zumne neue Steuplatz imne schöne Park mitemne Tümpusee, zum ne zNacht im Pot. (Pasta usem Pot, Müesli usem Pot, Salat usem Pot, was ässe mr ech morn usem Pot?)Read more

  • Day 3

    Witrfahrt nach Dänemark

    July 26, 2022 in Denmark ⋅ ⛅ 16 °C

    Ufgstange, Kaffi kochet, Müesli usem Pot gesse (was schüsch), u no einisch ga Grauwasser lääre u Wasser üffüue vor dr Witrfahrt. D Fahrt isch gmüetlech gsi resp. uf dänischer Site scho fasch e chli längwilig im Vrglich zu Dütschland. Bim Zwüschestopp ah dr Raststätte ischs mega windig gsi. Mä merkts ds mr immer meh ih Norde chömme, es wird immer windiger u chäuter. Es paar Squats gmacht u no chli gstrecht vor dr Witrfahrt. Wiukomme in Dänemark. Mir mache in Kopehage no e Stopp u gö morn no ga d Stadt ahluege.
    Was gits ech zum zNacht? Klar isch... USEM POT🤪
    Read more

  • Day 4

    Koppenhagen, Witerfahrt nach Schweden

    July 27, 2022 in Sweden ⋅ ⛅ 12 °C

    Hüt heimr üs bi Niesurege ufe Weg gmacht nach Koppenhagen. Dr Zug heimr guet gfunge, si aber fasch ih di fausch Richtig gfahre. In Koppehage simr ines härzigs Resti ga zMörgele, womer lustigerwis 2 Schwizer troffe hei u dr ganz Morge hei mitne Plöiderlet. D Quintessenz vo üsem lange Gspräch "mir müesse aui meh uf üse Körper und Psyche luege, faht bir Ernährig ah u het eig ou kes Ändi". In Koppehage säubr isch z Highlight eig klar d Graffiti Wänd gsi, grägnet hets de zum Glück ner doch ni. U weder nech fraget wrum hets so viu Lüt ufem einte Foti (hei mr üs ou gfragt, bis mr e Ihheimische gfragt hei) si hei dr dänisch Tour de France Rennfahrer gfiiret, wo ja gwunne het. När simr de gli mau widr zrügg zum Camper u hei no e lustige 'Spiuplatz' (eig Fitnessplatz) gfunge, mit ihbouteTrampolin am Bode. Nachere fasch 4stündige Fahrt, emne ungerirdische Tunnel u dr Überquerig vor Puente de Øresund, wo gueti 60Euro hei kostet simr iz in Huskvarna ahcho, womer no e mega schöne Sunneungergang hei chönne gniesse. Und heeei, mir hei iz 2 Campingstüu und es Tischli, womer spontan no gfunge hei im ne Lade, wo mr nume ine si, wöu ig di fausch Outobahnusfahrt ha gno.
    Ps: Hüt hani widr müesse öbis flicke. Dank em mini 'Bohrer' und de Ersatzschrube sitzts iz widr bombefest.
    Read more

  • Day 5

    Ersti Duschi, Witrfahrt, Stockholm

    July 28, 2022 in Sweden ⋅ ⛅ 18 °C

    Hüt Morge hei mr di ersti ...chauti🥶... Outdoor Duschi gno. Brrrr, ja es isch chaut gsi. Aber iz simr früsch duschet. Nachemne Müesli u emne Kaffi ir schöne Sunne simr witrgfahre. Aso so schnäu wini ds iz gschribe ha, ischs ni gange. Am Morge hei mr mind. 2h bis mr parat si zum Witrfahre (Bett vrrume, Gepäck umrume, dusche, aues füre nä zum zMörgele, aues widr vrrume, etc.) Es brucht haut eifach sini Zyt im Camper. In Stockholm simr e churze Zwüschestopp ga mache u ner aber de gad witrgfahre. Ane wunderschöne Ort, womr widr e prachtvolle Sunneungrgang hei chönne gniesse. Köcherlet am Meer bimne wundervoue Sunneungrgang, ganz fridlech für üs allei. Eifach nume schön.Read more

