Zentral- und Südamerika

Nach Caye Caulker hei mir Belize verlah u si när witers greist nach Bacalar in Mexico. Isch houptsächlech bekannt für die wunderschöni Süsswasser Lagunä😄 Abr z Städtli isch süsch nüt speziells, würkt sehr verschlafe. Mir hei da ä Segeltrip buechet. Da heisi üs gseit, es sig wunderschön (isches ja o) und chli umweltfründlecher wöu mä ja duet seglä - Fakt isch, mir si öpe 3/4 vom Weg nume mitem Motor gfahre und gsäglet würkli nume ä chliini Strecki. Abr drfür isch z Bier guet gsi und d Lagunä zum Bade zimmli nice😜🍺

Anschliessend si mir witers uf Tulum. Das isch 2-3h entfernt vo Bacalar. Tulum isch bekannt für ihri Cenote. Die Cenote gseh us wie grossi Löcher gfüllt mit Süsswasser. In Würklechkeit sis grossi Kavernen us Kalkstei, die dür dä Meteoriten Einschlag vor der mexikanische Halbinsle Yucatan si entstande vor rund 66 Millionen Jahr. Wäge däm Einschlag hets töifi, ungerirdischi Vertiefige gä. Das Ungerwasserhöhlesystem isch witlöifig und die Cenotes si zum Teil mitenang verbunde.
Mir si da natürli ga touche - woow, eifach wunderschön, faszinierend und überwäutigend! Es isch dunku gsi, hei abr ä Taschenlampe gha und zum Teil het z Tagesliecht düregschimmeret und de hei mir gseh was sech aus i däm spannende Höhlesystem befindet😄🙌🏼 Leider hei mir vo däm kener eigete Fotis, abr hei glich eis als Beispiel usem Internet ufeglade vo üsere Cenote „Dos Ojos“💦

Ja när isch no erschtä Auguscht gsi u dä hei mir natürli ono gfiiret. (Für die wo nid Schwizer si u das läse, am 1. Auguscht isch Nationalfiirtag vor Schwiz) 🇨🇭 Sam het ja äxtra d Schwizer Fahne mitgno 🤩 Wie es der „Reiner Zufall“ het wöue, si mir i däm Hostel genau denn a zwe Schwizer häre glüffe. (U vorher sit Wuchene kener Schwizer meh troffe ungerwegs) Uf jedefau häts so söue si, dass mir z viert hei chönne 1. Auguscht fiire und sogar drzue hei chönne jasse mitem nä feinä Bierli😜 Was wosch no meh🙌🏼 Und ja, ds cha o nid mänge säge, er heig dr 1. Auguscht gfiiret in Mexico u drzue no gjasset😂🇨🇭Meer informatie