- Show trip
- Add to bucket listRemove from bucket list
- Share
- Dec 15, 2023, 12:50pm
- ☀️ 12 °C
- Altitude: 605 m
- SpainMadridBarajasMadrid–Barajas Airport40°29’29” N 3°35’27” W
Adios 🇪🇨 y Grüezi 🇨🇭
December 15, 2023 in Spain ⋅ ☀️ 12 °C
Miteme vollpackte Koffer mit vielne schöne Erlebnis (ja han sogar no en Koffer müesse chaufe will nid alles Platz ka het) gahts zrugg i die chalt Schwiiz 😊 leider isch das schöne Kapitel z'end aber ich bin so dankbar, dass ich die Chance becho ha und das Privileg han so e unvergesslichi Reis derfe zmache. All die schöne Erlebnis, die neue Fründschafte und Iiblick hend mich sehr beriicheret und ich ha viel über anderi Kulturen derfe lerne. Leider bin ich i de letzte Wuche nüme wüki zum schriibe cho aber es Isch eifach so viel loos gsi und am abig bin ich jeweils zmüed gsi und meistens relativ früh go schlafe. Aber zum Schluss machi gern en chliine Rückblick - Disfruta 😀
Ich bin es paar mal gfreged worde, was miis Highlite gsi isch und ich ha jedesmal die gliich Antwort gä: es Isch schwierig öppis usezpicke will jedes Kapitel uf minere Reis öppis wunderschönes und einmaligs gsi isch. Agfange hets mit de Gruppereis durch Zentralamerika. Es fühlt sich so a als wär's scho ewigs her und trotzdem weni zruggdenke wird's mer warm ums Herz. Ich ha uf dere Gruppereis derfe e supertolli neui Kollegin us Ireland kennelerne und mir sind au jetzt no regelmässig in Kontakt. Ich hoffe e Fründschaft wo ewig halte wird Au wemer nid im gliiche Land lebed. Aber dass das gaht, weiss ich, siit ich dMarianna kennengelernt ha🥰 Usserdem mag ich mich erinnere das El Salvador als "sehr gfährllich" gulte het und ich chan nur säge es lohnt sich ufjedefall i die Kultur dete iztauche. Und I de letzte 2 Jahr isches eidütig sicherer worde! Die Gschicht von dem Land isch so spannend und mer erfahrt mehr über Wahrheite direkt vo de indigene Völker dete als vo de News....
Miis nächste Reiseziel Isch denn Kolumbien bzw. Cartagena und Spanischschuel und Gastfamilie gsi. Innerhalb vo 3 Wuche hani es neuis dihei ka. DSprachschuel Isch unglaublich familiär gsi, mir hend nebede Schuel viel tolli Aktivitäte unterno wie kolumbianisches esse choche, Salsa tanzen oder Karaoke mit spanisch Songs. Au sLebe mitere kolumbianische Familie isch sehr spannend gsi, ha viel über dKolumbianerinne derfe erfahre, kolumbianische Spezialitäte chöne probiere und miis Spanisch chöne verbessere (Au wens dete sehr schnell redet). Es Isch erstuunlich wie viel Fortschritt mer i nur 3 Wuche macht und vo praktisch kei Spanisch "una cerveza por favor" am endi e basic Konversation mit iheimische cha füehre (Au weni kei ziitforme cha😅). Es Isch ufallfall sehr wertvoll gsi bin reise sich einigermasse chöne uf spanisch unterhalte und de Kontext zverstah. Au weni im nachhinein denke wär's besser 2-3 Monet intensiv spanisch zlerne zum wüki chöne rede. Aber ha sehr viel spannendi unterhaltige während UBER Fahrte, i Cafis und uf Wanderige ka und das isch für mich s'Wichtigste 😊
Nach dene 3 Wuche bini denn wüki s'erste Mal meh oder weniger uf mich allei gstellt gsi. Zum Glück Isch e Dütschi gliichziitig mit de Schuel fertig gsi und mer sind no es paar Täg zäme wiiter. Wege minere Hornhutentzündig bini grad froh gsi. Leider hani ufgrund vo dem nid chöne de "Lost City Trekk" mache aber weni öppis glernt ha uf dere Reise, mer cha nid alles mache und gseh😄. In Medellin hani denn chöne mit em Beachsoccer Team von dete mittrainiere, was nach 5 Monet praktisch kein Ball am Fuess, sehr herausfordernd gsi Isch, aber au es einmaligs Erlebnis. Anschlüssend hani denn endli mal chli chöne id Berge und wandere, wasi sehr vermisst ha. Uf dere Reis Isch mir au einmal mehr klar worde, dass Grossstädt nid so miis Isch und ich lieber i chliniere Dörfli bin woni mi frei und ohni Angst cha bewege. Ich han mich mängisch i de Grossstädt fast chli igschlosse gfühlt.