  • Day 6

    Witrfahrt

    July 29, 2022 in Sweden ⋅ ⛅ 10 °C

    Hüt isch niso viu passiert. Mir hei dr Steuplatz vo letzt Nacht no richtig gnosse hüt morge. Hei zMörgelet, Yoga gmacht, tänzlet u dr Ort eifach so richtig gnosse. U Schwizer hei mr ou no troffe. Es isch wük witzig, aber mir chöi im hingerste Dörfli si u treffe geng widr Schwizer. Nach üsem Morgeritual simr no is Coop🤪 ga ihchoufe. Natürli es schwedisches coop... Ner simr 6.5h witrgfahre ih Norde. U di 'Outobahn' isch echt müesam gsi. Es het immer ca. e haube Kilometer 2 Bahne gha u ner ischs widr zu eire worde, drfür hets ner uf dr Gegefahrbahn 2 gha. Immer so abwechsligswis über 300km. Zudem hets öbe au 5 Kilometer e Blitzer gha mitere max. Gschwindigkeit vo 70km/h u ner hesch widr 110km/h chönne fahre. Gas gä, bremse, überhole u gad widr brämse, wöu "ACHTUNG ih 200m chunnt e Blitzer isch ahgschribe". Drfür simr ah richtig schöne Örtli vrbigfahre. Ah üsem neue Steuplatz simr ersch recht spät ahcho, wo mr lustigerwis widr Schwizer hei troffe. Hie hei mr no e Salat gmacht zum zNacht u di liebi Sabrina het Wasser gfiutert für morn. Iz no schnäu Tagebuech schribe u ner ab iz Bett.Read more

  • Day 7

    Norwege mir chömme

    July 30, 2022 in Norway ⋅ ⛅ 15 °C

    Öbe e drittu isch d "Outobahn" glich wi gester gsi. 110km/h, plötzlech e Blitzer und 70km/h. Di restleche 2/3 isch puuri Natur gsi, umd was für eini.😍 Mir hei hüt üse erst Elch gseh, naja um gnau z si 4. E wunderschöne häue, 2 wo z mitzt uf dr Gegefahrbahn si umegstouziert u e Junge. Fürnes Foti hets leider ni glängt. Nach ca. 8h Outofahrt simr in Narvik ahcho. Hie hei mr vrgeblech vrsuecht üses Früschwasser z füue, drfür simr amne richtig schöne Ussichtspunkt gsi. Hüt simr wük eifach houptsächlech Outo gfahre, aber mit emne hammer Usblick. Woooow. U zum zNacht hets es deluxe Curry gä. Zwar usem Pot, aber mir hei hüt z erste Mau wi Zivilisierti usem Teller gesse.🤪💪🏼
    Hei neeeei, iz isch scho widr haubi 12i u no so hell wi am 9i ir Schwiz. "Ds wird no zumne Problem, wes gent so hell isch um die Zyt, da bini aso ni parat für ga z schlafe."
    Read more

  • Day 8

    Narvikfjellet

    July 31, 2022 in Norway ⋅ ☁️ 12 °C

    Hüt simr ga 'wandere'. Aso mit dr Gondle uf d Bergstation u ner zum Turm ufegloffe, was no zimli ahstrengend isch gsi, wöus mega steil isch ufwärts gange. Dert obe hei mr d Ussicht so richtig gnosse. Womer dunge si gsi hei mr natürli widr Schwiizer troffe, womer dr ganz Abe mit ihne vrbracht hei. E mega härzigi Familie mit 2Giele und emne Baby. U e dütschi Familie mitemne Giu, si ou mit üs am Tisch gsi. Isch uh lustig gsi u e schöne Abe gsi, mitemne wunderschöne Sunneungrgang. Di Nacht blibe mr uf dem Camping, woni morn Morge de hoffentlech ou e warmi Duschi cha nä, für mi hets hüt nämli nüm glängt.Read more

  • Day 9

    Lofoten mir chömme

    August 1, 2022 in Norway ⋅ 🌧 10 °C

    Yeah, hüt ha ou ih mini warmi Duschi becho, ha aber müesse 20min warte bis dr Boiler widr Warmwasser het gha. Nach dr warme Duschi und emne delux zMorge, am nä mega schöne Plätzli, simr los uf d Lofote. Bimne churze Zwüschestopp amne mega schöne Plätzli, hani fasch mi Schueh vrlore. Gottseidank hani no es Foti fürs Tagebuech wöue mache, da isch mr nämli dr Schueh ufgfaue, wo da no am Bode ligt. Heis de dch no beidi Schueh widr mitgschafft. Ide Lofote hei mr besser Wetter gha, aus aui gseit hei. Das aber am Abe Rege gmäudet het, hei mr üs ner schneu es Plätzli füre Rest vom Tag gsuecht. Zersch ufem Camping, womer zwar hätte chönne Wäsche, aber ds isch üs z tüür und z luxuriös gsi. Darum simr witr u hei üses Glück vrsuecht in dem mir eifach chli umegfahre si u nachemne Plätzli hei usschou ghaute. Da simr sones engs Strässli hingere, wo mr amne Outo si usgwiche wo mr fasch ih Grabe si gheit. Aso mir si wüüük eifach gad ar Kante no gsi. Mit 4 nette Norweger u dr Sab wo z Outo hei gstosse u ih, wo vougas ha gä, simr de doch no usem Grabe usecho. Glück gha.🥵 (es het nämli eifach nur no gspuelet z vordere Rad u mir wäre allei äuä num usecho) Aso dem womer usgwiche si, dä isch vo allei widr umkehrt u üs cho häufe, dä isch äuä so ufmerksam gsi, dser gseh het, ds mir irgendwie si blibe stecke. Mersi tuusig. Ner hei mr es schöns, ruhigs Plätzli gfunge gha, näb paar Dütsche. Di bini no ga frage, ob mr hie dörfe 'Campe' u si hei gseit klar. Nachmene feine zNacht (mir hei Wraps gmacht) womer iz endlech mau hei d Drehsitzkonsole brucht, simr parat gsi für üse wüchentlech Mäntizoom scho richtig ir stimmig fürne gmüetleche Abe. Isch ner aber e eher weniger nette Norweger ar Türe cho chlopfe u het üs druf hiigwise, ds mr hie ni dörfe 'Campe'. Naja, higwise isch biz z nett usdrückt, er het nüm wöue gah, bevor mir ni si gange. De heimr üs haut ufe Weg gmacht zumne neue Plätzli.. Iz leider im Rege. Hei de ou eis gfunge, es wunderschöns, isch aber voller Touriste. Naja isch glich, e gmüetleche Abe mitemne Brandy Dog und emne Videoahruef id Schwiz hei mr de doch no gha.
    Guet Nacht sägi ah derä Steu. Dusse ischs geng no so hell, wi am 9i ir Schwiz.
    Ps: d Sab list mr jede Tag usemne Büechli 2 Site vor, mit Erkentnisse vom Lebe vom John Strelecky.
    Read more

  • Day 10

    Henningsvaer

    August 2, 2022 in Norway ⋅ ⛅ 10 °C

    Hüt Morge si mr ganz lang im Bett blibe lige. Es het üs eifach e biz ahgschnäggelet aues vo gester widr müesse z vruume, aso ischs gmüetlecher gsi, eifach im Bett z blibe lige.🤭 Nach dem mr endlech si ufgstange simr ab iz chaute Meer ghüpft, bi 12° Ussetemperatur. Brrr, isch ds chaut gsi. Nachemne gmüetleche zMorge simr ab uf Henningsvaer. Pumpevoll ischs gsi dert, klaaar isch ja Tourisasion. Aber was ou no drzue chunnt, heimr ner später erfahre, ds am 1-3Ougust es Festival stattfindet, di Junge hei üs au gfragt, chömmet dir as Festival? U mir hei natürli nimau gwüsst, dses eis git. Dür ds mega härzige Städtli hei mr öbe 2h gha, wöus eifach so viu süessi Lädeli het gha. Si so gar ni vom Fläck cho.🤪 Aso Hennigsvaer isch wüük mega schön, da hets üs mega gfaue. Ungerwegs für ah Vik Beach, hei mr no e Autostöppler mitgno. De isch mit üs ner fasch 1h Stung mitgfahre, ds isch no lustig gsi. Mir hei ihn ner abgsteut u si üs ner es Plätzli für zum Schlafe ga sueche. Mir hei zwar eis gfunge, lige aber für einisch mau e chli schräg, drfür ischs mega schön hie. Pasta usem Pot hets hüt für üs gä, u da bini mind. 1h dranne gsi zum Choche, es het irgendwie gad niso wöue chöcherle. Iz lö mr no dr Abe la usklinge u gö de ner mau is Bett.Read more