Dasi ehemalige Mitstudentin vom Bachelor per Zufall atroffe ha Isch au unvergesslich. Isch schön gsi mit ihre chli i de Natur zsi und sich über die 3 Jahr womer sich nid gseh het ustuusche.
Au Salento hetmer mega gfalle, vor allem de 3tages Trekk, isch eifach de Hammer gsi! Die gmüetlichen Abige nachere 6-8h Wanderige i denen Familiefarms mit frischem kolumbianischem Esse bliibed mir no lang in Erinnerig. Ich wär dete no gern länger bliibe!
Cali het mer denn weniger gfalle und ich bi dete wüki nur wegem Salsa hi und will de Kolleg woni in Medellin kennengelernt ha, dete gsi isch. Ich ha mich dete eifach nid wohl gfühlt und eig schnellstmöglich wieder wele gha. Aber für mini Salsakenntniss isches trotzdem wertvoll gsi😁 ich bin denn sogar zur Salsalehrerin ufgstiige - meh dezue später im Teil zu Quito-😉
Tatacoa Wüesti het sich au mega glohnt, so öppis hani nonie gseh und isch au chli abentüürlich gsi will mer euis i de Wüesti fast verlore hend😅
Nach 7 Wuche in Kolumbien isch miis Abentüür denn in Equador wiitergange. Fazit Kolumbien: ich chan das Land jedem nur empfehlen! dlüüt sind unglaublich nett und hilfsbereit! Es Isch so abwechslungsreich mit de Ande, mitem Meer und em Regenwald.. sEsse Isch im allgemeinen au sehr guet, eifach viel frittiert😄
Nachdem ich zerst chli unsicher gsi bi öbi wüki nach Equador söll gha, willi vo vielne ghört ha dases momentan nid so sicher Isch, bini froh gsi, dasi gange bin es het sich meh als glohnt! In Quito uf de Free Walking Tour bini die einzig gsi wo Salsakenntniss kha het (ufallfall h nur ich mini Hand ufgstreckt wo de Guide gfreged het) und drum han ich denn de ganze Gruppe dBasic vom Salsa müesse beibringe😅💃)..
De Cotopaxi Nationalpark Isch unglaublich gsi und ich ha s uf fast 5000 Höhenmeter gschafft. Denn bini spontan wiiter und ha de Quilotoa Loop gmacht. Vo dem hani erst in Cotopaxi erfahre. Es isch e spannendi Erfahrig gsi, da ich fast ufem gsamte Weg niemerd atroffe ha. Uf de einte siite hani das mega gnosse, mal wieder chli ziit für mich zha und über alles erlebte nazdenke, uf de andere siite hets au sehr viel Muet bruucht. Wege de vielne Hünd wo's ufem weg ka het und will dWeg teilwiis nid so guet kennzeichnet gsi sind, wie mer sich i de schwiiz gwohnt isch. Au wenn de weg als sehr sicher gulte het, hani biz Respekt ka. Aber es het sich definitiv glohnt. Und zum Schluss denn miis Abentüür in de Galapagos!! Es het sich für mich so unreal agfühlt, als wär ich imne Doku Film. So nöch bi de Tier zsi Isch eifach es unglaublichs Glück und sehr bewegend gsi. Mitem Grüsch vo "bellende" Seehünd am Morge ufwache, isch 1000mal besser als miteme Wecker. Ich bi dankbar für all die Menschen woni uf dere Reis ha chöne kennelerne und die schöne Moment ha chöne teile❤️
Mini Reis Isch öppis wom schönschte gsi woni bis jetzt gmacht ha i mim lebe. Freuie mich jetzt uf mini Familie und die schön wiehnachtsziit und denn gahts scho bald wiiter nach Norwege🤩
Ps: Han sponti es Business Upgrade gmacht und de 5h ufenthalt in Madrid i de Lounge im volle Masse usgnutzt (so viel Esse und Trinke wiemer will🤩) trotzdem hets denn nur miin Koffer mit de Souvenirs nach Züri geschafft😅Read more
Traveler Danke liebi Sarah, für dini bewegendi Zämefassig, hät mi grad sehr berüert und bi grad nomal mit dir "iitaucht", i dini Erlebniss🙏😊, danke 1000 fürs Teile 🫶
Traveler Danke😊❤️ Han au biz Träne i de Auge ka woni im Flugzüg agfange ha schriibe😌 aber gliichziitig Au mega Vorfreuid zum eui all wieder gseh😊
Traveler Ja das glaubi, chani guet nahfühle... so echli Wehmuet und Vorfreud mitenand 😌